१. कम्मनिरोधसुत्तवण्णना

1. Kammanirodhasuttavaṇṇanā

१४६. सम्पति विज्‍जमानस्स चक्खुस्स तंनिब्बत्तस्स कम्मस्स च अधिप्पेतत्ता ‘‘न चक्खु पुराणं, कम्ममेव पुराण’’न्ति वत्वा यथा तस्स चक्खुस्स पुराणपरियायो वुत्तो, तं दस्सेन्तो आह – ‘‘कम्मतो पना’’तिआदि। पच्‍चयनामेनाति पुरिमजातिसंसिद्धत्ता ‘‘पुराण’’न्ति वत्तब्बस्स पच्‍चयभूतस्स कम्मस्स नामेन। एवं वुत्तन्ति ‘‘पुराणकम्म’’न्ति एवं वुत्तं। पच्‍चयेहि अभिसमागन्त्वा कतन्ति तण्हाविज्‍जादिपच्‍चयेहि अभिमुखभावेन समागन्त्वा समेच्‍च निब्बत्तितं। चेतनायाति कम्मचेतनाय। पकप्पितन्ति अभिसमीहितं। वेदनायाति अत्तानं निस्साय आरम्मणं कत्वा पवत्ताय वेदनाय। वत्थूति निब्बत्तिकारणं पवत्तट्ठानन्ति विपस्सनापञ्‍ञाय पस्सितब्बं। कम्मस्स निरोधेनाति किलेसानं अनुप्पादनिरोधसिद्धेन कम्मस्स निरोधेन। विमुत्तिं फुसतीति अरहत्तफलविमुत्तिं पापुणाति। आरम्मणभूतो निरोधो निब्बानं ‘‘कम्मनिरोधो’’ति वुच्‍चति, ‘‘कम्मं निरुज्झति एत्था’’ति कत्वा। ‘‘झायथ, भिक्खवे, मा पमादत्था’’ति वुत्तत्ता ‘‘पुब्बभागविपस्सना कथिता’’ति वुत्तं।

146. Sampati vijjamānassa cakkhussa taṃnibbattassa kammassa ca adhippetattā ‘‘na cakkhu purāṇaṃ, kammameva purāṇa’’nti vatvā yathā tassa cakkhussa purāṇapariyāyo vutto, taṃ dassento āha – ‘‘kammato panā’’tiādi. Paccayanāmenāti purimajātisaṃsiddhattā ‘‘purāṇa’’nti vattabbassa paccayabhūtassa kammassa nāmena. Evaṃ vuttanti ‘‘purāṇakamma’’nti evaṃ vuttaṃ. Paccayehi abhisamāgantvā katanti taṇhāvijjādipaccayehi abhimukhabhāvena samāgantvā samecca nibbattitaṃ. Cetanāyāti kammacetanāya. Pakappitanti abhisamīhitaṃ. Vedanāyāti attānaṃ nissāya ārammaṇaṃ katvā pavattāya vedanāya. Vatthūti nibbattikāraṇaṃ pavattaṭṭhānanti vipassanāpaññāya passitabbaṃ. Kammassa nirodhenāti kilesānaṃ anuppādanirodhasiddhena kammassa nirodhena. Vimuttiṃ phusatīti arahattaphalavimuttiṃ pāpuṇāti. Ārammaṇabhūto nirodho nibbānaṃ ‘‘kammanirodho’’ti vuccati, ‘‘kammaṃ nirujjhati etthā’’ti katvā. ‘‘Jhāyatha, bhikkhave, mā pamādatthā’’ti vuttattā ‘‘pubbabhāgavipassanā kathitā’’ti vuttaṃ.

कम्मनिरोधसुत्तवण्णना निट्ठिता।

Kammanirodhasuttavaṇṇanā niṭṭhitā.

Next: २-५. अनिच्‍चनिब्बानसप्पायसुत्तादिवण्णना • 2-5. Aniccanibbānasappāyasuttādivaṇṇanā

Related texts:

तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / १. कम्मनिरोधसुत्तं • 1. Kammanirodhasuttaṃ

अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १. कम्मनिरोधसुत्तवण्णना • 1. Kammanirodhasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact