| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৭. কম্মন্তসুত্তং
7. Kammantasuttaṃ
১২০. ‘‘তিস্সো ইমা, ভিক্খৰে, ৰিপত্তিযো। কতমা তিস্সো? কম্মন্তৰিপত্তি, আজীৰৰিপত্তি, দিট্ঠিৰিপত্তি। কতমা চ, ভিক্খৰে, কম্মন্তৰিপত্তি? ইধ, ভিক্খৰে, একচ্চো পাণাতিপাতী হোতি…পে॰… সম্ফপ্পলাপী হোতি । অযং ৰুচ্চতি, ভিক্খৰে, কম্মন্তৰিপত্তি।
120. ‘‘Tisso imā, bhikkhave, vipattiyo. Katamā tisso? Kammantavipatti, ājīvavipatti, diṭṭhivipatti. Katamā ca, bhikkhave, kammantavipatti? Idha, bhikkhave, ekacco pāṇātipātī hoti…pe… samphappalāpī hoti . Ayaṃ vuccati, bhikkhave, kammantavipatti.
‘‘কতমা চ, ভিক্খৰে, আজীৰৰিপত্তি? ইধ, ভিক্খৰে, একচ্চো মিচ্ছাআজীৰো হোতি, মিচ্ছাআজীৰেন জীৰিকং 1 কপ্পেতি। অযং ৰুচ্চতি, ভিক্খৰে, আজীৰৰিপত্তি।
‘‘Katamā ca, bhikkhave, ājīvavipatti? Idha, bhikkhave, ekacco micchāājīvo hoti, micchāājīvena jīvikaṃ 2 kappeti. Ayaṃ vuccati, bhikkhave, ājīvavipatti.
‘‘কতমা চ, ভিক্খৰে, দিট্ঠিৰিপত্তি? ইধ , ভিক্খৰে, একচ্চো মিচ্ছাদিট্ঠিকো হোতি ৰিপরীতদস্সনো – ‘নত্থি দিন্নং, নত্থি যিট্ঠং…পে॰… যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’তি। অযং ৰুচ্চতি, ভিক্খৰে, দিট্ঠিৰিপত্তি। ইমা খো, ভিক্খৰে, তিস্সো ৰিপত্তিযোতি।
‘‘Katamā ca, bhikkhave, diṭṭhivipatti? Idha , bhikkhave, ekacco micchādiṭṭhiko hoti viparītadassano – ‘natthi dinnaṃ, natthi yiṭṭhaṃ…pe… ye imañca lokaṃ parañca lokaṃ sayaṃ abhiññā sacchikatvā pavedentī’ti. Ayaṃ vuccati, bhikkhave, diṭṭhivipatti. Imā kho, bhikkhave, tisso vipattiyoti.
‘‘তিস্সো ইমা, ভিক্খৰে, সম্পদা। কতমা তিস্সো? কম্মন্তসম্পদা, আজীৰসম্পদা, দিট্ঠিসম্পদা। কতমা চ, ভিক্খৰে, কম্মন্তসম্পদা? ইধ, ভিক্খৰে, একচ্চো পাণাতিপাতা পটিৰিরতো হোতি…পে॰… সম্ফপ্পলাপা পটিৰিরতো হোতি। অযং ৰুচ্চতি, ভিক্খৰে, কম্মন্তসম্পদা।
‘‘Tisso imā, bhikkhave, sampadā. Katamā tisso? Kammantasampadā, ājīvasampadā, diṭṭhisampadā. Katamā ca, bhikkhave, kammantasampadā? Idha, bhikkhave, ekacco pāṇātipātā paṭivirato hoti…pe… samphappalāpā paṭivirato hoti. Ayaṃ vuccati, bhikkhave, kammantasampadā.
‘‘কতমা চ, ভিক্খৰে, আজীৰসম্পদা? ইধ, ভিক্খৰে, একচ্চো সম্মাআজীৰো হোতি, সম্মাআজীৰেন জীৰিকং কপ্পেতি। অযং ৰুচ্চতি, ভিক্খৰে, আজীৰসম্পদা।
‘‘Katamā ca, bhikkhave, ājīvasampadā? Idha, bhikkhave, ekacco sammāājīvo hoti, sammāājīvena jīvikaṃ kappeti. Ayaṃ vuccati, bhikkhave, ājīvasampadā.
‘‘কতমা চ, ভিক্খৰে, দিট্ঠিসম্পদা? ইধ, ভিক্খৰে, একচ্চো সম্মাদিট্ঠিকো হোতি অৰিপরীতদস্সনো – ‘অত্থি দিন্নং, অত্থি যিট্ঠং…পে॰… যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’তি। অযং ৰুচ্চতি, ভিক্খৰে, দিট্ঠিসম্পদা। ইমা খো, ভিক্খৰে, তিস্সো সম্পদা’’তি। সত্তমং।
‘‘Katamā ca, bhikkhave, diṭṭhisampadā? Idha, bhikkhave, ekacco sammādiṭṭhiko hoti aviparītadassano – ‘atthi dinnaṃ, atthi yiṭṭhaṃ…pe… ye imañca lokaṃ parañca lokaṃ sayaṃ abhiññā sacchikatvā pavedentī’ti. Ayaṃ vuccati, bhikkhave, diṭṭhisampadā. Imā kho, bhikkhave, tisso sampadā’’ti. Sattamaṃ.
Footnotes:
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৬-৭. অপণ্ণকসুত্তাদিৰণ্ণনা • 6-7. Apaṇṇakasuttādivaṇṇanā
