| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
7. කම්‌මන්‌තසුත්‌තං
7. Kammantasuttaṃ
120. ‘‘තිස්‌සො ඉමා, භික්‌ඛවෙ, විපත්‌තියො. කතමා තිස්‌සො? කම්‌මන්‌තවිපත්‌ති, ආජීවවිපත්‌ති, දිට්‌ඨිවිපත්‌ති. කතමා ච, භික්‌ඛවෙ, කම්‌මන්‌තවිපත්‌ති? ඉධ, භික්‌ඛවෙ, එකච්‌චො පාණාතිපාතී හොති…පෙ.… සම්‌ඵප්‌පලාපී හොති . අයං වුච්‌චති, භික්‌ඛවෙ, කම්‌මන්‌තවිපත්‌ති.
120. ‘‘Tisso imā, bhikkhave, vipattiyo. Katamā tisso? Kammantavipatti, ājīvavipatti, diṭṭhivipatti. Katamā ca, bhikkhave, kammantavipatti? Idha, bhikkhave, ekacco pāṇātipātī hoti…pe… samphappalāpī hoti . Ayaṃ vuccati, bhikkhave, kammantavipatti.
‘‘කතමා ච, භික්‌ඛවෙ, ආජීවවිපත්‌ති? ඉධ, භික්‌ඛවෙ, එකච්‌චො මිච්‌ඡාආජීවො හොති, මිච්‌ඡාආජීවෙන ජීවිකං 1 කප්‌පෙති. අයං වුච්‌චති, භික්‌ඛවෙ, ආජීවවිපත්‌ති.
‘‘Katamā ca, bhikkhave, ājīvavipatti? Idha, bhikkhave, ekacco micchāājīvo hoti, micchāājīvena jīvikaṃ 2 kappeti. Ayaṃ vuccati, bhikkhave, ājīvavipatti.
‘‘කතමා ච, භික්‌ඛවෙ, දිට්‌ඨිවිපත්‌ති? ඉධ , භික්‌ඛවෙ, එකච්‌චො මිච්‌ඡාදිට්‌ඨිකො හොති විපරීතදස්‌සනො – ‘නත්‌ථි දින්‌නං, නත්‌ථි යිට්‌ඨං…පෙ.… යෙ ඉමඤ්‌ච ලොකං පරඤ්‌ච ලොකං සයං අභිඤ්‌ඤා සච්‌ඡිකත්‌වා පවෙදෙන්‌තී’ති. අයං වුච්‌චති, භික්‌ඛවෙ, දිට්‌ඨිවිපත්‌ති. ඉමා ඛො, භික්‌ඛවෙ, තිස්‌සො විපත්‌තියොති.
‘‘Katamā ca, bhikkhave, diṭṭhivipatti? Idha , bhikkhave, ekacco micchādiṭṭhiko hoti viparītadassano – ‘natthi dinnaṃ, natthi yiṭṭhaṃ…pe… ye imañca lokaṃ parañca lokaṃ sayaṃ abhiññā sacchikatvā pavedentī’ti. Ayaṃ vuccati, bhikkhave, diṭṭhivipatti. Imā kho, bhikkhave, tisso vipattiyoti.
‘‘තිස්‌සො ඉමා, භික්‌ඛවෙ, සම්‌පදා. කතමා තිස්‌සො? කම්‌මන්‌තසම්‌පදා, ආජීවසම්‌පදා, දිට්‌ඨිසම්‌පදා. කතමා ච, භික්‌ඛවෙ, කම්‌මන්‌තසම්‌පදා? ඉධ, භික්‌ඛවෙ, එකච්‌චො පාණාතිපාතා පටිවිරතො හොති…පෙ.… සම්‌ඵප්‌පලාපා පටිවිරතො හොති. අයං වුච්‌චති, භික්‌ඛවෙ, කම්‌මන්‌තසම්‌පදා.
‘‘Tisso imā, bhikkhave, sampadā. Katamā tisso? Kammantasampadā, ājīvasampadā, diṭṭhisampadā. Katamā ca, bhikkhave, kammantasampadā? Idha, bhikkhave, ekacco pāṇātipātā paṭivirato hoti…pe… samphappalāpā paṭivirato hoti. Ayaṃ vuccati, bhikkhave, kammantasampadā.
‘‘කතමා ච, භික්‌ඛවෙ, ආජීවසම්‌පදා? ඉධ, භික්‌ඛවෙ, එකච්‌චො සම්‌මාආජීවො හොති, සම්‌මාආජීවෙන ජීවිකං කප්‌පෙති. අයං වුච්‌චති, භික්‌ඛවෙ, ආජීවසම්‌පදා.
‘‘Katamā ca, bhikkhave, ājīvasampadā? Idha, bhikkhave, ekacco sammāājīvo hoti, sammāājīvena jīvikaṃ kappeti. Ayaṃ vuccati, bhikkhave, ājīvasampadā.
‘‘කතමා ච, භික්‌ඛවෙ, දිට්‌ඨිසම්‌පදා? ඉධ, භික්‌ඛවෙ, එකච්‌චො සම්‌මාදිට්‌ඨිකො හොති අවිපරීතදස්‌සනො – ‘අත්‌ථි දින්‌නං, අත්‌ථි යිට්‌ඨං…පෙ.… යෙ ඉමඤ්‌ච ලොකං පරඤ්‌ච ලොකං සයං අභිඤ්‌ඤා සච්‌ඡිකත්‌වා පවෙදෙන්‌තී’ති. අයං වුච්‌චති, භික්‌ඛවෙ, දිට්‌ඨිසම්‌පදා. ඉමා ඛො, භික්‌ඛවෙ, තිස්‌සො සම්‌පදා’’ති. සත්‌තමං.
‘‘Katamā ca, bhikkhave, diṭṭhisampadā? Idha, bhikkhave, ekacco sammādiṭṭhiko hoti aviparītadassano – ‘atthi dinnaṃ, atthi yiṭṭhaṃ…pe… ye imañca lokaṃ parañca lokaṃ sayaṃ abhiññā sacchikatvā pavedentī’ti. Ayaṃ vuccati, bhikkhave, diṭṭhisampadā. Imā kho, bhikkhave, tisso sampadā’’ti. Sattamaṃ.
Footnotes:
Related texts:
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6-7. අපණ්‌ණකසුත්‌තාදිවණ්‌ණනා • 6-7. Apaṇṇakasuttādivaṇṇanā
