| Library / Tipiṭaka / д̇ибидага • Tipiṭaka / д̇хаммасан̇г̇ан̣ий-анудийгаа • Dhammasaṅgaṇī-anuṭīkā |
гаммабат̇асам̣санд̣̇анагат̇ааван̣н̣анаа
Kammapathasaṃsandanakathāvaṇṇanā
д̇ат̇аад̇и гаммабат̇аббад̇д̇аанам̣. гзжийд̇и д̇хаммасирид̇т̇зрам̣ санд̇хааяааха. со хи гаммабат̇аббад̇д̇аанамзва д̣̇уссийляаад̣̇ийнам̣ сусийляаад̣̇ийнан̃жа гаммабат̇зхи ад̇т̇ад̇о наанад̇д̇аабхаавад̣̇ассанам̣, д̇зсам̣ ваа пассад̣̇ваараад̣̇ийхи авирод̇хабхаавзна д̣̇ийбанам̣ гаммабат̇асам̣санд̣̇ананд̇и вад̣̇ад̇и. гаммабат̇ад̇аа над̇т̇ийд̇и зд̇зна яат̇аавуд̇д̇аанам̣ асам̣варасам̣вараанам̣ д̇зсам̣ ваад̣̇з гаммабат̇асам̣санд̣̇анз асан̇г̇ахид̇ад̇ам̣ д̣̇ассзд̇и. яз бана сан̇г̇ахам̣ лабханд̇и, д̇зсам̣ г̇ахан̣з баяож̇анаабхаавам̣ д̣̇ассзд̇ум̣ ‘‘д̇ивид̇ха…бз… д̣̇ассанзнаа’’д̇и вуд̇д̇ам̣. звам̣ буримабагкз сан̇кзбад̇о д̣̇осам̣ вад̇ваа д̣̇уд̇ияабагкзби вад̇д̇ум̣ ‘‘на жа д̣̇ужжарид̇аана’’нд̇иаад̣̇имааха. д̇зна яз д̣̇ужжарид̇асужарид̇аасам̣варасам̣вараа анужарийяанд̇и, д̇зсам̣ гааяагаммаад̣̇ид̇аа вид̇хийяад̇ийд̇и д̣̇ассзд̇и. ‘‘бан̃жапассад̣̇вааравасзна уббанно асам̣варо агусалам̣ маногаммамзва ход̇ий’’д̇иаад̣̇инаа хи вуд̇д̇анд̇и. яад̣̇и жаад̇иаад̣̇инаа анавасзсабарияаад̣̇аанаабхаавамааха. уббад̇д̇и на вад̇д̇аб̣б̣аад̇и гаммабат̇а…бз… вад̣̇анд̇зхи ‘‘маногаммам̣ чапассад̣̇вааравасзна уббаж̇ж̇ад̇ий’’д̇и на вад̇д̇аб̣б̣анд̇и ад̇т̇о. ат̇а ваа яад̣̇и гаммабат̇аббад̇д̇аанзва д̣̇уссийляаад̣̇ийни гааяагаммаад̣̇инаамзхи адтагат̇ааяам̣ вуд̇д̇аанийд̇и звам̣ вад̣̇анд̇зхи адтагат̇аажариязхи маногаммасса чапассад̣̇вааравасзна уббад̇д̇и на вад̇д̇аб̣б̣аад̇и ад̇т̇о. д̇ам̣д̇ам̣гаммабхаавасса вуд̇д̇ад̇д̇аад̇и ‘‘д̇ивид̇хам̣ гааяад̣̇ужжарид̇ам̣ агусалам̣ гааяагаммамзва ход̇ий’’д̇иаад̣̇им̣ (вибха. 913) санд̇хааяааха.
Tathāti kammapathappattānaṃ. Kecīti dhammasirittheraṃ sandhāyāha. So hi kammapathappattānameva dussīlyādīnaṃ susīlyādīnañca kammapathehi atthato nānattābhāvadassanaṃ, tesaṃ vā phassadvārādīhi avirodhabhāvena dīpanaṃ kammapathasaṃsandananti vadati. Kammapathatā natthīti etena yathāvuttānaṃ asaṃvarasaṃvarānaṃ tesaṃ vāde kammapathasaṃsandane asaṅgahitataṃ dasseti. Ye pana saṅgahaṃ labhanti, tesaṃ gahaṇe payojanābhāvaṃ dassetuṃ ‘‘tividha…pe… dassanenā’’ti vuttaṃ. Evaṃ purimapakkhe saṅkhepato dosaṃ vatvā dutiyapakkhepi vattuṃ ‘‘na ca duccaritāna’’ntiādimāha. Tena ye duccaritasucaritaasaṃvarasaṃvarā anucarīyanti, tesaṃ kāyakammāditā vidhīyatīti dasseti. ‘‘Pañcaphassadvāravasena uppanno asaṃvaro akusalaṃ manokammameva hotī’’tiādinā hi vuttanti. Yadi cātiādinā anavasesapariyādānābhāvamāha. Uppatti na vattabbāti kammapatha…pe… vadantehi ‘‘manokammaṃ chaphassadvāravasena uppajjatī’’ti na vattabbanti attho. Atha vā yadi kammapathappattāneva dussīlyādīni kāyakammādināmehi aṭṭhakathāyaṃ vuttānīti evaṃ vadantehi aṭṭhakathācariyehi manokammassa chaphassadvāravasena uppatti na vattabbāti attho. Taṃtaṃkammabhāvassa vuttattāti ‘‘tividhaṃ kāyaduccaritaṃ akusalaṃ kāyakammameva hotī’’tiādiṃ (vibha. 913) sandhāyāha.
гамманд̇арамби д̇ам̣д̣̇вааригагаммамзва сияаад̇и баан̣аад̇ибаад̇аад̣̇игасса важийгаммаад̣̇ибхаавамаасан̇гад̇и. д̇асмаад̇и яасмаа гзсан̃жи асам̣вараанам̣ сам̣вараанан̃жа гаммабат̇ад̇аа над̇т̇и, гааяад̣̇ужжарид̇аад̣̇ийнан̃жа гаммабат̇зхи наанад̇д̇аабхаавад̣̇ассанзна баяож̇анам̣ над̇т̇и, на жа д̣̇ужжарид̇аад̣̇ийнам̣ пассад̣̇ваараанам̣ васзна уббад̇д̇и д̣̇ийбид̇аа, на жааяам̣ вид̇хи ниравасзсасан̇г̇аахигаа, гаммаанан̃жа сан̇гаро аабаж̇ж̇ад̇и, адтагат̇ааяан̃жа буб̣б̣аабаравирод̇хо, д̇асмаад̇и ад̇т̇о. самаананаамад̇аа гааяагаммаад̣̇ид̇аа. сааман̃н̃анаамаавиж̇аханам̣ гааяагаммаад̣̇ибхааваавиж̇аханам̣. убхаязсанд̇и гаммабат̇аагаммабат̇аанам̣. уббад̇д̇ибарияааяаважанаабхаавад̇од̇и зд̇зна пассад̣̇ваараасам̣варад̣̇ваараад̣̇ийнам̣ д̇ам̣д̣̇вааригагаммаанан̃жа ад̇т̇ад̇о наанад̇д̇аабхаавзби д̇ат̇аа д̇ат̇аа бавад̇д̇ад̣̇зсанаавасзна д̇з вижаарид̇аад̇и д̣̇ассзд̇и. ‘‘агусалам̣ гааяагаммам̣ бан̃жапассад̣̇вааравасзна на уббаж̇ж̇ад̇ий’’д̇иаад̣̇иго д̣̇уд̇ияавинижчаяо.
Kammantarampi taṃdvārikakammameva siyāti pāṇātipātādikassa vacīkammādibhāvamāsaṅkati. Tasmāti yasmā kesañci asaṃvarānaṃ saṃvarānañca kammapathatā natthi, kāyaduccaritādīnañca kammapathehi nānattābhāvadassanena payojanaṃ natthi, na ca duccaritādīnaṃ phassadvārānaṃ vasena uppatti dīpitā, na cāyaṃ vidhi niravasesasaṅgāhikā, kammānañca saṅkaro āpajjati, aṭṭhakathāyañca pubbāparavirodho, tasmāti attho. Samānanāmatā kāyakammāditā. Sāmaññanāmāvijahanaṃ kāyakammādibhāvāvijahanaṃ. Ubhayesanti kammapathākammapathānaṃ. Uppattipariyāyavacanābhāvatoti etena phassadvāraasaṃvaradvārādīnaṃ taṃdvārikakammānañca atthato nānattābhāvepi tathā tathā pavattadesanāvasena te vicāritāti dasseti. ‘‘Akusalaṃ kāyakammaṃ pañcaphassadvāravasena na uppajjatī’’tiādiko dutiyavinicchayo.
гааяз ваажааяа жа…бз… сид̣̇д̇хид̇од̇и зд̇зна жобанаббад̇д̇ам̣ агусалам̣ маногаммам̣ жобанам̣ аббад̇д̇ад̇о висзсзд̇ваа д̣̇ассзд̇ум̣ ‘‘гааяаважийгамма’’нд̇и вуд̇д̇ам̣, на бана гааяаважийгаммабхаавад̇од̇и д̣̇ассзд̇и. д̇зна гааяаважийг̇ахан̣ам̣ яат̇аавуд̇д̇ажобанаббад̇д̇ам̣ зва вибхаавзд̇ийд̇и д̣̇адтаб̣б̣ам̣. д̇знзвааха – ‘‘жобанаббад̇д̇ам̣ агусалам̣ гааяад̣̇ваарз важийд̣̇ваарз жа маногаммам̣ ход̇ий’’д̇и. д̇ам̣-сад̣̇д̣̇з вуд̇д̇з яам̣-сад̣̇д̣̇о аб̣яабхижаарид̇асамб̣анд̇хад̇ааяа вуд̇д̇оязва ход̇ийд̇и гад̇ваа ‘‘яам̣ уббаж̇ж̇ад̇ий’’д̇и вуд̇д̇ам̣. уббаад̣̇амад̇д̇абарижчиннзнаад̇и чапассад̣̇вааригагаммзнаад̇и ад̇т̇о. мад̇д̇а-сад̣̇д̣̇зна висзсанивад̇д̇иад̇т̇зна маногаммад̇аависзсам̣ нивад̇д̇зд̇и. нияамасса зва-сад̣̇д̣̇асса агад̇ад̇д̇аа ‘‘гааяаважийгаммамзва ход̇ий’’д̇и авуд̇д̇ад̇д̇аа. ид̣̇аани нияамаагаран̣зна лад̣̇д̇хаг̇ун̣ам̣ д̣̇ассзнд̇о ‘‘на бана саб̣б̣амбий’’д̇иаад̣̇имааха.
Kāye vācāya ca…pe… siddhitoti etena copanappattaṃ akusalaṃ manokammaṃ copanaṃ appattato visesetvā dassetuṃ ‘‘kāyavacīkamma’’nti vuttaṃ, na pana kāyavacīkammabhāvatoti dasseti. Tena kāyavacīgahaṇaṃ yathāvuttacopanappattaṃ eva vibhāvetīti daṭṭhabbaṃ. Tenevāha – ‘‘copanappattaṃ akusalaṃ kāyadvāre vacīdvāre ca manokammaṃ hotī’’ti. Taṃ-sadde vutte yaṃ-saddo abyabhicāritasambandhatāya vuttoyeva hotīti katvā ‘‘yaṃ uppajjatī’’ti vuttaṃ. Uppādamattaparicchinnenāti chaphassadvārikakammenāti attho. Matta-saddena visesanivattiatthena manokammatāvisesaṃ nivatteti. Niyamassa eva-saddassa akatattā ‘‘kāyavacīkammameva hotī’’ti avuttattā. Idāni niyamākaraṇena laddhaguṇaṃ dassento ‘‘na pana sabbampī’’tiādimāha.
‘‘нияамасса агад̇ад̇д̇аа’’д̇иаад̣̇и буриманаяод̇и ад̇хиббзд̇о. вад̇д̇уад̇хиббааяаанурод̇хиний сад̣̇д̣̇аббавад̇д̇ийд̇и самаасабад̣̇з згад̣̇зсоби аагад̣дхийяад̇и ад̇хигааравасзнаад̇и ад̇хиббааязна ‘‘гамма-сад̣̇д̣̇амад̇д̇зна самб̣анд̇хам̣ гад̇ваа’’д̇и вуд̇д̇ам̣. яам̣ бана вад̣̇анд̇ийд̇иаад̣̇инаа зд̇т̇а бад̣̇агаарамад̇асса аяуд̇д̇ад̇ам̣ д̣̇ассзд̇и. д̇ад̇т̇а жзд̇анаабагкигаананд̇и гааяаважийгаммабхууд̇ажзд̇анаабагкигаанам̣. сад̇анд̇и самаанаанам̣. д̇ам̣д̇ам̣д̣̇ваарагаммабат̇аанан̃жаад̇и ид̣̇ам̣ имасса жид̇д̇асса гаммабат̇абхаавзна бавад̇д̇ам̣ гаалам̣ санд̇хааяа вуд̇д̇ам̣, на саб̣б̣ад̣̇аа, гаммабат̇абхаавзнзва бавад̇д̇анад̇о. жа-сад̣̇д̣̇зна ваа агаммабат̇асан̇г̇ахо д̣̇адтаб̣б̣о. ат̇а ваа д̇ам̣д̇ам̣д̣̇ваараа жа д̇ам̣д̇ам̣д̣̇ваарагаммабат̇аа жа д̇ам̣д̇ам̣д̣̇ваарагаммабат̇аад̇и ‘‘д̇ам̣д̇ам̣д̣̇ваараа’’д̇и бад̣̇зна агаммабат̇аанам̣ сам̣вараанам̣ сан̇г̇ахо д̣̇адтаб̣б̣о. д̇зна сабхаавзнаад̇и маногаммасса д̣̇ваарабхаавзна, на ад̇д̇анод̇и ад̇хиббааяо. звамид̇хаабийд̇и жид̇д̇аж̇анид̇о жид̇д̇асамбаяуд̇д̇асса гаммасса д̣̇ваарабхааво жид̇д̇зби убажарид̇од̇и ад̇т̇о. вад̇д̇аб̣б̣амзва над̇т̇и ананд̇арабажжаяабхууд̇аманорахид̇асса жид̇д̇асса абхаавад̇од̇и.
‘‘Niyamassa akatattā’’tiādi purimanayoti adhippeto. Vattuadhippāyānurodhinī saddappavattīti samāsapade ekadesopi ākaḍḍhīyati adhikāravasenāti adhippāyena ‘‘kamma-saddamattena sambandhaṃ katvā’’ti vuttaṃ. Yaṃ pana vadantītiādinā ettha padakāramatassa ayuttataṃ dasseti. Tattha cetanāpakkhikānanti kāyavacīkammabhūtacetanāpakkhikānaṃ. Satanti samānānaṃ. Taṃtaṃdvārakammapathānañcāti idaṃ imassa cittassa kammapathabhāvena pavattaṃ kālaṃ sandhāya vuttaṃ, na sabbadā, kammapathabhāveneva pavattanato. Ca-saddena vā akammapathasaṅgaho daṭṭhabbo. Atha vā taṃtaṃdvārā ca taṃtaṃdvārakammapathā ca taṃtaṃdvārakammapathāti ‘‘taṃtaṃdvārā’’ti padena akammapathānaṃ saṃvarānaṃ saṅgaho daṭṭhabbo. Tena sabhāvenāti manokammassa dvārabhāvena, na attanoti adhippāyo. Evamidhāpīti cittajanito cittasampayuttassa kammassa dvārabhāvo cittepi upacaritoti attho. Vattabbameva natthi anantarapaccayabhūtamanorahitassa cittassa abhāvatoti.
д̣̇ваарагат̇ааван̣н̣анаа нидтид̇аа.
Dvārakathāvaṇṇanā niṭṭhitā.
гамаабхааванияамаабхаавз саб̣б̣аарамман̣ад̇аад̣̇ийд̇и аад̣̇и-сад̣̇д̣̇зна сан̇г̇ан̣хаад̇и. на хи…бз… ад̇т̇ийд̇и бад̇хаанз асамбхавад̇о аббад̇хаанам̣ ад̇хигарийяад̇ийд̇и д̣̇ассзд̇и.
Kamābhāvaniyamābhāve sabbārammaṇatādīti ādi-saddena saṅgaṇhāti. Na hi…pe… atthīti padhāne asambhavato appadhānaṃ adhikarīyatīti dasseti.
Related texts:
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / д̇хаммасан̇г̇ан̣ий-мууладийгаа • Dhammasaṅgaṇī-mūlaṭīkā / гаммабат̇асам̣санд̣̇анагат̇ааван̣н̣анаа • Kammapathasaṃsandanakathāvaṇṇanā
