| Library / Tipiṭaka / තිපිටක • Tipiṭaka / වජිරබුද්‌ධි-ටීකා • Vajirabuddhi-ṭīkā |
9. කම්‌මපටිබාහනසික්‌ඛාපදවණ්‌ණනා
9. Kammapaṭibāhanasikkhāpadavaṇṇanā
474. ‘‘ධම්‌මිකානං කම්‌මාන’’න්‌ති (පාචි. 475) වචනතො එකච්‌චෙ භික්‌ඛූ ධම්‌මිකානං කම්‌මානං ‘‘ඡන්‌දං දම්‌මී’’ති ඡන්‌දං දෙන්‌ති, තං තෙසං මතිමත්‌තමෙව, න පටිපත්‌ති. අධම්‌මං නිස්‌සාය ඛිය්‍යති, තං වා උක්‌කොටෙති, අනාපත්‌ති නෙව හොතීති? න, තථා ඡන්‌දදානකාලෙ අකත්‌වා පච්‌ඡා අධම්‌මකම්‌මඛිය්‍යනාදිපච්‌චයා අනාපත්‌තිවාරෙ වුත්‌තත්‌තා. අධම්‌මෙන වා වග්‌ගෙන වා න කම්‌මාරහස්‌ස වා කම්‌මකරණපච්‌චයා ආපත්‌තිමොක්‌ඛකරණතො අවිසෙසමෙව තථාවචනන්‌ති චෙ? න, ඡන්‌දදානකාලෙ අධම්‌මකම්‌මකරණානුමතියා අභාවතො, කාරකස්‌සෙව වජ්‌ජප්‌පසඞ්‌ගතො ච. ගණස්‌ස දුක්‌කටන්‌ති චෙ? පාරිසුද්‌ධිඡන්‌දදායකාව තෙ, න ගණො අකම්‌මප්‌පත්‌තත්‌තා, පරිවාරෙපි (පරි. 482 ආදයො) කම්‌මවග්‌ගෙ කම්‌මප්‌පත්‌තඡන්‌දදායකා විසුං වුත්‌තා. තථාපි අධම්‌මකම්‌මස්‌ස ඡන්‌දො න දාතබ්‌බො දෙන්‌තෙ අකප්‌පියානුමතිදුක්‌කටතො. තත්‌ථ හි යොජනදුක්‌කටතො න මුච්‌චන්‌තීති නො තක්‌කොති ආචරියො.
474. ‘‘Dhammikānaṃ kammāna’’nti (pāci. 475) vacanato ekacce bhikkhū dhammikānaṃ kammānaṃ ‘‘chandaṃ dammī’’ti chandaṃ denti, taṃ tesaṃ matimattameva, na paṭipatti. Adhammaṃ nissāya khiyyati, taṃ vā ukkoṭeti, anāpatti neva hotīti? Na, tathā chandadānakāle akatvā pacchā adhammakammakhiyyanādipaccayā anāpattivāre vuttattā. Adhammena vā vaggena vā na kammārahassa vā kammakaraṇapaccayā āpattimokkhakaraṇato avisesameva tathāvacananti ce? Na, chandadānakāle adhammakammakaraṇānumatiyā abhāvato, kārakasseva vajjappasaṅgato ca. Gaṇassa dukkaṭanti ce? Pārisuddhichandadāyakāva te, na gaṇo akammappattattā, parivārepi (pari. 482 ādayo) kammavagge kammappattachandadāyakā visuṃ vuttā. Tathāpi adhammakammassa chando na dātabbo dente akappiyānumatidukkaṭato. Tattha hi yojanadukkaṭato na muccantīti no takkoti ācariyo.
කම්‌මපටිබාහනසික්‌ඛාපදවණ්‌ණනා නිට්‌ඨිතා.
Kammapaṭibāhanasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 8. සහධම්‌මිකවග්‌ගො • 8. Sahadhammikavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 9. කම්‌මපටිබාහනසික්‌ඛාපදවණ්‌ණනා • 9. Kammapaṭibāhanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 9. කම්‌මපටිබාහනසික්‌ඛාපදවණ්‌ණනා • 9. Kammapaṭibāhanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 9. ඛිය්‍යනසික්‌ඛාපදවණ්‌ණනා • 9. Khiyyanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 9. කම්‌මපටිබාහනසික්‌ඛාපදං • 9. Kammapaṭibāhanasikkhāpadaṃ
