| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
८. कम्मफलअत्थिभावपञ्हो
8. Kammaphalaatthibhāvapañho
८. राजा आह ‘‘भन्ते नागसेन, इमिना नामरूपेन कम्मं कतं कुसलं वा अकुसलं वा, कुहिं तानि कम्मानि तिट्ठन्ती’’ति? ‘‘अनुबन्धेय्युं खो, महाराज, तानि कम्मानि छायाव अनपायिनी’’ति 1। ‘‘सक्का पन, भन्ते, तानि कम्मानि दस्सेतुं ‘इध वा इध वा तानि कम्मानि तिट्ठन्ती’’’ति? ‘‘न सक्का, महाराज, तानि कम्मानि दस्सेतुं ‘इध वा इध वा तानि कम्मानि तिट्ठन्ती’’’ति।
8. Rājā āha ‘‘bhante nāgasena, iminā nāmarūpena kammaṃ kataṃ kusalaṃ vā akusalaṃ vā, kuhiṃ tāni kammāni tiṭṭhantī’’ti? ‘‘Anubandheyyuṃ kho, mahārāja, tāni kammāni chāyāva anapāyinī’’ti 2. ‘‘Sakkā pana, bhante, tāni kammāni dassetuṃ ‘idha vā idha vā tāni kammāni tiṭṭhantī’’’ti? ‘‘Na sakkā, mahārāja, tāni kammāni dassetuṃ ‘idha vā idha vā tāni kammāni tiṭṭhantī’’’ti.
‘‘ओपम्मं करोही’’ति। ‘‘तं किं मञ्ञसि, महाराज, यानिमानि रुक्खानि अनिब्बत्तफलानि, सक्का तेसं फलानि दस्सेतुं ‘इध वा इध वा तानि फलानि तिट्ठन्ती’’’ति। ‘‘न हि, भन्ते’’ति। ‘‘एवमेव खो, महाराज, अब्बोच्छिन्नाय सन्ततिया न सक्का तानि कम्मानि दस्सेतुं ‘इध वा इध वा तानि कम्मानि तिट्ठन्ती’ति।
‘‘Opammaṃ karohī’’ti. ‘‘Taṃ kiṃ maññasi, mahārāja, yānimāni rukkhāni anibbattaphalāni, sakkā tesaṃ phalāni dassetuṃ ‘idha vā idha vā tāni phalāni tiṭṭhantī’’’ti. ‘‘Na hi, bhante’’ti. ‘‘Evameva kho, mahārāja, abbocchinnāya santatiyā na sakkā tāni kammāni dassetuṃ ‘idha vā idha vā tāni kammāni tiṭṭhantī’ti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
कम्मफलअत्थिभावपञ्हो अट्ठमो।
Kammaphalaatthibhāvapañho aṭṭhamo.
Footnotes:
