| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၈. ကမ္မဖလအတ္ထိဘာဝပဉ္ဟော
8. Kammaphalaatthibhāvapañho
၈. ရာဇာ အာဟ ‘‘ဘန္တေ နာဂသေန, ဣမိနာ နာမရူပေန ကမ္မံ ကတံ ကုသလံ ဝာ အကုသလံ ဝာ, ကုဟိံ တာနိ ကမ္မာနိ တိဋ္ဌန္တီ’’တိ? ‘‘အနုဗန္ဓေယ္ယုံ ခော, မဟာရာဇ, တာနိ ကမ္မာနိ ဆာယာဝ အနပာယိနီ’’တိ 1။ ‘‘သက္ကာ ပန, ဘန္တေ, တာနိ ကမ္မာနိ ဒသ္သေတုံ ‘ဣဓ ဝာ ဣဓ ဝာ တာနိ ကမ္မာနိ တိဋ္ဌန္တီ’’’တိ? ‘‘န သက္ကာ, မဟာရာဇ, တာနိ ကမ္မာနိ ဒသ္သေတုံ ‘ဣဓ ဝာ ဣဓ ဝာ တာနိ ကမ္မာနိ တိဋ္ဌန္တီ’’’တိ။
8. Rājā āha ‘‘bhante nāgasena, iminā nāmarūpena kammaṃ kataṃ kusalaṃ vā akusalaṃ vā, kuhiṃ tāni kammāni tiṭṭhantī’’ti? ‘‘Anubandheyyuṃ kho, mahārāja, tāni kammāni chāyāva anapāyinī’’ti 2. ‘‘Sakkā pana, bhante, tāni kammāni dassetuṃ ‘idha vā idha vā tāni kammāni tiṭṭhantī’’’ti? ‘‘Na sakkā, mahārāja, tāni kammāni dassetuṃ ‘idha vā idha vā tāni kammāni tiṭṭhantī’’’ti.
‘‘ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ယာနိမာနိ ရုက္ခာနိ အနိဗ္ဗတ္တဖလာနိ, သက္ကာ တေသံ ဖလာနိ ဒသ္သေတုံ ‘ဣဓ ဝာ ဣဓ ဝာ တာနိ ဖလာနိ တိဋ္ဌန္တီ’’’တိ။ ‘‘န ဟိ, ဘန္တေ’’တိ။ ‘‘ဧဝမေဝ ခော, မဟာရာဇ, အဗ္ဗောစ္ဆိန္နာယ သန္တတိယာ န သက္ကာ တာနိ ကမ္မာနိ ဒသ္သေတုံ ‘ဣဓ ဝာ ဣဓ ဝာ တာနိ ကမ္မာနိ တိဋ္ဌန္တီ’တိ။
‘‘Opammaṃ karohī’’ti. ‘‘Taṃ kiṃ maññasi, mahārāja, yānimāni rukkhāni anibbattaphalāni, sakkā tesaṃ phalāni dassetuṃ ‘idha vā idha vā tāni phalāni tiṭṭhantī’’’ti. ‘‘Na hi, bhante’’ti. ‘‘Evameva kho, mahārāja, abbocchinnāya santatiyā na sakkā tāni kammāni dassetuṃ ‘idha vā idha vā tāni kammāni tiṭṭhantī’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ကမ္မဖလအတ္ထိဘာဝပဉ္ဟော အဋ္ဌမော။
Kammaphalaatthibhāvapañho aṭṭhamo.
Footnotes:
