| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
8. කම්‌මඵලඅත්‌ථිභාවපඤ්‌හො
8. Kammaphalaatthibhāvapañho
8. රාජා ආහ ‘‘භන්‌තෙ නාගසෙන, ඉමිනා නාමරූපෙන කම්‌මං කතං කුසලං වා අකුසලං වා, කුහිං තානි කම්‌මානි තිට්‌ඨන්‌තී’’ති? ‘‘අනුබන්‌ධෙය්‍යුං ඛො, මහාරාජ, තානි කම්‌මානි ඡායාව අනපායිනී’’ති 1. ‘‘සක්‌කා පන, භන්‌තෙ, තානි කම්‌මානි දස්‌සෙතුං ‘ඉධ වා ඉධ වා තානි කම්‌මානි තිට්‌ඨන්‌තී’’’ති? ‘‘න සක්‌කා, මහාරාජ, තානි කම්‌මානි දස්‌සෙතුං ‘ඉධ වා ඉධ වා තානි කම්‌මානි තිට්‌ඨන්‌තී’’’ති.
8. Rājā āha ‘‘bhante nāgasena, iminā nāmarūpena kammaṃ kataṃ kusalaṃ vā akusalaṃ vā, kuhiṃ tāni kammāni tiṭṭhantī’’ti? ‘‘Anubandheyyuṃ kho, mahārāja, tāni kammāni chāyāva anapāyinī’’ti 2. ‘‘Sakkā pana, bhante, tāni kammāni dassetuṃ ‘idha vā idha vā tāni kammāni tiṭṭhantī’’’ti? ‘‘Na sakkā, mahārāja, tāni kammāni dassetuṃ ‘idha vā idha vā tāni kammāni tiṭṭhantī’’’ti.
‘‘ඔපම්‌මං කරොහී’’ති. ‘‘තං කිං මඤ්‌ඤසි, මහාරාජ, යානිමානි රුක්‌ඛානි අනිබ්‌බත්‌තඵලානි, සක්‌කා තෙසං ඵලානි දස්‌සෙතුං ‘ඉධ වා ඉධ වා තානි ඵලානි තිට්‌ඨන්‌තී’’’ති. ‘‘න හි, භන්‌තෙ’’ති. ‘‘එවමෙව ඛො, මහාරාජ, අබ්‌බොච්‌ඡින්‌නාය සන්‌තතියා න සක්‌කා තානි කම්‌මානි දස්‌සෙතුං ‘ඉධ වා ඉධ වා තානි කම්‌මානි තිට්‌ඨන්‌තී’ති.
‘‘Opammaṃ karohī’’ti. ‘‘Taṃ kiṃ maññasi, mahārāja, yānimāni rukkhāni anibbattaphalāni, sakkā tesaṃ phalāni dassetuṃ ‘idha vā idha vā tāni phalāni tiṭṭhantī’’’ti. ‘‘Na hi, bhante’’ti. ‘‘Evameva kho, mahārāja, abbocchinnāya santatiyā na sakkā tāni kammāni dassetuṃ ‘idha vā idha vā tāni kammāni tiṭṭhantī’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
කම්‌මඵලඅත්‌ථිභාවපඤ්‌හො අට්‌ඨමො.
Kammaphalaatthibhāvapañho aṭṭhamo.
Footnotes:
