| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
9. гаммаббадиб̣ааханасигкаабад̣̇аван̣н̣анаа
9. Kammappaṭibāhanasikkhāpadavaṇṇanā
д̇хаммигаананд̇и д̇хаммзна винаязна сад̇т̇усаасанзна гад̇ад̇д̇аа д̇хаммо зд̇зсу ад̇т̇ийд̇и д̇хаммигаани, д̇зсам̣ д̇хаммигаанам̣. гаммаананд̇и жад̇уннам̣ сан̇гхагаммаанам̣. д̇знааха ‘‘д̇хаммзнаа’’д̇иаад̣̇и. д̇ад̇т̇а д̇хаммзнаад̇и бхууд̇зна вад̇т̇унаа. винаязнаад̇и жод̣̇анааяа жзва сааран̣ааяа жа. сад̇т̇усаасанзнаад̇и н̃ад̇д̇исамбад̣̇ааяа жзва ануссаванаасамбад̣̇ааяа жа. самаг̇г̇асса сан̇гхассаад̇и сиймадтагасан̇гхам̣ сод̇хзд̇ваа чанд̣̇аарахаанам̣ чанд̣̇ам̣ аахарид̇ваа гад̇д̇аб̣б̣ад̇д̇аа гааязна жзва жид̇д̇зна жа згийбхууд̇асса сан̇гхасса. д̇ам̣ д̇ам̣ вад̇т̇унд̇и аван̣н̣абхан̣анаад̣̇им̣ д̇ам̣ д̇ам̣ вад̇т̇у.
Dhammikānanti dhammena vinayena satthusāsanena katattā dhammo etesu atthīti dhammikāni, tesaṃ dhammikānaṃ. Kammānanti catunnaṃ saṅghakammānaṃ. Tenāha ‘‘dhammenā’’tiādi. Tattha dhammenāti bhūtena vatthunā. Vinayenāti codanāya ceva sāraṇāya ca. Satthusāsanenāti ñattisampadāya ceva anussavanāsampadāya ca. Samaggassa saṅghassāti sīmaṭṭhakasaṅghaṃ sodhetvā chandārahānaṃ chandaṃ āharitvā kattabbattā kāyena ceva cittena ca ekībhūtassa saṅghassa. Taṃ taṃ vatthunti avaṇṇabhaṇanādiṃ taṃ taṃ vatthu.
осаарзнд̇и сан̇гхамаж̇жхам̣ зд̇знаад̇и осааран̣ам̣. ниссаарзнд̇и сан̇гхамхаа зд̇знаад̇и ниссааран̣ам̣. бхан̣д̣угамманд̇и мун̣д̣агаран̣ам̣, гзсажчзд̣̇анаабужчананд̇и ад̇т̇о. гаммамзва лагкан̣ам̣ гаммалагкан̣ам̣. осааран̣аад̣̇аяо вияа гамман̃жа худ̇ваа ан̃н̃ан̃жа наамам̣ на лабхад̇и, гаммамзва худ̇ваа лагкийяад̇ийд̇и гаммалагкан̣анд̇и ад̇т̇о. ‘‘осааран̣ам̣ ниссааран̣а’’нд̇и (бари. адта. 495-496) жзд̇т̇а бад̣̇асилидтад̇ааязд̇ам̣ вуд̇д̇ам̣. батамам̣ бана ниссааран̣аа ход̇и, бажчаа осааран̣аад̇и ааха ‘‘д̇ад̇т̇а ган̣дагасааман̣зрассаа’’д̇иаад̣̇и. ган̣дагасааман̣зрасса наасанаа вияа ниссааран̣аад̇и яат̇аа ган̣дагасааман̣зрасса д̣̇ан̣д̣агамманаасанаа ниссааран̣аа, д̇ат̇аа б̣уд̣̇д̇хасса ваа д̇хаммасса ваа сан̇гхасса ваа аван̣н̣ам̣ бхан̣ад̇о, агаббияам̣ ‘‘габбияа’’нд̇и д̣̇ийбаяад̇о, мижчаад̣̇идтигасса анд̇аг̇г̇аахигааяа д̣̇идтияаа саманнааг̇ад̇асса ан̃н̃ассааби сааман̣зрасса –
Osārenti saṅghamajjhaṃ etenāti osāraṇaṃ. Nissārenti saṅghamhā etenāti nissāraṇaṃ. Bhaṇḍukammanti muṇḍakaraṇaṃ, kesacchedanāpucchananti attho. Kammameva lakkhaṇaṃ kammalakkhaṇaṃ. Osāraṇādayo viya kammañca hutvā aññañca nāmaṃ na labhati, kammameva hutvā lakkhīyatīti kammalakkhaṇanti attho. ‘‘Osāraṇaṃ nissāraṇa’’nti (pari. aṭṭha. 495-496) cettha padasiliṭṭhatāyetaṃ vuttaṃ. Paṭhamaṃ pana nissāraṇā hoti, pacchā osāraṇāti āha ‘‘tattha kaṇṭakasāmaṇerassā’’tiādi. Kaṇṭakasāmaṇerassa nāsanā viya nissāraṇāti yathā kaṇṭakasāmaṇerassa daṇḍakammanāsanā nissāraṇā, tathā buddhassa vā dhammassa vā saṅghassa vā avaṇṇaṃ bhaṇato, akappiyaṃ ‘‘kappiya’’nti dīpayato, micchādiṭṭhikassa antaggāhikāya diṭṭhiyā samannāgatassa aññassāpi sāmaṇerassa –
‘‘сан̇гхам̣, бханд̇з, бужчаами ‘аяам̣ ид̇т̇аннаамо сааман̣зро б̣уд̣̇д̇хасса ваа д̇хаммасса ваа сан̇гхасса ваа аван̣н̣аваад̣̇ий мижчаад̣̇идтиго, яам̣ ан̃н̃з сааман̣зраа лабханд̇и д̣̇ирад̇д̇ад̇ирад̇д̇ам̣ бхигкуухи сад̣̇д̇хим̣ сахасзяяам̣, д̇асса алаабхааяа ниссааран̣аа ружжад̇и сан̇гхассаа’д̇и. д̣̇уд̇ияамби…бз… д̇ад̇ияамби, бханд̇з, сан̇гхам̣ бужчаами ‘аяам̣ ид̇т̇аннаамо сааман̣зро…бз… ружжад̇и сан̇гхассаа’д̇и, жара бирз винассаа’’д̇и (бари. адта. 495-496) –
‘‘Saṅghaṃ, bhante, pucchāmi ‘ayaṃ itthannāmo sāmaṇero buddhassa vā dhammassa vā saṅghassa vā avaṇṇavādī micchādiṭṭhiko, yaṃ aññe sāmaṇerā labhanti dirattatirattaṃ bhikkhūhi saddhiṃ sahaseyyaṃ, tassa alābhāya nissāraṇā ruccati saṅghassā’ti. Dutiyampi…pe… tatiyampi, bhante, saṅghaṃ pucchāmi ‘ayaṃ itthannāmo sāmaṇero…pe… ruccati saṅghassā’ti, cara pire vinassā’’ti (pari. aṭṭha. 495-496) –
гад̇д̇аб̣б̣анаасанаа ниссааран̣аад̇и ад̇т̇о. д̇аад̣̇исам̣язва саммаавад̇д̇анд̇ам̣ д̣̇исваа бавзсанаа осааран̣аад̇и д̇аад̣̇исам̣язва абарзна самаязна ‘‘ахам̣, бханд̇з, б̣аалад̇ааяа ан̃н̃аан̣ад̇ааяа алагкигад̇ааяа звам̣ агаасим̣, сваахам̣ сан̇гхам̣ камаабзмий’’д̇и камаабзнд̇ам̣ д̣̇исваа яаавад̇ад̇ияам̣ яаажаабзд̇ваа –
Kattabbanāsanā nissāraṇāti attho. Tādisaṃyeva sammāvattantaṃ disvā pavesanā osāraṇāti tādisaṃyeva aparena samayena ‘‘ahaṃ, bhante, bālatāya aññāṇatāya alakkhikatāya evaṃ akāsiṃ, svāhaṃ saṅghaṃ khamāpemī’’ti khamāpentaṃ disvā yāvatatiyaṃ yācāpetvā –
‘‘сан̇гхам̣, бханд̇з, бужчаами ‘аяам̣ ид̇т̇аннаамо сааман̣зро б̣уд̣̇д̇хасса ваа д̇хаммасса ваа сан̇гхасса ваа аван̣н̣аваад̣̇ий мижчаад̣̇идтиго, яам̣ ан̃н̃з сааман̣зраа лабханд̇и бхигкуухи сад̣̇д̇хим̣ д̣̇ирад̇д̇ад̇ирад̇д̇ам̣ сахасзяяам̣, д̇асса алаабхааяа ниссаарид̇о, свааяам̣ ид̣̇аани сорад̇о ниваад̇авуд̇д̇и лаж̇ж̇ид̇хаммам̣ огганд̇о хирод̇д̇аббз бад̇идтид̇о гад̇ад̣̇ан̣д̣агаммо ажжаяам̣ д̣̇зсзд̇и, имасса сааман̣зрасса яат̇аа бурз гааяасамбхог̇асаамаг̇г̇ид̣̇аанам̣ ружжад̇и сан̇гхассаа’д̇и. д̣̇уд̇ияамби…бз… д̇ад̇ияамби, бханд̇з, сан̇гхам̣ бужчаами…бз… ружжад̇и сан̇гхассаа’’д̇и (бари. адта. 495-496) –
‘‘Saṅghaṃ, bhante, pucchāmi ‘ayaṃ itthannāmo sāmaṇero buddhassa vā dhammassa vā saṅghassa vā avaṇṇavādī micchādiṭṭhiko, yaṃ aññe sāmaṇerā labhanti bhikkhūhi saddhiṃ dirattatirattaṃ sahaseyyaṃ, tassa alābhāya nissārito, svāyaṃ idāni sorato nivātavutti lajjidhammaṃ okkanto hirottappe patiṭṭhito katadaṇḍakammo accayaṃ deseti, imassa sāmaṇerassa yathā pure kāyasambhogasāmaggidānaṃ ruccati saṅghassā’ti. Dutiyampi…pe… tatiyampi, bhante, saṅghaṃ pucchāmi…pe… ruccati saṅghassā’’ti (pari. aṭṭha. 495-496) –
бавзсанаа осааран̣аад̇и ад̇т̇о.
Pavesanā osāraṇāti attho.
гзсажчзд̣̇анаабужчананд̇и сиймаабарияаабаннз бхигкуу саннибаад̇аабзд̇ваа баб̣б̣аж̇ж̇аабзгкам̣ д̇ад̇т̇а нзд̇ваа ‘‘сан̇гхам̣, бханд̇з, имасса д̣̇аарагасса бхан̣д̣угаммам̣ аабужчаамий’’д̇и д̇игкад̇д̇ум̣ ваа д̣̇вигкад̇д̇ум̣ ваа сагим̣ ваа важанам̣. ид̇ха жа ‘‘имасса д̣̇аарагасса бхан̣д̣угаммам̣ аабужчаамаа’’д̇иби ‘‘имасса саман̣агаран̣ам̣ аабужчаамаа’’д̇иби ‘‘имасса баб̣б̣ааж̇анам̣ аабужчаамаа’’д̇иби ‘‘аяам̣ саман̣о ход̇угаамо’’д̇иби ‘‘аяам̣ баб̣б̣аж̇ид̇угаамо’’д̇иби вад̇д̇ум̣ ваддад̇иязва.
Kesacchedanāpucchananti sīmāpariyāpanne bhikkhū sannipātāpetvā pabbajjāpekkhaṃ tattha netvā ‘‘saṅghaṃ, bhante, imassa dārakassa bhaṇḍukammaṃ āpucchāmī’’ti tikkhattuṃ vā dvikkhattuṃ vā sakiṃ vā vacanaṃ. Idha ca ‘‘imassa dārakassa bhaṇḍukammaṃ āpucchāmā’’tipi ‘‘imassa samaṇakaraṇaṃ āpucchāmā’’tipi ‘‘imassa pabbājanaṃ āpucchāmā’’tipi ‘‘ayaṃ samaṇo hotukāmo’’tipi ‘‘ayaṃ pabbajitukāmo’’tipi vattuṃ vaṭṭatiyeva.
мукарассаад̇и мукзна карасса. яам̣ аванд̣̇ияагаммам̣ анун̃н̃аад̇анд̇и самб̣анд̇хо. уурум̣ виварид̇ваа д̣̇ассанаад̣̇ивад̇т̇уусууд̇и –
Mukharassāti mukhena kharassa. Yaṃ avandiyakammaṃ anuññātanti sambandho. Ūruṃ vivaritvā dassanādivatthūsūti –
‘‘д̇зна ко бана самаязна чаб̣б̣аг̇г̇ияаа бхигкуу бхигкунияо гад̣̇д̣̇амод̣̇агзна осин̃жанд̇и ‘аббзва наама амхзсу саараж̇ж̇зяяу’нд̇и, гааяам̣ виварид̇ваа бхигкунийнам̣ д̣̇ассзнд̇и, уурум̣ виварид̇ваа бхигкунийнам̣ д̣̇ассзнд̇и, ан̇г̇аж̇аад̇ам̣ виварид̇ваа бхигкунийнам̣ д̣̇ассзнд̇и, бхигкунияо обхаасзнд̇и, бхигкунийхи сад̣̇д̇хим̣ самбаяож̇знд̇и ‘аббзва наама амхзсу саараж̇ж̇зяяу’’’нд̇и (жуул̣ава. 411) –
‘‘Tena kho pana samayena chabbaggiyā bhikkhū bhikkhuniyo kaddamodakena osiñcanti ‘appeva nāma amhesu sārajjeyyu’nti, kāyaṃ vivaritvā bhikkhunīnaṃ dassenti, ūruṃ vivaritvā bhikkhunīnaṃ dassenti, aṅgajātaṃ vivaritvā bhikkhunīnaṃ dassenti, bhikkhuniyo obhāsenti, bhikkhunīhi saddhiṃ sampayojenti ‘appeva nāma amhesu sārajjeyyu’’’nti (cūḷava. 411) –
имзсу вад̇т̇уусу.
Imesu vatthūsu.
ажчиннажийварагаад̣̇ийнанд̇и ажчиннажийвараж̇ин̣н̣ажийваранадтажийвараг̇илаанаб̣ахуссуд̇асан̇гхабхааранид̇т̇арагаад̣̇ийнам̣. жийвараад̣̇ийнийд̇и жийварабхзсаж̇ж̇асзнаасанаад̣̇ийни. барибхун̃ж̇ид̇аб̣б̣аанийд̇и барибхун̃ж̇ид̇аб̣б̣аани муулад̇ажабад̇д̇аан̇гурабубпапалаад̣̇ийни. абанзд̇аб̣б̣ааниби вад̇т̇уунийд̇и ааваасагаран̣аад̣̇иад̇т̇ам̣ харид̇аб̣б̣ааниби чааяуубаг̇апалуубаг̇аругкаад̣̇ийни. д̇ат̇ааруубам̣ ваа д̇хаммигам̣ гад̇игам̣ гаронд̇зхийд̇и жийварабин̣д̣абаад̇ад̇т̇ааяа д̣̇иннад̇о ааваасаж̇аг̇г̇анаад̣̇игам̣ д̇аад̣̇исам̣ ваа ан̃н̃амби д̇хаммигам̣ гад̇игам̣ гаронд̇зхи.
Acchinnacīvarakādīnanti acchinnacīvarajiṇṇacīvaranaṭṭhacīvaragilānabahussutasaṅghabhāranittharakādīnaṃ. Cīvarādīnīti cīvarabhesajjasenāsanādīni. Paribhuñjitabbānīti paribhuñjitabbāni mūlatacapattaaṅkurapupphaphalādīni. Apanetabbānipi vatthūnīti āvāsakaraṇādiatthaṃ haritabbānipi chāyūpagaphalūpagarukkhādīni. Tathārūpaṃ vā dhammikaṃ katikaṃ karontehīti cīvarapiṇḍapātatthāya dinnato āvāsajagganādikaṃ tādisaṃ vā aññampi dhammikaṃ katikaṃ karontehi.
нзва суд̇д̇ам̣ ааг̇ажчад̇ийд̇и на маад̇игаа ааг̇ажчад̇и. но суд̇д̇авибхан̇г̇од̇и винаяоби на баг̇ун̣о. б̣яан̃ж̇анажчааяааяа ад̇т̇ам̣ бадиб̣аахад̇ийд̇и (жуул̣ава. адта. 233) б̣яан̃ж̇анамад̇д̇амзва г̇ахзд̇ваа ад̇т̇ам̣ бадисзд̇хзд̇и. ж̇аад̇аруубараж̇ад̇акзд̇д̇авад̇т̇уббадиг̇г̇ахан̣аад̣̇ийсу винаяад̇харзхи бхигкуухи аабад̇д̇ияаа гаарияамаанз д̣̇исваа ‘‘гим̣ имз аабад̇д̇ияаа гаарзт̇а, нану ‘ж̇аад̇аруубараж̇ад̇аббадиг̇г̇ахан̣аа бадивирад̇о ход̇ий’д̇и (д̣̇ий. ни. 1.10, 194) звам̣ суд̇д̇з бадивирад̇имад̇д̇амзва вуд̇д̇ам̣, над̇т̇и зд̇т̇а аабад̇д̇ий’’д̇и вад̣̇ад̇и. абаро д̇хаммагат̇иго суд̇д̇асса ааг̇ад̇ад̇д̇аа оламб̣зд̇ваа ниваасзнд̇аанам̣ аабад̇д̇ияаа ааробияамаанааяа ‘‘гим̣ имзсам̣ аабад̇д̇им̣ ааробзт̇а, нану ‘бариман̣д̣алам̣ ниваасзссаамийд̇и сигкаа гаран̣ийяаа’д̇и (баажи. 576) звам̣ сигкаагаран̣амад̇д̇амзва вуд̇д̇ам̣, над̇т̇и зд̇т̇а аабад̇д̇ий’’д̇и вад̣̇ад̇и. уб̣б̣аахига винижчаязд̇и самат̇агканд̇хагз вуд̇д̇ауб̣б̣аахигавинижчаяз ‘‘сийлаваа ход̇ий’’д̇иаад̣̇игааяа хи д̣̇асан̇г̇асамбад̇д̇ияаа саманнааг̇ад̇з д̣̇вз д̇аяо бхигкуу ужжинид̇ваа винижчаяо уб̣б̣аахигавинижчаяод̇и д̣̇адтаб̣б̣о.
Neva suttaṃ āgacchatīti na mātikā āgacchati. No suttavibhaṅgoti vinayopi na paguṇo. Byañjanacchāyāya atthaṃ paṭibāhatīti (cūḷava. aṭṭha. 233) byañjanamattameva gahetvā atthaṃ paṭisedheti. Jātarūparajatakhettavatthuppaṭiggahaṇādīsu vinayadharehi bhikkhūhi āpattiyā kāriyamāne disvā ‘‘kiṃ ime āpattiyā kāretha, nanu ‘jātarūparajatappaṭiggahaṇā paṭivirato hotī’ti (dī. ni. 1.10, 194) evaṃ sutte paṭiviratimattameva vuttaṃ, natthi ettha āpattī’’ti vadati. Aparo dhammakathiko suttassa āgatattā olambetvā nivāsentānaṃ āpattiyā āropiyamānāya ‘‘kiṃ imesaṃ āpattiṃ āropetha, nanu ‘parimaṇḍalaṃ nivāsessāmīti sikkhā karaṇīyā’ti (pāci. 576) evaṃ sikkhākaraṇamattameva vuttaṃ, natthi ettha āpattī’’ti vadati. Ubbāhika vinicchayeti samathakkhandhake vuttaubbāhikavinicchaye ‘‘sīlavā hotī’’tiādikāya hi dasaṅgasampattiyā samannāgate dve tayo bhikkhū uccinitvā vinicchayo ubbāhikavinicchayoti daṭṭhabbo.
бавааран̣аббажжуггад̣дханаад̇и бавааран̣ааяа уггассанаа, уд̣̇д̇хам̣ гад̣дханаад̇и ад̇т̇о. д̇ин̣авад̇т̇аарагасамат̇з саб̣б̣асан̇г̇аахиган̃ад̇д̇и жаад̇и ‘‘сун̣аад̇у мз, бханд̇з, сан̇гхо, амхаагам̣ бхан̣д̣анаж̇аад̇аанам̣…бз… табзд̇ваа г̇ихиббадисам̣яуд̇д̇а’’нд̇и (жуул̣ава. 212-213) звам̣ д̇ин̣авад̇т̇аарагасамат̇з гад̇аа саб̣б̣абатамаа саб̣б̣асан̇г̇аахиган̃ад̇д̇и жа.
Pavāraṇappaccukkaḍḍhanāti pavāraṇāya ukkassanā, uddhaṃ kaḍḍhanāti attho. Tiṇavatthārakasamathe sabbasaṅgāhikañatti cāti ‘‘suṇātu me, bhante, saṅgho, amhākaṃ bhaṇḍanajātānaṃ…pe… ṭhapetvā gihippaṭisaṃyutta’’nti (cūḷava. 212-213) evaṃ tiṇavatthārakasamathe katā sabbapaṭhamā sabbasaṅgāhikañatti ca.
алаабхааяа барисагганаад̣̇игзхийд̇и жад̇уннам̣ бажжаяаанам̣ алаабхад̇т̇ааяа баяог̇агаран̣аад̣̇игзхи. аад̣̇исад̣̇д̣̇зна ‘‘анад̇т̇ааяа барисагганам̣, анааваасааяа барисагганам̣, аггосанабарибхаасанам̣, бхигкуу бхигкуухи бхзд̣̇анам̣, б̣уд̣̇д̇хасса аван̣н̣абхан̣анам̣, д̇хаммасса аван̣н̣абхан̣анам̣, сан̇гхасса аван̣н̣абхан̣ана’’нд̇и (жуул̣ава. 265) авасзсам̣ сад̇д̇ан̇г̇ам̣ сан̇г̇ан̣хаад̇и. адтахан̇г̇зхи саманнааг̇ад̇ассаад̇и адтахи жзва ан̇г̇зхи згзгзнаби ан̇г̇зна жа саманнааг̇ад̇асса. асамбхог̇агаран̣ад̇т̇анд̇и д̇зна д̣̇иннасса д̣̇зяяад̇хаммасса аббадиг̇г̇ахан̣ад̇т̇ам̣. бад̇д̇аниггуж̇ж̇анавасзнаад̇и гаммаваажааяа бад̇д̇аниггуж̇ж̇анавасзна, на ад̇хомукадтабанавасзна. бад̇д̇уггуж̇ж̇анавасзнаад̇и зд̇т̇ааби зсзва наяо. д̇ассзваад̇и яо бад̇д̇аниггуж̇ж̇анавасзна гад̇аниссааран̣о, д̇ассзва убаасагасса. саммаавад̇д̇анд̇ассаад̇и язна саманнааг̇ад̇асса бад̇д̇уггуж̇ж̇анам̣, д̇зна саманнааг̇ад̇асса. саад̇и яат̇аавуд̇д̇аа ниссааран̣аа, осааран̣аа жа.
Alābhāya parisakkanādikehīti catunnaṃ paccayānaṃ alābhatthāya payogakaraṇādikehi. Ādisaddena ‘‘anatthāya parisakkanaṃ, anāvāsāya parisakkanaṃ, akkosanaparibhāsanaṃ, bhikkhū bhikkhūhi bhedanaṃ, buddhassa avaṇṇabhaṇanaṃ, dhammassa avaṇṇabhaṇanaṃ, saṅghassa avaṇṇabhaṇana’’nti (cūḷava. 265) avasesaṃ sattaṅgaṃ saṅgaṇhāti. Aṭṭhahaṅgehi samannāgatassāti aṭṭhahi ceva aṅgehi ekekenapi aṅgena ca samannāgatassa. Asambhogakaraṇatthanti tena dinnassa deyyadhammassa appaṭiggahaṇatthaṃ. Pattanikkujjanavasenāti kammavācāya pattanikkujjanavasena, na adhomukhaṭṭhapanavasena. Pattukkujjanavasenāti etthāpi eseva nayo. Tassevāti yo pattanikkujjanavasena katanissāraṇo, tasseva upāsakassa. Sammāvattantassāti yena samannāgatassa pattukkujjanaṃ, tena samannāgatassa. Sāti yathāvuttā nissāraṇā, osāraṇā ca.
суужияаад̣̇иаббамад̇д̇агам̣ д̇ам̣д̇ад̣̇ад̇т̇игаанам̣ виссаж̇ж̇зд̇и д̣̇зд̇ийд̇и аббамад̇д̇агависсаж̇ж̇аго. саадияаг̇г̇аахаабагод̇и вассигасаадияаг̇г̇аахаабаго. гаммам̣ гаронд̇з аараамигз бзсанад̇т̇ааяа д̣̇аад̇аб̣б̣аа саммуд̇и аараамигабзсагасаммуд̇и. зса наяо сааман̣зрабзсагасаммуд̇ийд̇и зд̇т̇ааби.
Sūciyādiappamattakaṃ taṃtadatthikānaṃ vissajjeti detīti appamattakavissajjako. Sāṭiyaggāhāpakoti vassikasāṭiyaggāhāpako. Kammaṃ karonte ārāmike pesanatthāya dātabbā sammuti ārāmikapesakasammuti. Esa nayo sāmaṇerapesakasammutīti etthāpi.
д̇аж̇ж̇анийяагаммаад̣̇ийнам̣ сад̇д̇аннанд̇и д̇аж̇ж̇анийяам̣, нияасам̣, баб̣б̣ааж̇анийяам̣, бадисааран̣ийяам̣, д̇ивид̇хан̃жа угкзбанийяанд̇и д̇аж̇ж̇анийяаад̣̇ийнам̣ сад̇д̇аннам̣. адтаяаавад̇ад̇ияагаад̇и бхигкуунам̣ васзна жад̇д̇ааро, бхигкунийнам̣ васзна жад̇д̇аарод̇и адта сан̇гхаад̣̇исзсаа.
Tajjanīyakammādīnaṃ sattannanti tajjanīyaṃ, niyasaṃ, pabbājanīyaṃ, paṭisāraṇīyaṃ, tividhañca ukkhepanīyanti tajjanīyādīnaṃ sattannaṃ. Aṭṭhayāvatatiyakāti bhikkhūnaṃ vasena cattāro, bhikkhunīnaṃ vasena cattāroti aṭṭha saṅghādisesā.
н̃ад̇д̇игаммаад̣̇ивасзнаад̇и н̃ад̇д̇игамман̃ад̇д̇ид̣̇уд̇ияагамман̃ад̇д̇ижад̇уд̇т̇агаммавасзна. ‘‘гарияамаанам̣ д̣̇ал̣хад̇арам̣ ход̇и, д̇асмаа гаад̇аб̣б̣а’’нд̇и згажжз вад̣̇анд̇и. звам̣ бана сад̇и гаммасан̇гаро ход̇и, д̇асмаа на гаад̇аб̣б̣анд̇и бадигкид̇д̇амзва. сажз бана агкарабарихийнам̣ ваа бад̣̇абарихийнам̣ ваа д̣̇уруд̇д̇абад̣̇ам̣ ваа ход̇и, д̇асса сод̇ханад̇т̇ам̣ бунаббунам̣ вад̇д̇ум̣ ваддад̇и. ид̣̇ам̣ агуббагаммасса д̣̇ал̣хийгаммам̣ ход̇и, губбагаммз гаммам̣ худ̇ваа д̇идтад̇и. сагалагкан̣знзваад̇и н̃ад̇д̇ин̃жа жад̇ассо жа гаммаваажааяо саавзд̇ваава. на сзсагаммавасзнаад̇и абалоганагаммаад̣̇инаа авасзсагаммавасзна на гаад̇аб̣б̣ам̣.
Ñattikammādivasenāti ñattikammañattidutiyakammañatticatutthakammavasena. ‘‘Kariyamānaṃ daḷhataraṃ hoti, tasmā kātabba’’nti ekacce vadanti. Evaṃ pana sati kammasaṅkaro hoti, tasmā na kātabbanti paṭikkhittameva. Sace pana akkharaparihīnaṃ vā padaparihīnaṃ vā duruttapadaṃ vā hoti, tassa sodhanatthaṃ punappunaṃ vattuṃ vaṭṭati. Idaṃ akuppakammassa daḷhīkammaṃ hoti, kuppakamme kammaṃ hutvā tiṭṭhati. Sakalakkhaṇenevāti ñattiñca catasso ca kammavācāyo sāvetvāva. Na sesakammavasenāti apalokanakammādinā avasesakammavasena na kātabbaṃ.
гаммаббадиб̣ааханасигкаабад̣̇аван̣н̣анаа нидтид̇аа.
Kammappaṭibāhanasikkhāpadavaṇṇanā niṭṭhitā.
