கம்மாரப⁴ண்டு³வத்தா²தி³கதா²

98-9. கம்மாரப⁴ண்டூ³தி துலாதா⁴ரமுண்ட³கோ ஸுவண்ணகாரபுத்தோ, பஞ்சஸிகோ² தருணதா³ரகோதி வுத்தங் ஹோதி. ஸங்க⁴ங் அபலோகேதுங் ப⁴ண்டு³கம்மாயாதி ஸங்க⁴ங் ப⁴ண்டு³கம்மத்தா²ய ஆபுச்சி²துங் அனுஜானாமீதி அத்தோ². தத்ராயங் ஆபுச்ச²னவிதி⁴ – ஸீமாபரியாபன்னே பி⁴க்கூ² ஸன்னிபாதெத்வா பப்³ப³ஜ்ஜாபெக்க²ங் தத்த² நெத்வா ‘‘ஸங்க⁴ங் ப⁴ந்தே இமஸ்ஸ தா³ரகஸ்ஸ ப⁴ண்டு³கம்மங் ஆபுச்சா²மீ’’தி திக்க²த்துங் வா த்³விக்க²த்துங் வா ஸகிங் வா வத்தப்³ப³ங். எத்த² ச ‘‘இமஸ்ஸ தா³ரகஸ்ஸ ப⁴ண்டு³கம்மங் ஆபுச்சா²மீ’’திபி ‘‘இமஸ்ஸ ஸமணகரணங் ஆபுச்சா²மீ’’திபி ‘‘இமஸ்ஸ பப்³பா³ஜனங் ஆபுச்சா²மீ’’திபி ‘‘அயங் ஸமணோ ஹோதுகாமோ’’திபி ‘‘அயங் பப்³ப³ஜிதுகாமோ’’திபி வத்துங் வட்டதியேவ.

ஸசே ஸபா⁴க³ட்டா²னங் ஹோதி, த³ஸ வா வீஸங் வா திங்ஸங் வா பி⁴க்கூ² வஸந்தீதி பரிச்சே²தோ³ பஞ்ஞாயதி, தேஸங் டி²தோகாஸங் வா நிஸின்னோகாஸங் வா க³ந்த்வாபி புரிமனயேனேவ ஆபுச்சி²தப்³ப³ங். பப்³ப³ஜ்ஜாபெக்க²ங் வினாவ த³ஹரபி⁴க்கூ² வா ஸாமணேரே வா பேஸெத்வாபி ‘‘ஏகோ ப⁴ந்தே பப்³ப³ஜ்ஜாபெக்கோ² அத்தி² தஸ்ஸ ப⁴ண்டு³கம்மங் ஆபுச்சா²மா’’திஆதி³னா நயேன ஆபுச்சா²பேதுங் வட்டதி.

ஸசே கேசி பி⁴க்கூ² ஸேனாஸனங் வா கு³ம்பா³தீ³னி வா பவிஸித்வா நித்³தா³யந்தி வா ஸமணத⁴ம்மங் வா கரொந்தி, ஆபுச்ச²கா ச பரியேஸந்தாபி அதி³ஸ்வா ‘‘ஸப்³பே³ ஆபுச்சி²தா அம்ஹேஹீ’’தி ஸஞ்ஞினோ ஹொந்தி, பப்³ப³ஜ்ஜா நாம லஹுகங் கம்மங், தஸ்மா பப்³ப³ஜிதோ ஸுபப்³ப³ஜிதோவ பப்³பா³ஜெந்தஸ்ஸாபி அனாபத்தி.

ஸசே பன மஹாவிஹாரோ ஹோதி அனேகபி⁴க்கு²ஸஹஸ்ஸாவாஸோ, ஸப்³பே³ பி⁴க்கூ² ஸன்னிபாதேதும்பி து³க்கரங், பகே³வ படிபாடியா ஆபுச்சி²துங், க²ண்ட³ஸீமாயங் வா ட²த்வா நதீ³ஸமுத்³தா³தீ³னி வா க³ந்த்வா பப்³பா³ஜேதப்³போ³. யோ பன நவமுண்டோ³ வா ஹோதி விப்³ப⁴ந்தகோ வா நிக³ண்டா²தீ³ஸு அஞ்ஞதரோ வா த்³வங்கு³லகேஸோ வா ஊனத்³வங்கு³லகேஸோ வா, தஸ்ஸ கேஸச்சே²த³னகிச்சங் நத்தி², தஸ்மா ப⁴ண்டு³கம்மங் அனாபுச்சி²த்வாபி தாதி³ஸங் பப்³பா³ஜேதுங் வட்டதி. த்³வங்கு³லாதிரித்தகேஸோ பன யோ ஹோதி அந்தமஸோ ஏகஸிகா²மத்தத⁴ரோபி, ஸோ ப⁴ண்டு³கம்மங் ஆபுச்சி²த்வாவ பப்³பா³ஜேதப்³போ³. உபாலிவத்து² மஹாவிப⁴ங்கே³ வுத்தனயமேவ.

100. அஹிவாதகரோகே³னாதி மாரிப்³யாதி⁴னா; யத்ர ஹி ஸோ ரோகோ³ உப்பஜ்ஜதி, தங் குலங் த்³விபத³சதுப்பத³ங் ஸப்³ப³ங் நஸ்ஸதி, யோ பி⁴த்திங் வா ச²த³னங் வா பி⁴ந்தி³த்வா பலாயதி, திரோகா³மாதி³க³தோ வா ஹோதி, ஸோ முச்சதி. ததா² செத்த² பிதாபுத்தா முச்சிங்ஸு. தேன வுத்தங் – ‘‘பிதாபுத்தகா ஸேஸா ஹொந்தீ’’தி.

காகுட்³டே³பகந்தி யோ வாமஹத்தே²ன லெட்³டு³ங் க³ஹெத்வா நிஸின்னோ ஸக்கோதி ஆக³தாக³தே காகே உட்³டா³பெத்வா புரதோ நிக்கி²த்தங் ப⁴த்தங் பு⁴ஞ்ஜிதுங், அயங் காகுட்³டே³பகோ நாம, தங் பப்³பா³ஜேதுங் வட்டதி.

102. இத்தரோதி அப்பமத்தகோ; கதிபாஹமேவ வாஸோ ப⁴விஸ்ஸதீதி அத்தோ².

103. ஓக³ணேனாதி பரிஹீனக³ணேன; அப்பமத்தகேன பி⁴க்கு²ஸங்கே⁴னாதி அத்தோ². அப்³யத்தேன யாவஜீவந்தி எத்த² ஸசாயங் வுட்³ட⁴தரங் ஆசரியங் ந லப⁴தி, உபஸம்பதா³ய ஸட்டி²வஸ்ஸோ வா ஸத்ததிவஸ்ஸோ வா ஹோது, நவகதரஸ்ஸாபி ப்³யத்தஸ்ஸ ஸந்திகே உக்குடிகங் நிஸீதி³த்வா அஞ்ஜலிங் பக்³க³ஹெத்வா ‘‘ஆசரியோ மே ஆவுஸோ ஹோஹி, ஆயஸ்மதோ நிஸ்ஸாய வச்சா²மீ’’தி ஏவங் திக்க²த்துங் வத்வா நிஸ்ஸயோ க³ஹேதப்³போ³வ. கா³மப்பவேஸனங் ஆபுச்ச²ந்தேனாபி உக்குடிகங் நிஸீதி³த்வா அஞ்ஜலிங் பக்³க³ஹெத்வா கா³மப்பவேஸனங் ஆபுச்சா²மி ஆசரியா’’தி வத்தப்³ப³ங். ஏஸ நயோ ஸப்³ப³ஆபுச்ச²னேஸு. பஞ்சகச²க்கேஸு செத்த² யத்தகங் ஸுதங் நிஸ்ஸயமுத்தகஸ்ஸ இச்சி²தப்³ப³ங், தங் பி⁴க்கு²னோவாத³கவண்ணனாயங் வுத்தங். தஸ்ஸ நத்தி²தாய ச அப்பஸ்ஸுதோ; அத்தி²தாய ச ப³ஹுஸ்ஸுதோதி வேதி³தப்³போ³. ஸேஸங் வுத்தனயேனேவ.

கம்மாரப⁴ண்டு³வத்தா²தி³கதா² நிட்டி²தா.