| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
কম্মারভণ্ডুৰত্থাদিকথা
Kammārabhaṇḍuvatthādikathā
৯৮-৯. কম্মারভণ্ডূতি তুলাধারমুণ্ডকো সুৰণ্ণকারপুত্তো, পঞ্চসিখো তরুণদারকোতি ৰুত্তং হোতি। সঙ্ঘং অপলোকেতুং ভণ্ডুকম্মাযাতি সঙ্ঘং ভণ্ডুকম্মত্থায আপুচ্ছিতুং অনুজানামীতি অত্থো। তত্রাযং আপুচ্ছনৰিধি – সীমাপরিযাপন্নে ভিক্খূ সন্নিপাতেত্ৰা পব্বজ্জাপেক্খং তত্থ নেত্ৰা ‘‘সঙ্ঘং ভন্তে ইমস্স দারকস্স ভণ্ডুকম্মং আপুচ্ছামী’’তি তিক্খত্তুং ৰা দ্ৰিক্খত্তুং ৰা সকিং ৰা ৰত্তব্বং। এত্থ চ ‘‘ইমস্স দারকস্স ভণ্ডুকম্মং আপুচ্ছামী’’তিপি ‘‘ইমস্স সমণকরণং আপুচ্ছামী’’তিপি ‘‘ইমস্স পব্বাজনং আপুচ্ছামী’’তিপি ‘‘অযং সমণো হোতুকামো’’তিপি ‘‘অযং পব্বজিতুকামো’’তিপি ৰত্তুং ৰট্টতিযেৰ।
98-9.Kammārabhaṇḍūti tulādhāramuṇḍako suvaṇṇakāraputto, pañcasikho taruṇadārakoti vuttaṃ hoti. Saṅghaṃ apaloketuṃ bhaṇḍukammāyāti saṅghaṃ bhaṇḍukammatthāya āpucchituṃ anujānāmīti attho. Tatrāyaṃ āpucchanavidhi – sīmāpariyāpanne bhikkhū sannipātetvā pabbajjāpekkhaṃ tattha netvā ‘‘saṅghaṃ bhante imassa dārakassa bhaṇḍukammaṃ āpucchāmī’’ti tikkhattuṃ vā dvikkhattuṃ vā sakiṃ vā vattabbaṃ. Ettha ca ‘‘imassa dārakassa bhaṇḍukammaṃ āpucchāmī’’tipi ‘‘imassa samaṇakaraṇaṃ āpucchāmī’’tipi ‘‘imassa pabbājanaṃ āpucchāmī’’tipi ‘‘ayaṃ samaṇo hotukāmo’’tipi ‘‘ayaṃ pabbajitukāmo’’tipi vattuṃ vaṭṭatiyeva.
সচে সভাগট্ঠানং হোতি, দস ৰা ৰীসং ৰা তিংসং ৰা ভিক্খূ ৰসন্তীতি পরিচ্ছেদো পঞ্ঞাযতি, তেসং ঠিতোকাসং ৰা নিসিন্নোকাসং ৰা গন্ত্ৰাপি পুরিমনযেনেৰ আপুচ্ছিতব্বং। পব্বজ্জাপেক্খং ৰিনাৰ দহরভিক্খূ ৰা সামণেরে ৰা পেসেত্ৰাপি ‘‘একো ভন্তে পব্বজ্জাপেক্খো অত্থি তস্স ভণ্ডুকম্মং আপুচ্ছামা’’তিআদিনা নযেন আপুচ্ছাপেতুং ৰট্টতি।
Sace sabhāgaṭṭhānaṃ hoti, dasa vā vīsaṃ vā tiṃsaṃ vā bhikkhū vasantīti paricchedo paññāyati, tesaṃ ṭhitokāsaṃ vā nisinnokāsaṃ vā gantvāpi purimanayeneva āpucchitabbaṃ. Pabbajjāpekkhaṃ vināva daharabhikkhū vā sāmaṇere vā pesetvāpi ‘‘eko bhante pabbajjāpekkho atthi tassa bhaṇḍukammaṃ āpucchāmā’’tiādinā nayena āpucchāpetuṃ vaṭṭati.
সচে কেচি ভিক্খূ সেনাসনং ৰা গুম্বাদীনি ৰা পৰিসিত্ৰা নিদ্দাযন্তি ৰা সমণধম্মং ৰা করোন্তি, আপুচ্ছকা চ পরিযেসন্তাপি অদিস্ৰা ‘‘সব্বে আপুচ্ছিতা অম্হেহী’’তি সঞ্ঞিনো হোন্তি, পব্বজ্জা নাম লহুকং কম্মং, তস্মা পব্বজিতো সুপব্বজিতোৰ পব্বাজেন্তস্সাপি অনাপত্তি।
Sace keci bhikkhū senāsanaṃ vā gumbādīni vā pavisitvā niddāyanti vā samaṇadhammaṃ vā karonti, āpucchakā ca pariyesantāpi adisvā ‘‘sabbe āpucchitā amhehī’’ti saññino honti, pabbajjā nāma lahukaṃ kammaṃ, tasmā pabbajito supabbajitova pabbājentassāpi anāpatti.
সচে পন মহাৰিহারো হোতি অনেকভিক্খুসহস্সাৰাসো, সব্বে ভিক্খূ সন্নিপাতেতুম্পি দুক্করং, পগেৰ পটিপাটিযা আপুচ্ছিতুং, খণ্ডসীমাযং ৰা ঠত্ৰা নদীসমুদ্দাদীনি ৰা গন্ত্ৰা পব্বাজেতব্বো। যো পন নৰমুণ্ডো ৰা হোতি ৰিব্ভন্তকো ৰা নিগণ্ঠাদীসু অঞ্ঞতরো ৰা দ্ৰঙ্গুলকেসো ৰা ঊনদ্ৰঙ্গুলকেসো ৰা, তস্স কেসচ্ছেদনকিচ্চং নত্থি, তস্মা ভণ্ডুকম্মং অনাপুচ্ছিত্ৰাপি তাদিসং পব্বাজেতুং ৰট্টতি। দ্ৰঙ্গুলাতিরিত্তকেসো পন যো হোতি অন্তমসো একসিখামত্তধরোপি, সো ভণ্ডুকম্মং আপুচ্ছিত্ৰাৰ পব্বাজেতব্বো। উপালিৰত্থু মহাৰিভঙ্গে ৰুত্তনযমেৰ।
Sace pana mahāvihāro hoti anekabhikkhusahassāvāso, sabbe bhikkhū sannipātetumpi dukkaraṃ, pageva paṭipāṭiyā āpucchituṃ, khaṇḍasīmāyaṃ vā ṭhatvā nadīsamuddādīni vā gantvā pabbājetabbo. Yo pana navamuṇḍo vā hoti vibbhantako vā nigaṇṭhādīsu aññataro vā dvaṅgulakeso vā ūnadvaṅgulakeso vā, tassa kesacchedanakiccaṃ natthi, tasmā bhaṇḍukammaṃ anāpucchitvāpi tādisaṃ pabbājetuṃ vaṭṭati. Dvaṅgulātirittakeso pana yo hoti antamaso ekasikhāmattadharopi, so bhaṇḍukammaṃ āpucchitvāva pabbājetabbo. Upālivatthu mahāvibhaṅge vuttanayameva.
১০০. অহিৰাতকরোগেনাতি মারিব্যাধিনা; যত্র হি সো রোগো উপ্পজ্জতি, তং কুলং দ্ৰিপদচতুপ্পদং সব্বং নস্সতি, যো ভিত্তিং ৰা ছদনং ৰা ভিন্দিত্ৰা পলাযতি, তিরোগামাদিগতো ৰা হোতি, সো মুচ্চতি। তথা চেত্থ পিতাপুত্তা মুচ্চিংসু। তেন ৰুত্তং – ‘‘পিতাপুত্তকা সেসা হোন্তী’’তি।
100.Ahivātakarogenāti māribyādhinā; yatra hi so rogo uppajjati, taṃ kulaṃ dvipadacatuppadaṃ sabbaṃ nassati, yo bhittiṃ vā chadanaṃ vā bhinditvā palāyati, tirogāmādigato vā hoti, so muccati. Tathā cettha pitāputtā mucciṃsu. Tena vuttaṃ – ‘‘pitāputtakā sesā hontī’’ti.
কাকুড্ডেপকন্তি যো ৰামহত্থেন লেড্ডুং গহেত্ৰা নিসিন্নো সক্কোতি আগতাগতে কাকে উড্ডাপেত্ৰা পুরতো নিক্খিত্তং ভত্তং ভুঞ্জিতুং, অযং কাকুড্ডেপকো নাম, তং পব্বাজেতুং ৰট্টতি।
Kākuḍḍepakanti yo vāmahatthena leḍḍuṃ gahetvā nisinno sakkoti āgatāgate kāke uḍḍāpetvā purato nikkhittaṃ bhattaṃ bhuñjituṃ, ayaṃ kākuḍḍepako nāma, taṃ pabbājetuṃ vaṭṭati.
১০২. ইত্তরোতি অপ্পমত্তকো; কতিপাহমেৰ ৰাসো ভৰিস্সতীতি অত্থো।
102.Ittaroti appamattako; katipāhameva vāso bhavissatīti attho.
১০৩. ওগণেনাতি পরিহীনগণেন; অপ্পমত্তকেন ভিক্খুসঙ্ঘেনাতি অত্থো। অব্যত্তেন যাৰজীৰন্তি এত্থ সচাযং ৰুড্ঢতরং আচরিযং ন লভতি, উপসম্পদায সট্ঠিৰস্সো ৰা সত্ততিৰস্সো ৰা হোতু, নৰকতরস্সাপি ব্যত্তস্স সন্তিকে উক্কুটিকং নিসীদিত্ৰা অঞ্জলিং পগ্গহেত্ৰা ‘‘আচরিযো মে আৰুসো হোহি, আযস্মতো নিস্সায ৰচ্ছামী’’তি এৰং তিক্খত্তুং ৰত্ৰা নিস্সযো গহেতব্বোৰ। গামপ্পৰেসনং আপুচ্ছন্তেনাপি উক্কুটিকং নিসীদিত্ৰা অঞ্জলিং পগ্গহেত্ৰা গামপ্পৰেসনং আপুচ্ছামি আচরিযা’’তি ৰত্তব্বং। এস নযো সব্বআপুচ্ছনেসু। পঞ্চকছক্কেসু চেত্থ যত্তকং সুতং নিস্সযমুত্তকস্স ইচ্ছিতব্বং, তং ভিক্খুনোৰাদকৰণ্ণনাযং ৰুত্তং। তস্স নত্থিতায চ অপ্পস্সুতো; অত্থিতায চ বহুস্সুতোতি ৰেদিতব্বো। সেসং ৰুত্তনযেনেৰ।
103.Ogaṇenāti parihīnagaṇena; appamattakena bhikkhusaṅghenāti attho. Abyattena yāvajīvanti ettha sacāyaṃ vuḍḍhataraṃ ācariyaṃ na labhati, upasampadāya saṭṭhivasso vā sattativasso vā hotu, navakatarassāpi byattassa santike ukkuṭikaṃ nisīditvā añjaliṃ paggahetvā ‘‘ācariyo me āvuso hohi, āyasmato nissāya vacchāmī’’ti evaṃ tikkhattuṃ vatvā nissayo gahetabbova. Gāmappavesanaṃ āpucchantenāpi ukkuṭikaṃ nisīditvā añjaliṃ paggahetvā gāmappavesanaṃ āpucchāmi ācariyā’’ti vattabbaṃ. Esa nayo sabbaāpucchanesu. Pañcakachakkesu cettha yattakaṃ sutaṃ nissayamuttakassa icchitabbaṃ, taṃ bhikkhunovādakavaṇṇanāyaṃ vuttaṃ. Tassa natthitāya ca appassuto; atthitāya ca bahussutoti veditabbo. Sesaṃ vuttanayeneva.
কম্মারভণ্ডুৰত্থাদিকথা নিট্ঠিতা।
Kammārabhaṇḍuvatthādikathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
৩৫. কম্মারভণ্ডুৰত্থু • 35. Kammārabhaṇḍuvatthu
৩৬. উপালিদারকৰত্থু • 36. Upālidārakavatthu
৩৭. অহিৰাতকরোগৰত্থু • 37. Ahivātakarogavatthu
৩৯. আহুন্দরিকৰত্থু • 39. Āhundarikavatthu
৪০. নিস্সযমুচ্চনককথা • 40. Nissayamuccanakakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / নিস্সযমুচ্চনককথাৰণ্ণনা • Nissayamuccanakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / কম্মারভণ্ডুৰত্থাদিকথাৰণ্ণনা • Kammārabhaṇḍuvatthādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / কম্মারভণ্ডুৰত্থাদিকথাৰণ্ণনা • Kammārabhaṇḍuvatthādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
৩৫. কম্মারভণ্ডুৰত্থুআদিকথা • 35. Kammārabhaṇḍuvatthuādikathā
৪০. নিস্সযমুচ্চনককথা • 40. Nissayamuccanakakathā
