| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
35. கம்மாரப⁴ண்டு³வத்து²ஆதி³கதா²
35. Kammārabhaṇḍuvatthuādikathā
98. துலாதா⁴ரமுண்ட³கோதி மானப⁴ண்ட³தா⁴ரோ முண்ட³கோ. இமினா கம்மாரப⁴ண்டூ³தி எத்த² கம்மாரஸத்³தோ³ துலாதா⁴ரபரியாயோ, ப⁴ண்டு³ஸத்³தோ³ முண்ட³கபரியாயோதி த³ஸ்ஸேதி. துலாதா⁴ரோ ஹி அலங்காரவிகதிகரணத்தா²ய கம்மங் அரதி ஜானாதீதி கம்மாரோதி வுச்சதி. முண்ட³கோ ப⁴ண்டீ³யதி ‘‘முண்டோ³’’தி பரிபா⁴ஸீயதீதி ப⁴ண்டூ³தி வுச்சதி. ‘‘ஸுவண்ணகாரபுத்தோ’’தி இமினா தஸ்ஸ ஸரூபங் த³ஸ்ஸேதி. அபலோகேதுந்தி எத்த² அபபுப்³போ³ லோகஸத்³தோ³ ஆபுச்ச²னத்தோ²தி ஆஹ ‘‘ஆபுச்சி²து’’ந்தி. ‘‘ப⁴ண்டு³கம்மத்தா²யா’’தி இமினா ப⁴ண்டு³கம்மாயாதி எத்த² தத³த்தே² சதுத்தீ²தி த³ஸ்ஸேதி. தத்ராதி ‘‘ஸங்க⁴ங் அபலோகேது’’ந்திஆதி³வசனே. ஸீமாபரியாபன்னேதி விஹாரஸீமாய வா உபசாரஸீமாய வா பரியாபன்னே. தத்தா²தி பி⁴க்கூ²னங் ஸன்னிபாதட்டா²னங். எத்த² சாதி ஆபுச்ச²னே ச. வத்துங் வட்டதியேவாதி பஞ்சஸு வாக்யேஸு யங்கிஞ்சி வாக்யங் கதே²துங் வட்டதியேவ. பிஸத்³தே³ன ‘‘இமஸ்ஸ முண்ட³கம்மங் ஆபுச்சா²மீ’’தி வாக்யம்பி ஸங்க³ண்ஹாதி.
98.Tulādhāramuṇḍakoti mānabhaṇḍadhāro muṇḍako. Iminā kammārabhaṇḍūti ettha kammārasaddo tulādhārapariyāyo, bhaṇḍusaddo muṇḍakapariyāyoti dasseti. Tulādhāro hi alaṅkāravikatikaraṇatthāya kammaṃ arati jānātīti kammāroti vuccati. Muṇḍako bhaṇḍīyati ‘‘muṇḍo’’ti paribhāsīyatīti bhaṇḍūti vuccati. ‘‘Suvaṇṇakāraputto’’ti iminā tassa sarūpaṃ dasseti. Apaloketunti ettha apapubbo lokasaddo āpucchanatthoti āha ‘‘āpucchitu’’nti. ‘‘Bhaṇḍukammatthāyā’’ti iminā bhaṇḍukammāyāti ettha tadatthe catutthīti dasseti. Tatrāti ‘‘saṅghaṃ apaloketu’’ntiādivacane. Sīmāpariyāpanneti vihārasīmāya vā upacārasīmāya vā pariyāpanne. Tatthāti bhikkhūnaṃ sannipātaṭṭhānaṃ. Ettha cāti āpucchane ca. Vattuṃ vaṭṭatiyevāti pañcasu vākyesu yaṃkiñci vākyaṃ kathetuṃ vaṭṭatiyeva. Pisaddena ‘‘imassa muṇḍakammaṃ āpucchāmī’’ti vākyampi saṅgaṇhāti.
தேஸந்தி வீஸதிஆதீ³னங் பி⁴க்கூ²னங். ‘‘த³ஹரபி⁴க்கூ² வா ஸாமணேரே வா’’தி இத³ங் ஆஸன்னவஸேன வுத்தங். கி³ஹிம்பி பேஸெத்வா ஆபுச்சா²பேதுங் வட்டதி. கஸ்மா? ‘‘பப்³ப³ஜ்ஜாபெக்க²ங் வினா வா’’தி வுத்தத்தா.
Tesanti vīsatiādīnaṃ bhikkhūnaṃ. ‘‘Daharabhikkhū vā sāmaṇere vā’’ti idaṃ āsannavasena vuttaṃ. Gihimpi pesetvā āpucchāpetuṃ vaṭṭati. Kasmā? ‘‘Pabbajjāpekkhaṃ vinā vā’’ti vuttattā.
பப்³பா³ஜெந்தஸ்ஸ அனாபத்தியேவ, ஸுபப்³ப³ஜிதோதி ஆஹ ‘‘பப்³பா³ஜெந்தஸ்ஸாபி அனாபத்தீ’’தி.
Pabbājentassa anāpattiyeva, supabbajitoti āha ‘‘pabbājentassāpi anāpattī’’ti.
ஆபுச்சி²தங் பகே³வாதி யோஜனா. க²ண்ட³ஸீமாயந்தி விஹாரஸீமாய வா உபசாரஸீமாய வா அப்³ப⁴ந்தரே டி²தாயங் க²ண்ட³ஸீமாயங். யோ பனாதி பப்³ப³ஜ்ஜாபெக்கோ² பன. விப்³ப⁴ந்தகோ வாதி நவவிப்³ப⁴ந்தகோ வா. பப்³ப³ஜிதானங் த்³வங்கு³லகேஸோ வட்டதீதி ஆஹ ‘‘த்³வங்கு³லகேஸோ வா’’தி. த்³வீஹி அங்கு³லீஹி அதிரித்தோ கேஸோ இமஸ்ஸாதி த்³வங்கு³லாதிரித்தகேஸோ. ஏகஸிகா²மத்தத⁴ரோபி ஹோதீதி யோஜனா.
Āpucchitaṃ pagevāti yojanā. Khaṇḍasīmāyanti vihārasīmāya vā upacārasīmāya vā abbhantare ṭhitāyaṃ khaṇḍasīmāyaṃ. Yo panāti pabbajjāpekkho pana. Vibbhantako vāti navavibbhantako vā. Pabbajitānaṃ dvaṅgulakeso vaṭṭatīti āha ‘‘dvaṅgulakeso vā’’ti. Dvīhi aṅgulīhi atiritto keso imassāti dvaṅgulātirittakeso. Ekasikhāmattadharopi hotīti yojanā.
100. மாரப்³யாதி⁴னாதி மாரணாபா³தோ⁴. ஸோ ஹி ஸத்தானங் மாரணட்டே²ன, விவித⁴ஸ்ஸ ச து³க்க²ஸ்ஸ ஆத³ஹட்டே²ன மாரப்³யாதீ⁴தி வுச்சதி. இமினா அஹிவாதகரோகே³னாதி எத்த² அஹிவிஸஸதி³ஸேன வாதேன பவத்தோ ரோகோ³ அஹிவாதகரோகோ³தி வுச்சதீதி த³ஸ்ஸேதி. தமத்த²ங் வித்தா²ரெந்தோ ஆஹ ‘‘யத்ர ஹீ’’திஆதி³. தத்த² யத்ராதி யஸ்மிங் குலே. ஸோ ரோகோ³ தஸ்மிங் குலே த்³விபதே³ சதுப்பதே³ பட²மங் க³ண்ஹாதி, பச்சா² கே³ஹஸாமிகே க³ண்ஹாதீதி த⁴ம்மபத³அட்ட²கதா²யங் (த⁴॰ ப॰ அட்ட²॰ 1.ஸாமாவதீவத்து²) வுத்தங். ததா²தி யதா² அஞ்ஞோ பி⁴த்திங் வா ச²த³னங் வா பி⁴ந்தி³த்வா பலாயித்வா திரோகா³மாதி³க³தோ வா ஹுத்வா முச்சதி, ததா². எத்த² ச குலே பிதாபுத்தா முச்சிங்ஸூதி அத்தோ².
100.Mārabyādhināti māraṇābādho. So hi sattānaṃ māraṇaṭṭhena, vividhassa ca dukkhassa ādahaṭṭhena mārabyādhīti vuccati. Iminā ahivātakarogenāti ettha ahivisasadisena vātena pavatto rogo ahivātakarogoti vuccatīti dasseti. Tamatthaṃ vitthārento āha ‘‘yatra hī’’tiādi. Tattha yatrāti yasmiṃ kule. So rogo tasmiṃ kule dvipade catuppade paṭhamaṃ gaṇhāti, pacchā gehasāmike gaṇhātīti dhammapadaaṭṭhakathāyaṃ (dha. pa. aṭṭha. 1.sāmāvatīvatthu) vuttaṃ. Tathāti yathā añño bhittiṃ vā chadanaṃ vā bhinditvā palāyitvā tirogāmādigato vā hutvā muccati, tathā. Ettha ca kule pitāputtā mucciṃsūti attho.
காகுட்³டே³பகந்தி எத்த² காகே உட்³டா³பேதீதி காகுட்³டே³பகோ, காகே வா உட்³டா³பெத்வா ப⁴த்தங் பு⁴ஞ்ஜிதுங் ஸக்கோதீதி காகுட்³டே³பகோதி வசனத்த²ங் த³ஸ்ஸெந்தோ ஆஹ ‘‘யோ வாமஹத்தே²னா’’திஆதி³. தத்த² உட்³டா³பெத்வாதி உத்³த⁴ங் ஆகாஸங் க³மனாபெத்வா. தந்தி காகுட்³டே³பகங்.
Kākuḍḍepakanti ettha kāke uḍḍāpetīti kākuḍḍepako, kāke vā uḍḍāpetvā bhattaṃ bhuñjituṃ sakkotīti kākuḍḍepakoti vacanatthaṃ dassento āha ‘‘yo vāmahatthenā’’tiādi. Tattha uḍḍāpetvāti uddhaṃ ākāsaṃ gamanāpetvā. Tanti kākuḍḍepakaṃ.
102. இத்தரஸத்³தோ³ அப்பமத்தகவாசகோ அனிப்ப²ன்னபாடிபதி³கோதி ஆஹ ‘‘அப்பமத்தகோ’’தி. ‘‘கதிபாஹமேவா’’தி இமினா தஸ்ஸ அத்த²ங் த³ஸ்ஸேதி.
102.Ittarasaddo appamattakavācako anipphannapāṭipadikoti āha ‘‘appamattako’’ti. ‘‘Katipāhamevā’’ti iminā tassa atthaṃ dasseti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
35. கம்மாரப⁴ண்டு³வத்து² • 35. Kammārabhaṇḍuvatthu
37. அஹிவாதகரோக³வத்து² • 37. Ahivātakarogavatthu
39. ஆஹுந்த³ரிகவத்து² • 39. Āhundarikavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கம்மாரப⁴ண்டு³வத்தா²தி³கதா² • Kammārabhaṇḍuvatthādikathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கம்மாரப⁴ண்டு³வத்தா²தி³கதா²வண்ணனா • Kammārabhaṇḍuvatthādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கம்மாரப⁴ண்டு³வத்தா²தி³கதா²வண்ணனா • Kammārabhaṇḍuvatthādikathāvaṇṇanā
