| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
10. කම්‌මසුත්‌තං
10. Kammasuttaṃ
263. ‘‘චතූහි, භික්‌ඛවෙ, ධම්‌මෙහි සමන්‌නාගතො බාලො අබ්‍යත්‌තො අසප්‌පුරිසො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො විඤ්‌ඤූනං, බහුඤ්‌ච අපුඤ්‌ඤං පසවති. කතමෙහි චතූහි? සාවජ්‌ජෙන කායකම්‌මෙන, සාවජ්‌ජෙන වචීකම්‌මෙන, සාවජ්‌ජෙන මනොකම්‌මෙන, සාවජ්‌ජාය දිට්‌ඨියා – ඉමෙහි ඛො, භික්‌ඛවෙ, චතූහි ධම්‌මෙහි සමන්‌නාගතො බාලො අබ්‍යත්‌තො අසප්‌පුරිසො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො විඤ්‌ඤූනං, බහුඤ්‌ච අපුඤ්‌ඤං පසවති.
263. ‘‘Catūhi, bhikkhave, dhammehi samannāgato bālo abyatto asappuriso khataṃ upahataṃ attānaṃ pariharati, sāvajjo ca hoti sānuvajjo viññūnaṃ, bahuñca apuññaṃ pasavati. Katamehi catūhi? Sāvajjena kāyakammena, sāvajjena vacīkammena, sāvajjena manokammena, sāvajjāya diṭṭhiyā – imehi kho, bhikkhave, catūhi dhammehi samannāgato bālo abyatto asappuriso khataṃ upahataṃ attānaṃ pariharati, sāvajjo ca hoti sānuvajjo viññūnaṃ, bahuñca apuññaṃ pasavati.
‘‘චතූහි, භික්‌ඛවෙ, ධම්‌මෙහි සමන්‌නාගතො පණ්‌ඩිතො වියත්‌තො සප්‌පුරිසො අක්‌ඛතං අනුපහතං අත්‌තානං පරිහරති, අනවජ්‌ජො ච හොති අනනුවජ්‌ජො විඤ්‌ඤූනං, බහුඤ්‌ච පුඤ්‌ඤං පසවති. කතමෙහි චතූහි? අනවජ්‌ජෙන කායකම්‌මෙන, අනවජ්‌ජෙන වචීකම්‌මෙන, අනවජ්‌ජෙන මනොකම්‌මෙන, අනවජ්‌ජාය දිට්‌ඨියා – ඉමෙහි ඛො, භික්‌ඛවෙ, චතූහි ධම්‌මෙහි සමන්‌නාගතො පණ්‌ඩිතො වියත්‌තො සප්‌පුරිසො අක්‌ඛතං අනුපහතං අත්‌තානං පරිහරති, අනවජ්‌ජො ච හොති අනනුවජ්‌ජො විඤ්‌ඤූනං, බහුඤ්‌ච පුඤ්‌ඤං පසවතී’’ති. දසමං.
‘‘Catūhi, bhikkhave, dhammehi samannāgato paṇḍito viyatto sappuriso akkhataṃ anupahataṃ attānaṃ pariharati, anavajjo ca hoti ananuvajjo viññūnaṃ, bahuñca puññaṃ pasavati. Katamehi catūhi? Anavajjena kāyakammena, anavajjena vacīkammena, anavajjena manokammena, anavajjāya diṭṭhiyā – imehi kho, bhikkhave, catūhi dhammehi samannāgato paṇḍito viyatto sappuriso akkhataṃ anupahataṃ attānaṃ pariharati, anavajjo ca hoti ananuvajjo viññūnaṃ, bahuñca puññaṃ pasavatī’’ti. Dasamaṃ.
අභිඤ්‌ඤාවග්‌ගො ඡට්‌ඨො.
Abhiññāvaggo chaṭṭho.
තස්‌සුද්‌දානං –
Tassuddānaṃ –
අභිඤ්‌ඤා පරියෙසනා, සඞ්‌ගහං මාලුක්‍යපුත්‌තො;
Abhiññā pariyesanā, saṅgahaṃ mālukyaputto;
කුලං ද්‌වෙ ච ආජානීයා, බලං අරඤ්‌ඤකම්‌මුනාති.
Kulaṃ dve ca ājānīyā, balaṃ araññakammunāti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5-10. කුලසුත්‌තාදිවණ්‌ණනා • 5-10. Kulasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4-10. මාලුක්‍යපුත්‌තසුත්‌තාදිවණ්‌ණනා • 4-10. Mālukyaputtasuttādivaṇṇanā
