| Library / Tipiṭaka / д̇ибидага • Tipiṭaka / винаяавинижчаяа-уд̇д̇аравинижчаяа • Vinayavinicchaya-uttaravinicchaya |
гаммадтаанабхааванаавид̇хаанагат̇аа
Kammaṭṭhānabhāvanāvidhānakathā
3125.
3125.
баамогкз баад̇имогкасмим̣, мукз могкаббавзсанз;
Pāmokkhe pātimokkhasmiṃ, mukhe mokkhappavesane;
саб̣б̣ад̣̇угкагкаяз вуд̇д̇з, вуд̇д̇амзвид̇арад̇д̇аяам̣.
Sabbadukkhakkhaye vutte, vuttamevitarattayaṃ.
3126.
3126.
ид̣̇ам̣ жад̇уб̣б̣ид̇хам̣ сийлам̣, н̃ад̇ваа д̇ад̇т̇а бад̇идтид̇о;
Idaṃ catubbidhaṃ sīlaṃ, ñatvā tattha patiṭṭhito;
самаад̇хим̣ буна бхаавзд̇ваа, бан̃н̃ааяа баримужжад̇и.
Samādhiṃ puna bhāvetvā, paññāya parimuccati.
3127.
3127.
д̣̇асаануссад̇ияо вуд̇д̇аа, гасин̣аа жа д̣̇асаасубхаа;
Dasānussatiyo vuttā, kasiṇā ca dasāsubhā;
жад̇ассо аббаман̃н̃ааяо, д̇ат̇ааруббаа барад̣̇ваяам̣.
Catasso appamaññāyo, tathāruppā paradvayaṃ.
3128.
3128.
ижжзвам̣ бана саб̣б̣амби, жад̇д̇аалийсавид̇хам̣ сияаа;
Iccevaṃ pana sabbampi, cattālīsavidhaṃ siyā;
гаммадтаанам̣ самуд̣̇д̣̇идтам̣, маммадтаанам̣ манобхуно.
Kammaṭṭhānaṃ samuddiṭṭhaṃ, mammaṭṭhānaṃ manobhuno.
3129.
3129.
убажаараббанаад̇о жа, жхаанабхзд̣̇аа ад̇иггамаа;
Upacārappanāto ca, jhānabhedā atikkamā;
вад̣дханаавад̣дханаа жааби, д̇ат̇аарамман̣абхуумид̇о.
Vaḍḍhanāvaḍḍhanā cāpi, tathārammaṇabhūmito.
3130.
3130.
г̇ахан̣аа бажжаяаа бхияяо, д̇ат̇аа жарияаанугуулад̇о;
Gahaṇā paccayā bhiyyo, tathā cariyānukūlato;
висзсо аяамзд̇зсу, вин̃н̃аад̇аб̣б̣о вибхаавинаа.
Viseso ayametesu, viññātabbo vibhāvinā.
3131.
3131.
адтаануссад̇ияо сан̃н̃аа-вавад̇т̇аанан̃жа д̇ад̇т̇имз;
Aṭṭhānussatiyo saññā-vavatthānañca tatthime;
убажааравахаа, сзсаа, д̇им̣са жхаанавахаа мад̇аа.
Upacāravahā, sesā, tiṃsa jhānavahā matā.
3132.
3132.
батамаж̇жхаанигаа д̇ад̇т̇а, асубхаа гааяаг̇ад̇аасад̇и;
Paṭhamajjhānikā tattha, asubhā kāyagatāsati;
аанаабаанан̃жа гасин̣аа, жад̇уггаж̇жхаанигаа имз.
Ānāpānañca kasiṇā, catukkajjhānikā ime.
3133.
3133.
д̇игаж̇жхаанаани д̇иссова, аббаман̃н̃аат̇а бажчимаа;
Tikajjhānāni tissova, appamaññātha pacchimā;
жад̇д̇аароби жа ааруббаа, жад̇уд̇т̇аж̇жхаанигаа мад̇аа.
Cattāropi ca āruppā, catutthajjhānikā matā.
3134.
3134.
ад̇иггамо д̣̇вид̇хаа вуд̇д̇о, ан̇г̇аарамман̣ад̇оби жа;
Atikkamo dvidhā vutto, aṅgārammaṇatopi ca;
жад̇уггад̇игажхаанзсу, ан̇г̇аад̇иггамад̇аа мад̇аа.
Catukkatikajhānesu, aṅgātikkamatā matā.
3135.
3135.
жад̇уд̇т̇аа аббаман̃н̃ааби, ан̇г̇аад̇иггамад̇о сияаа;
Catutthā appamaññāpi, aṅgātikkamato siyā;
аарамман̣амад̇иггамма, ааруббаа бана ж̇ааяарз.
Ārammaṇamatikkamma, āruppā pana jāyare.
3136.
3136.
гасин̣аани д̣̇асзвзд̇т̇а, вад̣дхзд̇аб̣б̣аани яог̇инаа;
Kasiṇāni dasevettha, vaḍḍhetabbāni yoginā;
сзсам̣ бана жа саб̣б̣амби, на вад̣дхзд̇аб̣б̣амзва д̇ам̣.
Sesaṃ pana ca sabbampi, na vaḍḍhetabbameva taṃ.
3137.
3137.
нимид̇д̇аарамман̣аа д̇ад̇т̇а, гасин̣аа жа д̣̇асаасубхаа;
Nimittārammaṇā tattha, kasiṇā ca dasāsubhā;
гааяз сад̇аанаабаанан̃жа, б̣аавийсад̇и бхаванд̇имз.
Kāye satānāpānañca, bāvīsati bhavantime.
3138.
3138.
сзсаануссад̇ияо адта, сан̃н̃аа д̇хаад̇увавад̇т̇анам̣;
Sesānussatiyo aṭṭha, saññā dhātuvavatthanaṃ;
вин̃н̃аан̣ам̣ нзвасан̃н̃аа жа, д̣̇аса д̣̇вз бхааваг̇ожараа.
Viññāṇaṃ nevasaññā ca, dasa dve bhāvagocarā.
3139.
3139.
жад̇ассо аббаман̃н̃ааяо, д̣̇вз жа ааруббамаанасаа;
Catasso appamaññāyo, dve ca āruppamānasā;
имз д̇хаммаа винид̣̇д̣̇идтаа, ча навад̇д̇аб̣б̣аг̇ожараа.
Ime dhammā viniddiṭṭhā, cha navattabbagocarā.
3140.
3140.
д̣̇асаасубхаа бадиггуула-сан̃н̃аа гааяаг̇ад̇аасад̇и;
Dasāsubhā paṭikkūla-saññā kāyagatāsati;
д̣̇звзсу на бавад̇д̇анд̇и, д̣̇ваад̣̇асзваад̇и бхуумид̇о.
Devesu na pavattanti, dvādasevāti bhūmito.
3141.
3141.
д̇аани д̣̇ваад̣̇аса бхияяо жа, аанаабаанасад̇ийби жа;
Tāni dvādasa bhiyyo ca, ānāpānasatīpi ca;
саб̣б̣асо д̇зраса вааби, б̣рахмалогз на ж̇ааяарз.
Sabbaso terasa vāpi, brahmaloke na jāyare.
3142.
3142.
табзд̇ваа жад̇урааруббз, аруубааважарз гира;
Ṭhapetvā caturāruppe, arūpāvacare kira;
ан̃н̃з бана на ж̇ааяанд̇и, саб̣б̣з ж̇ааяанд̇и маанусз.
Aññe pana na jāyanti, sabbe jāyanti mānuse.
3143.
3143.
жад̇уд̇т̇ам̣ гасин̣ам̣ хид̇ваа, гасин̣аа жа д̣̇асаасубхаа;
Catutthaṃ kasiṇaṃ hitvā, kasiṇā ca dasāsubhā;
д̣̇идтзнзва г̇ахзд̇аб̣б̣аа, буб̣б̣абхааг̇з бхаванд̇и д̇з.
Diṭṭheneva gahetabbā, pubbabhāge bhavanti te.
3144.
3144.
аанаабаанан̃жа пудтзна, д̣̇идтзна д̇ажабан̃жагам̣;
Ānāpānañca phuṭṭhena, diṭṭhena tacapañcakaṃ;
маалуд̇о д̣̇идтапудтзна, суд̇зна жзд̇т̇а сзсагам̣.
Māluto diṭṭhaphuṭṭhena, sutena cettha sesakaṃ.
3145.
3145.
аагаасагасин̣ан̃жзд̇т̇а, табзд̇ваа гасин̣аа нава;
Ākāsakasiṇañcettha, ṭhapetvā kasiṇā nava;
батамааруббажид̇д̇асса, бажжаяаа бана ж̇ааяарз.
Paṭhamāruppacittassa, paccayā pana jāyare.
3146.
3146.
бхаванд̇и хи абхин̃н̃аан̣ам̣, гасин̣аани д̣̇асааби жа;
Bhavanti hi abhiññāṇaṃ, kasiṇāni dasāpi ca;
д̇иссоби аббаман̃н̃ааяо, жад̇уд̇т̇асса д̇у бажжаяаа.
Tissopi appamaññāyo, catutthassa tu paccayā.
3147.
3147.
хздтимахздтимааруббам̣, барасса жа барасса жа;
Heṭṭhimaheṭṭhimāruppaṃ, parassa ca parassa ca;
нзвасан̃н̃аа нирод̇хасса, бажжаяод̇и багаасид̇аа.
Nevasaññā nirodhassa, paccayoti pakāsitā.
3148.
3148.
саб̣б̣з сукавихаарасса, бхаваниссаран̣асса жа;
Sabbe sukhavihārassa, bhavanissaraṇassa ca;
д̇ат̇аа бхавасукаанан̃жа, бажжаяаад̇и жа д̣̇ийбид̇аа.
Tathā bhavasukhānañca, paccayāti ca dīpitā.
3149.
3149.
асубхаа д̣̇аса вин̃н̃зяяаа, д̇ат̇аа гааяаг̇ад̇аасад̇и;
Asubhā dasa viññeyyā, tathā kāyagatāsati;
анугуулаа имз рааг̇а-жарид̇асса висзсад̇о.
Anukūlā ime rāga-caritassa visesato.
3150.
3150.
жад̇ассо аббаман̃н̃ааяо, саван̣н̣агасин̣аа д̇ат̇аа;
Catasso appamaññāyo, savaṇṇakasiṇā tathā;
анугуулаа имз д̣̇оса-жарид̇асса багаасид̇аа.
Anukūlā ime dosa-caritassa pakāsitā.
3151.
3151.
вид̇аггажарид̇ассааби, мохаббагад̇иноби жа;
Vitakkacaritassāpi, mohappakatinopi ca;
аанаабаанасад̇згаава, саббааяаад̇и вибхаавид̇аа.
Ānāpānasatekāva, sappāyāti vibhāvitā.
3152.
3152.
сан̃н̃аа жзва вавад̇т̇аанам̣, маран̣уубасамз сад̇и;
Saññā ceva vavatthānaṃ, maraṇūpasame sati;
бан̃н̃аабагад̇ино зд̇з, анугуулаад̇и д̣̇ийбид̇аа.
Paññāpakatino ete, anukūlāti dīpitā.
3153.
3153.
аад̣̇иануссад̇ижчаггам̣, сад̣̇д̇хаажарид̇аван̣н̣ид̇ам̣;
Ādianussaticchakkaṃ, saddhācaritavaṇṇitaṃ;
ааруббаа гасин̣аа сзсаа, д̣̇аса саб̣б̣аануруубагаа.
Āruppā kasiṇā sesā, dasa sabbānurūpakā.
3154.
3154.
звам̣ бабхзд̣̇ад̇о н̃ад̇ваа, гаммадтаанаани бан̣д̣ид̇о;
Evaṃ pabhedato ñatvā, kammaṭṭhānāni paṇḍito;
жарияааяаанугуулам̣ д̇у, д̇зсу яам̣ ад̇д̇ано бана.
Cariyāyānukūlaṃ tu, tesu yaṃ attano pana.
3155.
3155.
д̇ам̣ г̇ахзд̇ваана мзд̇хаавий, д̣̇ал̣хам̣ галяаан̣амид̇д̇аго;
Taṃ gahetvāna medhāvī, daḷhaṃ kalyāṇamittako;
ужчзд̣̇ам̣ балиб̣од̇хаанам̣, гад̇ваа батамамзва жа.
Ucchedaṃ palibodhānaṃ, katvā paṭhamameva ca.
3156.
3156.
ануруубз васанд̇зна, вихаарз д̣̇осаваж̇ж̇ид̇з;
Anurūpe vasantena, vihāre dosavajjite;
бхаавзд̇ваа батамаад̣̇ийни, жхаанаани бана саб̣б̣асо.
Bhāvetvā paṭhamādīni, jhānāni pana sabbaso.
3157.
3157.
д̇ад̇о вудтааяа саббан̃н̃о, жхаанамхаа батамаад̣̇ид̇о;
Tato vuṭṭhāya sappañño, jhānamhā paṭhamādito;
наамаруубававад̇т̇аанам̣, гад̇ваа ган̇кам̣ вид̇ийрияа.
Nāmarūpavavatthānaṃ, katvā kaṅkhaṃ vitīriya.
3158.
3158.
убаглзсз амаг̇г̇од̇и, д̣̇асобхаасаад̣̇аяо бана;
Upaklese amaggoti, dasobhāsādayo pana;
маг̇г̇о вибассанаан̃аан̣ам̣, ид̇и ж̇аанаад̇и бан̣д̣ид̇о.
Maggo vipassanāñāṇaṃ, iti jānāti paṇḍito.
3159.
3159.
д̇ин̣н̣ам̣ д̇зсам̣ вавад̇т̇аанз, гад̇з зд̇д̇аавад̇аа бана;
Tiṇṇaṃ tesaṃ vavatthāne, kate ettāvatā pana;
д̇ин̣н̣ам̣ бана жа сажжаанам̣, вавад̇т̇аанам̣ гад̇ам̣ сияаа.
Tiṇṇaṃ pana ca saccānaṃ, vavatthānaṃ kataṃ siyā.
3160.
3160.
уд̣̇аяаб̣б̣аяабхан̇г̇аа жа, бхаяаад̣̇ийнаваниб̣б̣ид̣̇аа;
Udayabbayabhaṅgā ca, bhayādīnavanibbidā;
мун̃жид̇угамяад̇аан̃аан̣ам̣, бадисан̇каанубассанаа.
Muñcitukamyatāñāṇaṃ, paṭisaṅkhānupassanā.
3161.
3161.
сан̇каарубзгкаан̃аан̣ан̃жа, навамам̣ сажжаануломигам̣;
Saṅkhārupekkhāñāṇañca, navamaṃ saccānulomikaṃ;
аяам̣ ‘‘бадибад̣̇аан̃аан̣а-д̣̇ассана’’нд̇и багаасид̇аа.
Ayaṃ ‘‘paṭipadāñāṇa-dassana’’nti pakāsitā.
3162.
3162.
д̇ад̇о г̇од̇рабхужид̇д̇асса, самананд̇арамзва жа;
Tato gotrabhucittassa, samanantarameva ca;
санд̇имаарамман̣ам̣ гад̇ваа, ж̇ааяад̇з н̃аан̣ад̣̇ассанам̣.
Santimārammaṇaṃ katvā, jāyate ñāṇadassanaṃ.
3163.
3163.
‘‘н̃аан̣ад̣̇ассанасуд̣̇д̇хий’’д̇и, ид̣̇ам̣ н̃аан̣ам̣ багаасид̇ам̣;
‘‘Ñāṇadassanasuddhī’’ti, idaṃ ñāṇaṃ pakāsitaṃ;
бажжавзгкан̣абарияанд̇ам̣, палам̣ д̇ассаануж̇ааяад̇з.
Paccavekkhaṇapariyantaṃ, phalaṃ tassānujāyate.
3164.
3164.
д̇знзва жа убааязна, бхаавзнд̇о со бунаббунам̣;
Teneva ca upāyena, bhāvento so punappunaṃ;
баабун̣аад̇и яат̇аа бхигку, сзсамаг̇г̇апалаани жа.
Pāpuṇāti yathā bhikkhu, sesamaggaphalāni ca.
3165.
3165.
ижжзвамажжанд̇амавзжжа д̇хаммам̣;
Iccevamaccantamavecca dhammaṃ;
вид̣̇д̇хам̣саяид̇ваагусалам̣ асзсам̣;
Viddhaṃsayitvākusalaṃ asesaṃ;
висосаяид̇ваана д̇аяо бхавз со;
Visosayitvāna tayo bhave so;
убзд̇и санд̇им̣ нирубаад̣̇исзсам̣.
Upeti santiṃ nirupādisesaṃ.
3166.
3166.
вин̃н̃аасаггамад̇о вааби, буб̣б̣аабаравасзна ваа;
Viññāsakkamato vāpi, pubbāparavasena vā;
яад̣̇и агкараб̣анд̇хз ваа, аяуд̇д̇ам̣ вияа д̣̇иссад̇и.
Yadi akkharabandhe vā, ayuttaṃ viya dissati.
3167.
3167.
д̇ам̣ д̇ат̇аа на г̇ахзд̇аб̣б̣ам̣, г̇ахзд̇аб̣б̣амад̣̇осад̇о;
Taṃ tathā na gahetabbaṃ, gahetabbamadosato;
маяаа убабаригкид̇ваа, гад̇ад̇д̇аа бана саб̣б̣асо.
Mayā upaparikkhitvā, katattā pana sabbaso.
3168.
3168.
сздтасса жол̣арадтасса, наабхибхууд̇з нираагулз;
Seṭṭhassa coḷaraṭṭhassa, nābhibhūte nirākule;
саб̣б̣асса бана логасса, г̇аамз самбин̣д̣ид̇з вияа.
Sabbassa pana lokassa, gāme sampiṇḍite viya.
3169.
3169.
гад̣̇алийсаалад̇аалужчу-наал̣игзраванаагулз;
Kadalīsālatālucchu-nāḷikeravanākule;
гамалуббаласан̃чанна-салилаасаяасобхид̇з.
Kamaluppalasañchanna-salilāsayasobhite.
3170.
3170.
гаавзриж̇аласамбаад̇а-барибхууд̇амахийд̇алз;
Kāverijalasampāta-paribhūtamahītale;
ид̣̇д̇хз саб̣б̣ан̇г̇асамбаннз, ман̇г̇алз бхууд̇аман̇г̇алз.
Iddhe sabbaṅgasampanne, maṅgale bhūtamaṅgale.
3171.
3171.
бавараагаарабаагаара-барикаабариваарид̇з;
Pavarākārapākāra-parikhāparivārite;
вихаарз взн̣худ̣̇аасасса, д̣̇ассанийяз манорамз.
Vihāre veṇhudāsassa, dassanīye manorame.
3172.
3172.
д̇ийранд̇арухаваад̇ира-д̇арурааж̇авирааж̇ид̇з;
Tīrantaruhavātira-tarurājavirājite;
наанаад̣̇иж̇аг̇ан̣аараамз, наанаараамаманорамз.
Nānādijagaṇārāme, nānārāmamanorame.
3173.
3173.
жаарубан̇гаж̇асам̣гин̣н̣а-д̇ал̣аагасамалан̇гад̇з;
Cārupaṅkajasaṃkiṇṇa-taḷākasamalaṅkate;
сурасод̣̇агасамбун̣н̣а-варагуубобасобхид̇з.
Surasodakasampuṇṇa-varakūpopasobhite.
3174.
3174.
вижид̇равибулажжуг̇г̇а-вараман̣д̣абаман̣д̣ид̇з;
Vicitravipulaccugga-varamaṇḍapamaṇḍite;
ааваасзхи жанзгзхи, ажжанд̇амубасобхид̇з.
Āvāsehi canekehi, accantamupasobhite.
3175.
3175.
уббад̇зна жа т̇уубзна, бхзд̇ваава д̇харан̣ийд̇алам̣;
Uppatena ca thūpena, bhetvāva dharaṇītalaṃ;
ж̇ид̇вааваавахасанд̇зна, гзлаасасикарам̣ карам̣.
Jitvāvāvahasantena, kelāsasikharaṃ kharaṃ.
3176.
3176.
сарад̣̇амб̣уд̣̇асан̇гаасз, д̣̇ассанийяз самуссид̇з;
Saradambudasaṅkāse, dassanīye samussite;
басаад̣̇аж̇ананз раммз, баасаад̣̇з васад̇аа маяаа.
Pasādajanane ramme, pāsāde vasatā mayā.
3177.
3177.
вуд̇д̇асса б̣уд̣̇д̇хасийхзна, винаяасса винижчаяо;
Vuttassa buddhasīhena, vinayassa vinicchayo;
б̣уд̣̇д̇хасийхам̣ самуд̣̇д̣̇исса, мама сад̣̇д̇хивихааригам̣.
Buddhasīhaṃ samuddissa, mama saddhivihārikaṃ.
3178.
3178.
гад̇ояам̣ бана бхигкуунам̣, хид̇ад̇т̇ааяа самаасад̇о;
Katoyaṃ pana bhikkhūnaṃ, hitatthāya samāsato;
винаяассааваб̣од̇хад̇т̇ам̣, сукзнзваажирзна жа.
Vinayassāvabodhatthaṃ, sukhenevācirena ca.
3179.
3179.
ажжуд̇ажжуд̇авигганд̇з, галамб̣агулананд̣̇анз;
Accutaccutavikkante, kalambakulanandane;
махим̣ саманусаасанд̇з, аарад̣̇д̇хо жа самаабид̇о.
Mahiṃ samanusāsante, āraddho ca samāpito.
3180.
3180.
яат̇аа сид̣̇д̇химаяам̣ бад̇д̇о, анд̇арааяам̣ винаа д̇ат̇аа;
Yathā siddhimayaṃ patto, antarāyaṃ vinā tathā;
саб̣б̣з сиж̇жханд̇у сан̇габбаа, сад̇д̇аанам̣ д̇хаммасам̣яуд̇аа.
Sabbe sijjhantu saṅkappā, sattānaṃ dhammasaṃyutā.
3181.
3181.
яаава д̇идтад̇и логасмим̣, манд̣̇ааро жааруганд̣̇аро;
Yāva tiṭṭhati lokasmiṃ, mandāro cārukandaro;
д̇аава д̇идтад̇у б̣уд̣̇д̇хасса, саасанам̣ галисаасанам̣.
Tāva tiṭṭhatu buddhassa, sāsanaṃ kalisāsanaṃ.
3182.
3182.
гаалз саммаа бавассанд̇у, вассам̣ вассавалаахагаа;
Kāle sammā pavassantu, vassaṃ vassavalāhakā;
баалаяанд̇у махийбаалаа, д̇хаммад̇о сагалам̣ махим̣.
Pālayantu mahīpālā, dhammato sakalaṃ mahiṃ.
3183.
3183.
имам̣ саарабхууд̇ам̣ хид̇ам̣ ад̇т̇аяуд̇д̇ам̣;
Imaṃ sārabhūtaṃ hitaṃ atthayuttaṃ;
гаронд̇зна бад̇д̇ам̣ маяаа яам̣ д̇у бун̃н̃ам̣;
Karontena pattaṃ mayā yaṃ tu puññaṃ;
аяам̣ д̇зна лого мунинд̣̇аббаяаад̇ам̣;
Ayaṃ tena loko munindappayātaṃ;
сивам̣ вийд̇асогам̣ бурам̣ баабун̣аад̇у.
Sivaṃ vītasokaṃ puraṃ pāpuṇātu.
ид̇и винаяавинижчаяз гаммадтаанабхааванаавид̇хаанагат̇аа
Iti vinayavinicchaye kammaṭṭhānabhāvanāvidhānakathā
самад̇д̇аа.
Samattā.
ид̇и д̇амб̣абан̣н̣иязна барамавзяяаагаран̣зна д̇ибидаганаяавид̇хигусалзна барамагавиж̇анахад̣̇аяабад̣̇умаванавигасанагарзна гавиваравасабхзна барамарад̇игараварамад̇хураважануг̇г̇аарзна ураг̇абурзна б̣уд̣̇д̇хад̣̇ад̇д̇зна ражид̇ояам̣ винаяавинижчаяо.
Iti tambapaṇṇiyena paramaveyyākaraṇena tipiṭakanayavidhikusalena paramakavijanahadayapadumavanavikasanakarena kavivaravasabhena paramaratikaravaramadhuravacanuggārena uragapurena buddhadattena racitoyaṃ vinayavinicchayo.
винаяавинижчаяо самад̇д̇о.
Vinayavinicchayo samatto.
