| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
কম্মট্ঠানৰিভাৰনাৰিধানকথাৰণ্ণনা
Kammaṭṭhānavibhāvanāvidhānakathāvaṇṇanā
৩১২৫. ‘‘আদিম্হি সীলং দস্সেয্য।
3125. ‘‘Ādimhi sīlaṃ dasseyya.
মজ্ঝে মগ্গং ৰিভাৰযে।
Majjhe maggaṃ vibhāvaye;
পরিযোসানে চ নিব্বানং।
Pariyosāne ca nibbānaṃ;
এসা কথিকসণ্ঠিতী’’তি॥ (দী॰ নি॰ অট্ঠ॰ ১.১৯০; ম॰ নি॰ অট্ঠ॰ ১.২৯১; অ॰ নি॰ অট্ঠ॰ ২.৩.৬৪) –
Esā kathikasaṇṭhitī’’ti. (dī. ni. aṭṭha. 1.190; ma. ni. aṭṭha. 1.291; a. ni. aṭṭha. 2.3.64) –
ৰুত্তং ধম্মকথিকলক্খণং সমনুস্সরন্তোযমাচরিযো পাতিমোক্খসংৰরসীলপরিদীপকং ৰিনিচ্ছযং নাতিসঙ্খেপৰিত্থারমুখেন দস্সেত্ৰা তংমূলকানং ইতরেসঞ্চ তিণ্ণং সীলানং তংদস্সনেনেৰ দস্সিতভাৰঞ্চ সীলৰিসুদ্ধিমূলিকা চিত্তৰিসুদ্ধিআদিযো পঞ্চৰিসুদ্ধিযো চ তংমূলিকঞ্চ অরিযমগ্গসঙ্খাতং ঞাণদস্সনৰিসুদ্ধিং তদধিগমনীযং নিব্বানঞ্চ দস্সেত্ৰা যথারদ্ধং ৰিনযকথং পরিযোসাপেতুকামো আহ ‘‘পামোক্খে’’তিআদি। তত্থ পামোক্খেতি সমাধিআদীনং অনৰজ্জধম্মানং পতিট্ঠাভাৰেন উত্তমে। মোক্খপ্পৰেসনেতি অমতমহানিব্বাননগরস্স পৰেসননিমিত্তে। মুখে অসহাযদ্ৰারভূতে। যথাহ –
Vuttaṃ dhammakathikalakkhaṇaṃ samanussarantoyamācariyo pātimokkhasaṃvarasīlaparidīpakaṃ vinicchayaṃ nātisaṅkhepavitthāramukhena dassetvā taṃmūlakānaṃ itaresañca tiṇṇaṃ sīlānaṃ taṃdassaneneva dassitabhāvañca sīlavisuddhimūlikā cittavisuddhiādiyo pañcavisuddhiyo ca taṃmūlikañca ariyamaggasaṅkhātaṃ ñāṇadassanavisuddhiṃ tadadhigamanīyaṃ nibbānañca dassetvā yathāraddhaṃ vinayakathaṃ pariyosāpetukāmo āha ‘‘pāmokkhe’’tiādi. Tattha pāmokkheti samādhiādīnaṃ anavajjadhammānaṃ patiṭṭhābhāvena uttame. Mokkhappavesaneti amatamahānibbānanagarassa pavesananimitte. Mukhe asahāyadvārabhūte. Yathāha –
‘‘সগ্গারোহণসোপানং, অঞ্ঞং সীলসমং কুতো।
‘‘Saggārohaṇasopānaṃ, aññaṃ sīlasamaṃ kuto;
দ্ৰারং ৰা পন নিব্বান-নগরস্স পৰেসনে’’তি॥ (ৰিসুদ্ধি॰ ১.৯; বু॰ বং॰ অট্ঠ॰ ৩.দীপঙ্করবুদ্ধৰংসৰণ্ণনা)।
Dvāraṃ vā pana nibbāna-nagarassa pavesane’’ti. (visuddhi. 1.9; bu. baṃ. aṭṭha. 3.dīpaṅkarabuddhavaṃsavaṇṇanā);
সব্বদুক্খক্খযেতি জাতিদুক্খাদিসব্বদুক্খানং খযস্স অরিযমগ্গস্স অধিগমূপাযত্তা ফলূপচারেন সব্বদুক্খক্খযসঙ্খাতে। ‘‘পামোক্খে’’তি চ ‘‘মোক্খপ্পৰেসনে মুখে’’তি চ ‘‘সব্বদুক্খক্খযে’’তি চ ‘‘পাতিমোক্খস্মি’’ন্তি এতস্স ৰিসেসনং। ৰুত্তেতি পারাজিকতো পট্ঠায নানপ্পকারতো নিদ্দিট্ঠে সতি। ইতরত্তযং ৰুত্তমেৰাতি সম্বন্ধো। ইন্দ্রিযসংৰরসীলআজীৰপারিসুদ্ধিসীলপচ্চযসন্নিস্সিতসীলসঙ্খাতং ইতরং সীলত্তযং ৰুত্তমেৰ হোতি ‘‘রাজা আগতো’’তি ৰুত্তে পরিসায আগমনং ৰিয, তস্মা তং ন ৰক্খামাতি অধিপ্পাযো।
Sabbadukkhakkhayeti jātidukkhādisabbadukkhānaṃ khayassa ariyamaggassa adhigamūpāyattā phalūpacārena sabbadukkhakkhayasaṅkhāte. ‘‘Pāmokkhe’’ti ca ‘‘mokkhappavesane mukhe’’ti ca ‘‘sabbadukkhakkhaye’’ti ca ‘‘pātimokkhasmi’’nti etassa visesanaṃ. Vutteti pārājikato paṭṭhāya nānappakārato niddiṭṭhe sati. Itarattayaṃ vuttamevāti sambandho. Indriyasaṃvarasīlaājīvapārisuddhisīlapaccayasannissitasīlasaṅkhātaṃ itaraṃ sīlattayaṃ vuttameva hoti ‘‘rājā āgato’’ti vutte parisāya āgamanaṃ viya, tasmā taṃ na vakkhāmāti adhippāyo.
৩১২৬. ইদং চতুব্বিধং সীলন্তি পাতিমোক্খসংৰরসীলাদিং চতুপারিসুদ্ধিসীলং। ঞত্ৰাতি লক্খণাদিতো, ৰোদানতো, হানভাগিযট্ঠিতিভাগিযৰিসেসভাগিযনিব্বেধভাগিযাদিপ্পকারতো চ জানিত্ৰা। তত্থাতি চতুব্বিধসীলে। পতিট্ঠিতোতি অচ্ছিদ্দাদিঅঙ্গসমন্নাগতভাৰমাপাদনেন পতিট্ঠিতো। সমাধিন্তি উপচারপ্পনাভেদলোকিযসমাধিং। ভাৰেত্ৰাতি সমচত্তালীসায কম্মট্ঠানেসু পুনপ্পুনং অনুযোগৰসেন ৰড্ঢেত্ৰা। পঞ্ঞাযাতি তিলক্খণাকারাদিপরিচ্ছেদিকায লোকুত্তরায পঞ্ঞায হেতুভূতায, করণভূতায চ। পরিমুচ্চতীতি সব্বকিলেসবন্ধনং ছেত্ৰা সংসারচারকা সমন্ততো মুচ্চতি, অনুপাদিসেসায নিব্বানধাতুযা পরিনিব্বাযতীতি অধিপ্পাযো।
3126.Idaṃ catubbidhaṃ sīlanti pātimokkhasaṃvarasīlādiṃ catupārisuddhisīlaṃ. Ñatvāti lakkhaṇādito, vodānato, hānabhāgiyaṭṭhitibhāgiyavisesabhāgiyanibbedhabhāgiyādippakārato ca jānitvā. Tatthāti catubbidhasīle. Patiṭṭhitoti acchiddādiaṅgasamannāgatabhāvamāpādanena patiṭṭhito. Samādhinti upacārappanābhedalokiyasamādhiṃ. Bhāvetvāti samacattālīsāya kammaṭṭhānesu punappunaṃ anuyogavasena vaḍḍhetvā. Paññāyāti tilakkhaṇākārādiparicchedikāya lokuttarāya paññāya hetubhūtāya, karaṇabhūtāya ca. Parimuccatīti sabbakilesabandhanaṃ chetvā saṃsāracārakā samantato muccati, anupādisesāya nibbānadhātuyā parinibbāyatīti adhippāyo.
৩১২৭. এৰং সমাসতো ৰুত্তমেৰত্থং নিদ্দিসন্তো আহ ‘‘দসানুস্সতিযো’’তিআদি। দস অনুস্সতিযো চ দস কসিণা চ দস অসুভা চ চতস্সো অপ্পমঞ্ঞাযো চ তথা চত্তারো আরুপ্পা চ ৰুত্তা। অপরং কম্মট্ঠানদ্ৰযঞ্চ ৰুত্তন্তি সম্বন্ধো।
3127. Evaṃ samāsato vuttamevatthaṃ niddisanto āha ‘‘dasānussatiyo’’tiādi. Dasa anussatiyo ca dasa kasiṇā ca dasa asubhā ca catasso appamaññāyo ca tathā cattāro āruppā ca vuttā. Aparaṃ kammaṭṭhānadvayañca vuttanti sambandho.
তত্থ দসানুস্সতিযো নাম ‘‘বুদ্ধানুস্সতি, ধম্মানুস্সতি, সঙ্ঘানুস্সতি, সীলানুস্সতি, চাগানুস্সতি, দেৰতানুস্সতি, কাযগতাসতি, মরণানুস্সতি, আনাপানসতি, উপসমানুস্সতী’’তি (ৰিসুদ্ধি॰ ১.৪৭) এৰং ৰুত্তা দস অনুস্সতিযো।
Tattha dasānussatiyo nāma ‘‘buddhānussati, dhammānussati, saṅghānussati, sīlānussati, cāgānussati, devatānussati, kāyagatāsati, maraṇānussati, ānāpānasati, upasamānussatī’’ti (visuddhi. 1.47) evaṃ vuttā dasa anussatiyo.
দস কসিণা নাম ‘‘পথৰীকসিণং, আপোকসিণং, তেজোকসিণং, ৰাযোকসিণং, নীলকসিণং, পীতকসিণং, লোহিতকসিণং, ওদাতকসিণং, আলোককসিণং, পরিচ্ছিন্নাকাসকসিণ’’ন্তি (ৰিসুদ্ধি॰ ১.৪৭) ৰুত্তা ইমে দস কসিণা।
Dasa kasiṇā nāma ‘‘pathavīkasiṇaṃ, āpokasiṇaṃ, tejokasiṇaṃ, vāyokasiṇaṃ, nīlakasiṇaṃ, pītakasiṇaṃ, lohitakasiṇaṃ, odātakasiṇaṃ, ālokakasiṇaṃ, paricchinnākāsakasiṇa’’nti (visuddhi. 1.47) vuttā ime dasa kasiṇā.
দস অসুভা নাম ‘‘উদ্ধুমাতকং, ৰিনীলকং, ৰিপুব্বকং, ৰিচ্ছিদ্দকং, ৰিক্খাযিতকং, ৰিক্খিত্তকং, হতৰিক্খিত্তকং, লোহিতকং, পুল়ুৰকং, অট্ঠিক’’ন্তি (ৰিসুদ্ধি॰ ১.৪৭) ৰুত্তা ইমে দস অসুভা।
Dasa asubhā nāma ‘‘uddhumātakaṃ, vinīlakaṃ, vipubbakaṃ, vicchiddakaṃ, vikkhāyitakaṃ, vikkhittakaṃ, hatavikkhittakaṃ, lohitakaṃ, puḷuvakaṃ, aṭṭhika’’nti (visuddhi. 1.47) vuttā ime dasa asubhā.
চতস্সো অপ্পমঞ্ঞাযো নাম ‘‘মেত্তা, করুণা, মুদিতা, উপেক্খা’’তি (ৰিসুদ্ধি॰ ১.৪৭) ৰুত্তা ইমে অপ্পমঞ্ঞাযো।
Catasso appamaññāyo nāma ‘‘mettā, karuṇā, muditā, upekkhā’’ti (visuddhi. 1.47) vuttā ime appamaññāyo.
চত্তারো আরুপ্পা নাম ‘‘আকাসানঞ্চাযতনং, ৰিঞ্ঞাণঞ্চাযতনং, আকিঞ্চঞ্ঞাযতনং, নেৰসঞ্ঞানাসঞ্ঞাযতন’’ন্তি (ৰিসুদ্ধি॰ ১.৪৭) ৰুত্তা ইমে আরুপ্পা। অপরং কম্মট্ঠানদ্ৰযং নাম ‘‘আহারেপটিক্কূলসঞ্ঞা, চতুধাতুৰৰত্থান’’ন্তি ৰুত্তং ট্ঠানউভযং।
Cattāro āruppā nāma ‘‘ākāsānañcāyatanaṃ, viññāṇañcāyatanaṃ, ākiñcaññāyatanaṃ, nevasaññānāsaññāyatana’’nti (visuddhi. 1.47) vuttā ime āruppā. Aparaṃ kammaṭṭhānadvayaṃ nāma ‘‘āhārepaṭikkūlasaññā, catudhātuvavatthāna’’nti vuttaṃ ṭṭhānaubhayaṃ.
৩১২৮. ইচ্চেৰং চত্তালীসৰিধং মনোভুনো কম্মট্ঠানং সব্বম্পি কম্মট্ঠানং সমুদ্দিট্ঠং সিযাতি যোজনা। কম্মস্স যোগসঙ্খাতস্স ঠানং আরম্মণভাৰেন পৰত্তিট্ঠানন্তি কম্মট্ঠানং। তিট্ঠতি এত্থ ফলং তদাযত্তৰুত্তিতাযাতি ঠানং, কারণং, কম্মস্স ৰিপস্সনায ঠানং কারণং কম্মট্ঠানং, কস্সাতি আহ ‘‘মনোভুনো’’তি। মনো অভিভৰতীতি মনোভূ, তস্স মনোভুনো, কুসলচিত্তপ্পৰত্তিনিৰারণেন তথালদ্ধনামস্স কামদেৰস্সাতি অত্থো। ইমিনা কম্মট্ঠানগণনাপরিচ্ছেদো দস্সিতো।
3128. Iccevaṃ cattālīsavidhaṃ manobhuno kammaṭṭhānaṃ sabbampi kammaṭṭhānaṃ samuddiṭṭhaṃ siyāti yojanā. Kammassa yogasaṅkhātassa ṭhānaṃ ārammaṇabhāvena pavattiṭṭhānanti kammaṭṭhānaṃ. Tiṭṭhati ettha phalaṃ tadāyattavuttitāyāti ṭhānaṃ, kāraṇaṃ, kammassa vipassanāya ṭhānaṃ kāraṇaṃ kammaṭṭhānaṃ, kassāti āha ‘‘manobhuno’’ti. Mano abhibhavatīti manobhū, tassa manobhuno, kusalacittappavattinivāraṇena tathāladdhanāmassa kāmadevassāti attho. Iminā kammaṭṭhānagaṇanāparicchedo dassito.
৩১২৯-৩০. ইমেসং কম্মট্ঠানানং ভাৰনামযং ভিন্দিত্ৰা দস্সেতুং মাতিকং তাৰ দস্সেন্তো আহ ‘‘উপচারপ্পনাতো’’তিআদি। তত্থ উপচারপ্পনাতোতি ‘‘এত্তকানি কম্মট্ঠানানি উপচারাৰহানি , এত্তকানি অপ্পনাৰহানী’’তি এৰং উপচারপ্পনাৰসেন চ। ঝানভেদাতি ‘‘এত্তকানি পঠমজ্ঝানিকানি, এত্তকানি তিকচতুক্কজ্ঝানিকানি, এত্তকানি পঞ্চকজ্ঝানিকানী’’তিআদিনা ঝানভেদা চ। অতিক্কমাতি অঙ্গানং, আরম্মণানঞ্চ অতিক্কমতো। ৰড্ঢনাৰড্ঢনা চাপীতি অঙ্গুলদ্ৰঙ্গুলাদিৰসেন ৰড্ঢেতব্বা, অৰড্ঢেতব্বা চ। আরম্মণভূমিতোতি নিমিত্তারম্মণাদিআরম্মণতো চেৰ লব্ভমানালব্ভমানভূমিতো চ।
3129-30. Imesaṃ kammaṭṭhānānaṃ bhāvanāmayaṃ bhinditvā dassetuṃ mātikaṃ tāva dassento āha ‘‘upacārappanāto’’tiādi. Tattha upacārappanātoti ‘‘ettakāni kammaṭṭhānāni upacārāvahāni , ettakāni appanāvahānī’’ti evaṃ upacārappanāvasena ca. Jhānabhedāti ‘‘ettakāni paṭhamajjhānikāni, ettakāni tikacatukkajjhānikāni, ettakāni pañcakajjhānikānī’’tiādinā jhānabhedā ca. Atikkamāti aṅgānaṃ, ārammaṇānañca atikkamato. Vaḍḍhanāvaḍḍhanā cāpīti aṅguladvaṅgulādivasena vaḍḍhetabbā, avaḍḍhetabbā ca. Ārammaṇabhūmitoti nimittārammaṇādiārammaṇato ceva labbhamānālabbhamānabhūmito ca.
গহণাতি দিট্ঠাদিৰসেন গহেতব্বতো। পচ্চযাতি তংতংঠানানং পচ্চযভাৰতো চ। ভিয্যোতি পুন-সদ্দত্থনীহারত্থো। চরিযানুকূলতোতি রাগচরিযাদীনং অনুকূলভাৰতোতি অযং ৰিসেসো অযং ভেদো। এতেসু চত্তালীসায কম্মট্ঠানেসু।
Gahaṇāti diṭṭhādivasena gahetabbato. Paccayāti taṃtaṃṭhānānaṃ paccayabhāvato ca. Bhiyyoti puna-saddatthanīhārattho. Cariyānukūlatoti rāgacariyādīnaṃ anukūlabhāvatoti ayaṃ viseso ayaṃ bhedo. Etesu cattālīsāya kammaṭṭhānesu.
৩১৩১. এৰং মাতিকং নিদ্দিসিত্ৰা যথাক্কমং নিদ্দিসন্তো পঠমং তাৰ উপচারাৰহাদযো দস্সেতুমাহ ‘‘অট্ঠানুস্সতিযো’’তিআদি । তত্থাতি তিস্সং মাতিকাযং, তেসু ৰা চত্তালীসায কম্মট্ঠানেসু। অট্ঠানুস্সতিযোতি কাযগতাসতিআনাপানসতিদ্ৰযৰজ্জিতা বুদ্ধানুস্সতিআদিকা অট্ঠ অনুস্সতিযো চ। সঞ্ঞা আহারেপটিক্কূলসঞ্ঞা চ। ৰৰত্থানঞ্চ চতুধাতুৰৰত্থানঞ্চাতি ইমে দস। উপচারাৰহাতি বুদ্ধগুণাদীনং পরমত্থভাৰতো, অনেকৰিধত্তা, একস্সাপি গম্ভীরভাৰতো চ এতেসু দসসু কম্মট্ঠানেসু অপ্পনাৰসেন সমাধিস্স পতিট্ঠাতুমসক্কুণেয্যত্তা অপ্পনাভাৰনাপ্পত্তো সমাধি উপচারভাৰেযেৰ পতিট্ঠাতি, তস্মা এতে উপচারাৰহা।
3131. Evaṃ mātikaṃ niddisitvā yathākkamaṃ niddisanto paṭhamaṃ tāva upacārāvahādayo dassetumāha ‘‘aṭṭhānussatiyo’’tiādi . Tatthāti tissaṃ mātikāyaṃ, tesu vā cattālīsāya kammaṭṭhānesu. Aṭṭhānussatiyoti kāyagatāsatiānāpānasatidvayavajjitā buddhānussatiādikā aṭṭha anussatiyo ca. Saññā āhārepaṭikkūlasaññā ca. Vavatthānañca catudhātuvavatthānañcāti ime dasa. Upacārāvahāti buddhaguṇādīnaṃ paramatthabhāvato, anekavidhattā, ekassāpi gambhīrabhāvato ca etesu dasasu kammaṭṭhānesu appanāvasena samādhissa patiṭṭhātumasakkuṇeyyattā appanābhāvanāppatto samādhi upacārabhāveyeva patiṭṭhāti, tasmā ete upacārāvahā.
ননু চেত্থ দুতিযচতুত্থারুপ্পসমাধি, লোকুত্তরো চ সমাধি পরমত্থধম্মে অপ্পনং পাপুণাতি, তস্মা ‘‘পরমত্থভাৰতো’’তি হেতু অপ্পনমপাপুণনে কারণভাৰেন ন ৰুচ্চতীতি? ন, তস্স ভাৰনাৰিসেসেন পরমত্থধম্মে পৰত্তিসম্ভৰতো, ইমস্স চ রূপাৰচরচতুত্থভাৰনাৰিসেসসম্ভৰতো চ। তথা হি দুতিযচতুত্থারুপ্পসমাধি অপ্পনাপত্তস্স অরূপাৰচরসমাধিস্স চতুত্থজ্ঝানস্স আরম্মণসমতিক্কমমত্তভাৰনাৰসেন সভাৰারম্মণেপি অপ্পনং পাপুণাতি। ৰিসুদ্ধিভাৰনানুক্কমবলেন লোকুত্তরো সমাধি অপ্পনং পাপুণাতীতি।
Nanu cettha dutiyacatutthāruppasamādhi, lokuttaro ca samādhi paramatthadhamme appanaṃ pāpuṇāti, tasmā ‘‘paramatthabhāvato’’ti hetu appanamapāpuṇane kāraṇabhāvena na vuccatīti? Na, tassa bhāvanāvisesena paramatthadhamme pavattisambhavato, imassa ca rūpāvacaracatutthabhāvanāvisesasambhavato ca. Tathā hi dutiyacatutthāruppasamādhi appanāpattassa arūpāvacarasamādhissa catutthajjhānassa ārammaṇasamatikkamamattabhāvanāvasena sabhāvārammaṇepi appanaṃ pāpuṇāti. Visuddhibhāvanānukkamabalena lokuttaro samādhi appanaṃ pāpuṇātīti.
৩১৩২. তত্থাতি তেসু ঝানাৰহেসু তিংসকম্মট্ঠানেসু। অসুভাতি উদ্ধুমাতকাদযো দস অসুভা। কাযগতাসতীতি কাযগতাসতি চাতি ইমে একাদস। পঠমজ্ঝানিকাতি ইমেসং পটিক্কূলারম্মণত্তা, পটিক্কূলারম্মণে চ চিত্তস্স চণ্ডসোতায নদিযা অরিত্তবলেন নাৰাট্ঠানং ৰিয ৰিতক্কবলেনেৰ পৰত্তিসম্ভৰতো অৰিতক্কানং দুতিযজ্ঝানাদীনং অসম্ভৰোতি সৰিতক্কস্স পঠমজ্ঝানস্সেৰ সম্ভৰতো পঠমজ্ঝানিকা। আনাপানঞ্চ কসিণা চাতি ইমে একাদস চতুক্কজ্ঝানিকা রূপাৰচরচতুক্কজ্ঝানিকা চ চতুক্কনযেন, পঞ্চকজ্ঝানিকা চ।
3132.Tatthāti tesu jhānāvahesu tiṃsakammaṭṭhānesu. Asubhāti uddhumātakādayo dasa asubhā. Kāyagatāsatīti kāyagatāsati cāti ime ekādasa. Paṭhamajjhānikāti imesaṃ paṭikkūlārammaṇattā, paṭikkūlārammaṇe ca cittassa caṇḍasotāya nadiyā arittabalena nāvāṭṭhānaṃ viya vitakkabaleneva pavattisambhavato avitakkānaṃ dutiyajjhānādīnaṃ asambhavoti savitakkassa paṭhamajjhānasseva sambhavato paṭhamajjhānikā. Ānāpānañca kasiṇā cāti ime ekādasa catukkajjhānikā rūpāvacaracatukkajjhānikā ca catukkanayena, pañcakajjhānikā ca.
৩১৩৩. তিস্সোৰ অপ্পমঞ্ঞাতি মেত্তা, করুণা, মুদিতাতি অপ্পমঞ্ঞা তিস্সোৰ। সামঞ্ঞনিদ্দেসে এতাসমেৰ গহণং কথং ৰিঞ্ঞাযতীতি? ‘‘অথ পচ্ছিমা’’তিআদিনা চতুত্থায অপ্পমঞ্ঞায চতুত্থজ্ঝানিকভাৰস্স ৰক্খমানত্তা পারিসেসতো তং ৰিঞ্ঞাযতি। তিকজ্ঝানানীতি তিকজ্ঝানিকা। ‘‘তিকজ্ঝানা’’তি ৰত্তব্বে লিঙ্গৰিপল্লাসেন এৰং ৰুত্তন্তি দট্ঠব্বং। মেত্তাদীনং দোমনস্সসহগতব্যাপাদৰিহিংসানভিরতীনং পহাযকত্তা দোমনস্সপটিপক্খেন সোমনস্সেনেৰ সহগততা ৰুত্তাতি চতুক্কনযেন তিকজ্ঝানিকতা ৰুত্তা, পঞ্চকনযেন চতুক্কজ্ঝানিকতা চ।
3133.Tissova appamaññāti mettā, karuṇā, muditāti appamaññā tissova. Sāmaññaniddese etāsameva gahaṇaṃ kathaṃ viññāyatīti? ‘‘Atha pacchimā’’tiādinā catutthāya appamaññāya catutthajjhānikabhāvassa vakkhamānattā pārisesato taṃ viññāyati. Tikajjhānānīti tikajjhānikā. ‘‘Tikajjhānā’’ti vattabbe liṅgavipallāsena evaṃ vuttanti daṭṭhabbaṃ. Mettādīnaṃ domanassasahagatabyāpādavihiṃsānabhiratīnaṃ pahāyakattā domanassapaṭipakkhena somanasseneva sahagatatā vuttāti catukkanayena tikajjhānikatā vuttā, pañcakanayena catukkajjhānikatā ca.
‘‘অথা’’তি ইদং ‘‘পচ্ছিমা’’তি পদস্স ‘‘তিস্সো’’তি ইমিনা পুরিমপদেন সম্বন্ধনিৰত্তনত্থং। পচ্ছিমা অপ্পমঞ্ঞা, চত্তারো আরুপ্পা চ চতুত্থজ্ঝানিকা মতা চতুক্কনযেন, পঞ্চমজ্ঝানিকা চ। ‘‘সব্বে সত্তা সুখিতা হোন্তু, দুক্খা মুচ্চন্তু, লদ্ধসুখসম্পত্তিতো মা ৰিগচ্ছন্তূ’’তি মেত্তাদিতিৰিধৰসপ্পৰত্তং ব্যাপারত্তযং পহায কম্মস্সকতাদস্সনেন সত্তেসু মজ্ঝত্তাকারপ্পত্তভাৰনানিব্বত্তায তত্রমজ্ঝত্তোপেক্খায বলৰতরত্তা অপ্পনাপ্পত্তস্স উপেক্খাব্রহ্মৰিহারস্স সুখসহগততাসম্ভৰতো উপেক্খাসহগততা ৰুত্তা।
‘‘Athā’’ti idaṃ ‘‘pacchimā’’ti padassa ‘‘tisso’’ti iminā purimapadena sambandhanivattanatthaṃ. Pacchimā appamaññā, cattāro āruppā ca catutthajjhānikā matā catukkanayena, pañcamajjhānikā ca. ‘‘Sabbe sattā sukhitā hontu, dukkhā muccantu, laddhasukhasampattito mā vigacchantū’’ti mettāditividhavasappavattaṃ byāpārattayaṃ pahāya kammassakatādassanena sattesu majjhattākārappattabhāvanānibbattāya tatramajjhattopekkhāya balavatarattā appanāppattassa upekkhābrahmavihārassa sukhasahagatatāsambhavato upekkhāsahagatatā vuttā.
৩১৩৪. অঙ্গারম্মণতো অতিক্কমো দ্ৰিধা ৰুত্তোতি যোজনা। চতুক্কতিকজ্ঝানেসূতি দসকসিণা, আনাপানসতীতি একাদসসু চতুক্কজ্ঝানিকেসু চেৰ মেত্তাদিপুরিমব্রহ্মৰিহারত্তযসঙ্খাতেসু তিকজ্ঝানিকেসু চ কম্মট্ঠানেসু। অঙ্গাতিক্কমতাতি একস্মিংযেৰ আরম্মণে ৰিতক্কাদিঝানঙ্গ সমতিক্কমেন পঠমজ্ঝানাদীনং আরম্মণেযেৰ দুতিযজ্ঝানাদীনং উপ্পত্তিতো অঙ্গাতিক্কমো অধিপ্পেতোতি অত্থো। অঙ্গাতিক্কমোযেৰ অঙ্গাতিক্কমতা।
3134. Aṅgārammaṇato atikkamo dvidhā vuttoti yojanā. Catukkatikajjhānesūti dasakasiṇā, ānāpānasatīti ekādasasu catukkajjhānikesu ceva mettādipurimabrahmavihārattayasaṅkhātesu tikajjhānikesu ca kammaṭṭhānesu. Aṅgātikkamatāti ekasmiṃyeva ārammaṇe vitakkādijhānaṅga samatikkamena paṭhamajjhānādīnaṃ ārammaṇeyeva dutiyajjhānādīnaṃ uppattito aṅgātikkamo adhippetoti attho. Aṅgātikkamoyeva aṅgātikkamatā.
৩১৩৫. অঙ্গাতিক্কমতোতি ততিযজ্ঝানসম্পযুত্তসোমনস্সাতিক্কমনতো। আরম্মণমতিক্কম্মাতি পটিভাগনিমিত্তকসিণুগ্ঘাটিমাকাসতব্বিসযপঠমারুপ্পৰিঞ্ঞাণতদভাৰসঙ্খাতানি চত্তারি আরম্মণানি যথাক্কমং অতিক্কমিত্ৰা। কসিণুগ্ঘাটিমাকাসতব্বিসযপঠমারুপ্পৰিঞ্ঞাণতদভাৰতব্বিসযততিযারুপ্পৰিঞ্ঞাণসঙ্খাতেসু চতূসু আরম্মণেসু আরুপ্পা আকাসানঞ্চাযতনাদীনি চত্তারি অরূপাৰচরজ্ঝানানি জাযরে উপ্পজ্জন্তি।
3135.Aṅgātikkamatoti tatiyajjhānasampayuttasomanassātikkamanato. Ārammaṇamatikkammāti paṭibhāganimittakasiṇugghāṭimākāsatabbisayapaṭhamāruppaviññāṇatadabhāvasaṅkhātāni cattāri ārammaṇāni yathākkamaṃ atikkamitvā. Kasiṇugghāṭimākāsatabbisayapaṭhamāruppaviññāṇatadabhāvatabbisayatatiyāruppaviññāṇasaṅkhātesu catūsu ārammaṇesu āruppā ākāsānañcāyatanādīni cattāri arūpāvacarajjhānāni jāyare uppajjanti.
৩১৩৬. এত্থাতি এতেসু আরম্মণেসু। ৰড্ঢেতব্বানীতি ‘‘যত্তকং ওকাসং কসিণেন ফরতি, তদব্ভন্তরে দিব্বায সোতধাতুযা সদ্দং সোতুং, দিব্বেন চক্খুনা রূপং পস্সিতুং, পরসত্তানঞ্চ চেতসা চিত্তং অঞ্ঞাতুং সমত্থো হোতী’’তি ৰুত্তপ্পযোজনং সন্ধায অঙ্গগণনাদিৰসেন পরিচ্ছিন্দিত্ৰা যত্তকং ইচ্ছতি, তত্তকং ৰড্ঢেতব্বানি। সেসং অসুভাদি সব্বং তং কম্মট্ঠানং পযোজনাভাৰা ন ৰড্ঢেতব্বমেৰাতি যোজনা।
3136.Etthāti etesu ārammaṇesu. Vaḍḍhetabbānīti ‘‘yattakaṃ okāsaṃ kasiṇena pharati, tadabbhantare dibbāya sotadhātuyā saddaṃ sotuṃ, dibbena cakkhunā rūpaṃ passituṃ, parasattānañca cetasā cittaṃ aññātuṃ samattho hotī’’ti vuttappayojanaṃ sandhāya aṅgagaṇanādivasena paricchinditvā yattakaṃ icchati, tattakaṃ vaḍḍhetabbāni. Sesaṃ asubhādi sabbaṃ taṃ kammaṭṭhānaṃ payojanābhāvā na vaḍḍhetabbamevāti yojanā.
৩১৩৭. তত্থ তেসু কম্মট্ঠানেসু দস কসিণা চ দস অসুভা চ কাযগতাসতি, আনাপানসতীতি ইমে বাৰীসতি কম্মট্ঠানানি পটিভাগারম্মণানীতি যোজনা। এত্থ ‘‘কসিণা’’তিআদিনা তদারম্মণানি ঝানানি গহিতানি।
3137.Tattha tesu kammaṭṭhānesu dasa kasiṇā ca dasa asubhā ca kāyagatāsati, ānāpānasatīti ime bāvīsati kammaṭṭhānāni paṭibhāgārammaṇānīti yojanā. Ettha ‘‘kasiṇā’’tiādinā tadārammaṇāni jhānāni gahitāni.
৩১৩৮. ধাতুৰৰত্থনন্তি চতুধাতুৰৰত্থানং, গাথাবন্ধৰসেন রস্সত্তং। ৰিঞ্ঞাণঞ্চাতি ৰিঞ্ঞাণঞ্চাযতনং। নেৰসঞ্ঞাতি নেৰসঞ্ঞানাসঞ্ঞাযতনং। দস দ্ৰেতি দ্ৰাদস। ভাৰগোচরাতি সভাৰধম্মগোচরা, পরমত্থধম্মালম্বণাতি ৰুত্তং হোতি।
3138.Dhātuvavatthananti catudhātuvavatthānaṃ, gāthābandhavasena rassattaṃ. Viññāṇañcāti viññāṇañcāyatanaṃ. Nevasaññāti nevasaññānāsaññāyatanaṃ. Dasa dveti dvādasa. Bhāvagocarāti sabhāvadhammagocarā, paramatthadhammālambaṇāti vuttaṃ hoti.
৩১৩৯. দ্ৰে চ আরুপ্পমানসাতি আকাসানঞ্চাযতনআকিঞ্চঞ্ঞাযতনসঙ্খাতা অরূপাৰচরচিত্তুপ্পাদা দ্ৰে চ। ছ ইমে ধম্মা নৰত্তব্বগোচরা নিদ্দিট্ঠাতি যোজনা চতুন্নং অপ্পমঞ্ঞানং সত্তপঞ্ঞত্তিযা, পঠমারুপ্পস্স কসিণুগ্ঘাটিমাকাসপঞ্ঞত্তিযা, ততিযারুপ্পস্স পঠমারুপ্পৰিঞ্ঞাণাভাৰপঞ্ঞত্তিযা চ আরম্মণত্তা।
3139.Dve ca āruppamānasāti ākāsānañcāyatanaākiñcaññāyatanasaṅkhātā arūpāvacaracittuppādā dve ca. Cha ime dhammā navattabbagocarā niddiṭṭhāti yojanā catunnaṃ appamaññānaṃ sattapaññattiyā, paṭhamāruppassa kasiṇugghāṭimākāsapaññattiyā, tatiyāruppassa paṭhamāruppaviññāṇābhāvapaññattiyā ca ārammaṇattā.
৩১৪০. পটিক্কূলসঞ্ঞাতি আহারেপটিক্কূলসঞ্ঞা। কাযগতাসতীতি দ্ৰাদসেৰ ভূমিতো দেৰেসু কামাৰচরদেৰেসু কুণপানং, পটিক্কূলারহস্স চ অসম্ভৰা ন পৰত্তন্তীতি যোজনা।
3140.Paṭikkūlasaññāti āhārepaṭikkūlasaññā. Kāyagatāsatīti dvādaseva bhūmito devesu kāmāvacaradevesu kuṇapānaṃ, paṭikkūlārahassa ca asambhavā na pavattantīti yojanā.
৩১৪১. তানি দ্ৰাদস চ। ভিয্যোতি অধিকত্থে নিপাতো, ততো অধিকং আনাপানসতি চাতি তেরস রূপারূপলোকে অস্সাসপস্সাসানঞ্চ অভাৰা সব্বসো ন জাযরেতি যোজনা।
3141. Tāni dvādasa ca. Bhiyyoti adhikatthe nipāto, tato adhikaṃ ānāpānasati cāti terasa rūpārūpaloke assāsapassāsānañca abhāvā sabbaso na jāyareti yojanā.
৩১৪২. অরূপাৰচরে অরূপভৰে চতুরো আরুপ্পে ঠপেত্ৰা অঞ্ঞে ছত্তিংস ধম্মা রূপসমতিক্কমাভাৰা ন জাযন্তীতি যোজনা। সব্বে সমচত্তালীস ধম্মা মানুসে মনুস্সলোকে সব্বেসমেৰ লব্ভমানত্তা জাযন্তি।
3142.Arūpāvacare arūpabhave caturo āruppe ṭhapetvā aññe chattiṃsa dhammā rūpasamatikkamābhāvā na jāyantīti yojanā. Sabbe samacattālīsa dhammā mānuse manussaloke sabbesameva labbhamānattā jāyanti.
৩১৪৩. চতুত্থকসিণং হিত্ৰাতি ৰাযোকসিণং দিট্ঠফুট্ঠেন গহেতব্বত্তা তং ৰজ্জেত্ৰা নৰ কসিণা চ দস অসুভা চাতি তে একূনৰীসতি ধম্মা দিট্ঠেনেৰ চক্খুৰিঞ্ঞাণেন পুব্বভাগে পরিকম্মকালে গহেতব্বা ভৰন্তীতি যোজনা। পুব্বভাগে চক্খুনা ওলোকেত্ৰা পরিকম্মং কতং, তেন উগ্গহিতনিমিত্তং তেসং গহেতব্বন্তি ৰুত্তং হোতি।
3143.Catutthakasiṇaṃ hitvāti vāyokasiṇaṃ diṭṭhaphuṭṭhena gahetabbattā taṃ vajjetvā nava kasiṇā ca dasa asubhā cāti te ekūnavīsati dhammā diṭṭheneva cakkhuviññāṇena pubbabhāge parikammakāle gahetabbā bhavantīti yojanā. Pubbabhāge cakkhunā oloketvā parikammaṃ kataṃ, tena uggahitanimittaṃ tesaṃ gahetabbanti vuttaṃ hoti.
৩১৪৪. ফুট্ঠেনাতি নাসিকগ্গে, উত্তরোট্ঠে ৰা ফুট্ঠৰসেন। কাযগতাসতিযং তচপঞ্চকং দিট্ঠেন গহেতব্বং। মালুতোতি ৰাযোকসিণং দিট্ঠফুট্ঠেন গহেতব্বং উচ্ছুসস্সাদীনং পত্তেসু চলমানৰণ্ণগ্গহণমুখেন, কাযপ্পসাদঘট্টনেন চ গহেতব্বত্তা। এত্থ এতেসু কম্মট্ঠানেসু। সেসকন্তি ৰুত্তাৰসেসং। বুদ্ধানুস্সতিআদিকা অট্ঠানুস্সতিযো, চত্তারো ব্রহ্মৰিহারা, চত্তারো আরুপ্পা, আহারেপটিক্কূলসঞ্ঞা, চতুধাতুৰৰত্থানং, কাযগতাসতিযং ৰক্কপঞ্চকাদীনি চাতি সব্বমেতং পরতো সুত্ৰা গহেতব্বত্তা সুতেনেৰ গহেতব্বন্তি ৰুত্তং।
3144.Phuṭṭhenāti nāsikagge, uttaroṭṭhe vā phuṭṭhavasena. Kāyagatāsatiyaṃ tacapañcakaṃ diṭṭhena gahetabbaṃ. Mālutoti vāyokasiṇaṃ diṭṭhaphuṭṭhena gahetabbaṃ ucchusassādīnaṃ pattesu calamānavaṇṇaggahaṇamukhena, kāyappasādaghaṭṭanena ca gahetabbattā. Ettha etesu kammaṭṭhānesu. Sesakanti vuttāvasesaṃ. Buddhānussatiādikā aṭṭhānussatiyo, cattāro brahmavihārā, cattāro āruppā, āhārepaṭikkūlasaññā, catudhātuvavatthānaṃ, kāyagatāsatiyaṃ vakkapañcakādīni cāti sabbametaṃ parato sutvā gahetabbattā suteneva gahetabbanti vuttaṃ.
৩১৪৫. এত্থ এতেসু কম্মট্ঠানেসু আকাসকসিণং ঠপেত্ৰা নৰ কসিণা পঠমারুপ্পচিত্তস্স আরম্মণভূতকসিণুগ্ঘাটিমাকাসস্স হেতুভাৰতো পচ্চযা জাযরে পচ্চযা ভৰন্তীতি যোজনা।
3145.Ettha etesu kammaṭṭhānesu ākāsakasiṇaṃ ṭhapetvā nava kasiṇā paṭhamāruppacittassa ārammaṇabhūtakasiṇugghāṭimākāsassa hetubhāvato paccayā jāyare paccayā bhavantīti yojanā.
৩১৪৬. দসপি কসিণা অভিঞ্ঞানং দিব্বচক্খুঞাণাদীনং পচ্চযা ভৰন্তীতি যোজনা। চতুত্থস্সাতি চতুত্থস্স ব্রহ্মৰিহারস্স।
3146. Dasapi kasiṇā abhiññānaṃ dibbacakkhuñāṇādīnaṃ paccayā bhavantīti yojanā. Catutthassāti catutthassa brahmavihārassa.
৩১৪৭. হেট্ঠিমহেট্ঠিমারুপ্পন্তি আকাসানঞ্চাযতনাদিকং। পরস্স চ পরস্স চাতি ৰিঞ্ঞাণঞ্চাযতনাদিউত্তরজ্ঝানস্স পচ্চযোতি পকাসিতন্তি যোজনা। নেৰসঞ্ঞাতি নেৰসঞ্ঞানাসঞ্ঞাযতনং। নিরোধস্সাতি সঞ্ঞাৰেদযিতনিরোধস্স, তায নিরোধসমাপত্তিযা।
3147.Heṭṭhimaheṭṭhimāruppanti ākāsānañcāyatanādikaṃ. Parassa ca parassa cāti viññāṇañcāyatanādiuttarajjhānassa paccayoti pakāsitanti yojanā. Nevasaññāti nevasaññānāsaññāyatanaṃ. Nirodhassāti saññāvedayitanirodhassa, tāya nirodhasamāpattiyā.
৩১৪৮. সব্বেতি সমচত্তালীসকম্মট্ঠানধম্মা। সুখৰিহারস্সাতি দিট্ঠধম্মসুখৰিহারস্স। ভৰনিস্সরণস্স চাতি ৰিভৰূপনিস্সযতায ৰিপস্সনাপাদকত্তেন আসৰক্খযঞাণেন অধিগন্তব্বস্স নিব্বানস্স চ। ভৰসুখানঞ্চাতি পরিকম্মোপচারভাৰনাৰসপ্পৰত্তানি কামাৰচরকুসলচিত্তানি কামসুগতিভৰসুখানং, রূপাৰচরপ্পনাৰসপৰত্তানি রূপাৰচরচিত্তানি রূপাৰচরভৰসুখানং, ইতরানি অরূপাৰচরভূতানি অরূপাৰচরভৰসুখানঞ্চ পচ্চযাতি দীপিতা।
3148.Sabbeti samacattālīsakammaṭṭhānadhammā. Sukhavihārassāti diṭṭhadhammasukhavihārassa. Bhavanissaraṇassacāti vibhavūpanissayatāya vipassanāpādakattena āsavakkhayañāṇena adhigantabbassa nibbānassa ca. Bhavasukhānañcāti parikammopacārabhāvanāvasappavattāni kāmāvacarakusalacittāni kāmasugatibhavasukhānaṃ, rūpāvacarappanāvasapavattāni rūpāvacaracittāni rūpāvacarabhavasukhānaṃ, itarāni arūpāvacarabhūtāni arūpāvacarabhavasukhānañca paccayāti dīpitā.
৩১৪৯. দস অসুভা, কাযগতাসতীতি ইমে একাদস রাগচরিতস্স ৰিসেসতো অনুকূলা ৰিঞ্ঞেয্যাতি যোজনা। ‘‘ৰিসেসতো’’তি ইমিনা রাগস্স উজুৰিপচ্চনীকভাৰেন চ অতিসপ্পাযতো চ ৰুত্তো, ইতরে চ অপটিক্খিত্তাতি দীপেতি। ৰুত্তঞ্হেতং ৰিসুদ্ধিমগ্গে ‘‘সব্বঞ্চেতং উজুৰিপচ্চনীকৰসেন চ অতিসপ্পাযৰসেন চ ৰুত্তং, রাগাদীনং পন অৰিক্খম্ভিকা, সদ্ধাদীনং ৰা অনুপকারা কুসলভাৰনা নাম নত্থী’’তি (ৰিসুদ্ধি॰ ১.৪৭)।
3149. Dasa asubhā, kāyagatāsatīti ime ekādasa rāgacaritassa visesato anukūlā viññeyyāti yojanā. ‘‘Visesato’’ti iminā rāgassa ujuvipaccanīkabhāvena ca atisappāyato ca vutto, itare ca apaṭikkhittāti dīpeti. Vuttañhetaṃ visuddhimagge ‘‘sabbañcetaṃ ujuvipaccanīkavasena ca atisappāyavasena ca vuttaṃ, rāgādīnaṃ pana avikkhambhikā, saddhādīnaṃ vā anupakārā kusalabhāvanā nāma natthī’’ti (visuddhi. 1.47).
৩১৫০. সৰণ্ণকসিণাতি চতূহি ৰণ্ণকেহি কসিণেহি সহিতা। চতস্সো অপ্পমঞ্ঞাযোতি ইমে অট্ঠ দোসচরিতস্স অনুকূলাতি পকাসিতাতি যোজনা।
3150.Savaṇṇakasiṇāti catūhi vaṇṇakehi kasiṇehi sahitā. Catasso appamaññāyoti ime aṭṭha dosacaritassa anukūlāti pakāsitāti yojanā.
৩১৫১. মোহপ্পকতিনোতি মোহচরিতস্স। ‘‘আনাপানসতি একাৰা’’তি পদচ্ছেদো।
3151.Mohappakatinoti mohacaritassa. ‘‘Ānāpānasati ekāvā’’ti padacchedo.
৩১৫২. মরণূপসমেতি মরণঞ্চ উপসমো চ মরণূপসমং, তস্মিং মরণূপসমে। সতীতি মরণানুস্সতি, উপসমানুস্সতি চাতি এতে চত্তারো ধম্মা। পঞ্ঞাপকতিনোতি বুদ্ধিচরিতস্স।
3152.Maraṇūpasameti maraṇañca upasamo ca maraṇūpasamaṃ, tasmiṃ maraṇūpasame. Satīti maraṇānussati, upasamānussati cāti ete cattāro dhammā. Paññāpakatinoti buddhicaritassa.
৩১৫৩. আদিঅনুস্সতিচ্ছক্কন্তি বুদ্ধধম্মসঙ্ঘসীলচাগদেৰতানুস্সতিসঙ্খাতং ছক্কং। সদ্ধাচরিতৰণ্ণিতন্তি সদ্ধাচরিতস্স অনুকূলন্তি কথিতং। আরুপ্পাতি চত্তারো আরুপ্পা। সেসা কসিণাতি ভূতকসিণআলোকাকাসকসিণানং ৰসেন ছ কসিণাতি সেসা দস ধম্মা। সব্বানুরূপকাতি সব্বেসং ছন্নং চরিযানং অনুকূলাতি অত্থো।
3153.Ādianussaticchakkanti buddhadhammasaṅghasīlacāgadevatānussatisaṅkhātaṃ chakkaṃ. Saddhācaritavaṇṇitanti saddhācaritassa anukūlanti kathitaṃ. Āruppāti cattāro āruppā. Sesā kasiṇāti bhūtakasiṇaālokākāsakasiṇānaṃ vasena cha kasiṇāti sesā dasa dhammā. Sabbānurūpakāti sabbesaṃ channaṃ cariyānaṃ anukūlāti attho.
৩১৫৪-৮. এৰং যথানিক্খিত্তমাতিকানুক্কমেন কম্মট্ঠানপ্পভেদং ৰিভাৰেত্ৰা ইদানি ভাৰনানযং দস্সেতুমাহ ‘‘এৰ’’ন্তিআদি। এৰং পভেদতো ঞত্ৰা কম্মট্ঠানানীতি যথাৰুত্তভেদনযমুখেন ভাৰনামযারম্ভদস্সনং। পণ্ডিতোতি তিহেতুকপটিসন্ধিপঞ্ঞায পঞ্ঞৰা ভব্বপুগ্গলো। তেসূতি নিদ্ধারণে ভুম্মং। মেধাৰীতি পারিহারিযপঞ্ঞায সমন্নাগতো। দল়্হং গহেত্ৰানাতিআদিমজ্ঝপরিযোসানে সুট্ঠু সল্লক্খন্তেন দল়্হং অট্ঠিং কত্ৰা সক্কচ্চং উগ্গহেত্ৰা। কল্যাণমিত্তকোতি –
3154-8. Evaṃ yathānikkhittamātikānukkamena kammaṭṭhānappabhedaṃ vibhāvetvā idāni bhāvanānayaṃ dassetumāha ‘‘eva’’ntiādi. Evaṃ pabhedato ñatvā kammaṭṭhānānīti yathāvuttabhedanayamukhena bhāvanāmayārambhadassanaṃ. Paṇḍitoti tihetukapaṭisandhipaññāya paññavā bhabbapuggalo. Tesūti niddhāraṇe bhummaṃ. Medhāvīti pārihāriyapaññāya samannāgato. Daḷhaṃ gahetvānātiādimajjhapariyosāne suṭṭhu sallakkhantena daḷhaṃ aṭṭhiṃ katvā sakkaccaṃ uggahetvā. Kalyāṇamittakoti –
‘‘পিযো গরু ভাৰনীযো।
‘‘Piyo garu bhāvanīyo;
ৰত্তা চ ৰচনক্খমো।
Vattā ca vacanakkhamo;
গম্ভীরঞ্চ কথং কত্তা।
Gambhīrañca kathaṃ kattā;
নো চট্ঠানে নিযোজকো’’তি॥ (ৰিসুদ্ধি॰ ১.৩৭; নেত্তি॰ ১১৩) –
No caṭṭhāne niyojako’’ti. (visuddhi. 1.37; netti. 113) –
ৰুত্তলক্খণকো সীলসুতপঞ্ঞাদিগুণসমন্নাগতকল্যাণমিত্তকো।
Vuttalakkhaṇako sīlasutapaññādiguṇasamannāgatakalyāṇamittako.
পঠমমেৰ পলিবোধানং উচ্ছেদং কত্ৰাতি যোজনা। পঠমন্তি ভাৰনারম্ভতো পঠমমেৰ। পলিবোধানং উচ্ছেদং কত্ৰাতি –
Paṭhamameva palibodhānaṃ ucchedaṃ katvāti yojanā. Paṭhamanti bhāvanārambhato paṭhamameva. Palibodhānaṃ ucchedaṃ katvāti –
‘‘আৰাসো চ কুলং লাভো।
‘‘Āvāso ca kulaṃ lābho;
গণো কম্মঞ্চ পঞ্চমং।
Gaṇo kammañca pañcamaṃ;
অদ্ধানং ঞাতি আবাধো।
Addhānaṃ ñāti ābādho;
গন্থো ইদ্ধীতি তে দসা’’তি॥ (ৰিসুদ্ধি॰ ১.৪১) –
Gantho iddhīti te dasā’’ti. (visuddhi. 1.41) –
ৰুত্তানং দসমহাপলিবোধানং, দীঘকেসনখলোমচ্ছেদনচীৰররজনপত্তপচনাদীনং খুদ্দকপঅবোধানঞ্চাতি উভযেসং পলিবোধানং উচ্ছেদং কত্ৰা নিট্ঠাপনেন ৰা আলযপরিচ্চাগেন ৰা উচ্ছেদং কত্ৰা। ইদ্ধি পনেত্থ ৰিপস্সনায পলিবোধো হোতি, ন সমাধিভাৰনায। ৰুত্তঞ্হেতং ৰিসুদ্ধিমগ্গে ‘‘ইদ্ধীতি পোথুজ্জনিকা ইদ্ধি। সা হি উত্তানসেয্যকদারকো ৰিয, তরুণসস্সং ৰিয চ দুপ্পরিহারা হোতি, অপ্পমত্তকেনেৰ ভিজ্জতি। সা পন ৰিপস্সনায পলিবোধো হোতি, ন সমাধিস্স সমাধিং পত্ৰা পত্তব্বত্তা’’তি (ৰিসুদ্ধি॰ ১.৪১)।
Vuttānaṃ dasamahāpalibodhānaṃ, dīghakesanakhalomacchedanacīvararajanapattapacanādīnaṃ khuddakapaabodhānañcāti ubhayesaṃ palibodhānaṃ ucchedaṃ katvā niṭṭhāpanena vā ālayapariccāgena vā ucchedaṃ katvā. Iddhi panettha vipassanāya palibodho hoti, na samādhibhāvanāya. Vuttañhetaṃ visuddhimagge ‘‘iddhīti pothujjanikā iddhi. Sā hi uttānaseyyakadārako viya, taruṇasassaṃ viya ca dupparihārā hoti, appamattakeneva bhijjati. Sā pana vipassanāya palibodho hoti, na samādhissa samādhiṃ patvā pattabbattā’’ti (visuddhi. 1.41).
দোসৰজ্জিতে , অনুরূপে চ ৰিহারে ৰসন্তেনাতি যোজনা। দোসৰজ্জিতেতি –
Dosavajjite , anurūpe ca vihāre vasantenāti yojanā. Dosavajjiteti –
‘‘মহাৰাসং নৰাৰাসং, জরাৰাসঞ্চ পন্থনিং।
‘‘Mahāvāsaṃ navāvāsaṃ, jarāvāsañca panthaniṃ;
সোণ্ডিং পণ্ণঞ্চ পুপ্ফঞ্চ, ফলং পত্থিতমেৰ চ॥
Soṇḍiṃ paṇṇañca pupphañca, phalaṃ patthitameva ca.
‘‘নগরং দারুনা খেত্তং, ৰিসভাগেন পট্টনং।
‘‘Nagaraṃ dārunā khettaṃ, visabhāgena paṭṭanaṃ;
পচ্চন্তসীমাসপ্পাযং, যত্থ মিত্তো ন লব্ভতি॥
Paccantasīmāsappāyaṃ, yattha mitto na labbhati.
‘‘অট্ঠারসেতানি ঠানানি, ইতি ৰিঞ্ঞায পণ্ডিতো।
‘‘Aṭṭhārasetāni ṭhānāni, iti viññāya paṇḍito;
আরকা পরিৰজ্জেয্য, মগ্গং পটিভযং যথা’’তি॥ (ৰিসুদ্ধি॰ ১.৫২) –
Ārakā parivajjeyya, maggaṃ paṭibhayaṃ yathā’’ti. (visuddhi. 1.52) –
অট্ঠকথাসু ৰুত্তেহি ইমেহি অট্ঠারসহি দোসেহি গজ্জিতে।
Aṭṭhakathāsu vuttehi imehi aṭṭhārasahi dosehi gajjite.
অনুরূপে ৰসন্তেনাতি –
Anurūpe vasantenāti –
‘‘ইধ , ভিক্খৰে, সেনাসনং নাতিদূরং হোতি নচ্চাসন্নং গমনাগমনসম্পন্নং, দিৰা অপ্পাকিণ্ণং, রত্তিং অপ্পসদ্দং অপ্পনিগ্ঘোসং, অপ্পডংসমকসৰাতাতপসরীসপসম্ফস্সং, তস্মিং খো পন সেনাসনে ৰিহরন্তস্স অপ্পকসিরেনেৰ উপ্পজ্জন্তি চীৰরপিণ্ডপাতসেনাসনগিলানপচ্চযভেসজ্জপরিক্খারা, তস্মিং খো পন সেনাসনে যে তে ভিক্খূ ৰিহরন্তি বহুস্সুতা আগতাগমা ধম্মধরা ৰিনযধরা মাতিকাধরা, তে কালেন কালং উপসঙ্কমিত্ৰা পরিপুচ্ছতি পরিপঞ্হতি ‘ইদং, ভন্তে, কথং, ইমস্স কো অত্থো’তি, তস্স তে আযস্মন্তো অৰিৰটঞ্চেৰ ৰিৰরন্তি, অনুত্তানীকতঞ্চ উত্তানিং করোন্তি, অনেকৰিহিতেসু চ কঙ্খট্ঠানীযেসু ধম্মেসু কঙ্খং পটিৰিনোদেন্তি। এৰং খো, ভিক্খৰে, সেনাসনং পঞ্চঙ্গসমন্নাগতং হোতী’’তি (অ॰ নি॰ ১০.১১) –
‘‘Idha , bhikkhave, senāsanaṃ nātidūraṃ hoti naccāsannaṃ gamanāgamanasampannaṃ, divā appākiṇṇaṃ, rattiṃ appasaddaṃ appanigghosaṃ, appaḍaṃsamakasavātātapasarīsapasamphassaṃ, tasmiṃ kho pana senāsane viharantassa appakasireneva uppajjanti cīvarapiṇḍapātasenāsanagilānapaccayabhesajjaparikkhārā, tasmiṃ kho pana senāsane ye te bhikkhū viharanti bahussutā āgatāgamā dhammadharā vinayadharā mātikādharā, te kālena kālaṃ upasaṅkamitvā paripucchati paripañhati ‘idaṃ, bhante, kathaṃ, imassa ko attho’ti, tassa te āyasmanto avivaṭañceva vivaranti, anuttānīkatañca uttāniṃ karonti, anekavihitesu ca kaṅkhaṭṭhānīyesu dhammesu kaṅkhaṃ paṭivinodenti. Evaṃ kho, bhikkhave, senāsanaṃ pañcaṅgasamannāgataṃ hotī’’ti (a. ni. 10.11) –
এৰং ভগৰতা ৰণ্ণিতেহি পঞ্চহি গুণেহি সমন্নাগতত্তা অনুরূপে ভাৰনাকম্মানুগুণে ৰিহারে ৰিহরন্তেনাতি অত্থো। পঠমাদীনীতি পঠমদুতিযাদীনি রূপাৰচরজ্ঝানানি। সব্বসো ভাৰেত্ৰাতি ৰিসুদ্ধিমগ্গে ‘‘সব্বং ভাৰনাৰিধানং অপরিহাপেন্তেন ভাৰেতব্বো’’তি (ৰিসুদ্ধি॰ ১.৪১) নিক্খিত্তস্স মাতিকাপদস্স ৰিত্থারক্কমেন ভাৰেত্ৰা, চিত্তৰিসুদ্ধিং সম্পাদেত্ৰাতি ৰুত্তং হোতি।
Evaṃ bhagavatā vaṇṇitehi pañcahi guṇehi samannāgatattā anurūpe bhāvanākammānuguṇe vihāre viharantenāti attho. Paṭhamādīnīti paṭhamadutiyādīni rūpāvacarajjhānāni. Sabbaso bhāvetvāti visuddhimagge ‘‘sabbaṃ bhāvanāvidhānaṃ aparihāpentena bhāvetabbo’’ti (visuddhi. 1.41) nikkhittassa mātikāpadassa vitthārakkamena bhāvetvā, cittavisuddhiṃ sampādetvāti vuttaṃ hoti.
সপ্পঞ্ঞোতি কম্মজতিহেতুকপটিসন্ধিপঞ্ঞায চেৰ কম্মট্ঠানমনসিকারসপ্পাযানি পরিগ্গহেত্ৰা অসপ্পাযং পরিৰজ্জেত্ৰা সপ্পাযসেৰনোপকারায পারিহারিযপঞ্ঞায চ সমন্নাগতো যোগাৰচরো। ততোতি নেৰসঞ্ঞানাসঞ্ঞাযতনৰজ্জিতরূপারূপজ্ঝানং ৰিপস্সনাপাদকভাৰেন সমাপজ্জিত্ৰা অট্ঠন্নং ৰিপস্সনাপাদকজ্ঝানানমঞ্ঞতরতো ঝানা ৰুট্ঠায। তেনাহ ৰিসুদ্ধিমগ্গে ‘‘ঠপেত্ৰা নেৰসঞ্ঞানাসঞ্ঞাযতনং অৰসেসরূপারূপাৰচরজ্ঝানানং অঞ্ঞতরতো ৰুট্ঠাযা’’তি (ৰিসুদ্ধি॰ ২.৬৬৩)।
Sappaññoti kammajatihetukapaṭisandhipaññāya ceva kammaṭṭhānamanasikārasappāyāni pariggahetvā asappāyaṃ parivajjetvā sappāyasevanopakārāya pārihāriyapaññāya ca samannāgato yogāvacaro. Tatoti nevasaññānāsaññāyatanavajjitarūpārūpajjhānaṃ vipassanāpādakabhāvena samāpajjitvā aṭṭhannaṃ vipassanāpādakajjhānānamaññatarato jhānā vuṭṭhāya. Tenāha visuddhimagge ‘‘ṭhapetvā nevasaññānāsaññāyatanaṃ avasesarūpārūpāvacarajjhānānaṃ aññatarato vuṭṭhāyā’’ti (visuddhi. 2.663).
নামরূপৰৰত্থানং কত্ৰাতি ৰিসুদ্ধিমগ্গে দিট্ঠিৰিসুদ্ধিনিদ্দেসে ৰুত্তনযেন পঞ্চক্খন্ধাদিমুখেসু যথিচ্ছিতেন মুখেন পৰিসিত্ৰা নামরূপং ৰৰত্থপেত্ৰা ‘‘ইদং নামং, ইদং রূপং, ইমম্হা নামরূপতো ব্যতিরিত্তং অত্তাদি কিঞ্চি ৰত্তব্বং নত্থী’’তি নিট্ঠং গন্ত্ৰা, ইমিনা দিট্ঠিৰিসুদ্ধি দস্সিতা।
Nāmarūpavavatthānaṃ katvāti visuddhimagge diṭṭhivisuddhiniddese vuttanayena pañcakkhandhādimukhesu yathicchitena mukhena pavisitvā nāmarūpaṃ vavatthapetvā ‘‘idaṃ nāmaṃ, idaṃ rūpaṃ, imamhā nāmarūpato byatirittaṃ attādi kiñci vattabbaṃ natthī’’ti niṭṭhaṃ gantvā, iminā diṭṭhivisuddhi dassitā.
কঙ্খং ৰিতীরিযাতি যথাদিট্ঠনামরূপধম্মানং ৰিসুদ্ধিমগ্গে কঙ্খাৰিতরণৰিসুদ্ধিনিদ্দেসে (ৰিসুদ্ধি॰ ২.৬৭৮ আদযো) ৰুত্তনযেন পঞ্চধা পরিগ্গহেত্ৰা ‘‘ন তাৰিদং নামরূপং অহেতুকং, ন অত্তাদিহেতুক’’ন্তি যাথাৰতো নামরূপস্স পঞ্চধা দস্সনেন অদ্ধত্তযগতং ‘‘অহোসিং নু খো অহং অতীতমদ্ধান’’ন্তিআদিনযপ্পৰত্তং (ম॰ নি॰ ১.১৮; সং॰ নি॰ ২.২০; মহানি॰ ১৭৪) সোল়সৰিধং কঙ্খং, ‘‘সত্থরি কঙ্খতী’’তিআদিনযপ্পৰত্তং (ধ॰ স॰ ১০০৮) অট্ঠৰিধঞ্চ কঙ্খং ৰীরিযেন তরিত্ৰা পজহিত্ৰা, ইমিনা কঙ্খাৰিতরণৰিসুদ্ধি দস্সিতা হোতি।
Kaṅkhaṃ vitīriyāti yathādiṭṭhanāmarūpadhammānaṃ visuddhimagge kaṅkhāvitaraṇavisuddhiniddese (visuddhi. 2.678 ādayo) vuttanayena pañcadhā pariggahetvā ‘‘na tāvidaṃ nāmarūpaṃ ahetukaṃ, na attādihetuka’’nti yāthāvato nāmarūpassa pañcadhā dassanena addhattayagataṃ ‘‘ahosiṃ nu kho ahaṃ atītamaddhāna’’ntiādinayappavattaṃ (ma. ni. 1.18; saṃ. ni. 2.20; mahāni. 174) soḷasavidhaṃ kaṅkhaṃ, ‘‘satthari kaṅkhatī’’tiādinayappavattaṃ (dha. sa. 1008) aṭṭhavidhañca kaṅkhaṃ vīriyena taritvā pajahitvā, iminā kaṅkhāvitaraṇavisuddhi dassitā hoti.
এৰং কঙ্খাৰিতরণৰিসুদ্ধিনিপ্ফাদনেন ঞাতপরিঞ্ঞায ঠিতো যোগাৰচরো সপ্পাযং নামরূপং লক্খণত্তযং আরোপেত্ৰা কঙ্খাৰূপসমঞাণেন মগ্গামগ্গঞাণদস্সনৰিসুদ্ধিনিদ্দেসে (ৰিসুদ্ধি॰ ২.৬৯২ আদযো) ৰুত্তনযেন সঙ্খারে সম্মসন্তো ওভাসো, ঞাণং, পীতি, পস্সদ্ধি, সুখং, অধিমোক্খো, পগ্গহো, উপট্ঠানং, উপেক্খা, নিকন্তীতি দসসু উপক্কিলেসেসু পাতুভূতেসু তথা পাতুভূতে ওভাসাদযো দস উপক্কিলেসে ‘‘অমগ্গো’’তি মগ্গৰীথিপটিপন্নং ৰিপস্সনাঞাণমেৰ ‘‘মগ্গো’’তি পণ্ডিতো পঞ্ঞৰা যোগাৰচরো জানাতীতি অত্থো, ইমিনা মগ্গামগ্গঞাণদস্সনৰিসুদ্ধি সঙ্খেপতো দস্সিতা হোতি।
Evaṃ kaṅkhāvitaraṇavisuddhinipphādanena ñātapariññāya ṭhito yogāvacaro sappāyaṃ nāmarūpaṃ lakkhaṇattayaṃ āropetvā kaṅkhāvūpasamañāṇena maggāmaggañāṇadassanavisuddhiniddese (visuddhi. 2.692 ādayo) vuttanayena saṅkhāre sammasanto obhāso, ñāṇaṃ, pīti, passaddhi, sukhaṃ, adhimokkho, paggaho, upaṭṭhānaṃ, upekkhā, nikantīti dasasu upakkilesesu pātubhūtesu tathā pātubhūte obhāsādayo dasa upakkilese ‘‘amaggo’’ti maggavīthipaṭipannaṃ vipassanāñāṇameva ‘‘maggo’’ti paṇḍito paññavā yogāvacaro jānātīti attho, iminā maggāmaggañāṇadassanavisuddhi saṅkhepato dassitā hoti.
৩১৫৯. এত্তাৰতা তেসং তিণ্ণং ৰৰত্থানেতি যোজনা। এত্তাৰতাতি ‘‘নামরূপৰৰত্থানং কত্ৰা’’তিআদিনা সঙ্খেপতো দস্সিতনযেন। তেসং তিণ্ণন্তি দিট্ঠিৰিসুদ্ধি, কঙ্খাৰিতরণৰিসুদ্ধি, মগ্গামগ্গঞাণদস্সনৰিসুদ্ধীতি তীহি ৰিসুদ্ধীহি সকসকৰিপস্সনানং নামরূপতপ্পচ্চযমগ্গামগ্গানং তিণ্ণং। ৰৰত্থানে কতে নিযমে কতে। তিণ্ণং সচ্চানন্তি দুক্খসমুদযমগ্গসঙ্খআতানং তিণ্ণং সচ্চানং। ৰৰত্থানং কতং সিযাতি ঞাততীরণপরিঞ্ঞাসঙ্খাতেন লোকিযেনেৰ ঞাণেন অনুবোধৰসেন নিচ্ছযো কতো হোতীতি অত্থো। কথং? নামরূপৰৰত্থানসঙ্খাতেন দিট্ঠিৰিসুদ্ধিঞাণেন দুক্খসচ্চৰৰত্থানং কতং হোতি, পচ্চযপরিগ্গহসঙ্খাতেন কঙ্খাৰিতরণৰিসুদ্ধিঞাণেন সমুদযসচ্চৰৰত্থানং, মগ্গামগ্গৰৰত্থানসঙ্খাতেন মগ্গামগ্গঞাণদস্সনেন মগ্গসচ্চৰৰত্থানং।
3159. Ettāvatā tesaṃ tiṇṇaṃ vavatthāneti yojanā. Ettāvatāti ‘‘nāmarūpavavatthānaṃ katvā’’tiādinā saṅkhepato dassitanayena. Tesaṃ tiṇṇanti diṭṭhivisuddhi, kaṅkhāvitaraṇavisuddhi, maggāmaggañāṇadassanavisuddhīti tīhi visuddhīhi sakasakavipassanānaṃ nāmarūpatappaccayamaggāmaggānaṃ tiṇṇaṃ. Vavatthāne kate niyame kate. Tiṇṇaṃ saccānanti dukkhasamudayamaggasaṅkhaātānaṃ tiṇṇaṃ saccānaṃ. Vavatthānaṃ kataṃ siyāti ñātatīraṇapariññāsaṅkhātena lokiyeneva ñāṇena anubodhavasena nicchayo kato hotīti attho. Kathaṃ? Nāmarūpavavatthānasaṅkhātena diṭṭhivisuddhiñāṇena dukkhasaccavavatthānaṃ kataṃ hoti, paccayapariggahasaṅkhātena kaṅkhāvitaraṇavisuddhiñāṇena samudayasaccavavatthānaṃ, maggāmaggavavatthānasaṅkhātena maggāmaggañāṇadassanena maggasaccavavatthānaṃ.
৩১৬০-১. এৰং ঞাততীরণপরিঞ্ঞাদ্ৰযং সঙ্খেপতো দস্সেত্ৰা পহানপরিঞ্ঞায সরীরভূতানি নৰ ঞাণানি দস্সেতুমাহ ‘‘উদযব্বযা’’তিআদি। তত্থ উদযব্বযাতি উপ্পাদভঙ্গানুপস্সনাৰসপ্পৰত্তা উত্তরপদলোপেন ‘‘উদযব্বযা’’তি ৰুত্তা। তত্থ উদযং মুঞ্চিত্ৰা ৰযে ৰা পৰত্তা ভঙ্গানুপস্সনা ‘‘ভঙ্গা’’তি ৰুত্তা। ভযঞ্চ আদীনৰো চ নিব্বিদা চ ভযাদীনৰনিব্বিদা, সঙ্খারানং ভযতো অনুপস্সনৰসেন পৰত্তা ভযানুপস্সনা চ দিট্ঠভযানং আদীনৰতো পেক্খনৰসেন পৰত্তা আদীনৰানুপস্সনা চ দিট্ঠাদীনৰেসু নিব্বেদৰসেন পৰত্তা নিব্বিদানুপস্সনা চ তথা ৰুত্তা। নিব্বিন্দিত্ৰা সঙ্খারেহি মুচ্চিতুকামতাৰসেনেৰ পৰত্তং ঞাণং মুচ্চিতুকামতাঞাণং। মুচ্চনস্স উপাযসম্পটিপাদনত্থং পুন সঙ্খারত্তযপটিগ্গহৰসপৰত্তং ঞাণং পটিসঙ্খানুপস্সনা।
3160-1. Evaṃ ñātatīraṇapariññādvayaṃ saṅkhepato dassetvā pahānapariññāya sarīrabhūtāni nava ñāṇāni dassetumāha ‘‘udayabbayā’’tiādi. Tattha udayabbayāti uppādabhaṅgānupassanāvasappavattā uttarapadalopena ‘‘udayabbayā’’ti vuttā. Tattha udayaṃ muñcitvā vaye vā pavattā bhaṅgānupassanā ‘‘bhaṅgā’’ti vuttā. Bhayañca ādīnavo ca nibbidā ca bhayādīnavanibbidā, saṅkhārānaṃ bhayato anupassanavasena pavattā bhayānupassanā ca diṭṭhabhayānaṃ ādīnavato pekkhanavasena pavattā ādīnavānupassanā ca diṭṭhādīnavesu nibbedavasena pavattā nibbidānupassanā ca tathā vuttā. Nibbinditvā saṅkhārehi muccitukāmatāvaseneva pavattaṃ ñāṇaṃ muccitukāmatāñāṇaṃ. Muccanassa upāyasampaṭipādanatthaṃ puna saṅkhārattayapaṭiggahavasapavattaṃ ñāṇaṃ paṭisaṅkhānupassanā.
সঙ্খারধম্মে ভযনন্দিৰিৰজ্জনৰসেন অজ্ঝুপেক্খিত্ৰা পৰত্তঞাণং সঙ্খারুপেক্খাঞাণং, সচ্চানুলোমো তদধিগমায একন্তপচ্চযো হোতীতি ‘‘সচ্চানুলোমিক’’ন্তি চ কলাপসম্মসনঞাণাদীনং পুরিমানং নৰন্নং কিচ্চনিপ্ফত্তিযা, উপরি চ সত্ততিংসায বোধিপক্খিযধম্মানঞ্চ অনুলোমনতো ‘‘অনুলোমঞাণ’’ন্তি চ ৰুত্তং নৰমং ঞাণঞ্চাতি যা নৰানুপুব্বৰিপস্সনাসঙ্খাতা পহানপরিঞ্ঞা দস্সিতা, অযং ‘‘পটিপদাঞাণদস্সন’’ন্তি পকাসিতাতি যোজনা।
Saṅkhāradhamme bhayanandivivajjanavasena ajjhupekkhitvā pavattañāṇaṃ saṅkhārupekkhāñāṇaṃ, saccānulomo tadadhigamāya ekantapaccayo hotīti ‘‘saccānulomika’’nti ca kalāpasammasanañāṇādīnaṃ purimānaṃ navannaṃ kiccanipphattiyā, upari ca sattatiṃsāya bodhipakkhiyadhammānañca anulomanato ‘‘anulomañāṇa’’nti ca vuttaṃ navamaṃ ñāṇañcāti yā navānupubbavipassanāsaṅkhātā pahānapariññā dassitā, ayaṃ ‘‘paṭipadāñāṇadassana’’nti pakāsitāti yojanā.
৩১৬২. ততো অনুলোমঞাণতো পরং মগ্গস্স আৰজ্জনট্ঠানিযং হুত্ৰা নিব্বানমালম্বিত্ৰা উপ্পন্নস্স পুথুজ্জনগোত্তস্স অভিভৰনতো, অরিযগোত্তস্স ভাৰনতো ৰড্ঢনতো চ ‘‘গোত্রভূ’’তি সঙ্খং গতস্স চিত্তস্স সমনন্তরমেৰ চ। সন্তিমারম্মণং কত্ৰাতি সব্বকিলেসদরথানঞ্চ সঙ্খারদুক্খগ্গিনো চ ৰূপসমনিমিত্তত্তা ‘‘সন্তি’’ন্তি সঙ্খাতং নিরোধমালম্বিত্ৰা। ঞাণদস্সনন্তি চতুন্নং অরিযসচ্চানং পরিঞ্ঞাভিসমযাদিৰসেন জাননট্ঠেন ঞাণং, চক্খুনা ৰিয পচ্চক্খতো দস্সনট্ঠেন দস্সনন্তি সঙ্খং গতং সোতাপত্তিমগ্গঞাণসঙ্খাতং সত্তমৰিসুদ্ধিঞাণং জাযতে উপ্পজ্জতীতি অত্থো।
3162.Tato anulomañāṇato paraṃ maggassa āvajjanaṭṭhāniyaṃ hutvā nibbānamālambitvā uppannassa puthujjanagottassa abhibhavanato, ariyagottassa bhāvanato vaḍḍhanato ca ‘‘gotrabhū’’ti saṅkhaṃ gatassa cittassa samanantarameva ca. Santimārammaṇaṃ katvāti sabbakilesadarathānañca saṅkhāradukkhaggino ca vūpasamanimittattā ‘‘santi’’nti saṅkhātaṃ nirodhamālambitvā. Ñāṇadassananti catunnaṃ ariyasaccānaṃ pariññābhisamayādivasena jānanaṭṭhena ñāṇaṃ, cakkhunā viya paccakkhato dassanaṭṭhena dassananti saṅkhaṃ gataṃ sotāpattimaggañāṇasaṅkhātaṃ sattamavisuddhiñāṇaṃ jāyate uppajjatīti attho.
৩১৬৩. পচ্চৰেক্খণপরিযন্তন্তি পচ্চৰেক্খণজৰনপরিযোসানং। তস্সাতি ঞাণদস্সনসঙ্খাতস্স সোতাপত্তিমগ্গস্স। ফলন্তি ফলচিত্তং অনু পচ্ছা মগ্গানন্তরং হুত্ৰা জাযতে।
3163.Paccavekkhaṇapariyantanti paccavekkhaṇajavanapariyosānaṃ. Tassāti ñāṇadassanasaṅkhātassa sotāpattimaggassa. Phalanti phalacittaṃ anu pacchā maggānantaraṃ hutvā jāyate.
এত্থ ‘‘পচ্চৰেক্খণপরিযন্ত’’ন্তি ইদং ‘‘ফল’’ন্তি এতস্স ৰিসেসনং, কিরিযাৰিসেসনং ৰা, পচ্চৰেক্খণজৰনং মরিযাদং কত্ৰাতি অত্থো। মগ্গানন্তরং ফলে দ্ৰিক্খত্তুং, তিক্খত্তুং ৰা উপ্পজ্জিত্ৰা নিরুদ্ধে তদনন্তরমেৰ ভৰঙ্গং হোতি, ভৰঙ্গং আৰট্টেত্ৰা পচ্চৰেক্খিতব্বং মগ্গমালম্বিত্ৰা মনোদ্ৰারাৰজ্জনং উপ্পজ্জতি, ততো পচ্চৰেক্খণজৰনানি। এৰং ফলচিত্তং ভৰঙ্গপরিযন্তমেৰ হোতি, ন পচ্চৰেক্খণপরিযন্তং। তথাপি অঞ্ঞেন জৰনেন অনন্তরিকং হুত্ৰা ফলজৰনানমনন্তরং পচ্চৰেক্খণজৰনমেৰ পৰত্ততীতি দস্সনত্থং ফলপচ্চৰেক্খণজৰনানন্তরে উপ্পন্নানি ভৰঙ্গাৰজ্জনানি অব্বোহারিকানি কত্ৰা ‘‘পচ্চৰেক্খণপরিযন্তং, ফলং তস্সানুজাযতে’’তি ৰুত্তন্তি গহেতব্বং।
Ettha ‘‘paccavekkhaṇapariyanta’’nti idaṃ ‘‘phala’’nti etassa visesanaṃ, kiriyāvisesanaṃ vā, paccavekkhaṇajavanaṃ mariyādaṃ katvāti attho. Maggānantaraṃ phale dvikkhattuṃ, tikkhattuṃ vā uppajjitvā niruddhe tadanantarameva bhavaṅgaṃ hoti, bhavaṅgaṃ āvaṭṭetvā paccavekkhitabbaṃ maggamālambitvā manodvārāvajjanaṃ uppajjati, tato paccavekkhaṇajavanāni. Evaṃ phalacittaṃ bhavaṅgapariyantameva hoti, na paccavekkhaṇapariyantaṃ. Tathāpi aññena javanena anantarikaṃ hutvā phalajavanānamanantaraṃ paccavekkhaṇajavanameva pavattatīti dassanatthaṃ phalapaccavekkhaṇajavanānantare uppannāni bhavaṅgāvajjanāni abbohārikāni katvā ‘‘paccavekkhaṇapariyantaṃ, phalaṃ tassānujāyate’’ti vuttanti gahetabbaṃ.
পচ্চৰেক্খণঞ্চ মগ্গফলনিব্বানপহীনকিলেসঅৰসিট্ঠকিলেসানং পচ্চৰেক্খণৰসেন পঞ্চৰিধং হোতি। তেসু একেকং একেকেন জৰনৰারেন পচ্চৰেক্খতীতি পঞ্চ পচ্চৰেক্খণজৰনৰারানি হোন্তি। তানি পচ্চৰেক্খণগ্গহণেন সামঞ্ঞতো দস্সিতানীতি দট্ঠব্বানি।
Paccavekkhaṇañca maggaphalanibbānapahīnakilesaavasiṭṭhakilesānaṃ paccavekkhaṇavasena pañcavidhaṃ hoti. Tesu ekekaṃ ekekena javanavārena paccavekkhatīti pañca paccavekkhaṇajavanavārāni honti. Tāni paccavekkhaṇaggahaṇena sāmaññato dassitānīti daṭṭhabbāni.
৩১৬৪. তেনেৰ চ উপাযেনাতি উদযব্বযানুপস্সনাদিৰিপস্সনানং পঠমং মগ্গো অধিগতো, তেনেৰ উপাযেন। সো ভিক্খূতি সো যোগাৰচরো ভিক্খু। পুনপ্পুনং ভাৰেন্তোতি পুনপ্পুনং ৰিপস্সনং ৰড্ঢেত্ৰা। যথা পঠমমগ্গফলানি পত্তো, তথা। সেসমগ্গফলানি চাতি দুতিযাদিমগ্গফলানি চ পাপুণাতি।
3164.Teneva ca upāyenāti udayabbayānupassanādivipassanānaṃ paṭhamaṃ maggo adhigato, teneva upāyena. So bhikkhūti so yogāvacaro bhikkhu. Punappunaṃ bhāventoti punappunaṃ vipassanaṃ vaḍḍhetvā. Yathā paṭhamamaggaphalāni patto, tathā. Sesamaggaphalāni cāti dutiyādimaggaphalāni ca pāpuṇāti.
৩১৬৫. ইচ্চেৰং যথাৰুত্তনযেন উপ্পাদৰযন্তাতীতকত্তা অচ্চন্তং অমতং ধম্মং অৰেচ্চ পটিৰিজ্ঝিত্ৰা অসেসং অকুসলং ৰিদ্ধংসযিত্ৰা সমুচ্ছেদপ্পহানেন পজহিত্ৰা তযো ভৰে কামভৰাদীসু তীসু ভৰেসু নিকন্তিযা সোসনৰসেন তযো ভৰে ৰিসেসেন সোসযিত্ৰা সো অগ্গদক্খিণেয্যো খীণাসৰো ভিক্খু পঠমং কিলেসপরিনিব্বানে সোসিতৰিপাকক্খন্ধকটত্তারূপসঙ্খাতউপাদিসেসরহিতত্তা নিরুপাদিসেসং নিব্বানধাতুং উপেতি অধিগচ্ছতীতি যোজনা।
3165.Iccevaṃ yathāvuttanayena uppādavayantātītakattā accantaṃ amataṃ dhammaṃ avecca paṭivijjhitvā asesaṃ akusalaṃ viddhaṃsayitvā samucchedappahānena pajahitvā tayo bhave kāmabhavādīsu tīsu bhavesu nikantiyā sosanavasena tayo bhave visesena sosayitvā so aggadakkhiṇeyyo khīṇāsavo bhikkhu paṭhamaṃ kilesaparinibbāne sositavipākakkhandhakaṭattārūpasaṅkhātaupādisesarahitattā nirupādisesaṃ nibbānadhātuṃ upeti adhigacchatīti yojanā.
ইচ্চেৰং সঙ্খেপতো কম্মট্ঠানভাৰনানযো আচরিযেন দস্সিতোতি গন্থভীরুজনানুগ্গহৰসেন ৰিত্থারৰণ্ণনং অনামসিত্ৰা অনুপদৰণ্ণনামত্তমেৰেত্থ কতং। ৰিত্থারৰণ্ণনা পনস্স ৰিসুদ্ধিমগ্গতো, তব্বণ্ণনতো চ গহেতব্বা।
Iccevaṃ saṅkhepato kammaṭṭhānabhāvanānayo ācariyena dassitoti ganthabhīrujanānuggahavasena vitthāravaṇṇanaṃ anāmasitvā anupadavaṇṇanāmattamevettha kataṃ. Vitthāravaṇṇanā panassa visuddhimaggato, tabbaṇṇanato ca gahetabbā.
৩১৬৬-৭. ৰিঞ্ঞাসক্কমতো ৰাপীতি অক্খরপদৰাক্যসঙ্খাতগন্থরচনক্কমতো ৰা। পুব্বাপরৰসেন ৰাতি ৰত্তব্বানমত্থৰিসেসানং পটিপাটিৰসেন ৰা। অক্খরবন্ধে ৰাতি সদ্দসত্থঅলঙ্কারসত্থছন্দোৰিচিতিসত্থানুপাতেন কাতব্বায অক্খরপদরচনায, গাথাবন্ধেতি অত্থো। অযুত্তং ৰিয যদি দিস্সতীতি যোজনা।
3166-7.Viññāsakkamato vāpīti akkharapadavākyasaṅkhātagantharacanakkamato vā. Pubbāparavasena vāti vattabbānamatthavisesānaṃ paṭipāṭivasena vā. Akkharabandhe vāti saddasatthaalaṅkārasatthachandovicitisatthānupātena kātabbāya akkharapadaracanāya, gāthābandheti attho. Ayuttaṃ viya yadi dissatīti yojanā.
তন্তি তং ‘‘অযুত্ত’’ন্তি দিস্সমানট্ঠানং। তথা ন গহেতব্বন্তি দিস্সমানাকারেনেৰ অযুত্তন্তি ন গহেতব্বং। কথং গহেতব্বন্তি আহ ‘‘গহেতব্বমদোসতো’’তি। তস্স কারণমাহ ‘‘মযা উপপরিক্খিত্ৰা, কতত্তা পন সব্বসো’’তি। যো যো পনেত্থ দোসো দিস্সতি খিত্তদোসো ৰা হোতু ৰিপল্লাসগ্গহণদোসো ৰা, নাপরং দোসোতি দীপেতি। তেনেতং পকরণং সব্বেসং তিপিটকপরিযত্তিপ্পভেদাযতনবহুস্সুতানং সিক্খাকামানং থেরানং অত্তনো পমাণভূততং সূচেতি। অত্তনো পমাণসূচনেন অত্তনা ৰিরচিতস্স ৰিনযৰিনিচ্ছযস্সাপি পমাণতং ৰিভাৰেন্তো তস্স সৰনুগ্গহধারণাদীসু সোতুজনং নিযোজেতীতি দট্ঠব্বং।
Tanti taṃ ‘‘ayutta’’nti dissamānaṭṭhānaṃ. Tathā na gahetabbanti dissamānākāreneva ayuttanti na gahetabbaṃ. Kathaṃ gahetabbanti āha ‘‘gahetabbamadosato’’ti. Tassa kāraṇamāha ‘‘mayā upaparikkhitvā, katattā pana sabbaso’’ti. Yo yo panettha doso dissati khittadoso vā hotu vipallāsaggahaṇadoso vā, nāparaṃ dosoti dīpeti. Tenetaṃ pakaraṇaṃ sabbesaṃ tipiṭakapariyattippabhedāyatanabahussutānaṃ sikkhākāmānaṃ therānaṃ attano pamāṇabhūtataṃ sūceti. Attano pamāṇasūcanena attanā viracitassa vinayavinicchayassāpi pamāṇataṃ vibhāvento tassa savanuggahadhāraṇādīsu sotujanaṃ niyojetīti daṭṭhabbaṃ.
ইতি ৰিনযত্থসারসন্দীপনিযা ৰিনযৰিনিচ্ছযৰণ্ণনায
Iti vinayatthasārasandīpaniyā vinayavinicchayavaṇṇanāya
কম্মট্ঠানভাৰনাৰিধানকথাৰণ্ণনা নিট্ঠিতা।
Kammaṭṭhānabhāvanāvidhānakathāvaṇṇanā niṭṭhitā.
