| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
பஞ்சவக்³கோ³
Pañcavaggo
கம்மவக்³க³வண்ணனா
Kammavaggavaṇṇanā
482. கம்மவக்³கே³ ‘‘க³ணனபரிச்சே²த³வசன’’ந்தி இமினா ந பமாணவசனந்தி த³ஸ்ஸேதி. இமினா கம்மானங் ததோ ஊனாதிரேகபா⁴வங் நிவாரேதி. க³ணியதே க³ணனங், பரிச்சி²ஜ்ஜதி அனேனாதி பரிச்சே²தோ³, க³ணனஸ்ஸ பரிச்சே²தோ³ க³ணனபரிச்சே²தோ³. அத² வா க³ணியதி அனேனாதி க³ணனங், தமேவ பரிச்சே²தோ³ க³ணனபரிச்சே²தோ³, ஸோயேவ வசனங் க³ணனபரிச்சே²த³வசனங். அபலோகனகம்மங் நாமாதி கத்தப்³ப³ங் கம்மந்தி ஸம்ப³ந்தோ⁴. வுத்தனயேனேவாதி ‘‘ஸீமட்ட²கஸங்க⁴ங் ஸோதெ⁴த்வா ச²ந்தா³ரஹானங் ச²ந்த³ங் ஆஹரித்வா’’தி வுத்தேன ஏவ நயேன.
482. Kammavagge ‘‘gaṇanaparicchedavacana’’nti iminā na pamāṇavacananti dasseti. Iminā kammānaṃ tato ūnātirekabhāvaṃ nivāreti. Gaṇiyate gaṇanaṃ, paricchijjati anenāti paricchedo, gaṇanassa paricchedo gaṇanaparicchedo. Atha vā gaṇiyati anenāti gaṇanaṃ, tameva paricchedo gaṇanaparicchedo, soyeva vacanaṃ gaṇanaparicchedavacanaṃ. Apalokanakammaṃ nāmāti kattabbaṃ kammanti sambandho. Vuttanayenevāti ‘‘sīmaṭṭhakasaṅghaṃ sodhetvā chandārahānaṃ chandaṃ āharitvā’’ti vuttena eva nayena.
தத்தா²தி சதூஸு கம்மேஸு, ஞத்திது³தியகம்மங் பன அத்தீ²தி ஸம்ப³ந்தோ⁴.
Tatthāti catūsu kammesu, ñattidutiyakammaṃ pana atthīti sambandho.
தத்தா²தி த்³வீஸு கம்மேஸு. அவஸேஸாதி ச²ஹி கம்மேஹி அவஸேஸா. யதி³ பரிவத்தெத்வா கதங் த³ள்ஹீகம்மங் ந ஹோதி, ஏவங் ஸதி த³ள்ஹீகம்மத்தா²ய கிந்தி காதப்³ப³ந்தி ஆஹ ‘‘ஸசே பனா’’திஆதி³. தத்த² ‘‘அக்க²ரபரிஹீனங் வா பத³பரிஹீனங் வா’’தி இத³ங் அக்க²ரபதா³னங் க³ளிதங் ஸந்தா⁴ய வுத்தங். ‘‘து³ருத்தபத³ங் வா’’தி இத³ங் ஸிதி²லத⁴னிதாதி³அபரிபுண்ணங் ஸந்தா⁴ய வுத்தங். எத்த² ‘‘து³ருத்தக்க²ரங் வா’’தி அஜ்ஜா²ஹரிதப்³ப³ங். இத³ந்தி புனப்புனங் வசனங். கம்மங் ஹுத்வாதி ஸுகம்மங் ஹுத்வா.
Tatthāti dvīsu kammesu. Avasesāti chahi kammehi avasesā. Yadi parivattetvā kataṃ daḷhīkammaṃ na hoti, evaṃ sati daḷhīkammatthāya kinti kātabbanti āha ‘‘sace panā’’tiādi. Tattha ‘‘akkharaparihīnaṃ vā padaparihīnaṃ vā’’ti idaṃ akkharapadānaṃ gaḷitaṃ sandhāya vuttaṃ. ‘‘Duruttapadaṃ vā’’ti idaṃ sithiladhanitādiaparipuṇṇaṃ sandhāya vuttaṃ. Ettha ‘‘duruttakkharaṃ vā’’ti ajjhāharitabbaṃ. Idanti punappunaṃ vacanaṃ. Kammaṃ hutvāti sukammaṃ hutvā.
483. ஸம்முகா²கரணீயஅஸம்முகா²கரணீயேஸு அஸம்முகா²கரணீயானி அப்பகத்தா பட²மங் த³ஸ்ஸெத்வா ஸேஸானங் ஸம்முகா²கரணீயபா⁴வங் த³ஸ்ஸெந்தோ ஆஹ ‘‘தத்தா²’’திஆதி³. தத்த² தத்தா²தி தேஸு த்³வீஸு, அஸம்முகா²கரணீயங் நாம அட்ட²வித⁴ங் ஹோதீதி ஸம்ப³ந்தோ⁴. தத்த² தத்தா²தி தேஸு தேஸு க²ந்த⁴கேஸு. ‘‘ஸுகதங் ஹோதீ’’தி வசனஸாமத்தி²யதோ ஸம்முகா²கதம்பி ஸுகதங் ஹோதீதி அத்தோ²பி க³ஹேதப்³போ³.
483. Sammukhākaraṇīyaasammukhākaraṇīyesu asammukhākaraṇīyāni appakattā paṭhamaṃ dassetvā sesānaṃ sammukhākaraṇīyabhāvaṃ dassento āha ‘‘tatthā’’tiādi. Tattha tatthāti tesu dvīsu, asammukhākaraṇīyaṃ nāma aṭṭhavidhaṃ hotīti sambandho. Tattha tatthāti tesu tesu khandhakesu. ‘‘Sukataṃ hotī’’ti vacanasāmatthiyato sammukhākatampi sukataṃ hotīti atthopi gahetabbo.
ஸேஸானீதி அட்ட²கம்மேஹி ஸேஸானி. ஏதானீதி கம்மானி. வத்து²விபன்னானீதி வத்து²னா விபன்னானி.
Sesānīti aṭṭhakammehi sesāni. Etānīti kammāni. Vatthuvipannānīti vatthunā vipannāni.
தேஸம்பீதி படிபுச்சா²கரணீயானம்பி. எத்தா²தி ‘‘படிபுச்சா²கரணீய’’ந்தி பதே³. ‘‘புச்சி²த்வா’’தி இமினா படிபுச்சா²தி பத³ஸ்ஸ த்வாபச்சயந்தபா⁴வங் த³ஸ்ஸேதி. ‘‘காதப்³ப³’’ந்தி இமினா கரணீயந்தி எத்த² அனீயஸத்³த³ஸ்ஸ கம்மத்த²பா⁴வங் த³ஸ்ஸேதி. யதா²தி³ன்னாயாஹி சுதி³தகேன யதா²தி³ன்னாய. விப்பலபந்தஸ்ஸாதி விகாரேன யங் வா தங் வா வசனங் பலபந்தஸ்ஸ சுதி³தகஸ்ஸாதி ஸம்ப³ந்தோ⁴. ஸப்³ப³த்தா²தி ஸப்³பே³ஸு ‘‘தஜ்ஜனீயகம்மாரஹஸ்ஸா’’திஆதீ³ஸு.
Tesampīti paṭipucchākaraṇīyānampi. Etthāti ‘‘paṭipucchākaraṇīya’’nti pade. ‘‘Pucchitvā’’ti iminā paṭipucchāti padassa tvāpaccayantabhāvaṃ dasseti. ‘‘Kātabba’’nti iminā karaṇīyanti ettha anīyasaddassa kammatthabhāvaṃ dasseti. Yathādinnāyāhi cuditakena yathādinnāya. Vippalapantassāti vikārena yaṃ vā taṃ vā vacanaṃ palapantassa cuditakassāti sambandho. Sabbatthāti sabbesu ‘‘tajjanīyakammārahassā’’tiādīsu.
அனுபோஸத²தி³வஸேதி உபோஸத²தி³வஸதோ அஞ்ஞஸ்மிங் தி³வஸே. தமேவத்த²ங் த³ஸ்ஸெந்தோ ஆஹ ‘‘உபோஸத²தி³வஸோ நாமா’’திஆதி³. கத்திகமாஸந்தி பச்சி²மகத்திகமாஸங். தஸ்ஸ பவாரணமாஸத்தா ‘‘ட²பெத்வா’’தி வுத்தங். ஸாமக்³கி³தி³வஸோ ச யதா²வுத்தா சாதுத்³த³ஸபன்னரஸா ச உபோஸத²தி³வஸோ நாமாதி யோஜனா. யத்ரஹீதி யஸ்மிங் பன விஹாரே, ட²பெந்தீதி ஸம்ப³ந்தோ⁴. அந்தராதி சாதுத்³த³ஸீபன்னரஸீனங் மஜ்ஜே².
Anuposathadivaseti uposathadivasato aññasmiṃ divase. Tamevatthaṃ dassento āha ‘‘uposathadivaso nāmā’’tiādi. Kattikamāsanti pacchimakattikamāsaṃ. Tassa pavāraṇamāsattā ‘‘ṭhapetvā’’ti vuttaṃ. Sāmaggidivaso ca yathāvuttā cātuddasapannarasā ca uposathadivaso nāmāti yojanā. Yatrahīti yasmiṃ pana vihāre, ṭhapentīti sambandho. Antarāti cātuddasīpannarasīnaṃ majjhe.
பச்சுக்கட்³டி⁴த்வா ட²பிததி³வஸோதி பச்சா² உபரி கட்³டி⁴த்வா ட²பிதங் கத்திககாளபக்க²சாதுத்³த³ஸிங் வா பஞ்சத³ஸிங் வா ஸந்தா⁴ய வுத்தங். இதா⁴பீதி அபவாரணாய பவாரணட்டா²னேபி. பாளியமாக³தனயதோ அஞ்ஞம்பி நயங் த³ஸ்ஸெந்தோ ஆஹ ‘‘அபிசா’’திஆதி³. அந்திமவத்து²ந்தி பாராஜிகவத்து²ங். யஸ்ஸாதி புக்³க³லஸ்ஸ. இமினா கம்மாரஹோ புக்³க³லோ வத்து² நாமாதி த³ஸ்ஸேதி.
Paccukkaḍḍhitvā ṭhapitadivasoti pacchā upari kaḍḍhitvā ṭhapitaṃ kattikakāḷapakkhacātuddasiṃ vā pañcadasiṃ vā sandhāya vuttaṃ. Idhāpīti apavāraṇāya pavāraṇaṭṭhānepi. Pāḷiyamāgatanayato aññampi nayaṃ dassento āha ‘‘apicā’’tiādi. Antimavatthunti pārājikavatthuṃ. Yassāti puggalassa. Iminā kammāraho puggalo vatthu nāmāti dasseti.
484. த³ப்³ப³ஸ்ஸ அக்³க³ண்ஹனங் வத்து²அபராமஸனங் நாம ந ஹோதி, அத² கோ² நாமஸ்ஸ அக்³க³ண்ஹனமேவாதி ஆஹ ‘‘தஸ்ஸ நாமங் ந க³ண்ஹாதீ’’தி. அபராமஸனாகாரங் த³ஸ்ஸெந்தோ ஆஹ ‘‘ஸுணாது மே’’திஆதி³.
484. Dabbassa aggaṇhanaṃ vatthuaparāmasanaṃ nāma na hoti, atha kho nāmassa aggaṇhanamevāti āha ‘‘tassa nāmaṃ na gaṇhātī’’ti. Aparāmasanākāraṃ dassento āha ‘‘suṇātu me’’tiādi.
புக்³க³லங் ந பராமஸதீதி எத்த² புக்³க³லோ நாம உபஜ்ஜா²யோதி ஆஹ ‘‘யோ உபஸம்பதா³பெக்க²ஸ்ஸ உபஜ்ஜா²யோ’’தி. தந்தி உபஜ்ஜா²யங்.
Puggalaṃ na parāmasatīti ettha puggalo nāma upajjhāyoti āha ‘‘yo upasampadāpekkhassa upajjhāyo’’ti. Tanti upajjhāyaṃ.
ஸப்³பே³ன ஸப்³ப³ந்தி ஸப்³ப³தா² ஸப்³ப³ங், நிபாதஸமுதா³யோயங், ஸப்³பே³ன வா ஆகாரேன ஸப்³ப³ங் ஞத்திந்தி யோஜனா.
Sabbena sabbanti sabbathā sabbaṃ, nipātasamudāyoyaṃ, sabbena vā ākārena sabbaṃ ñattinti yojanā.
ஞத்திகம்மே பட²மங் கம்மங் கத்வா பச்சா² ஞத்திட்ட²பனம்பி பச்சா² ஞத்திங் ட²பேதியேவ நாம. இதி இமேஹீதிஆதி³ நிக³மனங்.
Ñattikamme paṭhamaṃ kammaṃ katvā pacchā ñattiṭṭhapanampi pacchā ñattiṃ ṭhapetiyeva nāma. Iti imehītiādi nigamanaṃ.
485. ‘‘வுத்தனயேனேவா’’தி அதிதி³ஸித்வாபி ஞத்திகம்மவாசானங் அஸதி³ஸத்தா அபராமஸனாகாரங் த³ஸ்ஸெந்தோ ஆஹ ‘‘ஏவங் பனா’’திஆதி³. தத்த² நேஸந்தி வத்து²ஸங்க⁴புக்³க³லானங், பட²மானுஸ்ஸாவனே வா து³தியததியானுஸ்ஸாவனாஸு வா வத்தப்³பே³ வத³ந்தோதி ஸம்ப³ந்தோ⁴.
485. ‘‘Vuttanayenevā’’ti atidisitvāpi ñattikammavācānaṃ asadisattā aparāmasanākāraṃ dassento āha ‘‘evaṃ panā’’tiādi. Tattha nesanti vatthusaṅghapuggalānaṃ, paṭhamānussāvane vā dutiyatatiyānussāvanāsu vā vattabbe vadantoti sambandho.
ஸாவனங் ஹாபேதீதி எத்த² அனுஸத்³தோ³ லோபோதி ஆஹ ‘‘அனுஸ்ஸாவனங் ந கரோதீ’’தி. ‘‘ஸாவனங் ஹாபேதீ’’தி எத்த² ந கேவலங் ஸப்³பே³ன ஸப்³ப³ங் அனுஸ்ஸாவனங் அகரொந்தோயேவ ஸாவனங் ஹாபேதி நாம, அத² கோ² அனுஸ்ஸாவனாய து³ருத்தச²ட்³ட³னம்பி ஹாபேதியேவ நாமாதி த³ஸ்ஸெந்தோ ஆஹ ‘‘யோபீ’’திஆதி³. ‘‘ஸகிமேவ வா த்³விக்க²த்துங் வா’’தி இமினா திக்க²த்துங் அபரிபூரெந்தோயேவ ஸாவனங் ஹாபேதி நாமாதி த³ஸ்ஸேதி. இமஸ்ஸ வசனஸ்ஸ ஸாமத்தி²யதோ ஞத்திது³தியகம்மே ஏகக்க²த்துதோ, ஞத்திசதுத்த²கம்மே திக்க²த்துதோ அதிரேகங் கம்மவாசங் கரொந்தோ ந ஹாபேதீதி ஞாயதி.
Sāvanaṃ hāpetīti ettha anusaddo lopoti āha ‘‘anussāvanaṃ na karotī’’ti. ‘‘Sāvanaṃ hāpetī’’ti ettha na kevalaṃ sabbena sabbaṃ anussāvanaṃ akarontoyeva sāvanaṃ hāpeti nāma, atha kho anussāvanāya duruttachaḍḍanampi hāpetiyeva nāmāti dassento āha ‘‘yopī’’tiādi. ‘‘Sakimeva vā dvikkhattuṃ vā’’ti iminā tikkhattuṃ aparipūrentoyeva sāvanaṃ hāpeti nāmāti dasseti. Imassa vacanassa sāmatthiyato ñattidutiyakamme ekakkhattuto, ñatticatutthakamme tikkhattuto atirekaṃ kammavācaṃ karonto na hāpetīti ñāyati.
‘‘ச²ட்³டே³தீ’’தி எத்த² ச²ட்³ட³னஸ்ஸ பத³க்க²ரானங் க³ளிதபா⁴வேன பாகடத்தா தங் அத³ஸ்ஸெத்வா ‘‘து³ருத்தங் கரோதீ’’தி எத்த² து³ருத்தமேவ த³ஸ்ஸெந்தோ ஆஹ ‘‘து³ருத்தங் கரோதீதி எத்த² பனா’’திஆதி³. கரொந்தேன பி⁴க்கு²னா உபலக்கே²தப்³போ³தி ஸம்ப³ந்தோ⁴.
‘‘Chaḍḍetī’’ti ettha chaḍḍanassa padakkharānaṃ gaḷitabhāvena pākaṭattā taṃ adassetvā ‘‘duruttaṃ karotī’’ti ettha duruttameva dassento āha ‘‘duruttaṃ karotīti ettha panā’’tiādi. Karontena bhikkhunā upalakkhetabboti sambandho.
‘‘ஸிதி²ல…பே॰… பபே⁴தோ³’’தி ய்வாயங் ப்³யஞ்ஜனப்பபே⁴தோ³ வுத்தோ, அயங் ப்³யஞ்ஜனப்பபே⁴தோ³தி யோஜனா . கா³தா²யங் த³ஸதா⁴தி த³ஸப்பகாரேன. ப்³யஞ்ஜனபு³த்³தி⁴யாதி வத்³தே⁴தீதி பு³த்³தி⁴, ப்³யஞ்ஜனமேவ அக்க²ரமேவ ஸிதி²லாதி³வஸேன த³ஸதா⁴ பு³த்³தி⁴ ப்³யஞ்ஜனபு³த்³தி⁴, தாய. எத்த² ‘‘த³ஸதா⁴’’தி பதே³ன ‘‘ப்³யஞ்ஜனபு³த்³தீ⁴’’தி ஸமாஸபத³ஸ்ஸ அந்தரே த³ஸதா⁴ஸத்³த³ஸ்ஸ லோபங் த³ஸ்ஸேதி ‘‘கம்மஜங் ஏவா’’திஆதீ³ஸு (விஸுத்³தி⁴॰ 2.450; விஸுத்³தி⁴॰ மஹாடி॰ 2.450) விய. எத்த² ஹி ஏவஸத்³தே³ன கம்மேன ஏவ ஜாதங் கம்மஜந்தி ஸமாஸங் கத்வா ஸமாஸமஜ்ஜே² ஏவஸத்³த³லோபங் த³ஸ்ஸேதி. பபே⁴தோ³தி விஸேஸோ. அயங் பனெத்த² யோஜனா – ஸிதி²லஞ்ச த⁴னிதஞ்ச தீ³க⁴ஞ்ச ரஸ்ஸஞ்ச க³ருகஞ்ச லஹுகஞ்ச நிக்³க³ஹிதஞ்ச ஸம்ப³ந்த⁴ஞ்ச வவத்தி²தஞ்ச விமுத்தஞ்சாதி த³ஸதா⁴ ப்³யஞ்ஜனபு³த்³தி⁴யாவ பபே⁴தோ³ விஸேஸோ ஞாதப்³போ³தி. ‘‘ஸிதி²ல’’ந்தி ஆதீ³னி த³ஸ பதா³னி ‘‘அக்க²ரங் பத³ங் ப்³யஞ்ஜன’’ந்தி நபுங்ஸகலிங்க³வஸேன வுத்தபாட²ங்னிஸ்ஸாய வுத்தானீதி த³ட்ட²ப்³ப³ங்.
‘‘Sithila…pe… pabhedo’’ti yvāyaṃ byañjanappabhedo vutto, ayaṃ byañjanappabhedoti yojanā . Gāthāyaṃ dasadhāti dasappakārena. Byañjanabuddhiyāti vaddhetīti buddhi, byañjanameva akkharameva sithilādivasena dasadhā buddhi byañjanabuddhi, tāya. Ettha ‘‘dasadhā’’ti padena ‘‘byañjanabuddhī’’ti samāsapadassa antare dasadhāsaddassa lopaṃ dasseti ‘‘kammajaṃ evā’’tiādīsu (visuddhi. 2.450; visuddhi. mahāṭi. 2.450) viya. Ettha hi evasaddena kammena eva jātaṃ kammajanti samāsaṃ katvā samāsamajjhe evasaddalopaṃ dasseti. Pabhedoti viseso. Ayaṃ panettha yojanā – sithilañca dhanitañca dīghañca rassañca garukañca lahukañca niggahitañca sambandhañca vavatthitañca vimuttañcāti dasadhā byañjanabuddhiyāva pabhedo viseso ñātabboti. ‘‘Sithila’’nti ādīni dasa padāni ‘‘akkharaṃ padaṃ byañjana’’nti napuṃsakaliṅgavasena vuttapāṭhaṃnissāya vuttānīti daṭṭhabbaṃ.
கா³தா²ய வித்தா²ரங் த³ஸ்ஸெந்தோ ஆஹ ‘‘எத்த² ஹீ’’திஆதி³. அகா³ள்ஹேன வசீபயோகே³ன வத்தப்³ப³ங் அக்க²ரங் ஸிதி²லங். கா³ள்ஹேன வசீபயோகே³ன வத்தப்³ப³ங் அக்க²ரங் த⁴னிதங். தெஸ்வேவாதி பஞ்சஸு ஏவ வக்³கே³ஸு. ந கேவலங் தீ³க⁴மேவ க³ருகங் நாம, அத² கோ² ஸங்யோக³பரம்பீதி ஆஹ ‘‘யங் வா’’திஆதி³. யங் அக்க²ரங் ஸங்யோக³பரங் கத்வா வுச்சதி, தம்பி க³ருகங் நாமாதி யோஜனா. ஸங்யோகோ³ பரோ யஸ்ஸ அக்க²ரஸ்ஸாதி ஸங்யோக³பரங். ‘‘ஸங்யோக³பத³’’ந்திபி பாடோ². யங் அஸங்யோக³பரங் கத்வா வுச்சதி, தம்பி லஹுகங் நாமாதி யோஜனா. யங் ஸானுனாஸிகங் கத்வா வத்தப்³ப³ங், தங் நிக்³க³ஹிதங் நாமாதி யோஜனா. நிக்³க³ஹெத்வாதி நிக்³க³ஹிதங் நாம அத்த²தோ டா²னகரணானங் அவிஸ்ஸஜ்ஜனங் அமுஞ்சனந்தி ஆஹ ‘‘அவிஸ்ஸஜ்ஜெத்வா’’தி. யங் ஸம்ப³ந்தி⁴த்வா வுச்சதி, தங் ஸம்ப³ந்த⁴ங் நாமாதி யோஜனா. யங் அஸம்ப³ந்த⁴ங் கத்வா வுச்சதி, தங் வவத்தி²தங் நாமாதி யோஜனா. யங் அனிக்³க³ஹெத்வா வுச்சதி, தங் விமுத்தங் நாமாதி யோஜனா. அனிக்³க³ஹெத்வாதி அனிக்³க³ஹங் நாம அத்த²தோ விஸ்ஸஜ்ஜனந்தி ஆஹ ‘‘விஸ்ஸஜ்ஜெத்வா’’தி.
Gāthāya vitthāraṃ dassento āha ‘‘ettha hī’’tiādi. Agāḷhena vacīpayogena vattabbaṃ akkharaṃ sithilaṃ. Gāḷhena vacīpayogena vattabbaṃ akkharaṃ dhanitaṃ. Tesvevāti pañcasu eva vaggesu. Na kevalaṃ dīghameva garukaṃ nāma, atha kho saṃyogaparampīti āha ‘‘yaṃ vā’’tiādi. Yaṃ akkharaṃ saṃyogaparaṃ katvā vuccati, tampi garukaṃ nāmāti yojanā. Saṃyogo paro yassa akkharassāti saṃyogaparaṃ. ‘‘Saṃyogapada’’ntipi pāṭho. Yaṃ asaṃyogaparaṃ katvā vuccati, tampi lahukaṃ nāmāti yojanā. Yaṃ sānunāsikaṃ katvā vattabbaṃ, taṃ niggahitaṃ nāmāti yojanā. Niggahetvāti niggahitaṃ nāma atthato ṭhānakaraṇānaṃ avissajjanaṃ amuñcananti āha ‘‘avissajjetvā’’ti. Yaṃ sambandhitvā vuccati, taṃ sambandhaṃ nāmāti yojanā. Yaṃ asambandhaṃ katvā vuccati, taṃ vavatthitaṃ nāmāti yojanā. Yaṃ aniggahetvā vuccati, taṃ vimuttaṃ nāmāti yojanā. Aniggahetvāti aniggahaṃ nāma atthato vissajjananti āha ‘‘vissajjetvā’’ti.
ஏவங் ப்³யஞ்ஜனபு³த்³தி⁴விஸேஸங் த³ஸ்ஸெத்வா இதா³னி கம்மவாசாய உச்சாரணவிஸேஸங் வித்தா²ரேன த³ஸ்ஸெந்தோ ஆஹ ‘‘தத்தா²’’திஆதி³. தத்த² தத்தா²தி தாஸு த³ஸஸு ப்³யஞ்ஜனபு³த்³தீ⁴ஸு. ததா²ஸத்³தே³ன தகாரஸ்ஸ த²காரகரணஞ்ச ஸிதி²லஸ்ஸ த⁴னிதகரணஞ்ச அதிதி³ஸதி, ததா² ‘‘பத்தகல்லங் ஏஸா ஞத்தீ’’திஆதி³வசனஞ்ச ஸிதி²லஸ்ஸ த⁴னிதகரணங் நாமாதி யோஜனா.
Evaṃ byañjanabuddhivisesaṃ dassetvā idāni kammavācāya uccāraṇavisesaṃ vitthārena dassento āha ‘‘tatthā’’tiādi. Tattha tatthāti tāsu dasasu byañjanabuddhīsu. Tathāsaddena takārassa thakārakaraṇañca sithilassa dhanitakaraṇañca atidisati, tathā ‘‘pattakallaṃ esā ñattī’’tiādivacanañca sithilassa dhanitakaraṇaṃ nāmāti yojanā.
இதீதி ஏவங். ஸிதி²லே கத்தப்³பே³ த⁴னிதங் கரோதீதி ஸம்ப³ந்தோ⁴. சத்தாரி ப்³யஞ்ஜனானீதி சத்தாரி அக்க²ரானி. ப்³யஞ்ஜனஸத்³தோ³ ஹி இத⁴ அக்க²ரவாசகோ. சதஸ்ஸன்னங் ப்³யஞ்ஜனபு³த்³தீ⁴னங் கம்மதூ³ஸனங் த³ஸ்ஸெத்வா இதராஸங் அதூ³ஸனங் த³ஸ்ஸெந்தோ ஆஹ ‘‘இதரேஸு பனா’’திஆதி³. அனுக்கமாக³தந்தி அரியேஹி ஓதரித்வா அனுக்கமேன ஆக³தங். பவேணிந்தி ஸந்ததிங். வினாஸெத்வா வுத்தே கிங் கம்மவாசாகோபோ ஹோதீதி ஆஹ ‘‘ஸசே பனா’’திஆதி³. ந குப்பதீதி ந நஸ்ஸதி. கஸ்மா பன கம்மவாசா ந குப்பதி, நனு கம்மங் கோபெந்தீ கம்மவாசா குப்பதீதி ஆஹ ‘‘இமானி ஹீ’’திஆதி³. ஹி யஸ்மா ந கோபெந்தி, தஸ்மா கம்மவாசா ந குப்பதீதி யோஜனா.
Itīti evaṃ. Sithile kattabbe dhanitaṃ karotīti sambandho. Cattāri byañjanānīti cattāri akkharāni. Byañjanasaddo hi idha akkharavācako. Catassannaṃ byañjanabuddhīnaṃ kammadūsanaṃ dassetvā itarāsaṃ adūsanaṃ dassento āha ‘‘itaresu panā’’tiādi. Anukkamāgatanti ariyehi otaritvā anukkamena āgataṃ. Paveṇinti santatiṃ. Vināsetvā vutte kiṃ kammavācākopo hotīti āha ‘‘sace panā’’tiādi. Na kuppatīti na nassati. Kasmā pana kammavācā na kuppati, nanu kammaṃ kopentī kammavācā kuppatīti āha ‘‘imāni hī’’tiādi. Hi yasmā na kopenti, tasmā kammavācā na kuppatīti yojanā.
யங் பன வசனங் ஸுத்தந்திகத்தே²ரா வத³ந்தீதி ஸம்ப³ந்தோ⁴. கச்சாயனாதி³ஸுத்தந்தங் கரொந்தீதி ஸுத்தந்திகா, கச்சாயனாத³யோ, ஸுத்தந்திகா ச தே தே²ரா சேதி ஸுத்தந்திகத்தே²ரா. ந வட்டதீதி அக்க²ரவிகாரோ ந வட்டதி. வினயத⁴ரேன கம்மவாசா காதப்³பா³தி ஸம்ப³ந்தோ⁴. யதா²பாளியாதி ப⁴க³வதா யதா²வுத்தாய பாளியா. ப்³யஞ்ஜனநிருத்தியாதி ப்³யஞ்ஜனநிருத்தியங். இதரதா²தி வுத்ததோ³ஸபரிஹரணதோ அஞ்ஞேன பகாரேன.
Yaṃ pana vacanaṃ suttantikattherā vadantīti sambandho. Kaccāyanādisuttantaṃ karontīti suttantikā, kaccāyanādayo, suttantikā ca te therā ceti suttantikattherā. Na vaṭṭatīti akkharavikāro na vaṭṭati. Vinayadharena kammavācā kātabbāti sambandho. Yathāpāḷiyāti bhagavatā yathāvuttāya pāḷiyā. Byañjananiruttiyāti byañjananiruttiyaṃ. Itarathāti vuttadosapariharaṇato aññena pakārena.
அகாலே வா ஸாவேதீதி எத்த² அகாலோ நாம அனோகாஸோதி ஆஹ ‘‘அனோகாஸே’’தி. அனோகாஸோ நாம ஞத்திஅனுஸ்ஸாவனானங் புப்³பா³பரவிதத²ந்தி ஆஹ ‘‘ஞத்திங் அட்ட²பெத்வா’’திஆதி³. பட²மங்யேவ ஞத்திங் அட்ட²பெத்வா பட²மங்யேவ அனுஸ்ஸாவனகம்மங் கத்வாதி யோஜனா. ‘‘பட²மங்யேவா’’தி ஹி பத³ங் புப்³பா³பராபெக்க²ங். இதீதிஆதி³ நிக³மனங்.
Akālevā sāvetīti ettha akālo nāma anokāsoti āha ‘‘anokāse’’ti. Anokāso nāma ñattianussāvanānaṃ pubbāparavitathanti āha ‘‘ñattiṃ aṭṭhapetvā’’tiādi. Paṭhamaṃyeva ñattiṃ aṭṭhapetvā paṭhamaṃyeva anussāvanakammaṃ katvāti yojanā. ‘‘Paṭhamaṃyevā’’ti hi padaṃ pubbāparāpekkhaṃ. Itītiādi nigamanaṃ.
486. யா ஏகவீஸதி பி⁴க்கூ² ந க³ண்ஹாதி, அயங் அதிகு²த்³த³கஸீமா நாமாதி யோஜனா. ஏகவீஸதி பி⁴க்கூ²தி அப்³பா⁴னகம்மே கம்மாரஹேன ஸத்³தி⁴ங் ஏகவீஸதி பி⁴க்கூ². யத்த² ஸீமாயங் நிஸீதி³துங் ந ஸக்கொந்தி, அயங் அதிகு²த்³த³கஸீமா நாமாதி யோஜனா. நிஸீதி³துந்தி அஞ்ஞமஞ்ஞஸ்ஸ ஹத்த²பாஸங் அவிஜஹித்வா பரிமண்ட³லாகாரேன நிஸீதி³துங். தத்தா²தி அதிகு²த்³த³கே. எத்தா²தி ஸேஸஸீமாஸு. யா ஸம்மதா ஹோதி, அயங் அதிமஹதீ நாமாதி யோஜனா. கேஸக்³க³மத்தேனாபீதி பிஸத்³தோ³ ததோ அதிரேகேன பன பகே³வாதி த³ஸ்ஸேதி. அக⁴டிதங் அஸம்ப³ந்த⁴ங் நிமித்தங் இமிஸ்ஸாதி அக⁴டிதனிமித்தா. க²ண்ட³னிமித்தபா⁴வங் அக²ண்ட³னிமித்தத³ஸ்ஸனேன பாகடங் கரொந்தோ ஆஹ ‘‘புரத்தி²மாயா’’திஆதி³. புப்³ப³கித்திதந்தி பட²மகித்திதங். தத்தே²வாதி உத்தராய ஏவ தி³ஸாய. அபராபீதி பிஸத்³தோ³ து³தியத்த²ஸம்பிண்ட³னத்தோ². யா ஸம்மதா ஹோதி, க²ண்ட³னிமித்தா நாமாதி யோஜனா. அனிமித்துபக³ந்தி யதா²பூ⁴தகத²னவிஸேஸனமேவ, ந ப்³யவச்சே²த³விஸேஸனங் தசஸாராதி³க்³க³ஹணேன அனிமித்துபக³பா⁴வஸ்ஸ பாகடத்தா. அந்தராதி மஜ்ஜே². யா ஸம்மதா ஹோதி, ஸா சா²யானிமித்தா நாம, அனிமித்தா நாமாதி யோஜனா.
486. Yā ekavīsati bhikkhū na gaṇhāti, ayaṃ atikhuddakasīmā nāmāti yojanā. Ekavīsati bhikkhūti abbhānakamme kammārahena saddhiṃ ekavīsati bhikkhū. Yattha sīmāyaṃ nisīdituṃ na sakkonti, ayaṃ atikhuddakasīmā nāmāti yojanā. Nisīditunti aññamaññassa hatthapāsaṃ avijahitvā parimaṇḍalākārena nisīdituṃ. Tatthāti atikhuddake. Etthāti sesasīmāsu. Yā sammatā hoti, ayaṃ atimahatī nāmāti yojanā. Kesaggamattenāpīti pisaddo tato atirekena pana pagevāti dasseti. Aghaṭitaṃ asambandhaṃ nimittaṃ imissāti aghaṭitanimittā. Khaṇḍanimittabhāvaṃ akhaṇḍanimittadassanena pākaṭaṃ karonto āha ‘‘puratthimāyā’’tiādi. Pubbakittitanti paṭhamakittitaṃ. Tatthevāti uttarāya eva disāya. Aparāpīti pisaddo dutiyatthasampiṇḍanattho. Yā sammatā hoti, khaṇḍanimittā nāmāti yojanā. Animittupaganti yathābhūtakathanavisesanameva, na byavacchedavisesanaṃ tacasārādiggahaṇena animittupagabhāvassa pākaṭattā. Antarāti majjhe. Yā sammatā hoti, sā chāyānimittā nāma, animittā nāmāti yojanā.
ப³ஹி டி²தோ ஹுத்வா ஸம்மன்னதீதி யோஜனா. நிமித்தானி பன ப³ஹி ட²த்வாபி கித்தேதுங் வட்டதி . ஏவங் ஸம்மதாபீதி பிஸத்³தோ³ அஸம்மதா பன பகே³வாதி த³ஸ்ஸேதி. ஸீமாய ஸீமந்தி பதா³னங் ஸம்ப³ந்தா⁴பெக்க²த்தா, தஸ்ஸ ச அஸமானபா⁴வதோ தேஸங் விஸுங் விஸுங் ஸம்ப³ந்த⁴ங் த³ஸ்ஸெந்தோ ஆஹ ‘‘அத்தனோ ஸீமாய பரேஸங் ஸீம’’ந்தி. ஸம்பி⁴ந்த³தீதி ஸம்ப³ந்த⁴ங் கரோதி. எத்த² ஹி பி⁴தி³தா⁴து த்³விதா⁴கரணத்த²வாசகோ, தா⁴த்வத்த²பா³த⁴கேன ஸங்த்யூபஸக்³கே³ன ஸம்ப³ந்த⁴வாசகோ ஹோதீதி த³ட்ட²ப்³ப³ங். தத்தா²தி தாஸு த்³வீஸு ஸீமாஸு. இதீதி ஏவங். தாஸூதி ஸீமாஸு.
Bahi ṭhito hutvā sammannatīti yojanā. Nimittāni pana bahi ṭhatvāpi kittetuṃ vaṭṭati . Evaṃ sammatāpīti pisaddo asammatā pana pagevāti dasseti. Sīmāya sīmanti padānaṃ sambandhāpekkhattā, tassa ca asamānabhāvato tesaṃ visuṃ visuṃ sambandhaṃ dassento āha ‘‘attano sīmāya paresaṃ sīma’’nti. Sambhindatīti sambandhaṃ karoti. Ettha hi bhididhātu dvidhākaraṇatthavācako, dhātvatthabādhakena saṃtyūpasaggena sambandhavācako hotīti daṭṭhabbaṃ. Tatthāti tāsu dvīsu sīmāsu. Itīti evaṃ. Tāsūti sīmāsu.
487-8. யம்பி கம்மப்பத்தச²ந்தா³ரஹலக்க²ணந்தி யோஜனா. தத்தா²தி தஸ்ஸங் பரிஸதோ கம்மவிபத்தியங். தம்பீதி கம்மப்பத்தச²ந்தா³ரஹலக்க²ணம்பி, வுத்தமேவாதி ஸம்ப³ந்தோ⁴. தத்தா²தி ‘‘சத்தாரோ பி⁴க்கூ² பகதத்தா கம்மப்பத்தா’’தி பாடே². அனுக்கி²த்தாதி ஸங்கே⁴ன உக்கே²பனீயகம்மஸ்ஸ அகதத்தா அனுக்கி²த்தா. பரிஸுத்³த⁴ஸீலாதி பாராஜிகங் அனஜ்ஜா²பன்னத்தா பரிஸுத்³த⁴ஸீலா. இமேஹி பதே³ஹி பகதி அத்தா ஸபா⁴வோ ஏதேஸந்தி பகதத்தாதி அத்த²ங் த³ஸ்ஸேதி. ‘‘கம்மஸ்ஸ அரஹா’’தி இமினா ‘‘கம்மப்பத்தா’’தி பத³ஸ்ஸ ச²ட்டீ²ஸமாஸஞ்ச பத்தஸத்³த³ஸ்ஸ அரஹஅனுச்ச²விகத்த²பா⁴வஞ்ச த³ஸ்ஸேதி. தேஹீதி சதூஹி பகதத்தேஹி. ஏதீதி ஆக³ச்ச²தி. அவஸேஸாதி சதூஹி பகதத்தேஹி அவஸேஸா. யஸ்ஸ பனாதி புக்³க³லஸ்ஸ பன. கம்மாரஹோதி கம்மஸ்ஸ அரஹோ.
487-8. Yampi kammappattachandārahalakkhaṇanti yojanā. Tatthāti tassaṃ parisato kammavipattiyaṃ. Tampīti kammappattachandārahalakkhaṇampi, vuttamevāti sambandho. Tatthāti ‘‘cattāro bhikkhū pakatattā kammappattā’’ti pāṭhe. Anukkhittāti saṅghena ukkhepanīyakammassa akatattā anukkhittā. Parisuddhasīlāti pārājikaṃ anajjhāpannattā parisuddhasīlā. Imehi padehi pakati attā sabhāvo etesanti pakatattāti atthaṃ dasseti. ‘‘Kammassa arahā’’ti iminā ‘‘kammappattā’’ti padassa chaṭṭhīsamāsañca pattasaddassa arahaanucchavikatthabhāvañca dasseti. Tehīti catūhi pakatattehi. Etīti āgacchati. Avasesāti catūhi pakatattehi avasesā. Yassa panāti puggalassa pana. Kammārahoti kammassa araho.
489. எத்தா²தி பண்ட³காதீ³னங் அவத்து²பா⁴வத³ஸ்ஸனட்டா²னே.
489.Etthāti paṇḍakādīnaṃ avatthubhāvadassanaṭṭhāne.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 1. கம்மவக்³கோ³ • 1. Kammavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / கம்மவக்³க³வண்ணனா • Kammavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கம்மவக்³க³வண்ணனா • Kammavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கம்மவக்³க³வண்ணனா • Kammavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கம்மவக்³க³வண்ணனா • Kammavaggavaṇṇanā
