பஞ்சவக்³கோ³

கம்மவக்³க³வண்ணனா

483. ‘‘உம்மத்தகஸம்முதிங் உம்மத்தகே யாசித்வா க³தே அஸம்முகா²பி தா³துங் வட்டதீ’’தி வுத்தங். தத்த² நிஸின்னேபி ந குப்பதி நியமாபா⁴வா. அஸம்முகா² கதே தோ³ஸாபா⁴வங் த³ஸ்ஸேதுங் ‘‘அஸம்முகா²கதங் ஸுகதங் ஹோதீ’’தி வுத்தங். தூ³தேன உபஸம்பதா³ பனெத்த² ஸம்முகா² காதுங் ந ஸக்கா. கம்மவாசானானத்தஸபா⁴வா பத்தனிக்குஜ்ஜனாத³யோ ஹத்த²பாஸதோ அபனெத்வா காதப்³பா³, தேன வுத்தங் ‘‘அஸம்முகா² கதங் ஸுகதங் ஹோதீ’’தி. ‘‘புச்சி²த்வா சோதெ³த்வா ஸாரெத்வா காதப்³ப³ங் அபுச்சி²த்வா அசோதெ³த்வா அஸாரெத்வா கரோதீ’’தி அயங் வசனத்தோ². ட²பெத்வா கத்திகமாஸந்தி ஸோ பவாரணாமாஸோ, த்³வே ச புண்ணமாஸியோதி பட²மது³தியவஸ்ஸூபக³தானங் பவாரணா புண்ணமாஸா த்³வே.

485. பத³ங் வா ச²ட்³டே³தீதி அத்தோ². க-வக்³கா³தீ³ஸு பஞ்சஸு. க³ருகந்தி தீ³க⁴ங், ஸங்யோக³பரஞ்ச. ‘‘பு³த்³த⁴ரக்கி²தத்தே²ரஸ்ஸ யஸ்ஸ நக்க²மதீ’’தி எத்த² த-காரக-காரா ஸங்யோக³பரா. தீ³கே⁴ வத்தப்³பே³ ரஸ்ஸந்தி ‘‘ஸோ துண்ஹீ அஸ்ஸா’’தி வத்தப்³பே³ ஸோ துண்ஹி அஸ்ஸாதி வசனங்.

486. ஸேஸட்ட²கதா²ஸு வுத்தவசனங் குருந்தி³யங் பாகடங் கத்வா ‘‘நிஸீதி³துங் ந ஸக்கொந்தீ’’தி வுத்தங்.

487-8. பரிஸுத்³த⁴ஸீலா சத்தாரோ பி⁴க்கூ²தி பாராஜிகங் அனாபன்னா. ந தேஸங் ச²ந்தோ³ வா பாரிஸுத்³தி⁴ வா ஏதீதி தீஸு, த்³வீஸு வா நிஸின்னேஸு ஏகஸ்ஸ, த்³வின்னங் வா ச²ந்த³பாரிஸுத்³தி⁴ ஆஹடாபி அனாஹடாவ.