| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
бан̃жаваг̇г̇о
Pañcavaggo
гаммаваг̇г̇аван̣н̣анаа
Kammavaggavaṇṇanā
483. гаммаваг̇г̇з табид̇аубосат̇абавааран̣аанам̣ гад̇д̇игамаасз саамаг̇г̇ияаа гад̇ааяа саамаг̇г̇ийбавааран̣ам̣ мун̃жид̇ваа убосат̇ам̣ гаад̇ум̣ на ваддад̇ийд̇и ааха ‘‘табзд̇ваа гад̇д̇игамааса’’нд̇и. сажз бана д̇зсам̣ наанаасиймаасу махаабавааран̣ааяа висум̣ баваарид̇аанам̣ гад̇д̇игамаасаб̣бханд̇арз саамаг̇г̇ий ход̇и, саамаг̇г̇ийубосат̇о зва д̇зхи гад̇д̇аб̣б̣о, на бавааран̣аа. згасмим̣ вассз гад̇абавааран̣аанам̣ буна бавааран̣ааяа авихид̇ад̇д̇аа. саамаг̇г̇ийд̣̇ивасод̇и анубосат̇ад̣̇ивасз саамаг̇г̇ийгаран̣ам̣ санд̇хааяа вуд̇д̇ам̣. сажз бана жаад̇уд̣̇д̣̇асияам̣, баннарасияам̣ ваа сан̇гхо саамаг̇г̇им̣ гарод̇и, д̇ад̣̇аа саамаг̇г̇ийубосат̇ад̣̇ивасо на ход̇и, жаад̇уд̣̇д̣̇асийбаннарасийубосат̇ова ход̇и. убари бавааран̣ааяаби зсзва наяо.
483. Kammavagge ṭhapitauposathapavāraṇānaṃ kattikamāse sāmaggiyā katāya sāmaggīpavāraṇaṃ muñcitvā uposathaṃ kātuṃ na vaṭṭatīti āha ‘‘ṭhapetvā kattikamāsa’’nti. Sace pana tesaṃ nānāsīmāsu mahāpavāraṇāya visuṃ pavāritānaṃ kattikamāsabbhantare sāmaggī hoti, sāmaggīuposatho eva tehi kattabbo, na pavāraṇā. Ekasmiṃ vasse katapavāraṇānaṃ puna pavāraṇāya avihitattā. Sāmaggīdivasoti anuposathadivase sāmaggīkaraṇaṃ sandhāya vuttaṃ. Sace pana cātuddasiyaṃ, pannarasiyaṃ vā saṅgho sāmaggiṃ karoti, tadā sāmaggīuposathadivaso na hoti, cātuddasīpannarasīuposathova hoti. Upari pavāraṇāyapi eseva nayo.
бажжуггад̣дхид̇ваа табид̇ад̣̇ивасод̇и бхан̣д̣анагаарагзхи убад̣̇д̣̇уд̇аа ваа гзнажид̣̇зва гаран̣ийязна бавааран̣аасан̇г̇ахам̣ ваа гад̇ваа табид̇о гаал̣абагкажаад̇уд̣̇д̣̇асийд̣̇ивасова. д̣̇вз жа бун̣н̣амаасияод̇и буб̣б̣а-гад̇д̇игабун̣н̣амаа, бажчимагад̇д̇игабун̣н̣амаа жаад̇и д̣̇вз бун̣н̣амаасияо. звам̣ жад̇уб̣б̣ид̇хамбийд̇и бун̣н̣амаасийд̣̇ваязна сад̣̇д̇хим̣ саамаг̇г̇ийбавааран̣ам̣, жаад̇уд̣̇д̣̇асийбавааран̣ан̃жа самбин̣д̣зд̇ваа вуд̇д̇ам̣. ид̣̇ан̃жа багад̇ижаарид̇д̇авасзна вуд̇д̇ам̣. д̇ат̇ааруубабажжаяз бана сад̇и убхиннам̣ бун̣н̣амаасийнам̣ буримаа д̣̇вз жаад̇уд̣̇д̣̇асияоби гаал̣абагкажаад̇уд̣̇д̣̇асияаа ананд̇араа баннарасийбийд̇и имзби д̇аяо д̣̇ивасаа бавааран̣аад̣̇ивасаа зваад̇и имам̣ сад̇д̇авид̇хамби бавааран̣аад̣̇ивасам̣ табзд̇ваа ан̃н̃асмим̣ д̣̇ивасз баваарзд̇ум̣ на ваддад̇и.
Paccukkaḍḍhitvā ṭhapitadivasoti bhaṇḍanakārakehi upaddutā vā kenacideva karaṇīyena pavāraṇāsaṅgahaṃ vā katvā ṭhapito kāḷapakkhacātuddasīdivasova. Dve ca puṇṇamāsiyoti pubba-kattikapuṇṇamā, pacchimakattikapuṇṇamā cāti dve puṇṇamāsiyo. Evaṃ catubbidhampīti puṇṇamāsīdvayena saddhiṃ sāmaggīpavāraṇaṃ, cātuddasīpavāraṇañca sampiṇḍetvā vuttaṃ. Idañca pakaticārittavasena vuttaṃ. Tathārūpapaccaye pana sati ubhinnaṃ puṇṇamāsīnaṃ purimā dve cātuddasiyopi kāḷapakkhacātuddasiyā anantarā pannarasīpīti imepi tayo divasā pavāraṇādivasā evāti imaṃ sattavidhampi pavāraṇādivasaṃ ṭhapetvā aññasmiṃ divase pavāretuṃ na vaṭṭati.
484. ануссааванагаммам̣ гад̇ваад̇и батамам̣ ануссааванам̣ саавзд̇ваа ‘‘зсаа н̃ад̇д̇ий’’д̇и ануссааванаананд̇арамзва сагалам̣ н̃ад̇д̇им̣ вад̇ваа, барияосаанз ‘‘зсаа н̃ад̇д̇ий’’д̇и вад̇ваад̇и ад̇хиббааяо.
484.Anussāvanakammaṃ katvāti paṭhamaṃ anussāvanaṃ sāvetvā ‘‘esā ñattī’’ti anussāvanānantarameva sakalaṃ ñattiṃ vatvā, pariyosāne ‘‘esā ñattī’’ti vatvāti adhippāyo.
485. явааяанд̇и б̣яан̃ж̇анаббабхзд̣̇о ад̇хиббзд̇о. д̣̇асад̇хаа б̣яан̃ж̇анаб̣уд̣̇д̇хияаа бабхзд̣̇од̇и зд̇т̇а д̣̇асад̇хаа д̣̇асавид̇хзна б̣яан̃ж̇анаанам̣ бабхзд̣̇од̇и яож̇зд̇аб̣б̣ам̣. гзнааяам̣ бабхзд̣̇од̇и ааха ‘‘б̣яан̃ж̇анаб̣уд̣̇д̇хияаа’’д̇и. яат̇аад̇хиббзд̇ад̇т̇аб̣яан̃ж̇анад̇о б̣яан̃ж̇анасан̇каад̇аанам̣ агкараанам̣ ж̇анигаа б̣уд̣̇д̇хи б̣яан̃ж̇анаб̣уд̣̇д̇хи, д̇ааяа б̣яан̃ж̇анаб̣уд̣̇д̇хияаа , агкарасамудтаабагажид̇д̇абхзд̣̇знзваад̇и ад̇т̇о. яам̣ ваа сам̣яог̇абарам̣ гад̇ваа вужжад̇и, ид̣̇амби г̇аруганд̇и яож̇анаа.
485.Yvāyanti byañjanappabhedo adhippeto. Dasadhā byañjanabuddhiyā pabhedoti ettha dasadhā dasavidhena byañjanānaṃ pabhedoti yojetabbaṃ. Kenāyaṃ pabhedoti āha ‘‘byañjanabuddhiyā’’ti. Yathādhippetatthabyañjanato byañjanasaṅkhātānaṃ akkharānaṃ janikā buddhi byañjanabuddhi, tāya byañjanabuddhiyā , akkharasamuṭṭhāpakacittabhedenevāti attho. Yaṃ vā saṃyogaparaṃ katvā vuccati, idampi garukanti yojanā.
д̇ад̇т̇а ааяасмад̇од̇иаад̣̇ийсу яаани ананд̇арид̇аани са-гаарама-гаараад̣̇иб̣яан̃ж̇анаани ‘‘сам̣яог̇о’’д̇и вужжанд̇и, со сам̣яог̇о баро яасса а-гаараад̣̇ино, со сам̣яог̇абаро наама. рассанд̇и агаараад̣̇иб̣яан̃ж̇анарахид̇ам̣ сарам̣. асам̣яог̇абаранд̇и ‘‘яасса нагкамад̇ий’’д̇иаад̣̇ийсу яа-гаара на-гаараад̣̇иб̣яан̃ж̇анасахид̇асарам̣ санд̇хааяа вуд̇д̇ам̣. д̇а-гаарасса т̇а-гаарам̣ агад̇ваа ваг̇г̇анд̇арз сит̇иламзва гад̇ваа ‘‘сун̣ааду мз’’д̇иаад̣̇им̣ вад̣̇анд̇оби д̣̇уруд̇д̇ам̣ гарод̇иязва табзд̇ваа ануруубам̣ аад̣̇зсам̣. яан̃хи ‘‘сажжигад̇т̇абарамад̇т̇знаа’’д̇и вад̇д̇аб̣б̣з ‘‘сажжигадтабарамадтзнаа’’д̇и жа ‘‘ад̇т̇агат̇аа’’д̇и вад̇д̇аб̣б̣з ‘‘адтагат̇аа’’д̇и жа д̇ад̇т̇а д̇ад̇т̇а вужжад̇и, д̇аад̣̇исам̣ баал̣иадтагат̇аасу д̣̇идтабаяог̇ам̣, д̇ад̣̇ануруубан̃жа вад̇д̇ум̣ ваддад̇и, д̇ад̇о ан̃н̃ам̣ на ваддад̇и. д̇знааха ‘‘ануггамааг̇ад̇ам̣ бавзн̣им̣ авинаасзнд̇знаа’’д̇иаад̣̇и.
Tattha āyasmatotiādīsu yāni anantaritāni sa-kārama-kārādibyañjanāni ‘‘saṃyogo’’ti vuccanti, so saṃyogo paro yassa a-kārādino, so saṃyogaparo nāma. Rassanti akārādibyañjanarahitaṃ saraṃ. Asaṃyogaparanti ‘‘yassa nakkhamatī’’tiādīsu ya-kāra na-kārādibyañjanasahitasaraṃ sandhāya vuttaṃ. Ta-kārassa tha-kāraṃ akatvā vaggantare sithilameva katvā ‘‘suṇāṭu me’’tiādiṃ vadantopi duruttaṃ karotiyeva ṭhapetvā anurūpaṃ ādesaṃ. Yañhi ‘‘saccikatthaparamatthenā’’ti vattabbe ‘‘saccikaṭṭhaparamaṭṭhenā’’ti ca ‘‘atthakathā’’ti vattabbe ‘‘aṭṭhakathā’’ti ca tattha tattha vuccati, tādisaṃ pāḷiaṭṭhakathāsu diṭṭhapayogaṃ, tadanurūpañca vattuṃ vaṭṭati, tato aññaṃ na vaṭṭati. Tenāha ‘‘anukkamāgataṃ paveṇiṃ avināsentenā’’tiādi.
д̣̇ийгхз вад̇д̇аб̣б̣з рассанд̇иаад̣̇ийсу ‘‘бхигкууна’’нд̇и вад̇д̇аб̣б̣з ‘‘бхигкуна’’нд̇и ваа ‘‘б̣ахуусуу’’д̇и вад̇д̇аб̣б̣з ‘‘б̣ахусуу’’д̇и ваа ‘‘нагкамад̇ий’’д̇и вад̇д̇аб̣б̣з ‘‘на камад̇ий’’д̇и ваа ‘‘убасамбад̣̇аабзгко’’д̇и вад̇д̇аб̣б̣з ‘‘убасамбад̣̇аабзко’’д̇и ваа звам̣ ануруубадтаанзсу зва д̣̇ийгхарассаад̣̇и рассад̣̇ийгхаад̣̇ивасзна баривад̇д̇зд̇ум̣ ваддад̇и, на бана ‘‘нааг̇о’’д̇и вад̇д̇аб̣б̣з ‘‘наг̇о’’д̇и ваа ‘‘сан̇гхо’’д̇и вад̇д̇аб̣б̣з ‘‘сагхо’’д̇и ваа ‘‘д̇иссо’’д̇и вад̇д̇аб̣б̣з ‘‘д̇исо’’д̇и ваа ‘‘яаажад̇ий’’д̇и вад̇д̇аб̣б̣з ‘‘яаажанд̇ий’’д̇и ваа звам̣ анануруубадтаанзсу вад̇д̇ум̣. самб̣анд̇хам̣, бана вавад̇т̇аанан̃жа саб̣б̣ат̇ааби ваддад̇ийд̇и г̇ахзд̇аб̣б̣ам̣.
Dīghe vattabbe rassantiādīsu ‘‘bhikkhūna’’nti vattabbe ‘‘bhikkhuna’’nti vā ‘‘bahūsū’’ti vattabbe ‘‘bahusū’’ti vā ‘‘nakkhamatī’’ti vattabbe ‘‘na khamatī’’ti vā ‘‘upasampadāpekkho’’ti vattabbe ‘‘upasampadāpekho’’ti vā evaṃ anurūpaṭṭhānesu eva dīgharassādi rassadīghādivasena parivattetuṃ vaṭṭati, na pana ‘‘nāgo’’ti vattabbe ‘‘nago’’ti vā ‘‘saṅgho’’ti vattabbe ‘‘sagho’’ti vā ‘‘tisso’’ti vattabbe ‘‘tiso’’ti vā ‘‘yācatī’’ti vattabbe ‘‘yācantī’’ti vā evaṃ ananurūpaṭṭhānesu vattuṃ. Sambandhaṃ, pana vavatthānañca sabbathāpi vaṭṭatīti gahetabbaṃ.
486. сзсасиймаасубийд̇и ад̇имахад̇ийаад̣̇ийсу д̣̇асасуби.
486.Sesasīmāsupīti atimahatīādīsu dasasupi.
488. жад̇уваг̇г̇агаран̣зд̇и жад̇уваг̇г̇зна сан̇гхзна гад̇д̇аб̣б̣з. аниссаарид̇аад̇и убосат̇адтабанаад̣̇инаа ваа лад̣̇д̇хинаанаасам̣ваасагабхаавзна ваа на б̣ахигад̇аа. адтагат̇ааяан̃хи ‘‘абагад̇ад̇д̇ассаад̇и угкид̇д̇агасса ваа, яасса ваа убосат̇абавааран̣аа табид̇аа хонд̇ий’’д̇и (бари. адта. 425) вуд̇д̇ад̇д̇аа табид̇аубосат̇абавааран̣о бхигку абагад̇ад̇д̇о зваад̇и г̇ахзд̇аб̣б̣ам̣. барисуд̣̇д̇хасийлаад̇и баарааж̇игам̣ анаабаннаа ад̇хиббзд̇аа. бариваасаад̣̇игаммзсу бана г̇аругадтааби абагад̇ад̇д̇аа зваад̇и г̇ахзд̇аб̣б̣ам̣ . авасзсаа…бз… чанд̣̇аарахаава хонд̇ийд̇и сан̇гхад̇о хад̇т̇абаасам̣ виж̇ахид̇ваа тид̇з санд̇хааяа вуд̇д̇ам̣. авиж̇ахид̇ваа тид̇аа бана чанд̣̇аарахаа на хонд̇и, д̇зби жад̇уваг̇г̇аад̣̇ид̇о ад̇хигаа хад̇т̇абаасам̣ виж̇ахид̇ваава чанд̣̇аарахаа хонд̇и. д̇асмаа сан̇гхад̇о хад̇т̇абаасам̣ виж̇ахид̇ваа тид̇знзва чанд̣̇о ваа баарисуд̣̇д̇хи ваа д̣̇аад̇аб̣б̣аа.
488.Catuvaggakaraṇeti catuvaggena saṅghena kattabbe. Anissāritāti uposathaṭṭhapanādinā vā laddhinānāsaṃvāsakabhāvena vā na bahikatā. Aṭṭhakathāyañhi ‘‘apakatattassāti ukkhittakassa vā, yassa vā uposathapavāraṇā ṭhapitā hontī’’ti (pari. aṭṭha. 425) vuttattā ṭhapitauposathapavāraṇo bhikkhu apakatatto evāti gahetabbaṃ. Parisuddhasīlāti pārājikaṃ anāpannā adhippetā. Parivāsādikammesu pana garukaṭṭhāpi apakatattā evāti gahetabbaṃ . Avasesā…pe… chandārahāva hontīti saṅghato hatthapāsaṃ vijahitvā ṭhite sandhāya vuttaṃ. Avijahitvā ṭhitā pana chandārahā na honti, tepi catuvaggādito adhikā hatthapāsaṃ vijahitvāva chandārahā honti. Tasmā saṅghato hatthapāsaṃ vijahitvā ṭhiteneva chando vā pārisuddhi vā dātabbā.
гаммаваг̇г̇аван̣н̣анаа нидтид̇аа.
Kammavaggavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / бариваарабаал̣и • Parivārapāḷi / 1. гаммаваг̇г̇о • 1. Kammavaggo
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / бариваара-адтагат̇аа • Parivāra-aṭṭhakathā / гаммаваг̇г̇аван̣н̣анаа • Kammavaggavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / гаммаваг̇г̇аван̣н̣анаа • Kammavaggavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / гаммаваг̇г̇аван̣н̣анаа • Kammavaggavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / гаммаваг̇г̇аван̣н̣анаа • Kammavaggavaṇṇanā
