| Library / Tipiṭaka / तिपिटक • Tipiṭaka / वजिरबुद्धि-टीका • Vajirabuddhi-ṭīkā |
पञ्चवग्गो
Pañcavaggo
कम्मवग्गवण्णना
Kammavaggavaṇṇanā
४८३. ‘‘उम्मत्तकसम्मुतिं उम्मत्तके याचित्वा गते असम्मुखापि दातुं वट्टती’’ति वुत्तं। तत्थ निसिन्नेपि न कुप्पति नियमाभावा। असम्मुखा कते दोसाभावं दस्सेतुं ‘‘असम्मुखाकतं सुकतं होती’’ति वुत्तं। दूतेन उपसम्पदा पनेत्थ सम्मुखा कातुं न सक्का। कम्मवाचानानत्तसभावा पत्तनिक्कुज्जनादयो हत्थपासतो अपनेत्वा कातब्बा, तेन वुत्तं ‘‘असम्मुखा कतं सुकतं होती’’ति। ‘‘पुच्छित्वा चोदेत्वा सारेत्वा कातब्बं अपुच्छित्वा अचोदेत्वा असारेत्वा करोती’’ति अयं वचनत्थो। ठपेत्वा कत्तिकमासन्ति सो पवारणामासो, द्वे च पुण्णमासियोति पठमदुतियवस्सूपगतानं पवारणा पुण्णमासा द्वे।
483. ‘‘Ummattakasammutiṃ ummattake yācitvā gate asammukhāpi dātuṃ vaṭṭatī’’ti vuttaṃ. Tattha nisinnepi na kuppati niyamābhāvā. Asammukhā kate dosābhāvaṃ dassetuṃ ‘‘asammukhākataṃ sukataṃ hotī’’ti vuttaṃ. Dūtena upasampadā panettha sammukhā kātuṃ na sakkā. Kammavācānānattasabhāvā pattanikkujjanādayo hatthapāsato apanetvā kātabbā, tena vuttaṃ ‘‘asammukhā kataṃ sukataṃ hotī’’ti. ‘‘Pucchitvā codetvā sāretvā kātabbaṃ apucchitvā acodetvā asāretvā karotī’’ti ayaṃ vacanattho. Ṭhapetvā kattikamāsanti so pavāraṇāmāso, dve ca puṇṇamāsiyoti paṭhamadutiyavassūpagatānaṃ pavāraṇā puṇṇamāsā dve.
४८५. पदं वा छड्डेतीति अत्थो। क-वग्गादीसु पञ्चसु। गरुकन्ति दीघं, संयोगपरञ्च। ‘‘बुद्धरक्खितत्थेरस्स यस्स नक्खमती’’ति एत्थ त-कारक-कारा संयोगपरा। दीघे वत्तब्बे रस्सन्ति ‘‘सो तुण्ही अस्सा’’ति वत्तब्बे सो तुण्हि अस्साति वचनं।
485. Padaṃ vā chaḍḍetīti attho. Ka-vaggādīsu pañcasu. Garukanti dīghaṃ, saṃyogaparañca. ‘‘Buddharakkhitattherassa yassa nakkhamatī’’ti ettha ta-kāraka-kārā saṃyogaparā. Dīghe vattabbe rassanti ‘‘so tuṇhī assā’’ti vattabbe so tuṇhi assāti vacanaṃ.
४८६. सेसट्ठकथासु वुत्तवचनं कुरुन्दियं पाकटं कत्वा ‘‘निसीदितुं न सक्कोन्ती’’ति वुत्तं।
486. Sesaṭṭhakathāsu vuttavacanaṃ kurundiyaṃ pākaṭaṃ katvā ‘‘nisīdituṃ na sakkontī’’ti vuttaṃ.
४८७-८. परिसुद्धसीला चत्तारो भिक्खूति पाराजिकं अनापन्ना। न तेसं छन्दो वा पारिसुद्धि वा एतीति तीसु, द्वीसु वा निसिन्नेसु एकस्स, द्विन्नं वा छन्दपारिसुद्धि आहटापि अनाहटाव।
487-8.Parisuddhasīlā cattāro bhikkhūti pārājikaṃ anāpannā. Na tesaṃ chando vā pārisuddhi vā etīti tīsu, dvīsu vā nisinnesu ekassa, dvinnaṃ vā chandapārisuddhi āhaṭāpi anāhaṭāva.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / १. कम्मवग्गो • 1. Kammavaggo
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / कम्मवग्गवण्णना • Kammavaggavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / कम्मवग्गवण्णना • Kammavaggavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / कम्मवग्गवण्णना • Kammavaggavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / कम्मवग्गवण्णना • Kammavaggavaṇṇanā
