| Library / Tipiṭaka / တိပိဋက • Tipiṭaka / ဝဇိရဗုဒ္ဓိ-ဋီကာ • Vajirabuddhi-ṭīkā |
ပဉ္စဝဂ္ဂော
Pañcavaggo
ကမ္မဝဂ္ဂဝဏ္ဏနာ
Kammavaggavaṇṇanā
၄၈၃. ‘‘ဥမ္မတ္တကသမ္မုတိံ ဥမ္မတ္တကေ ယာစိတ္ဝာ ဂတေ အသမ္မုခာပိ ဒာတုံ ဝဋ္ဋတီ’’တိ ဝုတ္တံ။ တတ္ထ နိသိန္နေပိ န ကုပ္ပတိ နိယမာဘာဝာ။ အသမ္မုခာ ကတေ ဒောသာဘာဝံ ဒသ္သေတုံ ‘‘အသမ္မုခာကတံ သုကတံ ဟောတီ’’တိ ဝုတ္တံ။ ဒူတေန ဥပသမ္ပဒာ ပနေတ္ထ သမ္မုခာ ကာတုံ န သက္ကာ။ ကမ္မဝာစာနာနတ္တသဘာဝာ ပတ္တနိက္ကုဇ္ဇနာဒယော ဟတ္ထပာသတော အပနေတ္ဝာ ကာတဗ္ဗာ, တေန ဝုတ္တံ ‘‘အသမ္မုခာ ကတံ သုကတံ ဟောတီ’’တိ။ ‘‘ပုစ္ဆိတ္ဝာ စောဒေတ္ဝာ သာရေတ္ဝာ ကာတဗ္ဗံ အပုစ္ဆိတ္ဝာ အစောဒေတ္ဝာ အသာရေတ္ဝာ ကရောတီ’’တိ အယံ ဝစနတ္ထော။ ဌပေတ္ဝာ ကတ္တိကမာသန္တိ သော ပဝာရဏာမာသော, ဒ္ဝေ စ ပုဏ္ဏမာသိယောတိ ပဌမဒုတိယဝသ္သူပဂတာနံ ပဝာရဏာ ပုဏ္ဏမာသာ ဒ္ဝေ။
483. ‘‘Ummattakasammutiṃ ummattake yācitvā gate asammukhāpi dātuṃ vaṭṭatī’’ti vuttaṃ. Tattha nisinnepi na kuppati niyamābhāvā. Asammukhā kate dosābhāvaṃ dassetuṃ ‘‘asammukhākataṃ sukataṃ hotī’’ti vuttaṃ. Dūtena upasampadā panettha sammukhā kātuṃ na sakkā. Kammavācānānattasabhāvā pattanikkujjanādayo hatthapāsato apanetvā kātabbā, tena vuttaṃ ‘‘asammukhā kataṃ sukataṃ hotī’’ti. ‘‘Pucchitvā codetvā sāretvā kātabbaṃ apucchitvā acodetvā asāretvā karotī’’ti ayaṃ vacanattho. Ṭhapetvā kattikamāsanti so pavāraṇāmāso, dve ca puṇṇamāsiyoti paṭhamadutiyavassūpagatānaṃ pavāraṇā puṇṇamāsā dve.
၄၈၅. ပဒံ ဝာ ဆဍ္ဍေတီတိ အတ္ထော။ က-ဝဂ္ဂာဒီသု ပဉ္စသု။ ဂရုကန္တိ ဒီဃံ, သံယောဂပရဉ္စ။ ‘‘ဗုဒ္ဓရက္ခိတတ္ထေရသ္သ ယသ္သ နက္ခမတီ’’တိ ဧတ္ထ တ-ကာရက-ကာရာ သံယောဂပရာ။ ဒီဃေ ဝတ္တဗ္ဗေ ရသ္သန္တိ ‘‘သော တုဏ္ဟီ အသ္သာ’’တိ ဝတ္တဗ္ဗေ သော တုဏ္ဟိ အသ္သာတိ ဝစနံ။
485. Padaṃ vā chaḍḍetīti attho. Ka-vaggādīsu pañcasu. Garukanti dīghaṃ, saṃyogaparañca. ‘‘Buddharakkhitattherassa yassa nakkhamatī’’ti ettha ta-kāraka-kārā saṃyogaparā. Dīghe vattabbe rassanti ‘‘so tuṇhī assā’’ti vattabbe so tuṇhi assāti vacanaṃ.
၄၈၆. သေသဋ္ဌကထာသု ဝုတ္တဝစနံ ကုရုန္ဒိယံ ပာကဋံ ကတ္ဝာ ‘‘နိသီဒိတုံ န သက္ကောန္တီ’’တိ ဝုတ္တံ။
486. Sesaṭṭhakathāsu vuttavacanaṃ kurundiyaṃ pākaṭaṃ katvā ‘‘nisīdituṃ na sakkontī’’ti vuttaṃ.
၄၈၇-၈. ပရိသုဒ္ဓသီလာ စတ္တာရော ဘိက္ခူတိ ပာရာဇိကံ အနာပန္နာ။ န တေသံ ဆန္ဒော ဝာ ပာရိသုဒ္ဓိ ဝာ ဧတီတိ တီသု, ဒ္ဝီသု ဝာ နိသိန္နေသု ဧကသ္သ, ဒ္ဝိန္နံ ဝာ ဆန္ဒပာရိသုဒ္ဓိ အာဟဋာပိ အနာဟဋာဝ။
487-8.Parisuddhasīlā cattāro bhikkhūti pārājikaṃ anāpannā. Na tesaṃ chando vā pārisuddhi vā etīti tīsu, dvīsu vā nisinnesu ekassa, dvinnaṃ vā chandapārisuddhi āhaṭāpi anāhaṭāva.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ၁. ကမ္မဝဂ္ဂော • 1. Kammavaggo
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / ကမ္မဝဂ္ဂဝဏ္ဏနာ • Kammavaggavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ကမ္မဝဂ္ဂဝဏ္ဏနာ • Kammavaggavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ကမ္မဝဂ္ဂဝဏ္ဏနာ • Kammavaggavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ကမ္မဝဂ္ဂဝဏ္ဏနာ • Kammavaggavaṇṇanā
