| Library / Tipiṭaka / ཏིཔིཊཀ • Tipiṭaka / ཝཛིརབུདྡྷི-ཊཱིཀཱ • Vajirabuddhi-ṭīkā |
པཉྩཝགྒོ
Pañcavaggo
ཀམྨཝགྒཝཎྞནཱ
Kammavaggavaṇṇanā
༤༨༣. ‘‘ཨུམྨཏྟཀསམྨུཏིཾ ཨུམྨཏྟཀེ ཡཱཙིཏྭཱ གཏེ ཨསམྨུཁཱཔི དཱཏུཾ ཝཊྚཏཱི’’ཏི ཝུཏྟཾ། ཏཏྠ ནིསིནྣེཔི ན ཀུཔྤཏི ནིཡམཱབྷཱཝཱ། ཨསམྨུཁཱ ཀཏེ དོསཱབྷཱཝཾ དསྶེཏུཾ ‘‘ཨསམྨུཁཱཀཏཾ སུཀཏཾ ཧོཏཱི’’ཏི ཝུཏྟཾ། དཱུཏེན ཨུཔསམྤདཱ པནེཏྠ སམྨུཁཱ ཀཱཏུཾ ན སཀྐཱ། ཀམྨཝཱཙཱནཱནཏྟསབྷཱཝཱ པཏྟནིཀྐུཛྫནཱདཡོ ཧཏྠཔཱསཏོ ཨཔནེཏྭཱ ཀཱཏབྦཱ, ཏེན ཝུཏྟཾ ‘‘ཨསམྨུཁཱ ཀཏཾ སུཀཏཾ ཧོཏཱི’’ཏི། ‘‘པུཙྪིཏྭཱ ཙོདེཏྭཱ སཱརེཏྭཱ ཀཱཏབྦཾ ཨཔུཙྪིཏྭཱ ཨཙོདེཏྭཱ ཨསཱརེཏྭཱ ཀརོཏཱི’’ཏི ཨཡཾ ཝཙནཏྠོ། ཋཔེཏྭཱ ཀཏྟིཀམཱསནྟི སོ པཝཱརཎཱམཱསོ, དྭེ ཙ པུཎྞམཱསིཡོཏི པཋམདུཏིཡཝསྶཱུཔགཏཱནཾ པཝཱརཎཱ པུཎྞམཱསཱ དྭེ།
483. ‘‘Ummattakasammutiṃ ummattake yācitvā gate asammukhāpi dātuṃ vaṭṭatī’’ti vuttaṃ. Tattha nisinnepi na kuppati niyamābhāvā. Asammukhā kate dosābhāvaṃ dassetuṃ ‘‘asammukhākataṃ sukataṃ hotī’’ti vuttaṃ. Dūtena upasampadā panettha sammukhā kātuṃ na sakkā. Kammavācānānattasabhāvā pattanikkujjanādayo hatthapāsato apanetvā kātabbā, tena vuttaṃ ‘‘asammukhā kataṃ sukataṃ hotī’’ti. ‘‘Pucchitvā codetvā sāretvā kātabbaṃ apucchitvā acodetvā asāretvā karotī’’ti ayaṃ vacanattho. Ṭhapetvā kattikamāsanti so pavāraṇāmāso, dve ca puṇṇamāsiyoti paṭhamadutiyavassūpagatānaṃ pavāraṇā puṇṇamāsā dve.
༤༨༥. པདཾ ཝཱ ཚཌྜེཏཱིཏི ཨཏྠོ། ཀ-ཝགྒཱདཱིསུ པཉྩསུ། གརུཀནྟི དཱིགྷཾ, སཾཡོགཔརཉྩ། ‘‘བུདྡྷརཀྑིཏཏྠེརསྶ ཡསྶ ནཀྑམཏཱི’’ཏི ཨེཏྠ ཏ-ཀཱརཀ-ཀཱརཱ སཾཡོགཔརཱ། དཱིགྷེ ཝཏྟབྦེ རསྶནྟི ‘‘སོ ཏུཎྷཱི ཨསྶཱ’’ཏི ཝཏྟབྦེ སོ ཏུཎྷི ཨསྶཱཏི ཝཙནཾ།
485. Padaṃ vā chaḍḍetīti attho. Ka-vaggādīsu pañcasu. Garukanti dīghaṃ, saṃyogaparañca. ‘‘Buddharakkhitattherassa yassa nakkhamatī’’ti ettha ta-kāraka-kārā saṃyogaparā. Dīghe vattabbe rassanti ‘‘so tuṇhī assā’’ti vattabbe so tuṇhi assāti vacanaṃ.
༤༨༦. སེསཊྛཀཐཱསུ ཝུཏྟཝཙནཾ ཀུརུནྡིཡཾ པཱཀཊཾ ཀཏྭཱ ‘‘ནིསཱིདིཏུཾ ན སཀྐོནྟཱི’’ཏི ཝུཏྟཾ།
486. Sesaṭṭhakathāsu vuttavacanaṃ kurundiyaṃ pākaṭaṃ katvā ‘‘nisīdituṃ na sakkontī’’ti vuttaṃ.
༤༨༧-༨. པརིསུདྡྷསཱིལཱ ཙཏྟཱརོ བྷིཀྑཱུཏི པཱརཱཛིཀཾ ཨནཱཔནྣཱ། ན ཏེསཾ ཚནྡོ ཝཱ པཱརིསུདྡྷི ཝཱ ཨེཏཱིཏི ཏཱིསུ, དྭཱིསུ ཝཱ ནིསིནྣེསུ ཨེཀསྶ, དྭིནྣཾ ཝཱ ཚནྡཔཱརིསུདྡྷི ཨཱཧཊཱཔི ཨནཱཧཊཱཝ།
487-8.Parisuddhasīlā cattāro bhikkhūti pārājikaṃ anāpannā. Na tesaṃ chando vā pārisuddhi vā etīti tīsu, dvīsu vā nisinnesu ekassa, dvinnaṃ vā chandapārisuddhi āhaṭāpi anāhaṭāva.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi / ༡. ཀམྨཝགྒོ • 1. Kammavaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / ཀམྨཝགྒཝཎྞནཱ • Kammavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཀམྨཝགྒཝཎྞནཱ • Kammavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཀམྨཝགྒཝཎྞནཱ • Kammavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཀམྨཝགྒཝཎྞནཱ • Kammavaggavaṇṇanā
