| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
পঞ্চৰগ্গো
Pañcavaggo
১. কম্মৰগ্গো
1. Kammavaggo
৪৮২. চত্তারি কম্মানি। অপলোকনকম্মং, ঞত্তিকম্মং, ঞত্তিদুতিযকম্মং, ঞত্তিচতুত্থকম্মং – ইমানি চত্তারি কম্মানি। কতিহাকারেহি ৰিপজ্জন্তি? ইমানি চত্তারি কম্মানি পঞ্চহাকারেহি ৰিপজ্জন্তি – ৰত্থুতো ৰা ঞত্তিতো ৰা অনুস্সাৰনতো ৰা সীমতো ৰা পরিসতো ৰা।
482. Cattāri kammāni. Apalokanakammaṃ, ñattikammaṃ, ñattidutiyakammaṃ, ñatticatutthakammaṃ – imāni cattāri kammāni. Katihākārehi vipajjanti? Imāni cattāri kammāni pañcahākārehi vipajjanti – vatthuto vā ñattito vā anussāvanato vā sīmato vā parisato vā.
৪৮৩. কথং ৰত্থুতো কম্মানি ৰিপজ্জন্তি? সম্মুখাকরণীযং কম্মং অসম্মুখা করোতি, ৰত্থুৰিপন্নং অধম্মকম্মং; পটিপুচ্ছাকরণীযং কম্মং অপটিপুচ্ছা করোতি, ৰত্থুৰিপন্নং অধম্মকম্মং; পটিঞ্ঞায করণীযং কম্মং অপটিঞ্ঞায করোতি, ৰত্থুৰিপন্নং অধম্মকম্মং; সতিৰিনযারহস্স অমূল়্হৰিনযং দেতি, ৰত্থুৰিপন্নং অধম্মকম্মং; অমূল়্হৰিনযারহস্স তস্সপাপিযসিকাকম্মং করোতি, ৰত্থুৰিপন্নং অধম্মকম্মং; তস্সপাপিযসিকাকম্মারহস্স তজ্জনীযকম্মং করোতি, ৰত্থুৰিপন্নং অধম্মকম্মং; তজ্জনীযকম্মারহস্স নিযস্সকম্মং করোতি, ৰত্থুৰিপন্নং অধম্মকম্মং; নিযস্সকম্মারহস্স পব্বাজনীযকম্মং করোতি, ৰত্থুৰিপন্নং অধম্মকম্মং; পব্বাজনীযকম্মারহস্স পটিসারণীযকম্মং করোতি, ৰত্থুৰিপন্নং অধম্মকম্মং; পটিসারণীযকম্মারহস্স উক্খেপনীযকম্মং করোতি, ৰত্থুৰিপন্নং অধম্মকম্মং; উক্খেপনীযকম্মারহস্স পরিৰাসং দেতি, ৰত্থুৰিপন্নং অধম্মকম্মং ; পরিৰাসারহং মূলায পটিকস্সতি, ৰত্থুৰিপন্নং অধম্মকম্মং; মূলাযপটিকস্সনারহস্স মানত্তং দেতি, ৰত্থুৰিপন্নং অধম্মকম্মং; মানত্তারহং অব্ভেতি, ৰত্থুৰিপন্নং অধম্মকম্মং; অব্ভানারহং উপসম্পাদেতি, ৰত্থুৰিপন্নং অধম্মকম্মং; অনুপোসথে উপোসথং করোতি, ৰত্থুৰিপন্নং অধম্মকম্মং; অপৰারণায পৰারেতি, ৰত্থুৰিপন্নং অধম্মকম্মং। এৰং ৰত্থুতো কম্মানি ৰিপজ্জন্তি।
483. Kathaṃ vatthuto kammāni vipajjanti? Sammukhākaraṇīyaṃ kammaṃ asammukhā karoti, vatthuvipannaṃ adhammakammaṃ; paṭipucchākaraṇīyaṃ kammaṃ apaṭipucchā karoti, vatthuvipannaṃ adhammakammaṃ; paṭiññāya karaṇīyaṃ kammaṃ apaṭiññāya karoti, vatthuvipannaṃ adhammakammaṃ; sativinayārahassa amūḷhavinayaṃ deti, vatthuvipannaṃ adhammakammaṃ; amūḷhavinayārahassa tassapāpiyasikākammaṃ karoti, vatthuvipannaṃ adhammakammaṃ; tassapāpiyasikākammārahassa tajjanīyakammaṃ karoti, vatthuvipannaṃ adhammakammaṃ; tajjanīyakammārahassa niyassakammaṃ karoti, vatthuvipannaṃ adhammakammaṃ; niyassakammārahassa pabbājanīyakammaṃ karoti, vatthuvipannaṃ adhammakammaṃ; pabbājanīyakammārahassa paṭisāraṇīyakammaṃ karoti, vatthuvipannaṃ adhammakammaṃ; paṭisāraṇīyakammārahassa ukkhepanīyakammaṃ karoti, vatthuvipannaṃ adhammakammaṃ; ukkhepanīyakammārahassa parivāsaṃ deti, vatthuvipannaṃ adhammakammaṃ ; parivāsārahaṃ mūlāya paṭikassati, vatthuvipannaṃ adhammakammaṃ; mūlāyapaṭikassanārahassa mānattaṃ deti, vatthuvipannaṃ adhammakammaṃ; mānattārahaṃ abbheti, vatthuvipannaṃ adhammakammaṃ; abbhānārahaṃ upasampādeti, vatthuvipannaṃ adhammakammaṃ; anuposathe uposathaṃ karoti, vatthuvipannaṃ adhammakammaṃ; apavāraṇāya pavāreti, vatthuvipannaṃ adhammakammaṃ. Evaṃ vatthuto kammāni vipajjanti.
৪৮৪. কথং ঞত্তিতো কম্মানি ৰিপজ্জন্তি? পঞ্চহাকারেহি ঞত্তিতো কম্মানি ৰিপজ্জন্তি – ৰত্থুং ন পরামসতি, সঙ্ঘং ন পরামসতি, পুগ্গলং ন পরামসতি, ঞত্তিং ন পরামসতি, পচ্ছা ৰা ঞত্তিং ঠপেতি – ইমেহি পঞ্চহাকারেহি ঞত্তিতো কম্মানি ৰিপজ্জন্তি।
484. Kathaṃ ñattito kammāni vipajjanti? Pañcahākārehi ñattito kammāni vipajjanti – vatthuṃ na parāmasati, saṅghaṃ na parāmasati, puggalaṃ na parāmasati, ñattiṃ na parāmasati, pacchā vā ñattiṃ ṭhapeti – imehi pañcahākārehi ñattito kammāni vipajjanti.
৪৮৫. কথং অনুস্সাৰনতো কম্মানি ৰিপজ্জন্তি? পঞ্চহাকারেহি অনুস্সাৰনতো কম্মানি ৰিপজ্জন্তি – ৰত্থুং ন পরামসতি, সঙ্ঘং ন পরামসতি, পুগ্গলং ন পরামসতি, সাৰনং হাপেতি, অকালে ৰা সাৰেতি – ইমেহি পঞ্চহাকারেহি অনুস্সাৰনতো কম্মানি ৰিপজ্জন্তি।
485. Kathaṃ anussāvanato kammāni vipajjanti? Pañcahākārehi anussāvanato kammāni vipajjanti – vatthuṃ na parāmasati, saṅghaṃ na parāmasati, puggalaṃ na parāmasati, sāvanaṃ hāpeti, akāle vā sāveti – imehi pañcahākārehi anussāvanato kammāni vipajjanti.
৪৮৬. কথং সীমতো কম্মানি ৰিপজ্জন্তি? একাদসহি আকারেহি সীমতো কম্মানি ৰিপজ্জন্তি – অতিখুদ্দকং সীমং সম্মন্নতি, অতিমহতিং সীমং সম্মন্নতি, খণ্ডনিমিত্তং সীমং সম্মন্নতি, ছাযানিমিত্তং সীমং সম্মন্নতি, অনিমিত্তং সীমং সম্মন্নতি, বহিসীমে ঠিতো সীমং সম্মন্নতি, নদিযা সীমং সম্মন্নতি, সমুদ্দে সীমং সম্মন্নতি, জাতস্সরে সীমং সম্মন্নতি, সীমায সীমং সম্ভিন্দতি, সীমায সীমং অজ্ঝোত্থরতি – ইমেহি একাদসহি আকারেহি সীমতো কম্মানি ৰিপজ্জন্তি।
486. Kathaṃ sīmato kammāni vipajjanti? Ekādasahi ākārehi sīmato kammāni vipajjanti – atikhuddakaṃ sīmaṃ sammannati, atimahatiṃ sīmaṃ sammannati, khaṇḍanimittaṃ sīmaṃ sammannati, chāyānimittaṃ sīmaṃ sammannati, animittaṃ sīmaṃ sammannati, bahisīme ṭhito sīmaṃ sammannati, nadiyā sīmaṃ sammannati, samudde sīmaṃ sammannati, jātassare sīmaṃ sammannati, sīmāya sīmaṃ sambhindati, sīmāya sīmaṃ ajjhottharati – imehi ekādasahi ākārehi sīmato kammāni vipajjanti.
৪৮৭. কথং পরিসতো কম্মানি ৰিপজ্জন্তি? দ্ৰাদসহি আকারেহি পরিসতো কম্মানি ৰিপজ্জন্তি – চতুৰগ্গকরণে কম্মে যাৰতিকা ভিক্খূ কম্মপত্তা তে অনাগতা হোন্তি, ছন্দারহানং ছন্দো অনাহটো হোতি, সম্মুখীভূতা পটিক্কোসন্তি, চতুৰগ্গকরণে কম্মে যাৰতিকা ভিক্খূ কম্মপত্তা তে আগতা হোন্তি, ছন্দারহানং ছন্দো অনাহটো হোতি, সম্মুখীভূতা পটিক্কোসন্তি, চতুৰগ্গকরণে কম্মে যাৰতিকা ভিক্খূ কম্মপত্তা তে আগতা হোন্তি, ছন্দারহানং ছন্দো আহটো হোতি, সম্মুখীভূতা পটিক্কোসন্তি। পঞ্চৰগ্গকরণে কম্মে…পে॰… দসৰগ্গকরণে কম্মে…পে॰… ৰীসতিৰগ্গকরণে কম্মে যাৰতিকা ভিক্খূ কম্মপত্তা তে অনাগতা হোন্তি, ছন্দারহানং ছন্দো অনাহটো হোতি, সম্মুখীভূতা পটিক্কোসন্তি, ৰীসতিৰগ্গকরণে কম্মে যাৰতিকা ভিক্খূ কম্মপত্তা, তে আগতা হোন্তি, ছন্দারহানং ছন্দো অনাহটো হোতি, সম্মুখীভূতা পটিক্কোসন্তি, ৰীসতিৰগ্গকরণে কম্মে যাৰতিকা ভিক্খূ কম্মপত্তা, তে আগতা হোন্তি, ছন্দারহানং ছন্দো আহটো হোতি সম্মুখীভূতা পটিক্কোসন্তি – ইমেহি দ্ৰাদসহি আকারেহি পরিসতো কম্মানি ৰিপজ্জন্তি।
487. Kathaṃ parisato kammāni vipajjanti? Dvādasahi ākārehi parisato kammāni vipajjanti – catuvaggakaraṇe kamme yāvatikā bhikkhū kammapattā te anāgatā honti, chandārahānaṃ chando anāhaṭo hoti, sammukhībhūtā paṭikkosanti, catuvaggakaraṇe kamme yāvatikā bhikkhū kammapattā te āgatā honti, chandārahānaṃ chando anāhaṭo hoti, sammukhībhūtā paṭikkosanti, catuvaggakaraṇe kamme yāvatikā bhikkhū kammapattā te āgatā honti, chandārahānaṃ chando āhaṭo hoti, sammukhībhūtā paṭikkosanti. Pañcavaggakaraṇe kamme…pe… dasavaggakaraṇe kamme…pe… vīsativaggakaraṇe kamme yāvatikā bhikkhū kammapattā te anāgatā honti, chandārahānaṃ chando anāhaṭo hoti, sammukhībhūtā paṭikkosanti, vīsativaggakaraṇe kamme yāvatikā bhikkhū kammapattā, te āgatā honti, chandārahānaṃ chando anāhaṭo hoti, sammukhībhūtā paṭikkosanti, vīsativaggakaraṇe kamme yāvatikā bhikkhū kammapattā, te āgatā honti, chandārahānaṃ chando āhaṭo hoti sammukhībhūtā paṭikkosanti – imehi dvādasahi ākārehi parisato kammāni vipajjanti.
৪৮৮. চতুৰগ্গকরণে কম্মে চত্তারো ভিক্খূ পকতত্তা কম্মপত্তা, অৰসেসা পকতত্তা ছন্দারহা । যস্স সঙ্ঘো কম্মং করোতি সো নেৰ কম্মপত্তো নাপি ছন্দারহো, অপি চ কম্মারহো। পঞ্চৰগ্গকরণে কম্মে পঞ্চ ভিক্খূ পকতত্তা কম্মপত্তা, অৰসেসা পকতত্তা ছন্দারহা। যস্স সঙ্ঘো কম্মং করোতি সো নেৰ কম্মপত্তো নাপি ছন্দারহো, অপি চ কম্মারহো। দসৰগ্গকরণে কম্মে দস ভিক্খূ পকতত্তা কম্মপত্তা, অৰসেসা পকতত্তা ছন্দারহা। যস্স সঙ্ঘো কম্মং করোতি সো নেৰ কম্মপত্তো নাপি ছন্দারহো, অপি চ কম্মারহো। ৰীসতিৰগ্গকরণে কম্মে ৰীসতি ভিক্খূ পকতত্তা কম্মপত্তা, অৰসেসা পকতত্তা ছন্দারহা। যস্স সঙ্ঘো কম্মং করোতি সো নেৰ কম্মপত্তো নাপি ছন্দারহো, অপি চ কম্মারহো।
488. Catuvaggakaraṇe kamme cattāro bhikkhū pakatattā kammapattā, avasesā pakatattā chandārahā . Yassa saṅgho kammaṃ karoti so neva kammapatto nāpi chandāraho, api ca kammāraho. Pañcavaggakaraṇe kamme pañca bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho. Dasavaggakaraṇe kamme dasa bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho. Vīsativaggakaraṇe kamme vīsati bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho.
৪৮৯. চত্তারি কম্মানি – অপলোকনকম্মং, ঞত্তিকম্মং, ঞত্তিদুতিযকম্মং, ঞত্তিচতুত্থকম্মং। ইমানি চত্তারি কম্মানি কতিহাকারেহি ৰিপজ্জন্তি? ইমানি চত্তারি কম্মানি পঞ্চহাকারেহি ৰিপজ্জন্তি – ৰত্থুতো ৰা ঞত্তিতো ৰা অনুস্সাৰনতো ৰা সীমতো ৰা পরিসতো ৰা।
489. Cattāri kammāni – apalokanakammaṃ, ñattikammaṃ, ñattidutiyakammaṃ, ñatticatutthakammaṃ. Imāni cattāri kammāni katihākārehi vipajjanti? Imāni cattāri kammāni pañcahākārehi vipajjanti – vatthuto vā ñattito vā anussāvanato vā sīmato vā parisato vā.
৪৯০. কথং ৰত্থুতো কম্মানি ৰিপজ্জন্তি? পণ্ডকং উপসম্পাদেতি , ৰত্থুৰিপন্নং অধম্মকম্মং। থেয্যসংৰাসকং উপসম্পাদেতি, ৰত্থুৰিপন্নং অধম্মকম্মং। তিত্থিযপক্কন্তকং উপসম্পাদেতি, ৰত্থুৰিপন্নং অধম্মকম্মং। তিরচ্ছানগতং উপসম্পাদেতি, ৰত্থুৰিপন্নং অধম্মকম্মং। মাতুঘাতকং উপসম্পাদেতি, ৰত্থুৰিপন্নং অধম্মকম্মং। পিতুঘাতকং উপসম্পাদেতি, ৰত্থুৰিপন্নং অধম্মকম্মং। অরহন্তঘাতকং উপসম্পাদেতি, ৰত্থুৰিপন্নং অধম্মকম্মং। ভিক্খুনিদূসকং উপসম্পাদেতি, ৰত্থুৰিপন্নং অধম্মকম্মং। সঙ্ঘভেদকং উপসম্পাদেতি, ৰত্থুৰিপন্নং অধম্মকম্মং। লোহিতুপ্পাদকং উপসম্পাদেতি, ৰত্থুৰিপন্নং অধম্মকম্মং। উভতোব্যঞ্জনং উপসম্পাদেতি, ৰত্থুৰিপন্নং অধম্মকম্মং। ঊনৰীসতিৰস্সং পুগ্গলং উপসম্পাদেতি, ৰত্থুৰিপন্নং অধম্মকম্মং। এৰং ৰত্থুতো কম্মানি ৰিপজ্জন্তি।
490. Kathaṃ vatthuto kammāni vipajjanti? Paṇḍakaṃ upasampādeti , vatthuvipannaṃ adhammakammaṃ. Theyyasaṃvāsakaṃ upasampādeti, vatthuvipannaṃ adhammakammaṃ. Titthiyapakkantakaṃ upasampādeti, vatthuvipannaṃ adhammakammaṃ. Tiracchānagataṃ upasampādeti, vatthuvipannaṃ adhammakammaṃ. Mātughātakaṃ upasampādeti, vatthuvipannaṃ adhammakammaṃ. Pitughātakaṃ upasampādeti, vatthuvipannaṃ adhammakammaṃ. Arahantaghātakaṃ upasampādeti, vatthuvipannaṃ adhammakammaṃ. Bhikkhunidūsakaṃ upasampādeti, vatthuvipannaṃ adhammakammaṃ. Saṅghabhedakaṃ upasampādeti, vatthuvipannaṃ adhammakammaṃ. Lohituppādakaṃ upasampādeti, vatthuvipannaṃ adhammakammaṃ. Ubhatobyañjanaṃ upasampādeti, vatthuvipannaṃ adhammakammaṃ. Ūnavīsativassaṃ puggalaṃ upasampādeti, vatthuvipannaṃ adhammakammaṃ. Evaṃ vatthuto kammāni vipajjanti.
৪৯১. কথং ঞত্তিতো কম্মানি ৰিপজ্জন্তি? পঞ্চহাকারেহি ঞত্তিতো কম্মানি ৰিপজ্জন্তি। ৰত্থুং ন পরামসতি, সঙ্ঘং ন পরামসতি, পুগ্গলং ন পরামসতি, ঞত্তিং ন পরামসতি, পচ্ছা ৰা ঞত্তিং ঠপেতি – ইমেহি পঞ্চহাকারেহি ঞত্তিতো কম্মানি ৰিপজ্জন্তি।
491. Kathaṃ ñattito kammāni vipajjanti? Pañcahākārehi ñattito kammāni vipajjanti. Vatthuṃ na parāmasati, saṅghaṃ na parāmasati, puggalaṃ na parāmasati, ñattiṃ na parāmasati, pacchā vā ñattiṃ ṭhapeti – imehi pañcahākārehi ñattito kammāni vipajjanti.
৪৯২. কথং অনুস্সাৰনতো কম্মানি ৰিপজ্জন্তি? পঞ্চহাকারেহি অনুস্সাৰনতো কম্মানি ৰিপজ্জন্তি – ৰত্থুং ন পরামসতি, সঙ্ঘং ন পরামসতি, পুগ্গলং ন পরামসতি, সাৰনং হাপেতি, অকালে ৰা সাৰেতি – ইমেহি পঞ্চহাকারেহি অনুস্সাৰনতো কম্মানি ৰিপজ্জন্তি।
492. Kathaṃ anussāvanato kammāni vipajjanti? Pañcahākārehi anussāvanato kammāni vipajjanti – vatthuṃ na parāmasati, saṅghaṃ na parāmasati, puggalaṃ na parāmasati, sāvanaṃ hāpeti, akāle vā sāveti – imehi pañcahākārehi anussāvanato kammāni vipajjanti.
৪৯৩. কথং সীমতো কম্মানি ৰিপজ্জন্তি? একাদসহি আকারেহি সীমতো কম্মানি ৰিপজ্জন্তি। অতিখুদ্দকং সীমং সম্মন্নতি, অতিমহতিং সীমং সম্মন্নতি, খণ্ডনিমিত্তং সীমং সম্মন্নতি, ছাযানিমিত্তং সীমং সম্মন্নতি, অনিমিত্তং সীমং সম্মন্নতি, বহিসীমে ঠিতো সীমং সম্মন্নতি, নদিযা সীমং সম্মন্নতি, সমুদ্দে সীমং সম্মন্নতি, জাতস্সরে সীমং সম্মন্নতি, সীমায সীমং সম্ভিন্দতি, সীমায সীমং অজ্ঝোত্থরতি – ইমেহি একাদসহি আকারেহি সীমতো কম্মানি ৰিপজ্জন্তি।
493. Kathaṃ sīmato kammāni vipajjanti? Ekādasahi ākārehi sīmato kammāni vipajjanti. Atikhuddakaṃ sīmaṃ sammannati, atimahatiṃ sīmaṃ sammannati, khaṇḍanimittaṃ sīmaṃ sammannati, chāyānimittaṃ sīmaṃ sammannati, animittaṃ sīmaṃ sammannati, bahisīme ṭhito sīmaṃ sammannati, nadiyā sīmaṃ sammannati, samudde sīmaṃ sammannati, jātassare sīmaṃ sammannati, sīmāya sīmaṃ sambhindati, sīmāya sīmaṃ ajjhottharati – imehi ekādasahi ākārehi sīmato kammāni vipajjanti.
৪৯৪. কথং পরিসতো কম্মানি ৰিপজ্জন্তি? দ্ৰাদসহি আকারেহি পরিসতো কম্মানি ৰিপজ্জন্তি – চতুৰগ্গকরণে কম্মে যাৰতিকা ভিক্খূ কম্মপত্তা তে অনাগতা হোন্তি, ছন্দারহানং ছন্দো অনাহটো হোতি, সম্মুখীভূতা পটিক্কোসন্তি, চতুৰগ্গকরণে কম্মে যাৰতিকা ভিক্খূ কম্মপত্তা তে আগতা হোন্তি, ছন্দারহানং ছন্দো অনাহটো হোতি, সম্মুখীভূতা পটিক্কোসন্তি। চতুৰগ্গকরণে কম্মে যাৰতিকা ভিক্খূ কম্মপত্তা তে আগতা হোন্তি, ছন্দারহানং ছন্দো আহটো হোতি সম্মুখীভূতা পটিক্কোসন্তি। পঞ্চৰগ্গকরণে কম্মে…পে॰… দসৰগ্গকরণে কম্মে…পে॰… ৰীসতিৰগ্গকরণে কম্মে যাৰতিকা ভিক্খূ কম্মপত্তা তে অনাগতা হোন্তি, ছন্দারহানং ছন্দো অনাহটো হোতি, সম্মুখীভূতা পটিক্কোসন্তি। ৰীসতিৰগ্গকরণে কম্মে যাৰতিকা ভিক্খূ কম্মপত্তা তে আগতা হোন্তি, ছন্দারহানং ছন্দো অনাহটো হোতি, সম্মুখীভূতা পটিক্কোসন্তি। ৰীসতিৰগ্গকরণে কম্মে যাৰতিকা ভিক্খূ কম্মপত্তা তে আগতা হোন্তি, ছন্দারহানং ছন্দো আহটো হোতি, সম্মুখীভূতা পটিক্কোসন্তি – ইমেহি দ্ৰাদসহি আকারেহি পরিসতো কম্মানি ৰিপজ্জন্তি।
494. Kathaṃ parisato kammāni vipajjanti? Dvādasahi ākārehi parisato kammāni vipajjanti – catuvaggakaraṇe kamme yāvatikā bhikkhū kammapattā te anāgatā honti, chandārahānaṃ chando anāhaṭo hoti, sammukhībhūtā paṭikkosanti, catuvaggakaraṇe kamme yāvatikā bhikkhū kammapattā te āgatā honti, chandārahānaṃ chando anāhaṭo hoti, sammukhībhūtā paṭikkosanti. Catuvaggakaraṇe kamme yāvatikā bhikkhū kammapattā te āgatā honti, chandārahānaṃ chando āhaṭo hoti sammukhībhūtā paṭikkosanti. Pañcavaggakaraṇe kamme…pe… dasavaggakaraṇe kamme…pe… vīsativaggakaraṇe kamme yāvatikā bhikkhū kammapattā te anāgatā honti, chandārahānaṃ chando anāhaṭo hoti, sammukhībhūtā paṭikkosanti. Vīsativaggakaraṇe kamme yāvatikā bhikkhū kammapattā te āgatā honti, chandārahānaṃ chando anāhaṭo hoti, sammukhībhūtā paṭikkosanti. Vīsativaggakaraṇe kamme yāvatikā bhikkhū kammapattā te āgatā honti, chandārahānaṃ chando āhaṭo hoti, sammukhībhūtā paṭikkosanti – imehi dvādasahi ākārehi parisato kammāni vipajjanti.
৪৯৫. অপলোকনকম্মং কতি ঠানানি গচ্ছতি? ঞত্তিকম্মং কতি ঠানানি গচ্ছতি? ঞত্তিদুতিযকম্মং কতি ঠানানি গচ্ছতি? ঞত্তিচতুত্থকম্মং কতি ঠানানি গচ্ছতি? অপলোকনকম্মং পঞ্চ ঠানানি গচ্ছতি। ঞত্তিকম্মং নৰ ঠানানি গচ্ছতি। ঞত্তিদুতিযকম্মং সত্ত ঠানানি গচ্ছতি। ঞত্তিচতুত্থকম্মং সত্ত ঠানানি গচ্ছতি।
495. Apalokanakammaṃ kati ṭhānāni gacchati? Ñattikammaṃ kati ṭhānāni gacchati? Ñattidutiyakammaṃ kati ṭhānāni gacchati? Ñatticatutthakammaṃ kati ṭhānāni gacchati? Apalokanakammaṃ pañca ṭhānāni gacchati. Ñattikammaṃ nava ṭhānāni gacchati. Ñattidutiyakammaṃ satta ṭhānāni gacchati. Ñatticatutthakammaṃ satta ṭhānāni gacchati.
৪৯৬. অপলোকনকম্মং কতমানি পঞ্চ ঠানানি গচ্ছতি? ওসারণং, নিস্সারণং, ভণ্ডুকম্মং, ব্রহ্মদণ্ডং, কম্মলক্খণঞ্ঞেৰ পঞ্চমং – অপলোকনকম্মং ইমানি পঞ্চ ঠানানি গচ্ছতি । ঞত্তিকম্মং কতমানি নৰ ঠানানি গচ্ছতি? ওসারণং, নিস্সারণং, উপোসথং, পৰারণং, সম্মুতিং, দানং, পটিগ্গহং, পচ্চুক্কড্ঢনং, কম্মলক্খণঞ্ঞেৰ নৰমং – ঞত্তিকম্মং ইমানি নৰ ঠানানি গচ্ছতি। ঞত্তিদুতিযকম্মং কতমানি সত্ত ঠানানি গচ্ছতি? ওসারণং, নিস্সারণং, সম্মুতিং, দানং, উদ্ধরণং, দেসনং, কম্মলক্খণঞ্ঞেৰ সত্তমং – ঞত্তিদুতিযকম্মং ইমানি সত্ত ঠানানি গচ্ছতি। ঞত্তিচতুত্থকম্মং কতমানি সত্ত ঠানানি গচ্ছতি? ওসারণং, নিস্সারণং, সম্মুতিং, দানং, নিগ্গহং, সমনুভাসনং, কম্মলক্খণঞ্ঞেৰ সত্তমং – ঞত্তিচতুত্থকম্মং ইমানি সত্ত ঠানানি গচ্ছতি।
496. Apalokanakammaṃ katamāni pañca ṭhānāni gacchati? Osāraṇaṃ, nissāraṇaṃ, bhaṇḍukammaṃ, brahmadaṇḍaṃ, kammalakkhaṇaññeva pañcamaṃ – apalokanakammaṃ imāni pañca ṭhānāni gacchati . Ñattikammaṃ katamāni nava ṭhānāni gacchati? Osāraṇaṃ, nissāraṇaṃ, uposathaṃ, pavāraṇaṃ, sammutiṃ, dānaṃ, paṭiggahaṃ, paccukkaḍḍhanaṃ, kammalakkhaṇaññeva navamaṃ – ñattikammaṃ imāni nava ṭhānāni gacchati. Ñattidutiyakammaṃ katamāni satta ṭhānāni gacchati? Osāraṇaṃ, nissāraṇaṃ, sammutiṃ, dānaṃ, uddharaṇaṃ, desanaṃ, kammalakkhaṇaññeva sattamaṃ – ñattidutiyakammaṃ imāni satta ṭhānāni gacchati. Ñatticatutthakammaṃ katamāni satta ṭhānāni gacchati? Osāraṇaṃ, nissāraṇaṃ, sammutiṃ, dānaṃ, niggahaṃ, samanubhāsanaṃ, kammalakkhaṇaññeva sattamaṃ – ñatticatutthakammaṃ imāni satta ṭhānāni gacchati.
৪৯৭. চতুৰগ্গকরণে কম্মে চত্তারো ভিক্খূ পকতত্তা কম্মপত্তা, অৰসেসা পকতত্তা ছন্দারহা। যস্স সঙ্ঘো কম্মং করোতি সো নেৰ কম্মপত্তো নাপি ছন্দারহো, অপি চ কম্মারহো। পঞ্চৰগ্গকরণে কম্মে পঞ্চ ভিক্খূ পকতত্তা কম্মপত্তা, অৰসেসা পকতত্তা ছন্দারহা। যস্স সঙ্ঘো কম্মং করোতি সো নেৰ কম্মপত্তো নাপি ছন্দারহো, অপি চ কম্মারহো। দসৰগ্গকরণে কম্মে দস ভিক্খূ পকতত্তা কম্মপত্তা, অৰসেসা পকতত্তা ছন্দারহা। যস্স সঙ্ঘো কম্মং করোতি সো নেৰ কম্মপত্তো নাপি ছন্দারহো, অপি চ কম্মারহো। ৰীসতিৰগ্গকরণে কম্মে ৰীসতি ভিক্খূ পকতত্তা কম্মপত্তা, অৰসেসা পকতত্তা ছন্দারহা। যস্স সঙ্ঘো কম্মং করোতি সো নেৰ কম্মপত্তো নাপি ছন্দারহো, অপি চ কম্মারহো।
497. Catuvaggakaraṇe kamme cattāro bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho. Pañcavaggakaraṇe kamme pañca bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho. Dasavaggakaraṇe kamme dasa bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho. Vīsativaggakaraṇe kamme vīsati bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho.
কম্মৰগ্গো নিট্ঠিতো পঠমো।
Kammavaggo niṭṭhito paṭhamo.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā
কম্মৰগ্গৰণ্ণনা • Kammavaggavaṇṇanā
অপলোকনকম্মকথা • Apalokanakammakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
কম্মৰগ্গৰণ্ণনা • Kammavaggavaṇṇanā
অপলোকনকম্মকথাৰণ্ণনা • Apalokanakammakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
কম্মৰগ্গৰণ্ণনা • Kammavaggavaṇṇanā
অপলোকনকম্মকথাৰণ্ণনা • Apalokanakammakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā
কম্মৰগ্গৰণ্ণনা • Kammavaggavaṇṇanā
অপলোকনকম্মকথাৰণ্ণনা • Apalokanakammakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
কম্মৰগ্গৰণ্ণনা • Kammavaggavaṇṇanā
অপলোকনকম্মকথা • Apalokanakammakathā
