| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
පඤ්‌චවග්‌ගො
Pañcavaggo
1. කම්‌මවග්‌ගො
1. Kammavaggo
482. චත්‌තාරි කම්‌මානි. අපලොකනකම්‌මං, ඤත්‌තිකම්‌මං, ඤත්‌තිදුතියකම්‌මං, ඤත්‌තිචතුත්‌ථකම්‌මං – ඉමානි චත්‌තාරි කම්‌මානි. කතිහාකාරෙහි විපජ්‌ජන්‌ති? ඉමානි චත්‌තාරි කම්‌මානි පඤ්‌චහාකාරෙහි විපජ්‌ජන්‌ති – වත්‌ථුතො වා ඤත්‌තිතො වා අනුස්‌සාවනතො වා සීමතො වා පරිසතො වා.
482. Cattāri kammāni. Apalokanakammaṃ, ñattikammaṃ, ñattidutiyakammaṃ, ñatticatutthakammaṃ – imāni cattāri kammāni. Katihākārehi vipajjanti? Imāni cattāri kammāni pañcahākārehi vipajjanti – vatthuto vā ñattito vā anussāvanato vā sīmato vā parisato vā.
483. කථං වත්‌ථුතො කම්‌මානි විපජ්‌ජන්‌ති? සම්‌මුඛාකරණීයං කම්‌මං අසම්‌මුඛා කරොති, වත්‌ථුවිපන්‌නං අධම්‌මකම්‌මං; පටිපුච්‌ඡාකරණීයං කම්‌මං අපටිපුච්‌ඡා කරොති, වත්‌ථුවිපන්‌නං අධම්‌මකම්‌මං; පටිඤ්‌ඤාය කරණීයං කම්‌මං අපටිඤ්‌ඤාය කරොති, වත්‌ථුවිපන්‌නං අධම්‌මකම්‌මං; සතිවිනයාරහස්‌ස අමූළ්‌හවිනයං දෙති, වත්‌ථුවිපන්‌නං අධම්‌මකම්‌මං; අමූළ්‌හවිනයාරහස්‌ස තස්‌සපාපියසිකාකම්‌මං කරොති, වත්‌ථුවිපන්‌නං අධම්‌මකම්‌මං; තස්‌සපාපියසිකාකම්‌මාරහස්‌ස තජ්‌ජනීයකම්‌මං කරොති, වත්‌ථුවිපන්‌නං අධම්‌මකම්‌මං; තජ්‌ජනීයකම්‌මාරහස්‌ස නියස්‌සකම්‌මං කරොති, වත්‌ථුවිපන්‌නං අධම්‌මකම්‌මං; නියස්‌සකම්‌මාරහස්‌ස පබ්‌බාජනීයකම්‌මං කරොති, වත්‌ථුවිපන්‌නං අධම්‌මකම්‌මං; පබ්‌බාජනීයකම්‌මාරහස්‌ස පටිසාරණීයකම්‌මං කරොති, වත්‌ථුවිපන්‌නං අධම්‌මකම්‌මං; පටිසාරණීයකම්‌මාරහස්‌ස උක්‌ඛෙපනීයකම්‌මං කරොති, වත්‌ථුවිපන්‌නං අධම්‌මකම්‌මං; උක්‌ඛෙපනීයකම්‌මාරහස්‌ස පරිවාසං දෙති, වත්‌ථුවිපන්‌නං අධම්‌මකම්‌මං ; පරිවාසාරහං මූලාය පටිකස්‌සති, වත්‌ථුවිපන්‌නං අධම්‌මකම්‌මං; මූලායපටිකස්‌සනාරහස්‌ස මානත්‌තං දෙති, වත්‌ථුවිපන්‌නං අධම්‌මකම්‌මං; මානත්‌තාරහං අබ්‌භෙති, වත්‌ථුවිපන්‌නං අධම්‌මකම්‌මං; අබ්‌භානාරහං උපසම්‌පාදෙති, වත්‌ථුවිපන්‌නං අධම්‌මකම්‌මං; අනුපොසථෙ උපොසථං කරොති, වත්‌ථුවිපන්‌නං අධම්‌මකම්‌මං; අපවාරණාය පවාරෙති, වත්‌ථුවිපන්‌නං අධම්‌මකම්‌මං. එවං වත්‌ථුතො කම්‌මානි විපජ්‌ජන්‌ති.
483. Kathaṃ vatthuto kammāni vipajjanti? Sammukhākaraṇīyaṃ kammaṃ asammukhā karoti, vatthuvipannaṃ adhammakammaṃ; paṭipucchākaraṇīyaṃ kammaṃ apaṭipucchā karoti, vatthuvipannaṃ adhammakammaṃ; paṭiññāya karaṇīyaṃ kammaṃ apaṭiññāya karoti, vatthuvipannaṃ adhammakammaṃ; sativinayārahassa amūḷhavinayaṃ deti, vatthuvipannaṃ adhammakammaṃ; amūḷhavinayārahassa tassapāpiyasikākammaṃ karoti, vatthuvipannaṃ adhammakammaṃ; tassapāpiyasikākammārahassa tajjanīyakammaṃ karoti, vatthuvipannaṃ adhammakammaṃ; tajjanīyakammārahassa niyassakammaṃ karoti, vatthuvipannaṃ adhammakammaṃ; niyassakammārahassa pabbājanīyakammaṃ karoti, vatthuvipannaṃ adhammakammaṃ; pabbājanīyakammārahassa paṭisāraṇīyakammaṃ karoti, vatthuvipannaṃ adhammakammaṃ; paṭisāraṇīyakammārahassa ukkhepanīyakammaṃ karoti, vatthuvipannaṃ adhammakammaṃ; ukkhepanīyakammārahassa parivāsaṃ deti, vatthuvipannaṃ adhammakammaṃ ; parivāsārahaṃ mūlāya paṭikassati, vatthuvipannaṃ adhammakammaṃ; mūlāyapaṭikassanārahassa mānattaṃ deti, vatthuvipannaṃ adhammakammaṃ; mānattārahaṃ abbheti, vatthuvipannaṃ adhammakammaṃ; abbhānārahaṃ upasampādeti, vatthuvipannaṃ adhammakammaṃ; anuposathe uposathaṃ karoti, vatthuvipannaṃ adhammakammaṃ; apavāraṇāya pavāreti, vatthuvipannaṃ adhammakammaṃ. Evaṃ vatthuto kammāni vipajjanti.
484. කථං ඤත්‌තිතො කම්‌මානි විපජ්‌ජන්‌ති? පඤ්‌චහාකාරෙහි ඤත්‌තිතො කම්‌මානි විපජ්‌ජන්‌ති – වත්‌ථුං න පරාමසති, සඞ්‌ඝං න පරාමසති, පුග්‌ගලං න පරාමසති, ඤත්‌තිං න පරාමසති, පච්‌ඡා වා ඤත්‌තිං ඨපෙති – ඉමෙහි පඤ්‌චහාකාරෙහි ඤත්‌තිතො කම්‌මානි විපජ්‌ජන්‌ති.
484. Kathaṃ ñattito kammāni vipajjanti? Pañcahākārehi ñattito kammāni vipajjanti – vatthuṃ na parāmasati, saṅghaṃ na parāmasati, puggalaṃ na parāmasati, ñattiṃ na parāmasati, pacchā vā ñattiṃ ṭhapeti – imehi pañcahākārehi ñattito kammāni vipajjanti.
485. කථං අනුස්‌සාවනතො කම්‌මානි විපජ්‌ජන්‌ති? පඤ්‌චහාකාරෙහි අනුස්‌සාවනතො කම්‌මානි විපජ්‌ජන්‌ති – වත්‌ථුං න පරාමසති, සඞ්‌ඝං න පරාමසති, පුග්‌ගලං න පරාමසති, සාවනං හාපෙති, අකාලෙ වා සාවෙති – ඉමෙහි පඤ්‌චහාකාරෙහි අනුස්‌සාවනතො කම්‌මානි විපජ්‌ජන්‌ති.
485. Kathaṃ anussāvanato kammāni vipajjanti? Pañcahākārehi anussāvanato kammāni vipajjanti – vatthuṃ na parāmasati, saṅghaṃ na parāmasati, puggalaṃ na parāmasati, sāvanaṃ hāpeti, akāle vā sāveti – imehi pañcahākārehi anussāvanato kammāni vipajjanti.
486. කථං සීමතො කම්‌මානි විපජ්‌ජන්‌ති? එකාදසහි ආකාරෙහි සීමතො කම්‌මානි විපජ්‌ජන්‌ති – අතිඛුද්‌දකං සීමං සම්‌මන්‌නති, අතිමහතිං සීමං සම්‌මන්‌නති, ඛණ්‌ඩනිමිත්‌තං සීමං සම්‌මන්‌නති, ඡායානිමිත්‌තං සීමං සම්‌මන්‌නති, අනිමිත්‌තං සීමං සම්‌මන්‌නති, බහිසීමෙ ඨිතො සීමං සම්‌මන්‌නති, නදියා සීමං සම්‌මන්‌නති, සමුද්‌දෙ සීමං සම්‌මන්‌නති, ජාතස්‌සරෙ සීමං සම්‌මන්‌නති, සීමාය සීමං සම්‌භින්‌දති, සීමාය සීමං අජ්‌ඣොත්‌ථරති – ඉමෙහි එකාදසහි ආකාරෙහි සීමතො කම්‌මානි විපජ්‌ජන්‌ති.
486. Kathaṃ sīmato kammāni vipajjanti? Ekādasahi ākārehi sīmato kammāni vipajjanti – atikhuddakaṃ sīmaṃ sammannati, atimahatiṃ sīmaṃ sammannati, khaṇḍanimittaṃ sīmaṃ sammannati, chāyānimittaṃ sīmaṃ sammannati, animittaṃ sīmaṃ sammannati, bahisīme ṭhito sīmaṃ sammannati, nadiyā sīmaṃ sammannati, samudde sīmaṃ sammannati, jātassare sīmaṃ sammannati, sīmāya sīmaṃ sambhindati, sīmāya sīmaṃ ajjhottharati – imehi ekādasahi ākārehi sīmato kammāni vipajjanti.
487. කථං පරිසතො කම්‌මානි විපජ්‌ජන්‌ති? ද්‌වාදසහි ආකාරෙහි පරිසතො කම්‌මානි විපජ්‌ජන්‌ති – චතුවග්‌ගකරණෙ කම්‌මෙ යාවතිකා භික්‌ඛූ කම්‌මපත්‌තා තෙ අනාගතා හොන්‌ති, ඡන්‌දාරහානං ඡන්‌දො අනාහටො හොති, සම්‌මුඛීභූතා පටික්‌කොසන්‌ති, චතුවග්‌ගකරණෙ කම්‌මෙ යාවතිකා භික්‌ඛූ කම්‌මපත්‌තා තෙ ආගතා හොන්‌ති, ඡන්‌දාරහානං ඡන්‌දො අනාහටො හොති, සම්‌මුඛීභූතා පටික්‌කොසන්‌ති, චතුවග්‌ගකරණෙ කම්‌මෙ යාවතිකා භික්‌ඛූ කම්‌මපත්‌තා තෙ ආගතා හොන්‌ති, ඡන්‌දාරහානං ඡන්‌දො ආහටො හොති, සම්‌මුඛීභූතා පටික්‌කොසන්‌ති. පඤ්‌චවග්‌ගකරණෙ කම්‌මෙ…පෙ.… දසවග්‌ගකරණෙ කම්‌මෙ…පෙ.… වීසතිවග්‌ගකරණෙ කම්‌මෙ යාවතිකා භික්‌ඛූ කම්‌මපත්‌තා තෙ අනාගතා හොන්‌ති, ඡන්‌දාරහානං ඡන්‌දො අනාහටො හොති, සම්‌මුඛීභූතා පටික්‌කොසන්‌ති, වීසතිවග්‌ගකරණෙ කම්‌මෙ යාවතිකා භික්‌ඛූ කම්‌මපත්‌තා, තෙ ආගතා හොන්‌ති, ඡන්‌දාරහානං ඡන්‌දො අනාහටො හොති, සම්‌මුඛීභූතා පටික්‌කොසන්‌ති, වීසතිවග්‌ගකරණෙ කම්‌මෙ යාවතිකා භික්‌ඛූ කම්‌මපත්‌තා, තෙ ආගතා හොන්‌ති, ඡන්‌දාරහානං ඡන්‌දො ආහටො හොති සම්‌මුඛීභූතා පටික්‌කොසන්‌ති – ඉමෙහි ද්‌වාදසහි ආකාරෙහි පරිසතො කම්‌මානි විපජ්‌ජන්‌ති.
487. Kathaṃ parisato kammāni vipajjanti? Dvādasahi ākārehi parisato kammāni vipajjanti – catuvaggakaraṇe kamme yāvatikā bhikkhū kammapattā te anāgatā honti, chandārahānaṃ chando anāhaṭo hoti, sammukhībhūtā paṭikkosanti, catuvaggakaraṇe kamme yāvatikā bhikkhū kammapattā te āgatā honti, chandārahānaṃ chando anāhaṭo hoti, sammukhībhūtā paṭikkosanti, catuvaggakaraṇe kamme yāvatikā bhikkhū kammapattā te āgatā honti, chandārahānaṃ chando āhaṭo hoti, sammukhībhūtā paṭikkosanti. Pañcavaggakaraṇe kamme…pe… dasavaggakaraṇe kamme…pe… vīsativaggakaraṇe kamme yāvatikā bhikkhū kammapattā te anāgatā honti, chandārahānaṃ chando anāhaṭo hoti, sammukhībhūtā paṭikkosanti, vīsativaggakaraṇe kamme yāvatikā bhikkhū kammapattā, te āgatā honti, chandārahānaṃ chando anāhaṭo hoti, sammukhībhūtā paṭikkosanti, vīsativaggakaraṇe kamme yāvatikā bhikkhū kammapattā, te āgatā honti, chandārahānaṃ chando āhaṭo hoti sammukhībhūtā paṭikkosanti – imehi dvādasahi ākārehi parisato kammāni vipajjanti.
488. චතුවග්‌ගකරණෙ කම්‌මෙ චත්‌තාරො භික්‌ඛූ පකතත්‌තා කම්‌මපත්‌තා, අවසෙසා පකතත්‌තා ඡන්‌දාරහා . යස්‌ස සඞ්‌ඝො කම්‌මං කරොති සො නෙව කම්‌මපත්‌තො නාපි ඡන්‌දාරහො, අපි ච කම්‌මාරහො. පඤ්‌චවග්‌ගකරණෙ කම්‌මෙ පඤ්‌ච භික්‌ඛූ පකතත්‌තා කම්‌මපත්‌තා, අවසෙසා පකතත්‌තා ඡන්‌දාරහා. යස්‌ස සඞ්‌ඝො කම්‌මං කරොති සො නෙව කම්‌මපත්‌තො නාපි ඡන්‌දාරහො, අපි ච කම්‌මාරහො. දසවග්‌ගකරණෙ කම්‌මෙ දස භික්‌ඛූ පකතත්‌තා කම්‌මපත්‌තා, අවසෙසා පකතත්‌තා ඡන්‌දාරහා. යස්‌ස සඞ්‌ඝො කම්‌මං කරොති සො නෙව කම්‌මපත්‌තො නාපි ඡන්‌දාරහො, අපි ච කම්‌මාරහො. වීසතිවග්‌ගකරණෙ කම්‌මෙ වීසති භික්‌ඛූ පකතත්‌තා කම්‌මපත්‌තා, අවසෙසා පකතත්‌තා ඡන්‌දාරහා. යස්‌ස සඞ්‌ඝො කම්‌මං කරොති සො නෙව කම්‌මපත්‌තො නාපි ඡන්‌දාරහො, අපි ච කම්‌මාරහො.
488. Catuvaggakaraṇe kamme cattāro bhikkhū pakatattā kammapattā, avasesā pakatattā chandārahā . Yassa saṅgho kammaṃ karoti so neva kammapatto nāpi chandāraho, api ca kammāraho. Pañcavaggakaraṇe kamme pañca bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho. Dasavaggakaraṇe kamme dasa bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho. Vīsativaggakaraṇe kamme vīsati bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho.
489. චත්‌තාරි කම්‌මානි – අපලොකනකම්‌මං, ඤත්‌තිකම්‌මං, ඤත්‌තිදුතියකම්‌මං, ඤත්‌තිචතුත්‌ථකම්‌මං. ඉමානි චත්‌තාරි කම්‌මානි කතිහාකාරෙහි විපජ්‌ජන්‌ති? ඉමානි චත්‌තාරි කම්‌මානි පඤ්‌චහාකාරෙහි විපජ්‌ජන්‌ති – වත්‌ථුතො වා ඤත්‌තිතො වා අනුස්‌සාවනතො වා සීමතො වා පරිසතො වා.
489. Cattāri kammāni – apalokanakammaṃ, ñattikammaṃ, ñattidutiyakammaṃ, ñatticatutthakammaṃ. Imāni cattāri kammāni katihākārehi vipajjanti? Imāni cattāri kammāni pañcahākārehi vipajjanti – vatthuto vā ñattito vā anussāvanato vā sīmato vā parisato vā.
490. කථං වත්‌ථුතො කම්‌මානි විපජ්‌ජන්‌ති? පණ්‌ඩකං උපසම්‌පාදෙති , වත්‌ථුවිපන්‌නං අධම්‌මකම්‌මං. ථෙය්‍යසංවාසකං උපසම්‌පාදෙති, වත්‌ථුවිපන්‌නං අධම්‌මකම්‌මං. තිත්‌ථියපක්‌කන්‌තකං උපසම්‌පාදෙති, වත්‌ථුවිපන්‌නං අධම්‌මකම්‌මං. තිරච්‌ඡානගතං උපසම්‌පාදෙති, වත්‌ථුවිපන්‌නං අධම්‌මකම්‌මං. මාතුඝාතකං උපසම්‌පාදෙති, වත්‌ථුවිපන්‌නං අධම්‌මකම්‌මං. පිතුඝාතකං උපසම්‌පාදෙති, වත්‌ථුවිපන්‌නං අධම්‌මකම්‌මං. අරහන්‌තඝාතකං උපසම්‌පාදෙති, වත්‌ථුවිපන්‌නං අධම්‌මකම්‌මං. භික්‌ඛුනිදූසකං උපසම්‌පාදෙති, වත්‌ථුවිපන්‌නං අධම්‌මකම්‌මං. සඞ්‌ඝභෙදකං උපසම්‌පාදෙති, වත්‌ථුවිපන්‌නං අධම්‌මකම්‌මං. ලොහිතුප්‌පාදකං උපසම්‌පාදෙති, වත්‌ථුවිපන්‌නං අධම්‌මකම්‌මං. උභතොබ්‍යඤ්‌ජනං උපසම්‌පාදෙති, වත්‌ථුවිපන්‌නං අධම්‌මකම්‌මං. ඌනවීසතිවස්‌සං පුග්‌ගලං උපසම්‌පාදෙති, වත්‌ථුවිපන්‌නං අධම්‌මකම්‌මං. එවං වත්‌ථුතො කම්‌මානි විපජ්‌ජන්‌ති.
490. Kathaṃ vatthuto kammāni vipajjanti? Paṇḍakaṃ upasampādeti , vatthuvipannaṃ adhammakammaṃ. Theyyasaṃvāsakaṃ upasampādeti, vatthuvipannaṃ adhammakammaṃ. Titthiyapakkantakaṃ upasampādeti, vatthuvipannaṃ adhammakammaṃ. Tiracchānagataṃ upasampādeti, vatthuvipannaṃ adhammakammaṃ. Mātughātakaṃ upasampādeti, vatthuvipannaṃ adhammakammaṃ. Pitughātakaṃ upasampādeti, vatthuvipannaṃ adhammakammaṃ. Arahantaghātakaṃ upasampādeti, vatthuvipannaṃ adhammakammaṃ. Bhikkhunidūsakaṃ upasampādeti, vatthuvipannaṃ adhammakammaṃ. Saṅghabhedakaṃ upasampādeti, vatthuvipannaṃ adhammakammaṃ. Lohituppādakaṃ upasampādeti, vatthuvipannaṃ adhammakammaṃ. Ubhatobyañjanaṃ upasampādeti, vatthuvipannaṃ adhammakammaṃ. Ūnavīsativassaṃ puggalaṃ upasampādeti, vatthuvipannaṃ adhammakammaṃ. Evaṃ vatthuto kammāni vipajjanti.
491. කථං ඤත්‌තිතො කම්‌මානි විපජ්‌ජන්‌ති? පඤ්‌චහාකාරෙහි ඤත්‌තිතො කම්‌මානි විපජ්‌ජන්‌ති. වත්‌ථුං න පරාමසති, සඞ්‌ඝං න පරාමසති, පුග්‌ගලං න පරාමසති, ඤත්‌තිං න පරාමසති, පච්‌ඡා වා ඤත්‌තිං ඨපෙති – ඉමෙහි පඤ්‌චහාකාරෙහි ඤත්‌තිතො කම්‌මානි විපජ්‌ජන්‌ති.
491. Kathaṃ ñattito kammāni vipajjanti? Pañcahākārehi ñattito kammāni vipajjanti. Vatthuṃ na parāmasati, saṅghaṃ na parāmasati, puggalaṃ na parāmasati, ñattiṃ na parāmasati, pacchā vā ñattiṃ ṭhapeti – imehi pañcahākārehi ñattito kammāni vipajjanti.
492. කථං අනුස්‌සාවනතො කම්‌මානි විපජ්‌ජන්‌ති? පඤ්‌චහාකාරෙහි අනුස්‌සාවනතො කම්‌මානි විපජ්‌ජන්‌ති – වත්‌ථුං න පරාමසති, සඞ්‌ඝං න පරාමසති, පුග්‌ගලං න පරාමසති, සාවනං හාපෙති, අකාලෙ වා සාවෙති – ඉමෙහි පඤ්‌චහාකාරෙහි අනුස්‌සාවනතො කම්‌මානි විපජ්‌ජන්‌ති.
492. Kathaṃ anussāvanato kammāni vipajjanti? Pañcahākārehi anussāvanato kammāni vipajjanti – vatthuṃ na parāmasati, saṅghaṃ na parāmasati, puggalaṃ na parāmasati, sāvanaṃ hāpeti, akāle vā sāveti – imehi pañcahākārehi anussāvanato kammāni vipajjanti.
493. කථං සීමතො කම්‌මානි විපජ්‌ජන්‌ති? එකාදසහි ආකාරෙහි සීමතො කම්‌මානි විපජ්‌ජන්‌ති. අතිඛුද්‌දකං සීමං සම්‌මන්‌නති, අතිමහතිං සීමං සම්‌මන්‌නති, ඛණ්‌ඩනිමිත්‌තං සීමං සම්‌මන්‌නති, ඡායානිමිත්‌තං සීමං සම්‌මන්‌නති, අනිමිත්‌තං සීමං සම්‌මන්‌නති, බහිසීමෙ ඨිතො සීමං සම්‌මන්‌නති, නදියා සීමං සම්‌මන්‌නති, සමුද්‌දෙ සීමං සම්‌මන්‌නති, ජාතස්‌සරෙ සීමං සම්‌මන්‌නති, සීමාය සීමං සම්‌භින්‌දති, සීමාය සීමං අජ්‌ඣොත්‌ථරති – ඉමෙහි එකාදසහි ආකාරෙහි සීමතො කම්‌මානි විපජ්‌ජන්‌ති.
493. Kathaṃ sīmato kammāni vipajjanti? Ekādasahi ākārehi sīmato kammāni vipajjanti. Atikhuddakaṃ sīmaṃ sammannati, atimahatiṃ sīmaṃ sammannati, khaṇḍanimittaṃ sīmaṃ sammannati, chāyānimittaṃ sīmaṃ sammannati, animittaṃ sīmaṃ sammannati, bahisīme ṭhito sīmaṃ sammannati, nadiyā sīmaṃ sammannati, samudde sīmaṃ sammannati, jātassare sīmaṃ sammannati, sīmāya sīmaṃ sambhindati, sīmāya sīmaṃ ajjhottharati – imehi ekādasahi ākārehi sīmato kammāni vipajjanti.
494. කථං පරිසතො කම්‌මානි විපජ්‌ජන්‌ති? ද්‌වාදසහි ආකාරෙහි පරිසතො කම්‌මානි විපජ්‌ජන්‌ති – චතුවග්‌ගකරණෙ කම්‌මෙ යාවතිකා භික්‌ඛූ කම්‌මපත්‌තා තෙ අනාගතා හොන්‌ති, ඡන්‌දාරහානං ඡන්‌දො අනාහටො හොති, සම්‌මුඛීභූතා පටික්‌කොසන්‌ති, චතුවග්‌ගකරණෙ කම්‌මෙ යාවතිකා භික්‌ඛූ කම්‌මපත්‌තා තෙ ආගතා හොන්‌ති, ඡන්‌දාරහානං ඡන්‌දො අනාහටො හොති, සම්‌මුඛීභූතා පටික්‌කොසන්‌ති. චතුවග්‌ගකරණෙ කම්‌මෙ යාවතිකා භික්‌ඛූ කම්‌මපත්‌තා තෙ ආගතා හොන්‌ති, ඡන්‌දාරහානං ඡන්‌දො ආහටො හොති සම්‌මුඛීභූතා පටික්‌කොසන්‌ති. පඤ්‌චවග්‌ගකරණෙ කම්‌මෙ…පෙ.… දසවග්‌ගකරණෙ කම්‌මෙ…පෙ.… වීසතිවග්‌ගකරණෙ කම්‌මෙ යාවතිකා භික්‌ඛූ කම්‌මපත්‌තා තෙ අනාගතා හොන්‌ති, ඡන්‌දාරහානං ඡන්‌දො අනාහටො හොති, සම්‌මුඛීභූතා පටික්‌කොසන්‌ති. වීසතිවග්‌ගකරණෙ කම්‌මෙ යාවතිකා භික්‌ඛූ කම්‌මපත්‌තා තෙ ආගතා හොන්‌ති, ඡන්‌දාරහානං ඡන්‌දො අනාහටො හොති, සම්‌මුඛීභූතා පටික්‌කොසන්‌ති. වීසතිවග්‌ගකරණෙ කම්‌මෙ යාවතිකා භික්‌ඛූ කම්‌මපත්‌තා තෙ ආගතා හොන්‌ති, ඡන්‌දාරහානං ඡන්‌දො ආහටො හොති, සම්‌මුඛීභූතා පටික්‌කොසන්‌ති – ඉමෙහි ද්‌වාදසහි ආකාරෙහි පරිසතො කම්‌මානි විපජ්‌ජන්‌ති.
494. Kathaṃ parisato kammāni vipajjanti? Dvādasahi ākārehi parisato kammāni vipajjanti – catuvaggakaraṇe kamme yāvatikā bhikkhū kammapattā te anāgatā honti, chandārahānaṃ chando anāhaṭo hoti, sammukhībhūtā paṭikkosanti, catuvaggakaraṇe kamme yāvatikā bhikkhū kammapattā te āgatā honti, chandārahānaṃ chando anāhaṭo hoti, sammukhībhūtā paṭikkosanti. Catuvaggakaraṇe kamme yāvatikā bhikkhū kammapattā te āgatā honti, chandārahānaṃ chando āhaṭo hoti sammukhībhūtā paṭikkosanti. Pañcavaggakaraṇe kamme…pe… dasavaggakaraṇe kamme…pe… vīsativaggakaraṇe kamme yāvatikā bhikkhū kammapattā te anāgatā honti, chandārahānaṃ chando anāhaṭo hoti, sammukhībhūtā paṭikkosanti. Vīsativaggakaraṇe kamme yāvatikā bhikkhū kammapattā te āgatā honti, chandārahānaṃ chando anāhaṭo hoti, sammukhībhūtā paṭikkosanti. Vīsativaggakaraṇe kamme yāvatikā bhikkhū kammapattā te āgatā honti, chandārahānaṃ chando āhaṭo hoti, sammukhībhūtā paṭikkosanti – imehi dvādasahi ākārehi parisato kammāni vipajjanti.
495. අපලොකනකම්‌මං කති ඨානානි ගච්‌ඡති? ඤත්‌තිකම්‌මං කති ඨානානි ගච්‌ඡති? ඤත්‌තිදුතියකම්‌මං කති ඨානානි ගච්‌ඡති? ඤත්‌තිචතුත්‌ථකම්‌මං කති ඨානානි ගච්‌ඡති? අපලොකනකම්‌මං පඤ්‌ච ඨානානි ගච්‌ඡති. ඤත්‌තිකම්‌මං නව ඨානානි ගච්‌ඡති. ඤත්‌තිදුතියකම්‌මං සත්‌ත ඨානානි ගච්‌ඡති. ඤත්‌තිචතුත්‌ථකම්‌මං සත්‌ත ඨානානි ගච්‌ඡති.
495. Apalokanakammaṃ kati ṭhānāni gacchati? Ñattikammaṃ kati ṭhānāni gacchati? Ñattidutiyakammaṃ kati ṭhānāni gacchati? Ñatticatutthakammaṃ kati ṭhānāni gacchati? Apalokanakammaṃ pañca ṭhānāni gacchati. Ñattikammaṃ nava ṭhānāni gacchati. Ñattidutiyakammaṃ satta ṭhānāni gacchati. Ñatticatutthakammaṃ satta ṭhānāni gacchati.
496. අපලොකනකම්‌මං කතමානි පඤ්‌ච ඨානානි ගච්‌ඡති? ඔසාරණං, නිස්‌සාරණං, භණ්‌ඩුකම්‌මං, බ්‍රහ්‌මදණ්‌ඩං, කම්‌මලක්‌ඛණඤ්‌ඤෙව පඤ්‌චමං – අපලොකනකම්‌මං ඉමානි පඤ්‌ච ඨානානි ගච්‌ඡති . ඤත්‌තිකම්‌මං කතමානි නව ඨානානි ගච්‌ඡති? ඔසාරණං, නිස්‌සාරණං, උපොසථං, පවාරණං, සම්‌මුතිං, දානං, පටිග්‌ගහං, පච්‌චුක්‌කඩ්‌ඪනං, කම්‌මලක්‌ඛණඤ්‌ඤෙව නවමං – ඤත්‌තිකම්‌මං ඉමානි නව ඨානානි ගච්‌ඡති. ඤත්‌තිදුතියකම්‌මං කතමානි සත්‌ත ඨානානි ගච්‌ඡති? ඔසාරණං, නිස්‌සාරණං, සම්‌මුතිං, දානං, උද්‌ධරණං, දෙසනං, කම්‌මලක්‌ඛණඤ්‌ඤෙව සත්‌තමං – ඤත්‌තිදුතියකම්‌මං ඉමානි සත්‌ත ඨානානි ගච්‌ඡති. ඤත්‌තිචතුත්‌ථකම්‌මං කතමානි සත්‌ත ඨානානි ගච්‌ඡති? ඔසාරණං, නිස්‌සාරණං, සම්‌මුතිං, දානං, නිග්‌ගහං, සමනුභාසනං, කම්‌මලක්‌ඛණඤ්‌ඤෙව සත්‌තමං – ඤත්‌තිචතුත්‌ථකම්‌මං ඉමානි සත්‌ත ඨානානි ගච්‌ඡති.
496. Apalokanakammaṃ katamāni pañca ṭhānāni gacchati? Osāraṇaṃ, nissāraṇaṃ, bhaṇḍukammaṃ, brahmadaṇḍaṃ, kammalakkhaṇaññeva pañcamaṃ – apalokanakammaṃ imāni pañca ṭhānāni gacchati . Ñattikammaṃ katamāni nava ṭhānāni gacchati? Osāraṇaṃ, nissāraṇaṃ, uposathaṃ, pavāraṇaṃ, sammutiṃ, dānaṃ, paṭiggahaṃ, paccukkaḍḍhanaṃ, kammalakkhaṇaññeva navamaṃ – ñattikammaṃ imāni nava ṭhānāni gacchati. Ñattidutiyakammaṃ katamāni satta ṭhānāni gacchati? Osāraṇaṃ, nissāraṇaṃ, sammutiṃ, dānaṃ, uddharaṇaṃ, desanaṃ, kammalakkhaṇaññeva sattamaṃ – ñattidutiyakammaṃ imāni satta ṭhānāni gacchati. Ñatticatutthakammaṃ katamāni satta ṭhānāni gacchati? Osāraṇaṃ, nissāraṇaṃ, sammutiṃ, dānaṃ, niggahaṃ, samanubhāsanaṃ, kammalakkhaṇaññeva sattamaṃ – ñatticatutthakammaṃ imāni satta ṭhānāni gacchati.
497. චතුවග්‌ගකරණෙ කම්‌මෙ චත්‌තාරො භික්‌ඛූ පකතත්‌තා කම්‌මපත්‌තා, අවසෙසා පකතත්‌තා ඡන්‌දාරහා. යස්‌ස සඞ්‌ඝො කම්‌මං කරොති සො නෙව කම්‌මපත්‌තො නාපි ඡන්‌දාරහො, අපි ච කම්‌මාරහො. පඤ්‌චවග්‌ගකරණෙ කම්‌මෙ පඤ්‌ච භික්‌ඛූ පකතත්‌තා කම්‌මපත්‌තා, අවසෙසා පකතත්‌තා ඡන්‌දාරහා. යස්‌ස සඞ්‌ඝො කම්‌මං කරොති සො නෙව කම්‌මපත්‌තො නාපි ඡන්‌දාරහො, අපි ච කම්‌මාරහො. දසවග්‌ගකරණෙ කම්‌මෙ දස භික්‌ඛූ පකතත්‌තා කම්‌මපත්‌තා, අවසෙසා පකතත්‌තා ඡන්‌දාරහා. යස්‌ස සඞ්‌ඝො කම්‌මං කරොති සො නෙව කම්‌මපත්‌තො නාපි ඡන්‌දාරහො, අපි ච කම්‌මාරහො. වීසතිවග්‌ගකරණෙ කම්‌මෙ වීසති භික්‌ඛූ පකතත්‌තා කම්‌මපත්‌තා, අවසෙසා පකතත්‌තා ඡන්‌දාරහා. යස්‌ස සඞ්‌ඝො කම්‌මං කරොති සො නෙව කම්‌මපත්‌තො නාපි ඡන්‌දාරහො, අපි ච කම්‌මාරහො.
497. Catuvaggakaraṇe kamme cattāro bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho. Pañcavaggakaraṇe kamme pañca bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho. Dasavaggakaraṇe kamme dasa bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho. Vīsativaggakaraṇe kamme vīsati bhikkhū pakatattā kammapattā, avasesā pakatattā chandārahā. Yassa saṅgho kammaṃ karoti so neva kammapatto nāpi chandāraho, api ca kammāraho.
කම්‌මවග්‌ගො නිට්‌ඨිතො පඨමො.
Kammavaggo niṭṭhito paṭhamo.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā
කම්‌මවග්‌ගවණ්‌ණනා • Kammavaggavaṇṇanā
අපලොකනකම්‌මකථා • Apalokanakammakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā
කම්‌මවග්‌ගවණ්‌ණනා • Kammavaggavaṇṇanā
අපලොකනකම්‌මකථාවණ්‌ණනා • Apalokanakammakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā
කම්‌මවග්‌ගවණ්‌ණනා • Kammavaggavaṇṇanā
අපලොකනකම්‌මකථාවණ්‌ණනා • Apalokanakammakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā
කම්‌මවග්‌ගවණ්‌ණනා • Kammavaggavaṇṇanā
අපලොකනකම්‌මකථාවණ්‌ණනා • Apalokanakammakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi
කම්‌මවග්‌ගවණ්‌ණනා • Kammavaggavaṇṇanā
අපලොකනකම්‌මකථා • Apalokanakammakathā
