| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
கம்மவிபத்திகதா²வண்ணனா
Kammavipattikathāvaṇṇanā
3014. கம்மானங் விபத்தியா த³ஸ்ஸிதாய ஸம்பத்திபி ப்³யதிரேகதோ விஞ்ஞாயதீதி கம்மவிபத்திங் தாவ த³ஸ்ஸேதுமாஹ ‘‘வத்து²தோ’’திஆதி³. வஸதி எத்த² கம்மஸங்கா²தங் ப²லங் ததா³யத்தவுத்திதாயாதி வத்து², கம்மஸ்ஸ பதா⁴னகாரணங், ததோ வத்து²தோ ச. அனுஸ்ஸாவனஸீமதோதி அனுஸ்ஸாவனதோ, ஸீமதோ ச. பஞ்சேவாதி ஏவகாரேன கம்மதோ³ஸானங் ஏதங்பரமதங் த³ஸ்ஸேதி.
3014. Kammānaṃ vipattiyā dassitāya sampattipi byatirekato viññāyatīti kammavipattiṃ tāva dassetumāha ‘‘vatthuto’’tiādi. Vasati ettha kammasaṅkhātaṃ phalaṃ tadāyattavuttitāyāti vatthu, kammassa padhānakāraṇaṃ, tato vatthuto ca. Anussāvanasīmatoti anussāvanato, sīmato ca. Pañcevāti evakārena kammadosānaṃ etaṃparamataṃ dasseti.
3015. யதா²னிக்கி²த்தகம்மதோ³ஸமாதிகானுக்கமே கம்மவிபத்திங் விப⁴ஜித்வா த³ஸ்ஸேதுமாஹ ‘‘ஸம்முகா²’’திஆதி³. ஸங்க⁴த⁴ம்மவினயபுக்³க³லஸம்முகா²ஸங்கா²தங் சதுப்³பி³த⁴ங் ஸம்முகா²வினயங் உபனெத்வா காதப்³ப³ங் கம்மங் ஸம்முகா²கரணீயங் நாம.
3015. Yathānikkhittakammadosamātikānukkame kammavipattiṃ vibhajitvā dassetumāha ‘‘sammukhā’’tiādi. Saṅghadhammavinayapuggalasammukhāsaṅkhātaṃ catubbidhaṃ sammukhāvinayaṃ upanetvā kātabbaṃ kammaṃ sammukhākaraṇīyaṃ nāma.
தத்த² யாவதிகா பி⁴க்கூ² கம்மபத்தா, தே ஆக³தா ஹொந்தி, ச²ந்தா³ரஹானங் ச²ந்தோ³ ஆஹடோ ஹோதி, ஸம்முகீ²பூ⁴தா ந படிக்கோஸந்தி, அயங் ஸங்க⁴ஸம்முக²தா. யேன த⁴ம்மேன யேன வினயேன யேன ஸத்து²ஸாஸனேன ஸங்கோ⁴ தங் கம்மங் கரோதி, அயங் த⁴ம்மஸம்முக²தா, வினயஸம்முக²தா. தத்த² த⁴ம்மோதி பூ⁴தங் வத்து². வினயோதி சோத³னா சேவ ஸாரணா ச. ஸத்து²ஸாஸனங் நாம ஞத்திஸம்பதா³ சேவ அனுஸ்ஸாவனஸம்பதா³ ச. யஸ்ஸ ஸங்கோ⁴ தங் கம்மங் கரோதி, தஸ்ஸ ஸம்முக²பா⁴வோ புக்³க³லஸம்முக²தா. ஏவங் சதுப்³பி³தே⁴ன ஸம்முகா²வினயேன யங் ஸங்க⁴கம்மங் ‘‘கரணீய’’ந்தி வுத்தங், தங் அஸம்முகா² கரோதி சதுப்³பி³த⁴லக்க²ணதோ ஏகம்பி பரிஹாபெத்வா கரோதி, தங் கம்மங் வத்து²விபன்னங் ஸம்முகா²வினயஸங்கா²தேன வத்து²னா வேகல்லங் ‘‘அத⁴ம்மகம்ம’’ந்தி பவுச்சதீதி யோஜனா.
Tattha yāvatikā bhikkhū kammapattā, te āgatā honti, chandārahānaṃ chando āhaṭo hoti, sammukhībhūtā na paṭikkosanti, ayaṃ saṅghasammukhatā. Yena dhammena yena vinayena yena satthusāsanena saṅgho taṃ kammaṃ karoti, ayaṃ dhammasammukhatā, vinayasammukhatā. Tattha dhammoti bhūtaṃ vatthu. Vinayoti codanā ceva sāraṇā ca. Satthusāsanaṃ nāma ñattisampadā ceva anussāvanasampadā ca. Yassa saṅgho taṃ kammaṃ karoti, tassa sammukhabhāvo puggalasammukhatā. Evaṃ catubbidhena sammukhāvinayena yaṃ saṅghakammaṃ ‘‘karaṇīya’’nti vuttaṃ, taṃ asammukhā karoti catubbidhalakkhaṇato ekampi parihāpetvā karoti, taṃ kammaṃ vatthuvipannaṃ sammukhāvinayasaṅkhātena vatthunā vekallaṃ ‘‘adhammakamma’’nti pavuccatīti yojanā.
3016-8. ஏவங் ஸம்முகா²கரணீயே வத்து²தோ கம்மவிபத்திங் த³ஸ்ஸெத்வா அஸம்முகா²கரணீயங் விப⁴ஜித்வா த³ஸ்ஸேதுமாஹ ‘‘அஸம்முகா²’’திஆதி³.
3016-8. Evaṃ sammukhākaraṇīye vatthuto kammavipattiṃ dassetvā asammukhākaraṇīyaṃ vibhajitvā dassetumāha ‘‘asammukhā’’tiādi.
தே³வத³த்தஸ்ஸ கதங் பகாஸனீயகம்மஞ்ச. ஸெக்க²ஸம்முதி உம்மத்தகஸம்முதீதி யோஜனா. அவந்தி³யகம்மங் புக்³க³லஸீஸேன ‘‘அவந்தி³யோ’’தி வுத்தங். அட்³ட⁴காஸியா க³ணிகாய அனுஞ்ஞாதா தூ³தேன உபஸம்பதா³ தூ³தூபஸம்பதா³. இதி இமானி அட்ட² கம்மானி ட²பெத்வான ஸேஸானி பன ஸப்³ப³ஸோ ஸப்³பா³னி கம்மானி ‘‘ஸம்முகா²கரணீயானீ’’தி ஸோப⁴னக³மனாதீ³ஹி ஸுக³தோ ஸத்தா² அப்³ர்வி கதே²ஸீதி யோஜனா.
Devadattassa kataṃ pakāsanīyakammañca. Sekkhasammuti ummattakasammutīti yojanā. Avandiyakammaṃ puggalasīsena ‘‘avandiyo’’ti vuttaṃ. Aḍḍhakāsiyā gaṇikāya anuññātā dūtena upasampadā dūtūpasampadā. Iti imāni aṭṭha kammāni ṭhapetvāna sesāni pana sabbaso sabbāni kammāni ‘‘sammukhākaraṇīyānī’’ti sobhanagamanādīhi sugato satthā abrvi kathesīti yojanā.
3019-20. ஏவங் வத்து²தோ கம்மவிபத்திங் த³ஸ்ஸெத்வா ஞத்திதோ த³ஸ்ஸேதுமாஹ ‘‘ஞத்திதோ’’திஆதி³. விபஜ்ஜனநயாதி வினயவிபஜ்ஜனக்கமா. வத்து²ங் ந பராமஸதீதி யஸ்ஸ உபஸம்பதா³தி³கம்மங் கரோதி, தங் ந பராமஸதி தஸ்ஸ நாமங் ந க³ண்ஹாதி. ‘‘ஸுணாது மே, ப⁴ந்தே ஸங்கோ⁴, அயங் த⁴ம்மரக்கி²தோ ஆயஸ்மதோ பு³த்³த⁴ரக்கி²தஸ்ஸ உபஸம்பதா³பெக்கோ²’’தி வத்தப்³பே³ ‘‘ஸுணாது மே, ப⁴ந்தே ஸங்கோ⁴, ஆயஸ்மதோ பு³த்³த⁴ரக்கி²தஸ்ஸ உபஸம்பதா³பெக்கோ²’’தி வத³தி. ஏவங் வத்து²ங் ந பராமஸதி.
3019-20. Evaṃ vatthuto kammavipattiṃ dassetvā ñattito dassetumāha ‘‘ñattito’’tiādi. Vipajjananayāti vinayavipajjanakkamā. Vatthuṃ na parāmasatīti yassa upasampadādikammaṃ karoti, taṃ na parāmasati tassa nāmaṃ na gaṇhāti. ‘‘Suṇātu me, bhante saṅgho, ayaṃ dhammarakkhito āyasmato buddharakkhitassa upasampadāpekkho’’ti vattabbe ‘‘suṇātu me, bhante saṅgho, āyasmato buddharakkhitassa upasampadāpekkho’’ti vadati. Evaṃ vatthuṃ na parāmasati.
ஸங்க⁴ங் ந பராமஸதீதி ஸங்க⁴ஸ்ஸ நாமங் ந பராமஸதி தஸ்ஸ நாமங் ந க³ண்ஹாதி. ‘‘ஸுணாது மே, ப⁴ந்தே ஸங்கோ⁴, அயங் த⁴ம்மரக்கி²தோ’’தி வத்தப்³பே³ ‘‘ஸுணாது மே, ப⁴ந்தே, அயங் த⁴ம்மரக்கி²தோ’’தி வத³தி. ஏவங் ஸங்க⁴ங் ந பராமஸதி.
Saṅghaṃ na parāmasatīti saṅghassa nāmaṃ na parāmasati tassa nāmaṃ na gaṇhāti. ‘‘Suṇātu me, bhante saṅgho, ayaṃ dhammarakkhito’’ti vattabbe ‘‘suṇātu me, bhante, ayaṃ dhammarakkhito’’ti vadati. Evaṃ saṅghaṃ na parāmasati.
புக்³க³லங் ந பராமஸதீதி யோ உபஸம்பதா³பெக்க²ஸ்ஸ உபஜ்ஜா²யோ, தங் ந பராமஸதி தஸ்ஸ நாமங் ந க³ண்ஹாதி. ‘‘ஸுணாது மே, ப⁴ந்தே ஸங்கோ⁴, அயங் த⁴ம்மரக்கி²தோ ஆயஸ்மதோ பு³த்³த⁴ரக்கி²தஸ்ஸ உபஸம்பதா³பெக்கோ²’’தி வத்தப்³பே³ ‘‘ஸுணாது மே, ப⁴ந்தே ஸங்கோ⁴, அயங் த⁴ம்மரக்கி²தோ உபஸம்பதா³பெக்கோ²’’தி வத³தி. ஏவங் புக்³க³லங் ந பராமஸதி.
Puggalaṃna parāmasatīti yo upasampadāpekkhassa upajjhāyo, taṃ na parāmasati tassa nāmaṃ na gaṇhāti. ‘‘Suṇātu me, bhante saṅgho, ayaṃ dhammarakkhito āyasmato buddharakkhitassa upasampadāpekkho’’ti vattabbe ‘‘suṇātu me, bhante saṅgho, ayaṃ dhammarakkhito upasampadāpekkho’’ti vadati. Evaṃ puggalaṃ na parāmasati.
ஞத்திங் ந பராமஸதீதி ஸப்³பே³ன ஸப்³ப³ங் ஞத்திங் ந பராமஸதி, ஞத்திது³தியகம்மே ஞத்திங் அட்ட²பெத்வா த்³விக்க²த்துங் கம்மவாசாய ஏவ அனுஸ்ஸாவனகம்மங் கரோதி, ஞத்திசதுத்த²கம்மேபி ஞத்திங் அட்ட²பெத்வா சதுக்க²த்துங் கம்மவாசாய ஏவ அனுஸ்ஸாவனகம்மங் கரோதி. ஏவங் ஞத்திங் ந பராமஸதி.
Ñattiṃ na parāmasatīti sabbena sabbaṃ ñattiṃ na parāmasati, ñattidutiyakamme ñattiṃ aṭṭhapetvā dvikkhattuṃ kammavācāya eva anussāvanakammaṃ karoti, ñatticatutthakammepi ñattiṃ aṭṭhapetvā catukkhattuṃ kammavācāya eva anussāvanakammaṃ karoti. Evaṃ ñattiṃ na parāmasati.
பச்சா² வா ஞத்திங் ட²பேதீதி பட²மங் கம்மவாசாய அனுஸ்ஸாவனகம்மங் கத்வா ‘‘ஏஸா ஞத்தீ’’தி வத்வா ‘‘க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி வத³தி. ஏவங் பச்சா² ஞத்திங் ட²பேதி. பஞ்சஹேதேஹீதி ஏதேஹி பஞ்சஹி காரணேஹி.
Pacchā vā ñattiṃ ṭhapetīti paṭhamaṃ kammavācāya anussāvanakammaṃ katvā ‘‘esā ñattī’’ti vatvā ‘‘khamati saṅghassa, tasmā tuṇhī, evametaṃ dhārayāmī’’ti vadati. Evaṃ pacchā ñattiṃ ṭhapeti. Pañcahetehīti etehi pañcahi kāraṇehi.
3021-2. ஏவங் ஞத்திதோ கம்மவிபத்திங் த³ஸ்ஸெத்வா இதா³னி அனுஸ்ஸாவனதோ த³ஸ்ஸேதுமாஹ ‘‘அனுஸ்ஸாவனதோ’’திஆதி³. அனுஸ்ஸாவனதோ கம்மதோ³ஸா பஞ்ச பகாஸிதாதி யோஜனா. ‘‘ந பராமஸதி வத்து²ங் வா’’திஆதீ³ஸு வத்து²ஆதீ³னி வுத்தனயேனேவ வேதி³தப்³பா³னி. ஏவங் பன நேஸங் அபராமஸனங் ஹோதி (பரி॰ அட்ட²॰ 485) – ‘‘ஸுணாது மே, ப⁴ந்தே ஸங்கோ⁴’’தி பட²மானுஸ்ஸாவனே வா ‘‘து³தியம்பி ஏதமத்த²ங் வதா³மி… ததியம்பி ஏதமத்த²ங் வதா³மி, ‘‘ஸுணாது மே ப⁴ந்தே ஸங்கோ⁴’’தி து³தியததியானுஸ்ஸாவனேஸு வா ‘‘அயங் த⁴ம்மரக்கி²தோ ஆயஸ்மதோ பு³த்³த⁴ரக்கி²தஸ்ஸ உபஸம்பதா³பெக்கோ²’’தி வத்தப்³பே³ ‘‘ஸுணாது மே, ப⁴ந்தே ஸங்கோ⁴, ஆயஸ்மதோ பு³த்³த⁴ரக்கி²தஸ்ஸா’’தி வத³ந்தோ வத்து²ங் ந பராமஸதி நாம.
3021-2. Evaṃ ñattito kammavipattiṃ dassetvā idāni anussāvanato dassetumāha ‘‘anussāvanato’’tiādi. Anussāvanato kammadosā pañca pakāsitāti yojanā. ‘‘Na parāmasati vatthuṃ vā’’tiādīsu vatthuādīni vuttanayeneva veditabbāni. Evaṃ pana nesaṃ aparāmasanaṃ hoti (pari. aṭṭha. 485) – ‘‘suṇātu me, bhante saṅgho’’ti paṭhamānussāvane vā ‘‘dutiyampi etamatthaṃ vadāmi… tatiyampi etamatthaṃ vadāmi, ‘‘suṇātu me bhante saṅgho’’ti dutiyatatiyānussāvanesu vā ‘‘ayaṃ dhammarakkhito āyasmato buddharakkhitassa upasampadāpekkho’’ti vattabbe ‘‘suṇātu me, bhante saṅgho, āyasmato buddharakkhitassā’’ti vadanto vatthuṃ na parāmasati nāma.
‘‘ஸுணாது மே, ப⁴ந்தே ஸங்கோ⁴, அயங் த⁴ம்மரக்கி²தோ’’தி வத்தப்³பே³ ‘‘ஸுணாது மே, ப⁴ந்தே, அயங் த⁴ம்மரக்கி²தோ’’தி வத³ந்தோ ஸங்க⁴ங் ந பராமஸதி நாம.
‘‘Suṇātu me, bhante saṅgho, ayaṃ dhammarakkhito’’ti vattabbe ‘‘suṇātu me, bhante, ayaṃ dhammarakkhito’’ti vadanto saṅghaṃ na parāmasati nāma.
‘‘ஸுணாது மே, ப⁴ந்தே ஸங்கோ⁴, அயங் த⁴ம்மரக்கி²தோ ஆயஸ்மதோ பு³த்³த⁴ரக்கி²தஸ்ஸா’’தி வத்தப்³பே³ ‘‘ஸுணாது மே, ப⁴ந்தே ஸங்கோ⁴, அயங் த⁴ம்மரக்கி²தோ உபஸம்பதா³பெக்கோ²’’தி வத³ந்தோ புக்³க³லங் ந பராமஸதி நாம.
‘‘Suṇātu me, bhante saṅgho, ayaṃ dhammarakkhito āyasmato buddharakkhitassā’’ti vattabbe ‘‘suṇātu me, bhante saṅgho, ayaṃ dhammarakkhito upasampadāpekkho’’ti vadanto puggalaṃ na parāmasati nāma.
ஸாவனங் ஹாபேதீதி ஸப்³பே³ன ஸப்³ப³ங் கம்மவாசாய அனுஸ்ஸாவனங் ந கரோதி, ஞத்திது³தியகம்மே த்³விக்க²த்துங் ஞத்திமேவ ட²பேதி, ஞத்திசதுத்த²கம்மே சதுக்க²த்துங் ஞத்திமேவ ட²பேதி. ஏவங் அனுஸ்ஸாவனங் ஹாபேதி. யோபி ஞத்திது³தியகம்மே ஏகங் ஞத்திங் ட²பெத்வா ஏகங் கம்மவாசங் அனுஸ்ஸாவெந்தோ அக்க²ரங் வா ச²ட்³டே³தி, பத³ங் வா து³ருத்தங் கரோதி, அயம்பி அனுஸ்ஸாவனங் ஹாபேதியேவ. ஞத்திசதுத்த²கம்மே பன ஏகங் ஞத்திங் ட²பெத்வா ஸகிமேவ வா த்³விக்க²த்துங் வா கம்மவாசாய அனுஸ்ஸாவனங் கரொந்தோபி அக்க²ரங் வா பத³ங் வா ச²ட்³டெ³ந்தோபி து³ருத்தங் கரொந்தோபி அனுஸ்ஸாவனங் ஹாபேதியேவாதி வேதி³தப்³போ³.
Sāvanaṃ hāpetīti sabbena sabbaṃ kammavācāya anussāvanaṃ na karoti, ñattidutiyakamme dvikkhattuṃ ñattimeva ṭhapeti, ñatticatutthakamme catukkhattuṃ ñattimeva ṭhapeti. Evaṃ anussāvanaṃ hāpeti. Yopi ñattidutiyakamme ekaṃ ñattiṃ ṭhapetvā ekaṃ kammavācaṃ anussāvento akkharaṃ vā chaḍḍeti, padaṃ vā duruttaṃ karoti, ayampi anussāvanaṃ hāpetiyeva. Ñatticatutthakamme pana ekaṃ ñattiṃ ṭhapetvā sakimeva vā dvikkhattuṃ vā kammavācāya anussāvanaṃ karontopi akkharaṃ vā padaṃ vā chaḍḍentopi duruttaṃ karontopi anussāvanaṃ hāpetiyevāti veditabbo.
து³ருத்தங் கரோதீதி எத்த² பன அயங் வினிச்ச²யோ (பரி॰ அட்ட²॰ 485) – யோ ஹி அஞ்ஞஸ்மிங் அக்க²ரே வத்தப்³பே³ அஞ்ஞங் வத³தி, அயங் து³ருத்தங் கரோதி நாம. தஸ்மா கம்மவாசங் கரொந்தேன பி⁴க்கு²னா ய்வாயங் –
Duruttaṃ karotīti ettha pana ayaṃ vinicchayo (pari. aṭṭha. 485) – yo hi aññasmiṃ akkhare vattabbe aññaṃ vadati, ayaṃ duruttaṃ karoti nāma. Tasmā kammavācaṃ karontena bhikkhunā yvāyaṃ –
‘‘ஸிதி²லங் த⁴னிதஞ்ச தீ³க⁴ரஸ்ஸங்;
‘‘Sithilaṃ dhanitañca dīgharassaṃ;
க³ருகங் லஹுகஞ்ச நிக்³க³ஹிதங்;
Garukaṃ lahukañca niggahitaṃ;
ஸம்ப³ந்த⁴ங் வவத்தி²தங் விமுத்தங்;
Sambandhaṃ vavatthitaṃ vimuttaṃ;
த³ஸதா⁴ ப்³யஞ்ஜனபு³த்³தி⁴யா பபே⁴தோ³’’தி. (பரி॰ அட்ட²॰ 485) –
Dasadhā byañjanabuddhiyā pabhedo’’ti. (pari. aṭṭha. 485) –
வுத்தோ , அயங் ஸுட்டு² உபலக்கே²தப்³போ³.
Vutto , ayaṃ suṭṭhu upalakkhetabbo.
எத்த² ஹி ஸிதி²லங் நாம பஞ்சஸு வக்³கே³ஸு பட²மததியங். த⁴னிதங் நாம தெஸ்வேவ து³தியசதுத்த²ங். தீ³க⁴ந்தி தீ³கே⁴ன காலேன வத்தப்³ப³ங் ஆகாராதி³ . ரஸ்ஸந்தி ததோ உபட்³ட⁴காலேன வத்தப்³ப³ங் அகாராதி³. க³ருகந்தி தீ³க⁴மேவ, யங் வா ‘‘ஆயஸ்மதோ பு³த்³த⁴ரக்கி²தத்தே²ரஸ்ஸ, யஸ்ஸ நக்க²மதீ’’தி ஏவங் ஸங்யோக³பரங் கத்வா வுச்சதி. லஹுகந்தி ரஸ்ஸமேவ, யங் வா ‘‘ஆயஸ்மதோ பு³த்³த⁴ரக்கி²ததே²ரஸ்ஸ, யஸ்ஸ ந க²மதீ’’தி ஏவங் அஸங்யோக³பரங் கத்வா வுச்சதி. நிக்³க³ஹிதந்தி யங் கரணானி நிக்³க³ஹெத்வா அவிஸ்ஸஜ்ஜெத்வா அவிவடேன முகே²ன அனுனாஸிகங் கத்வா வத்தப்³ப³ங். ஸம்ப³ந்த⁴ந்தி யங் பரபதே³ன ஸம்ப³ந்தி⁴த்வா ‘‘துண்ஹஸ்ஸா’’தி வா ‘‘துண்ஹிஸ்ஸா’’தி வா வுச்சதி. வவத்தி²தந்தி யங் பரபதே³ன அஸம்ப³ந்த⁴ங் கத்வா விச்சி²ந்தி³த்வா ‘‘துண்ஹீ அஸ்ஸா’’தி வா ‘‘துண்ஹ அஸ்ஸா’’தி வா வுச்சதி. விமுத்தந்தி யங் கரணானி அனிக்³க³ஹெத்வா விஸ்ஸஜ்ஜெத்வா விவடேன முகே²ன அனுனாஸிகங் அகத்வா வுச்சதி.
Ettha hi sithilaṃ nāma pañcasu vaggesu paṭhamatatiyaṃ. Dhanitaṃ nāma tesveva dutiyacatutthaṃ. Dīghanti dīghena kālena vattabbaṃ ākārādi . Rassanti tato upaḍḍhakālena vattabbaṃ akārādi. Garukanti dīghameva, yaṃ vā ‘‘āyasmato buddharakkhitattherassa, yassa nakkhamatī’’ti evaṃ saṃyogaparaṃ katvā vuccati. Lahukanti rassameva, yaṃ vā ‘‘āyasmato buddharakkhitatherassa, yassa na khamatī’’ti evaṃ asaṃyogaparaṃ katvā vuccati. Niggahitanti yaṃ karaṇāni niggahetvā avissajjetvā avivaṭena mukhena anunāsikaṃ katvā vattabbaṃ. Sambandhanti yaṃ parapadena sambandhitvā ‘‘tuṇhassā’’ti vā ‘‘tuṇhissā’’ti vā vuccati. Vavatthitanti yaṃ parapadena asambandhaṃ katvā vicchinditvā ‘‘tuṇhī assā’’ti vā ‘‘tuṇha assā’’ti vā vuccati. Vimuttanti yaṃ karaṇāni aniggahetvā vissajjetvā vivaṭena mukhena anunāsikaṃ akatvā vuccati.
தத்த² ‘‘ஸுணாது மே’’தி வத்தப்³பே³ த-காரஸ்ஸ த²-காரங் கத்வா ‘‘ஸுணாது² மே’’தி வசனங் ஸிதி²லஸ்ஸ த⁴னிதகரணங் நாம, ததா² ‘‘பத்தகல்லங், ஏஸா ஞத்தீ’’தி வத்தப்³பே³ ‘‘பத்த²கல்லங், ஏஸா ஞத்தீ²’’திஆதி³வசனஞ்ச. ‘‘ப⁴ந்தே ஸங்கோ⁴’’தி வத்தப்³பே³ ப⁴காரக⁴காரானங் ப³காரக³காரே கத்வா ‘‘ப³ந்தே ஸங்கோ³’’தி வசனங் த⁴னிதஸ்ஸ ஸிதி²லகரணங் நாம. ‘‘ஸுணாது மே’’தி விவடேன முகே²ன வத்தப்³பே³ பன ‘‘ஸுணங்து மே’’தி வா ‘‘ஏஸா ஞத்தீ’’தி வத்தப்³பே³ ‘‘ஏஸங் ஞத்தீ’’தி வா அவிவடேன முகே²ன அனுனாஸிகங் கத்வா வசனங் விமுத்தஸ்ஸ நிக்³க³ஹிதவசனங் நாம. ‘‘பத்தகல்ல’’ந்தி அவிவடேன முகே²ன அனுனாஸிகங் கத்வா வத்தப்³பே³ ‘‘பத்தகல்லா’’தி விவடேன முகே²ன அனுனாஸிகங் அகத்வா வசனங் நிக்³க³ஹிதஸ்ஸ விமுத்தவசனங் நாம. இதி ஸிதி²லே கத்தப்³பே³ த⁴னிதங், த⁴னிதே கத்தப்³பே³ ஸிதி²லங், விமுத்தே கத்தப்³பே³ நிக்³க³ஹிதங், நிக்³க³ஹிதே கத்தப்³பே³ விமுத்தந்தி இமானி சத்தாரி ப்³யஞ்ஜனானி அந்தோகம்மவாசாய கம்மங் தூ³ஸெந்தி. ஏவங் வத³ந்தோ ஹி அஞ்ஞஸ்மிங் அக்க²ரே வத்தப்³பே³ அஞ்ஞங் வத³தி, து³ருத்தங் கரோதீதி வுச்சதி.
Tattha ‘‘suṇātu me’’ti vattabbe ta-kārassa tha-kāraṃ katvā ‘‘suṇāthu me’’ti vacanaṃ sithilassa dhanitakaraṇaṃ nāma, tathā ‘‘pattakallaṃ, esā ñattī’’ti vattabbe ‘‘patthakallaṃ, esā ñatthī’’tiādivacanañca. ‘‘Bhante saṅgho’’ti vattabbe bhakāraghakārānaṃ bakāragakāre katvā ‘‘bante saṃgo’’ti vacanaṃ dhanitassa sithilakaraṇaṃ nāma. ‘‘Suṇātu me’’ti vivaṭena mukhena vattabbe pana ‘‘suṇaṃtu me’’ti vā ‘‘esā ñattī’’ti vattabbe ‘‘esaṃ ñattī’’ti vā avivaṭena mukhena anunāsikaṃ katvā vacanaṃ vimuttassa niggahitavacanaṃ nāma. ‘‘Pattakalla’’nti avivaṭena mukhena anunāsikaṃ katvā vattabbe ‘‘pattakallā’’ti vivaṭena mukhena anunāsikaṃ akatvā vacanaṃ niggahitassa vimuttavacanaṃ nāma. Iti sithile kattabbe dhanitaṃ, dhanite kattabbe sithilaṃ, vimutte kattabbe niggahitaṃ, niggahite kattabbe vimuttanti imāni cattāri byañjanāni antokammavācāya kammaṃ dūsenti. Evaṃ vadanto hi aññasmiṃ akkhare vattabbe aññaṃ vadati, duruttaṃ karotīti vuccati.
இதரேஸு பன தீ³க⁴ரஸ்ஸாதீ³ஸு ச²ஸு ப்³யஞ்ஜனேஸு தீ³க⁴ட்டா²னே தீ³க⁴மேவ, ரஸ்ஸட்டா²னே ச ரஸ்ஸமேவாதி ஏவங் யதா²டா²னே தங் ததே³வ அக்க²ரங் பா⁴ஸந்தேன அனுக்கமாக³தங் பவேணிங் அவினாஸெந்தேன கம்மவாசா காதப்³பா³. ஸசே பன ஏவங் அகத்வா தீ³கே⁴ வத்தப்³பே³ ரஸ்ஸங், ரஸ்ஸே வா வத்தப்³பே³ தீ³க⁴ங் வத³தி , ததா² க³ருகே வத்தப்³பே³ லஹுகங், லஹுகே வா வத்தப்³பே³ க³ருகங் வத³தி, ஸம்ப³ந்தே⁴ வா பன வத்தப்³பே³ வவத்தி²தங், வவத்தி²தே வா வத்தப்³பே³ ஸம்ப³ந்த⁴ங் வத³தி, ஏவங் வுத்தேபி கம்மவாசா ந குப்பதி. இமானி ஹி ச² ப்³யஞ்ஜனானி கம்மங் ந கோபெந்தி.
Itaresu pana dīgharassādīsu chasu byañjanesu dīghaṭṭhāne dīghameva, rassaṭṭhāne ca rassamevāti evaṃ yathāṭhāne taṃ tadeva akkharaṃ bhāsantena anukkamāgataṃ paveṇiṃ avināsentena kammavācā kātabbā. Sace pana evaṃ akatvā dīghe vattabbe rassaṃ, rasse vā vattabbe dīghaṃ vadati , tathā garuke vattabbe lahukaṃ, lahuke vā vattabbe garukaṃ vadati, sambandhe vā pana vattabbe vavatthitaṃ, vavatthite vā vattabbe sambandhaṃ vadati, evaṃ vuttepi kammavācā na kuppati. Imāni hi cha byañjanāni kammaṃ na kopenti.
யங் பன ஸுத்தந்திகத்தே²ரா ‘‘த³-காரோ த-காரமாபஜ்ஜதி, த-காரோ த³-காரமாபஜ்ஜதி, ச-காரோ ஜ-காரமாபஜ்ஜதி, ஜ-காரோ ச-காரமாபஜ்ஜதி, ய-காரோ க-காரமாபஜ்ஜதி, க-காரோ ய-காரமாபஜ்ஜதி, தஸ்மா த³-காராதீ³ஸு வத்தப்³பே³ஸு த-காராதி³வசனங் ந விருஜ்ஜ²தீ’’தி வத³ந்தி, தங் கம்மவாசங் பத்வா ந வட்டதி. தஸ்மா வினயத⁴ரேன நேவ த³-காரோ த-காரோ காதப்³போ³…பே॰… ந க-காரோ ய-காரோ. யதா²பாளியா நிருத்திங் ஸோதெ⁴த்வா த³ஸவிதா⁴ய ப்³யஞ்ஜனநிருத்தியா வுத்ததோ³ஸே பரிஹரந்தேன கம்மவாசா காதப்³பா³. இதரதா² ஹி ஸாவனங் ஹாபேதி நாம.
Yaṃ pana suttantikattherā ‘‘da-kāro ta-kāramāpajjati, ta-kāro da-kāramāpajjati, ca-kāro ja-kāramāpajjati, ja-kāro ca-kāramāpajjati, ya-kāro ka-kāramāpajjati, ka-kāro ya-kāramāpajjati, tasmā da-kārādīsu vattabbesu ta-kārādivacanaṃ na virujjhatī’’ti vadanti, taṃ kammavācaṃ patvā na vaṭṭati. Tasmā vinayadharena neva da-kāro ta-kāro kātabbo…pe… na ka-kāro ya-kāro. Yathāpāḷiyā niruttiṃ sodhetvā dasavidhāya byañjananiruttiyā vuttadose pariharantena kammavācā kātabbā. Itarathā hi sāvanaṃ hāpeti nāma.
அஸமயே ஸாவேதீதி ஸாவனாய அகாலே அனவகாஸே ஞத்திங் அட்ட²பெத்வா பட²மங்யேவ அனுஸ்ஸாவனகம்மங் கத்வா பச்சா² ஞத்திங் ட²பேதி. இதி இமேஹி பஞ்சஹாகாரேஹி அனுஸ்ஸாவனதோ கம்மானி விபஜ்ஜந்தி. தேனாஹ – ‘‘ஏவங் பன விபஜ்ஜந்தி, அனுஸ்ஸாவனதோபி சா’’தி.
Asamaye sāvetīti sāvanāya akāle anavakāse ñattiṃ aṭṭhapetvā paṭhamaṃyeva anussāvanakammaṃ katvā pacchā ñattiṃ ṭhapeti. Iti imehi pañcahākārehi anussāvanato kammāni vipajjanti. Tenāha – ‘‘evaṃ pana vipajjanti, anussāvanatopi cā’’ti.
3023. ஏவங் அனுஸ்ஸாவனதோ கம்மவிபத்திங் த³ஸ்ஸெத்வா ஸீமதோ கம்மவிபத்தி உபோஸத²க்க²ந்த⁴ககதா²ய வுத்தனயா ஏவாதி தமேவ அதிதி³ஸந்தோ ஆஹ ‘‘ஏகாத³ஸஹி…பே॰… மயா’’தி. கம்மதோ³ஸோயேவ கம்மதோ³ஸதா. தாவ பட²மங்.
3023. Evaṃ anussāvanato kammavipattiṃ dassetvā sīmato kammavipatti uposathakkhandhakakathāya vuttanayā evāti tameva atidisanto āha ‘‘ekādasahi…pe… mayā’’ti. Kammadosoyeva kammadosatā. Tāva paṭhamaṃ.
3024-7. ஏவங் ஸீமதோ கம்மவிபத்திங் அதிதே³ஸதோ த³ஸ்ஸெத்வா இதா³னி பரிஸவஸேன த³ஸ்ஸேதுமாஹ ‘‘சதுவக்³கே³னா’’திஆதி³. கம்மபத்தாதி எத்த² ‘‘சத்தாரோ பகதத்தா’’தி ஸேஸோ. யதா²ஹ – ‘‘சதுவக்³க³கரணே கம்மே சத்தாரோ பி⁴க்கூ² பகதத்தா கம்மபத்தா’’தி (பரி॰ 497). எத்த² ச பகதத்தா நாம அனுக்கி²த்தா அனிஸ்ஸாரிதா பரிஸுத்³த⁴ஸீலா சத்தாரோ பி⁴க்கூ². கம்மபத்தா கம்மஸ்ஸ அரஹா அனுச்ச²விகா ஸாமினோ. ந தேஹி வினா தங் கம்மங் கரீயதி, ந தேஸங் ச²ந்தோ³ வா பாரிஸுத்³தி⁴ வா ஏதி. அனாக³தாதி பரிஸாய ஹத்த²பாஸங் அனாக³தா. ச²ந்தோ³தி எத்த² ‘‘ச²ந்தா³ரஹான’’ந்தி ஸேஸோ. யதா²ஹ ‘‘அவஸேஸா பகதத்தா ச²ந்தா³ரஹா’’தி. இமினா அயமத்தோ² தீ³பிதோ ஹோதி – ‘‘அவஸேஸா பன ஸசேபி ஸஹஸ்ஸமத்தா ஹொந்தி, ஸசே ஸமானஸங்வாஸகா, ஸப்³பே³ ச²ந்தா³ரஹாவ ஹொந்தி, ச²ந்த³பாரிஸுத்³தி⁴ங் த³த்வா ஆக³ச்ச²ந்து வா மா வா, கம்மங் பன திட்ட²தீ’’தி. ஸம்முகா²தி ஸம்முகீ²பூ⁴தா.
3024-7. Evaṃ sīmato kammavipattiṃ atidesato dassetvā idāni parisavasena dassetumāha ‘‘catuvaggenā’’tiādi. Kammapattāti ettha ‘‘cattāro pakatattā’’ti seso. Yathāha – ‘‘catuvaggakaraṇe kamme cattāro bhikkhū pakatattā kammapattā’’ti (pari. 497). Ettha ca pakatattā nāma anukkhittā anissāritā parisuddhasīlā cattāro bhikkhū. Kammapattā kammassa arahā anucchavikā sāmino. Na tehi vinā taṃ kammaṃ karīyati, na tesaṃ chando vā pārisuddhi vā eti. Anāgatāti parisāya hatthapāsaṃ anāgatā. Chandoti ettha ‘‘chandārahāna’’nti seso. Yathāha ‘‘avasesā pakatattā chandārahā’’ti. Iminā ayamattho dīpito hoti – ‘‘avasesā pana sacepi sahassamattā honti, sace samānasaṃvāsakā, sabbe chandārahāva honti, chandapārisuddhiṃ datvā āgacchantu vā mā vā, kammaṃ pana tiṭṭhatī’’ti. Sammukhāti sammukhībhūtā.
திவங்கி³கோதி கம்மபத்தானாக³மனச²ந்தா³னாஹரணபடிக்கோஸனஸங்கா²தஅங்க³த்தயயுத்தோ. தோ³ஸோ கம்மவிபத்திலக்க²ணோ. பரிஸாய வஸா ஸியாதி பரிஸவஸேன ஹோதி.
Tivaṅgikoti kammapattānāgamanachandānāharaṇapaṭikkosanasaṅkhātaaṅgattayayutto. Doso kammavipattilakkhaṇo. Parisāya vasā siyāti parisavasena hoti.
படிஸேதெ⁴ந்தீதி படிக்கோஸந்தி. து³தியே சதுவக்³கி³கே கம்மே து³வங்கி³கோ தோ³ஸோ பரிஸாய வஸா ஸியாதி யோஜனா.
Paṭisedhentīti paṭikkosanti. Dutiye catuvaggike kamme duvaṅgiko doso parisāya vasā siyāti yojanā.
எத்த² ஏதஸ்மிங் ததியே சதுவக்³கி³கே படிக்கோஸோவ அத்தி², ந இதரே பரிஸதோ³ஸாதி ஏகங்கி³கோ தோ³ஸோ பரிஸாய வஸா ஸியாதி யோஜனா. து³வங்க³ யுத்தபரிஸாதோ³ஸஸ்ஸ து³தியங் தே³ஸிதத்தா து³வங்க³ யுத்தபரிஸாதோ³ஸோ ‘‘து³தியோ’’தி வுத்தோ. ததா² ததியங் தே³ஸிதத்தா ஏகங்க³யுத்தோ ததியோ வேதி³தப்³போ³. இமமேவ நயங் பஞ்சவக்³கா³தி³ஸங்க⁴த்தயஸ்ஸ அதிதி³ஸந்தோ ஆஹ ‘‘ஏவங்…பே॰… திவிதே⁴ஸுபீ’’தி. ஆதி³-ஸத்³தே³ன த³ஸவக்³க³வீஸதிவக்³க³ஸங்கா⁴னங் க³ஹணங்.
Ettha etasmiṃ tatiye catuvaggike paṭikkosova atthi, na itare parisadosāti ekaṅgiko doso parisāya vasā siyāti yojanā. Duvaṅga yuttaparisādosassa dutiyaṃ desitattā duvaṅga yuttaparisādoso ‘‘dutiyo’’ti vutto. Tathā tatiyaṃ desitattā ekaṅgayutto tatiyo veditabbo. Imameva nayaṃ pañcavaggādisaṅghattayassa atidisanto āha ‘‘evaṃ…pe… tividhesupī’’ti. Ādi-saddena dasavaggavīsativaggasaṅghānaṃ gahaṇaṃ.
3028. ஏவங் சதூஸு ஸங்கே⁴ஸு சதுன்னங் திகானங் வஸேன பரிஸதோ கம்மவிபத்தியா த்³வாத³ஸவித⁴தங் த³ஸ்ஸேதுமாஹ ‘‘சதுத்தி²கா’’தி. அனுவாதே³ன ‘‘த³ஸ த்³வே ஸியு’’ந்தி விதீ⁴யதி. பரிஸாவஸா சதுத்தி²கா தோ³ஸா த³ஸ த்³வே த்³வாத³ஸ ஸியுந்தி யோஜனா. எத்தா²தி ஏதேஸு ‘‘வத்து²தோ’’திஆதி³னா வுத்தேஸு பஞ்சஸு கம்மதோ³ஸேஸு, நித்³தா⁴ரணே பு⁴ம்மங். ‘‘பரிஸாவஸா’’தி இத³ங் நித்³தா⁴ரேதப்³ப³ங். கம்மானீதி அபலோகனாதீ³னி சத்தாரி. எத்த² ச சதுவக்³கா³தி³கரணீயேஸு கம்மேஸு பகதத்தேன கம்மவாசங் ஸாவெத்வா கதமேவ கம்மங் கம்மபத்தேன கதங் ஹோதி. கம்மபத்தே பகதத்தே ட²பெத்வா அபகதத்தேன கேனசி, கேவலேனேவ கம்மவாசங் ஸாவெத்வா கதங் அபகதத்தகம்மபத்தலக்க²ணாபா⁴வா, கம்மபத்தேன ச கம்மவாசாய அஸ்ஸாவிதத்தா அனுஸ்ஸாவனதோ³ஸேன விபன்னங் ஹோதீதி வேதி³தப்³ப³ங். தேனேவ போராணகவினயத⁴ரத்தே²ரா கம்மவிபத்திஸங்காபரிஹாரத்த²ங் த்³வீஹி தீஹி ஏகதோ கம்மவாசங் ஸாவயந்தி. அயமெத்த² ஸங்கே²போ, வித்தா²ரோ பன பரிவாராவஸானே பாளியா (பரி॰ 482 ஆத³யோ) வா அட்ட²கதா²ய (பரி॰ அட்ட²॰ 482 ஆத³யோ) ச க³ஹேதப்³போ³.
3028. Evaṃ catūsu saṅghesu catunnaṃ tikānaṃ vasena parisato kammavipattiyā dvādasavidhataṃ dassetumāha ‘‘catutthikā’’ti. Anuvādena ‘‘dasa dve siyu’’nti vidhīyati. Parisāvasā catutthikā dosā dasa dve dvādasa siyunti yojanā. Etthāti etesu ‘‘vatthuto’’tiādinā vuttesu pañcasu kammadosesu, niddhāraṇe bhummaṃ. ‘‘Parisāvasā’’ti idaṃ niddhāretabbaṃ. Kammānīti apalokanādīni cattāri. Ettha ca catuvaggādikaraṇīyesu kammesu pakatattena kammavācaṃ sāvetvā katameva kammaṃ kammapattena kataṃ hoti. Kammapatte pakatatte ṭhapetvā apakatattena kenaci, kevaleneva kammavācaṃ sāvetvā kataṃ apakatattakammapattalakkhaṇābhāvā, kammapattena ca kammavācāya assāvitattā anussāvanadosena vipannaṃ hotīti veditabbaṃ. Teneva porāṇakavinayadharattherā kammavipattisaṅkāparihāratthaṃ dvīhi tīhi ekato kammavācaṃ sāvayanti. Ayamettha saṅkhepo, vitthāro pana parivārāvasāne pāḷiyā (pari. 482 ādayo) vā aṭṭhakathāya (pari. aṭṭha. 482 ādayo) ca gahetabbo.
கம்மவிபத்திகதா²வண்ணனா.
Kammavipattikathāvaṇṇanā.
