| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৫. পন্নরসমৰগ্গো
15. Pannarasamavaggo
(১৫৫) ১১. কম্মূপচযকথা
(155) 11. Kammūpacayakathā
৭৩৭. অঞ্ঞং কম্মং অঞ্ঞো কম্মূপচযোতি? আমন্তা। অঞ্ঞো ফস্সো, অঞ্ঞো ফস্সূপচযো; অঞ্ঞা ৰেদনা, অঞ্ঞো ৰেদনূপচযো; অঞ্ঞা সঞ্ঞা, অঞ্ঞো সঞ্ঞূপচযো; অঞ্ঞা চেতনা, অঞ্ঞো চেতনূপচযো; অঞ্ঞং চিত্তং, অঞ্ঞো চিত্তূপচযো; অঞ্ঞা সদ্ধা, অঞ্ঞো সদ্ধূপচযো; অঞ্ঞং ৰীরিযং, অঞ্ঞো ৰীরিযূপচযো; অঞ্ঞা সতি, অঞ্ঞো সতূপচযো ; অঞ্ঞো সমাধি, অঞ্ঞো সমাধূপচযো; অঞ্ঞা পঞ্ঞা, অঞ্ঞো পঞ্ঞূপচযো; অঞ্ঞো রাগো, অঞ্ঞো রাগূপচযো…পে॰… অঞ্ঞং অনোত্তপ্পং, অঞ্ঞো অনোত্তপ্পূপচযোতি? ন হেৰং ৰত্তব্বে…পে॰…।
737. Aññaṃ kammaṃ añño kammūpacayoti? Āmantā. Añño phasso, añño phassūpacayo; aññā vedanā, añño vedanūpacayo; aññā saññā, añño saññūpacayo; aññā cetanā, añño cetanūpacayo; aññaṃ cittaṃ, añño cittūpacayo; aññā saddhā, añño saddhūpacayo; aññaṃ vīriyaṃ, añño vīriyūpacayo; aññā sati, añño satūpacayo ; añño samādhi, añño samādhūpacayo; aññā paññā, añño paññūpacayo; añño rāgo, añño rāgūpacayo…pe… aññaṃ anottappaṃ, añño anottappūpacayoti? Na hevaṃ vattabbe…pe….
৭৩৮. অঞ্ঞং কম্মং, অঞ্ঞো কম্মূপচযোতি? আমন্তা। কম্মূপচযো কম্মেন সহজাতোতি? ন হেৰং ৰত্তব্বে…পে॰…।
738. Aññaṃ kammaṃ, añño kammūpacayoti? Āmantā. Kammūpacayo kammena sahajātoti? Na hevaṃ vattabbe…pe….
কম্মূপচযো কম্মেন সহজাতোতি, আমন্তা। কুসলেন কম্মেন সহজাতো কম্মূপচযো কুসলোতি, ন হেৰং ৰত্তব্বে…পে॰…।
Kammūpacayo kammena sahajātoti, āmantā. Kusalena kammena sahajāto kammūpacayo kusaloti, na hevaṃ vattabbe…pe….
কুসলেন কম্মেন সহজাতো কম্মূপচযো কুসলোতি? আমন্তা। সুখায ৰেদনায সম্পযুত্তেন কম্মেন সহজাতো কম্মূপচযো সুখায ৰেদনায সম্পযুত্তোতি? ন হেৰং ৰত্তব্বে…পে॰… দুক্খায ৰেদনায…পে॰… অদুক্খমসুখায ৰেদনায সম্পযুত্তেন কম্মেন সহজাতো কম্মূপচযো অদুক্খমসুখায ৰেদনায সম্পযুত্তোতি? ন হেৰং ৰত্তব্বে…পে॰…।
Kusalena kammena sahajāto kammūpacayo kusaloti? Āmantā. Sukhāya vedanāya sampayuttena kammena sahajāto kammūpacayo sukhāya vedanāya sampayuttoti? Na hevaṃ vattabbe…pe… dukkhāya vedanāya…pe… adukkhamasukhāya vedanāya sampayuttena kammena sahajāto kammūpacayo adukkhamasukhāya vedanāya sampayuttoti? Na hevaṃ vattabbe…pe….
৭৩৯. কম্মূপচযো কম্মেন সহজাতোতি? আমন্তা। অকুসলেন কম্মেন সহজাতো কম্মূপচযো অকুসলোতি? ন হেৰং ৰত্তব্বে…পে॰…।
739. Kammūpacayo kammena sahajātoti? Āmantā. Akusalena kammena sahajāto kammūpacayo akusaloti? Na hevaṃ vattabbe…pe….
অকুসলেন কম্মেন সহজাতো কম্মূপচযো অকুসলোতি? আমন্তা। সুখায ৰেদনায সম্পযুত্তেন কম্মেন সহজাতো কম্মূপচযো সুখায ৰেদনায সম্পযুত্তোতি? ন হেৰং ৰত্তব্বে…পে॰… দুক্খায ৰেদনায…পে॰… অদুক্খমসুখায ৰেদনায সম্পযুত্তেন কম্মেন সহজাতো কম্মূপচযো অদুক্খমসুখায ৰেদনায সম্পযুত্তোতি? ন হেৰং ৰত্তব্বে…পে॰…।
Akusalena kammena sahajāto kammūpacayo akusaloti? Āmantā. Sukhāya vedanāya sampayuttena kammena sahajāto kammūpacayo sukhāya vedanāya sampayuttoti? Na hevaṃ vattabbe…pe… dukkhāya vedanāya…pe… adukkhamasukhāya vedanāya sampayuttena kammena sahajāto kammūpacayo adukkhamasukhāya vedanāya sampayuttoti? Na hevaṃ vattabbe…pe….
৭৪০. কম্মং চিত্তেন সহজাতং, কম্মং সারম্মণন্তি? আমন্তা। কম্মূপচযো চিত্তেন সহজাতো, কম্মূপচযো সারম্মণোতি? ন হেৰং ৰত্তব্বে…পে॰… কম্মূপচযো চিত্তেন সহজাতো , কম্মূপচযো অনারম্মণোতি ? আমন্তা। কম্মং চিত্তেন সহজাতং, কম্মং অনারম্মণন্তি? ন হেৰং ৰত্তব্বে…পে॰…।
740. Kammaṃ cittena sahajātaṃ, kammaṃ sārammaṇanti? Āmantā. Kammūpacayo cittena sahajāto, kammūpacayo sārammaṇoti? Na hevaṃ vattabbe…pe… kammūpacayo cittena sahajāto , kammūpacayo anārammaṇoti ? Āmantā. Kammaṃ cittena sahajātaṃ, kammaṃ anārammaṇanti? Na hevaṃ vattabbe…pe….
কম্মং চিত্তেন সহজাতং, চিত্তং ভিজ্জমানং কম্মং ভিজ্জতীতি? আমন্তা। কম্মূপচযো চিত্তেন সহজাতো, চিত্তং ভিজ্জমানং কম্মূপচযো ভিজ্জতীতি? ন হেৰং ৰত্তব্বে…পে॰…।
Kammaṃ cittena sahajātaṃ, cittaṃ bhijjamānaṃ kammaṃ bhijjatīti? Āmantā. Kammūpacayo cittena sahajāto, cittaṃ bhijjamānaṃ kammūpacayo bhijjatīti? Na hevaṃ vattabbe…pe….
কম্মূপচযো চিত্তেন সহজাতো, চিত্তং ভিজ্জমানং কম্মূপচযো ন ভিজ্জতীতি? আমন্তা। কম্মং চিত্তেন সহজাতং, চিত্তং ভিজ্জমানং কম্মং ন ভিজ্জতীতি? ন হেৰং ৰত্তব্বে…পে॰…।
Kammūpacayo cittena sahajāto, cittaṃ bhijjamānaṃ kammūpacayo na bhijjatīti? Āmantā. Kammaṃ cittena sahajātaṃ, cittaṃ bhijjamānaṃ kammaṃ na bhijjatīti? Na hevaṃ vattabbe…pe….
৭৪১. কম্মম্হি কম্মূপচযোতি? আমন্তা। তঞ্ঞেৰ কম্মং সো কম্মূপচযোতি? ন হেৰং ৰত্তব্বে…পে॰…।
741. Kammamhi kammūpacayoti? Āmantā. Taññeva kammaṃ so kammūpacayoti? Na hevaṃ vattabbe…pe….
কম্মম্হি কম্মূপচযো, কম্মূপচযতো ৰিপাকো নিব্বত্ততীতি? আমন্তা। তঞ্ঞেৰ কম্মং, সো কম্মূপচযো, সো কম্মৰিপাকোতি? ন হেৰং ৰত্তব্বে…পে॰…।
Kammamhi kammūpacayo, kammūpacayato vipāko nibbattatīti? Āmantā. Taññeva kammaṃ, so kammūpacayo, so kammavipākoti? Na hevaṃ vattabbe…pe….
কম্মম্হি কম্মূপচযো, কম্মূপচযতো ৰিপাকো নিব্বত্ততি, ৰিপাকো সারম্মণোতি? আমন্তা। কম্মূপচযো সারম্মণোতি? ন হেৰং ৰত্তব্বে…পে॰… কম্মূপচযো অনারম্মণোতি? আমন্তা। ৰিপাকো অনারম্মণোতি? ন হেৰং ৰত্তব্বে…পে॰…।
Kammamhi kammūpacayo, kammūpacayato vipāko nibbattati, vipāko sārammaṇoti? Āmantā. Kammūpacayo sārammaṇoti? Na hevaṃ vattabbe…pe… kammūpacayo anārammaṇoti? Āmantā. Vipāko anārammaṇoti? Na hevaṃ vattabbe…pe….
৭৪২. অঞ্ঞং কম্মং অঞ্ঞো কম্মূপচযোতি, আমন্তা। ননু ৰুত্তং ভগৰতা – ‘‘ইধ, পুণ্ণ, একচ্চো সব্যাবজ্ঝম্পি অব্যাবজ্ঝম্পি 1 কাযসঙ্খারং অভিসঙ্খরোতি, সব্যাবজ্ঝম্পি অব্যাবজ্ঝম্পি ৰচীসঙ্খারং…পে॰… মনোসঙ্খারং অভিসঙ্খরোতি, সো সব্যাবজ্ঝম্পি অব্যাবজ্ঝম্পি কাযসঙ্খারং অভিসঙ্খরিত্ৰা, সব্যাবজ্ঝম্পি অব্যাবজ্ঝম্পি ৰচীসঙ্খারং…পে॰… মনোসঙ্খারং অভিসঙ্খরিত্ৰা সব্যাবজ্ঝম্পি অব্যাবজ্ঝম্পি লোকং উপপজ্জতি। তমেনং সব্যাবজ্ঝম্পি অব্যাবজ্ঝম্পি লোকং উপপন্নং সমানং সব্যাবজ্ঝাপি অব্যাবজ্ঝাপি ফস্সা ফুসন্তি। সো সব্যাবজ্ঝেহিপি অব্যাবজ্ঝেহিপি ফস্সেহি ফুট্ঠো সমানো সব্যাবজ্ঝম্পি অব্যাবজ্ঝম্পি ৰেদনং ৰেদেতি ৰোকিণ্ণসুখদুক্খং, সেয্যথাপি মনুস্সা একচ্চে চ দেৰা একচ্চে চ ৰিনিপাতিকা। ইতি খো, পুণ্ণ, ভূতা ভূতস্স উপপত্তি হোতি, যং করোতি তেন উপপজ্জতি, উপপন্নমেতং ফস্সা ফুসন্তি। এৰম্পাহং, পুণ্ণ, ‘কম্মদাযাদা সত্তা’তি ৰদামী’’তি 2। অত্থেৰ সুত্তন্তোতি? আমন্তা। তেন হি ন ৰত্তব্বং – ‘‘অঞ্ঞং কম্মং, অঞ্ঞো কম্মূপচযো’’তি।
742. Aññaṃ kammaṃ añño kammūpacayoti, āmantā. Nanu vuttaṃ bhagavatā – ‘‘idha, puṇṇa, ekacco sabyābajjhampi abyābajjhampi 3 kāyasaṅkhāraṃ abhisaṅkharoti, sabyābajjhampi abyābajjhampi vacīsaṅkhāraṃ…pe… manosaṅkhāraṃ abhisaṅkharoti, so sabyābajjhampi abyābajjhampi kāyasaṅkhāraṃ abhisaṅkharitvā, sabyābajjhampi abyābajjhampi vacīsaṅkhāraṃ…pe… manosaṅkhāraṃ abhisaṅkharitvā sabyābajjhampi abyābajjhampi lokaṃ upapajjati. Tamenaṃ sabyābajjhampi abyābajjhampi lokaṃ upapannaṃ samānaṃ sabyābajjhāpi abyābajjhāpi phassā phusanti. So sabyābajjhehipi abyābajjhehipi phassehi phuṭṭho samāno sabyābajjhampi abyābajjhampi vedanaṃ vedeti vokiṇṇasukhadukkhaṃ, seyyathāpi manussā ekacce ca devā ekacce ca vinipātikā. Iti kho, puṇṇa, bhūtā bhūtassa upapatti hoti, yaṃ karoti tena upapajjati, upapannametaṃ phassā phusanti. Evampāhaṃ, puṇṇa, ‘kammadāyādā sattā’ti vadāmī’’ti 4. Attheva suttantoti? Āmantā. Tena hi na vattabbaṃ – ‘‘aññaṃ kammaṃ, añño kammūpacayo’’ti.
কম্মূপচযকথা নিট্ঠিতা।
Kammūpacayakathā niṭṭhitā.
পন্নরসমৰগ্গো।
Pannarasamavaggo.
তস্সুদ্দানং –
Tassuddānaṃ –
পচ্চযতা ৰৰত্থিতা, পটিচ্চসমুপ্পাদো, অদ্ধা, খণো লযো মুহুত্তং, চত্তারো আসৰা অনাসৰা, লোকুত্তরানং ধম্মানং জরামরণং লোকুত্তরা, সঞ্ঞাৰেদযিতনিরোধসমাপত্তি লোকুত্তরা, সঞ্ঞাৰেদযিতনিরোধসমাপত্তি লোকিযা, সঞ্ঞাৰেদযিতনিরোধং সমাপন্নো কালং করেয্য, স্ৰেৰ মগ্গো অসঞ্ঞসত্তুপপত্তিযা , অঞ্ঞং কম্মং অঞ্ঞো কম্মূপচযোতি।
Paccayatā vavatthitā, paṭiccasamuppādo, addhā, khaṇo layo muhuttaṃ, cattāro āsavā anāsavā, lokuttarānaṃ dhammānaṃ jarāmaraṇaṃ lokuttarā, saññāvedayitanirodhasamāpatti lokuttarā, saññāvedayitanirodhasamāpatti lokiyā, saññāvedayitanirodhaṃ samāpanno kālaṃ kareyya, sveva maggo asaññasattupapattiyā , aññaṃ kammaṃ añño kammūpacayoti.
ততিযো পণ্ণাসকো।
Tatiyo paṇṇāsako.
তস্সুদ্দানং –
Tassuddānaṃ –
অনুসযা, সংৰরো, কপ্পো, মূলঞ্চ ৰৰত্থিতাতি।
Anusayā, saṃvaro, kappo, mūlañca vavatthitāti.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১১. কম্মূপচযকথাৰণ্ণনা • 11. Kammūpacayakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১১. কম্মূপচযকথাৰণ্ণনা • 11. Kammūpacayakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১১. কম্মূপচযকথাৰণ্ণনা • 11. Kammūpacayakathāvaṇṇanā
