| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၅. ပန္နရသမဝဂ္ဂော
15. Pannarasamavaggo
(၁၅၅) ၁၁. ကမ္မူပစယကထာ
(155) 11. Kammūpacayakathā
၇၃၇. အညံ ကမ္မံ အညော ကမ္မူပစယောတိ? အာမန္တာ။ အညော ဖသ္သော, အညော ဖသ္သူပစယော; အညာ ဝေဒနာ, အညော ဝေဒနူပစယော; အညာ သညာ, အညော သညူပစယော; အညာ စေတနာ, အညော စေတနူပစယော; အညံ စိတ္တံ, အညော စိတ္တူပစယော; အညာ သဒ္ဓာ, အညော သဒ္ဓူပစယော; အညံ ဝီရိယံ, အညော ဝီရိယူပစယော; အညာ သတိ, အညော သတူပစယော ; အညော သမာဓိ, အညော သမာဓူပစယော; အညာ ပညာ, အညော ပညူပစယော; အညော ရာဂော, အညော ရာဂူပစယော။ပေ.။ အညံ အနောတ္တပ္ပံ, အညော အနောတ္တပ္ပူပစယောတိ? န ဟေဝံ ဝတ္တဗ္ဗေ။ပေ.။။
737. Aññaṃ kammaṃ añño kammūpacayoti? Āmantā. Añño phasso, añño phassūpacayo; aññā vedanā, añño vedanūpacayo; aññā saññā, añño saññūpacayo; aññā cetanā, añño cetanūpacayo; aññaṃ cittaṃ, añño cittūpacayo; aññā saddhā, añño saddhūpacayo; aññaṃ vīriyaṃ, añño vīriyūpacayo; aññā sati, añño satūpacayo ; añño samādhi, añño samādhūpacayo; aññā paññā, añño paññūpacayo; añño rāgo, añño rāgūpacayo…pe… aññaṃ anottappaṃ, añño anottappūpacayoti? Na hevaṃ vattabbe…pe….
၇၃၈. အညံ ကမ္မံ, အညော ကမ္မူပစယောတိ? အာမန္တာ။ ကမ္မူပစယော ကမ္မေန သဟဇာတောတိ? န ဟေဝံ ဝတ္တဗ္ဗေ။ပေ.။။
738. Aññaṃ kammaṃ, añño kammūpacayoti? Āmantā. Kammūpacayo kammena sahajātoti? Na hevaṃ vattabbe…pe….
ကမ္မူပစယော ကမ္မေန သဟဇာတောတိ, အာမန္တာ။ ကုသလေန ကမ္မေန သဟဇာတော ကမ္မူပစယော ကုသလောတိ, န ဟေဝံ ဝတ္တဗ္ဗေ။ပေ.။။
Kammūpacayo kammena sahajātoti, āmantā. Kusalena kammena sahajāto kammūpacayo kusaloti, na hevaṃ vattabbe…pe….
ကုသလေန ကမ္မေန သဟဇာတော ကမ္မူပစယော ကုသလောတိ? အာမန္တာ။ သုခာယ ဝေဒနာယ သမ္ပယုတ္တေန ကမ္မေန သဟဇာတော ကမ္မူပစယော သုခာယ ဝေဒနာယ သမ္ပယုတ္တောတိ? န ဟေဝံ ဝတ္တဗ္ဗေ။ပေ.။ ဒုက္ခာယ ဝေဒနာယ။ပေ.။ အဒုက္ခမသုခာယ ဝေဒနာယ သမ္ပယုတ္တေန ကမ္မေန သဟဇာတော ကမ္မူပစယော အဒုက္ခမသုခာယ ဝေဒနာယ သမ္ပယုတ္တောတိ? န ဟေဝံ ဝတ္တဗ္ဗေ။ပေ.။။
Kusalena kammena sahajāto kammūpacayo kusaloti? Āmantā. Sukhāya vedanāya sampayuttena kammena sahajāto kammūpacayo sukhāya vedanāya sampayuttoti? Na hevaṃ vattabbe…pe… dukkhāya vedanāya…pe… adukkhamasukhāya vedanāya sampayuttena kammena sahajāto kammūpacayo adukkhamasukhāya vedanāya sampayuttoti? Na hevaṃ vattabbe…pe….
၇၃၉. ကမ္မူပစယော ကမ္မေန သဟဇာတောတိ? အာမန္တာ။ အကုသလေန ကမ္မေန သဟဇာတော ကမ္မူပစယော အကုသလောတိ? န ဟေဝံ ဝတ္တဗ္ဗေ။ပေ.။။
739. Kammūpacayo kammena sahajātoti? Āmantā. Akusalena kammena sahajāto kammūpacayo akusaloti? Na hevaṃ vattabbe…pe….
အကုသလေန ကမ္မေန သဟဇာတော ကမ္မူပစယော အကုသလောတိ? အာမန္တာ။ သုခာယ ဝေဒနာယ သမ္ပယုတ္တေန ကမ္မေန သဟဇာတော ကမ္မူပစယော သုခာယ ဝေဒနာယ သမ္ပယုတ္တောတိ? န ဟေဝံ ဝတ္တဗ္ဗေ။ပေ.။ ဒုက္ခာယ ဝေဒနာယ။ပေ.။ အဒုက္ခမသုခာယ ဝေဒနာယ သမ္ပယုတ္တေန ကမ္မေန သဟဇာတော ကမ္မူပစယော အဒုက္ခမသုခာယ ဝေဒနာယ သမ္ပယုတ္တောတိ? န ဟေဝံ ဝတ္တဗ္ဗေ။ပေ.။။
Akusalena kammena sahajāto kammūpacayo akusaloti? Āmantā. Sukhāya vedanāya sampayuttena kammena sahajāto kammūpacayo sukhāya vedanāya sampayuttoti? Na hevaṃ vattabbe…pe… dukkhāya vedanāya…pe… adukkhamasukhāya vedanāya sampayuttena kammena sahajāto kammūpacayo adukkhamasukhāya vedanāya sampayuttoti? Na hevaṃ vattabbe…pe….
၇၄၀. ကမ္မံ စိတ္တေန သဟဇာတံ, ကမ္မံ သာရမ္မဏန္တိ? အာမန္တာ။ ကမ္မူပစယော စိတ္တေန သဟဇာတော, ကမ္မူပစယော သာရမ္မဏောတိ? န ဟေဝံ ဝတ္တဗ္ဗေ။ပေ.။ ကမ္မူပစယော စိတ္တေန သဟဇာတော , ကမ္မူပစယော အနာရမ္မဏောတိ ? အာမန္တာ။ ကမ္မံ စိတ္တေန သဟဇာတံ, ကမ္မံ အနာရမ္မဏန္တိ? န ဟေဝံ ဝတ္တဗ္ဗေ။ပေ.။။
740. Kammaṃ cittena sahajātaṃ, kammaṃ sārammaṇanti? Āmantā. Kammūpacayo cittena sahajāto, kammūpacayo sārammaṇoti? Na hevaṃ vattabbe…pe… kammūpacayo cittena sahajāto , kammūpacayo anārammaṇoti ? Āmantā. Kammaṃ cittena sahajātaṃ, kammaṃ anārammaṇanti? Na hevaṃ vattabbe…pe….
ကမ္မံ စိတ္တေန သဟဇာတံ, စိတ္တံ ဘိဇ္ဇမာနံ ကမ္မံ ဘိဇ္ဇတီတိ? အာမန္တာ။ ကမ္မူပစယော စိတ္တေန သဟဇာတော, စိတ္တံ ဘိဇ္ဇမာနံ ကမ္မူပစယော ဘိဇ္ဇတီတိ? န ဟေဝံ ဝတ္တဗ္ဗေ။ပေ.။။
Kammaṃ cittena sahajātaṃ, cittaṃ bhijjamānaṃ kammaṃ bhijjatīti? Āmantā. Kammūpacayo cittena sahajāto, cittaṃ bhijjamānaṃ kammūpacayo bhijjatīti? Na hevaṃ vattabbe…pe….
ကမ္မူပစယော စိတ္တေန သဟဇာတော, စိတ္တံ ဘိဇ္ဇမာနံ ကမ္မူပစယော န ဘိဇ္ဇတီတိ? အာမန္တာ။ ကမ္မံ စိတ္တေန သဟဇာတံ, စိတ္တံ ဘိဇ္ဇမာနံ ကမ္မံ န ဘိဇ္ဇတီတိ? န ဟေဝံ ဝတ္တဗ္ဗေ။ပေ.။။
Kammūpacayo cittena sahajāto, cittaṃ bhijjamānaṃ kammūpacayo na bhijjatīti? Āmantā. Kammaṃ cittena sahajātaṃ, cittaṃ bhijjamānaṃ kammaṃ na bhijjatīti? Na hevaṃ vattabbe…pe….
၇၄၁. ကမ္မမ္ဟိ ကမ္မူပစယောတိ? အာမန္တာ။ တညေဝ ကမ္မံ သော ကမ္မူပစယောတိ? န ဟေဝံ ဝတ္တဗ္ဗေ။ပေ.။။
741. Kammamhi kammūpacayoti? Āmantā. Taññeva kammaṃ so kammūpacayoti? Na hevaṃ vattabbe…pe….
ကမ္မမ္ဟိ ကမ္မူပစယော, ကမ္မူပစယတော ဝိပာကော နိဗ္ဗတ္တတီတိ? အာမန္တာ။ တညေဝ ကမ္မံ, သော ကမ္မူပစယော, သော ကမ္မဝိပာကောတိ? န ဟေဝံ ဝတ္တဗ္ဗေ။ပေ.။။
Kammamhi kammūpacayo, kammūpacayato vipāko nibbattatīti? Āmantā. Taññeva kammaṃ, so kammūpacayo, so kammavipākoti? Na hevaṃ vattabbe…pe….
ကမ္မမ္ဟိ ကမ္မူပစယော, ကမ္မူပစယတော ဝိပာကော နိဗ္ဗတ္တတိ, ဝိပာကော သာရမ္မဏောတိ? အာမန္တာ။ ကမ္မူပစယော သာရမ္မဏောတိ? န ဟေဝံ ဝတ္တဗ္ဗေ။ပေ.။ ကမ္မူပစယော အနာရမ္မဏောတိ? အာမန္တာ။ ဝိပာကော အနာရမ္မဏောတိ? န ဟေဝံ ဝတ္တဗ္ဗေ။ပေ.။။
Kammamhi kammūpacayo, kammūpacayato vipāko nibbattati, vipāko sārammaṇoti? Āmantā. Kammūpacayo sārammaṇoti? Na hevaṃ vattabbe…pe… kammūpacayo anārammaṇoti? Āmantā. Vipāko anārammaṇoti? Na hevaṃ vattabbe…pe….
၇၄၂. အညံ ကမ္မံ အညော ကမ္မူပစယောတိ, အာမန္တာ။ နနု ဝုတ္တံ ဘဂဝတာ – ‘‘ဣဓ, ပုဏ္ဏ, ဧကစ္စော သဗ္ယာဗဇ္ဈမ္ပိ အဗ္ယာဗဇ္ဈမ္ပိ 1 ကာယသင္ခာရံ အဘိသင္ခရောတိ, သဗ္ယာဗဇ္ဈမ္ပိ အဗ္ယာဗဇ္ဈမ္ပိ ဝစီသင္ခာရံ။ပေ.။ မနောသင္ခာရံ အဘိသင္ခရောတိ, သော သဗ္ယာဗဇ္ဈမ္ပိ အဗ္ယာဗဇ္ဈမ္ပိ ကာယသင္ခာရံ အဘိသင္ခရိတ္ဝာ, သဗ္ယာဗဇ္ဈမ္ပိ အဗ္ယာဗဇ္ဈမ္ပိ ဝစီသင္ခာရံ။ပေ.။ မနောသင္ခာရံ အဘိသင္ခရိတ္ဝာ သဗ္ယာဗဇ္ဈမ္ပိ အဗ္ယာဗဇ္ဈမ္ပိ လောကံ ဥပပဇ္ဇတိ။ တမေနံ သဗ္ယာဗဇ္ဈမ္ပိ အဗ္ယာဗဇ္ဈမ္ပိ လောကံ ဥပပန္နံ သမာနံ သဗ္ယာဗဇ္ဈာပိ အဗ္ယာဗဇ္ဈာပိ ဖသ္သာ ဖုသန္တိ။ သော သဗ္ယာဗဇ္ဈေဟိပိ အဗ္ယာဗဇ္ဈေဟိပိ ဖသ္သေဟိ ဖုဋ္ဌော သမာနော သဗ္ယာဗဇ္ဈမ္ပိ အဗ္ယာဗဇ္ဈမ္ပိ ဝေဒနံ ဝေဒေတိ ဝောကိဏ္ဏသုခဒုက္ခံ, သေယ္ယထာပိ မနုသ္သာ ဧကစ္စေ စ ဒေဝာ ဧကစ္စေ စ ဝိနိပာတိကာ။ ဣတိ ခော, ပုဏ္ဏ, ဘူတာ ဘူတသ္သ ဥပပတ္တိ ဟောတိ, ယံ ကရောတိ တေန ဥပပဇ္ဇတိ, ဥပပန္နမေတံ ဖသ္သာ ဖုသန္တိ။ ဧဝမ္ပာဟံ, ပုဏ္ဏ, ‘ကမ္မဒာယာဒာ သတ္တာ’တိ ဝဒာမီ’’တိ 2။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘အညံ ကမ္မံ, အညော ကမ္မူပစယော’’တိ။
742. Aññaṃ kammaṃ añño kammūpacayoti, āmantā. Nanu vuttaṃ bhagavatā – ‘‘idha, puṇṇa, ekacco sabyābajjhampi abyābajjhampi 3 kāyasaṅkhāraṃ abhisaṅkharoti, sabyābajjhampi abyābajjhampi vacīsaṅkhāraṃ…pe… manosaṅkhāraṃ abhisaṅkharoti, so sabyābajjhampi abyābajjhampi kāyasaṅkhāraṃ abhisaṅkharitvā, sabyābajjhampi abyābajjhampi vacīsaṅkhāraṃ…pe… manosaṅkhāraṃ abhisaṅkharitvā sabyābajjhampi abyābajjhampi lokaṃ upapajjati. Tamenaṃ sabyābajjhampi abyābajjhampi lokaṃ upapannaṃ samānaṃ sabyābajjhāpi abyābajjhāpi phassā phusanti. So sabyābajjhehipi abyābajjhehipi phassehi phuṭṭho samāno sabyābajjhampi abyābajjhampi vedanaṃ vedeti vokiṇṇasukhadukkhaṃ, seyyathāpi manussā ekacce ca devā ekacce ca vinipātikā. Iti kho, puṇṇa, bhūtā bhūtassa upapatti hoti, yaṃ karoti tena upapajjati, upapannametaṃ phassā phusanti. Evampāhaṃ, puṇṇa, ‘kammadāyādā sattā’ti vadāmī’’ti 4. Attheva suttantoti? Āmantā. Tena hi na vattabbaṃ – ‘‘aññaṃ kammaṃ, añño kammūpacayo’’ti.
ကမ္မူပစယကထာ နိဋ္ဌိတာ။
Kammūpacayakathā niṭṭhitā.
ပန္နရသမဝဂ္ဂော။
Pannarasamavaggo.
တသ္သုဒ္ဒာနံ –
Tassuddānaṃ –
ပစ္စယတာ ဝဝတ္ထိတာ, ပဋိစ္စသမုပ္ပာဒော, အဒ္ဓာ, ခဏော လယော မုဟုတ္တံ, စတ္တာရော အာသဝာ အနာသဝာ, လောကုတ္တရာနံ ဓမ္မာနံ ဇရာမရဏံ လောကုတ္တရာ, သညာဝေဒယိတနိရောဓသမာပတ္တိ လောကုတ္တရာ, သညာဝေဒယိတနိရောဓသမာပတ္တိ လောကိယာ, သညာဝေဒယိတနိရောဓံ သမာပန္နော ကာလံ ကရေယ္ယ, သ္ဝေဝ မဂ္ဂော အသညသတ္တုပပတ္တိယာ , အညံ ကမ္မံ အညော ကမ္မူပစယောတိ။
Paccayatā vavatthitā, paṭiccasamuppādo, addhā, khaṇo layo muhuttaṃ, cattāro āsavā anāsavā, lokuttarānaṃ dhammānaṃ jarāmaraṇaṃ lokuttarā, saññāvedayitanirodhasamāpatti lokuttarā, saññāvedayitanirodhasamāpatti lokiyā, saññāvedayitanirodhaṃ samāpanno kālaṃ kareyya, sveva maggo asaññasattupapattiyā , aññaṃ kammaṃ añño kammūpacayoti.
တတိယော ပဏ္ဏာသကော။
Tatiyo paṇṇāsako.
တသ္သုဒ္ဒာနံ –
Tassuddānaṃ –
အနုသယာ, သံဝရော, ကပ္ပော, မူလဉ္စ ဝဝတ္ထိတာတိ။
Anusayā, saṃvaro, kappo, mūlañca vavatthitāti.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၁၁. ကမ္မူပစယကထာဝဏ္ဏနာ • 11. Kammūpacayakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁၁. ကမ္မူပစယကထာဝဏ္ဏနာ • 11. Kammūpacayakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁၁. ကမ္မူပစယကထာဝဏ္ဏနာ • 11. Kammūpacayakathāvaṇṇanā
