| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೧೫. ಪನ್ನರಸಮವಗ್ಗೋ
15. Pannarasamavaggo
(೧೫೫) ೧೧. ಕಮ್ಮೂಪಚಯಕಥಾ
(155) 11. Kammūpacayakathā
೭೩೭. ಅಞ್ಞಂ ಕಮ್ಮಂ ಅಞ್ಞೋ ಕಮ್ಮೂಪಚಯೋತಿ? ಆಮನ್ತಾ। ಅಞ್ಞೋ ಫಸ್ಸೋ, ಅಞ್ಞೋ ಫಸ್ಸೂಪಚಯೋ; ಅಞ್ಞಾ ವೇದನಾ, ಅಞ್ಞೋ ವೇದನೂಪಚಯೋ; ಅಞ್ಞಾ ಸಞ್ಞಾ, ಅಞ್ಞೋ ಸಞ್ಞೂಪಚಯೋ; ಅಞ್ಞಾ ಚೇತನಾ, ಅಞ್ಞೋ ಚೇತನೂಪಚಯೋ; ಅಞ್ಞಂ ಚಿತ್ತಂ, ಅಞ್ಞೋ ಚಿತ್ತೂಪಚಯೋ; ಅಞ್ಞಾ ಸದ್ಧಾ, ಅಞ್ಞೋ ಸದ್ಧೂಪಚಯೋ; ಅಞ್ಞಂ ವೀರಿಯಂ, ಅಞ್ಞೋ ವೀರಿಯೂಪಚಯೋ; ಅಞ್ಞಾ ಸತಿ, ಅಞ್ಞೋ ಸತೂಪಚಯೋ ; ಅಞ್ಞೋ ಸಮಾಧಿ, ಅಞ್ಞೋ ಸಮಾಧೂಪಚಯೋ; ಅಞ್ಞಾ ಪಞ್ಞಾ, ಅಞ್ಞೋ ಪಞ್ಞೂಪಚಯೋ; ಅಞ್ಞೋ ರಾಗೋ, ಅಞ್ಞೋ ರಾಗೂಪಚಯೋ…ಪೇ॰… ಅಞ್ಞಂ ಅನೋತ್ತಪ್ಪಂ, ಅಞ್ಞೋ ಅನೋತ್ತಪ್ಪೂಪಚಯೋತಿ? ನ ಹೇವಂ ವತ್ತಬ್ಬೇ…ಪೇ॰…।
737. Aññaṃ kammaṃ añño kammūpacayoti? Āmantā. Añño phasso, añño phassūpacayo; aññā vedanā, añño vedanūpacayo; aññā saññā, añño saññūpacayo; aññā cetanā, añño cetanūpacayo; aññaṃ cittaṃ, añño cittūpacayo; aññā saddhā, añño saddhūpacayo; aññaṃ vīriyaṃ, añño vīriyūpacayo; aññā sati, añño satūpacayo ; añño samādhi, añño samādhūpacayo; aññā paññā, añño paññūpacayo; añño rāgo, añño rāgūpacayo…pe… aññaṃ anottappaṃ, añño anottappūpacayoti? Na hevaṃ vattabbe…pe….
೭೩೮. ಅಞ್ಞಂ ಕಮ್ಮಂ, ಅಞ್ಞೋ ಕಮ್ಮೂಪಚಯೋತಿ? ಆಮನ್ತಾ। ಕಮ್ಮೂಪಚಯೋ ಕಮ್ಮೇನ ಸಹಜಾತೋತಿ? ನ ಹೇವಂ ವತ್ತಬ್ಬೇ…ಪೇ॰…।
738. Aññaṃ kammaṃ, añño kammūpacayoti? Āmantā. Kammūpacayo kammena sahajātoti? Na hevaṃ vattabbe…pe….
ಕಮ್ಮೂಪಚಯೋ ಕಮ್ಮೇನ ಸಹಜಾತೋತಿ, ಆಮನ್ತಾ। ಕುಸಲೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಕುಸಲೋತಿ, ನ ಹೇವಂ ವತ್ತಬ್ಬೇ…ಪೇ॰…।
Kammūpacayo kammena sahajātoti, āmantā. Kusalena kammena sahajāto kammūpacayo kusaloti, na hevaṃ vattabbe…pe….
ಕುಸಲೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಕುಸಲೋತಿ? ಆಮನ್ತಾ। ಸುಖಾಯ ವೇದನಾಯ ಸಮ್ಪಯುತ್ತೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಸುಖಾಯ ವೇದನಾಯ ಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ॰… ದುಕ್ಖಾಯ ವೇದನಾಯ…ಪೇ॰… ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ॰…।
Kusalena kammena sahajāto kammūpacayo kusaloti? Āmantā. Sukhāya vedanāya sampayuttena kammena sahajāto kammūpacayo sukhāya vedanāya sampayuttoti? Na hevaṃ vattabbe…pe… dukkhāya vedanāya…pe… adukkhamasukhāya vedanāya sampayuttena kammena sahajāto kammūpacayo adukkhamasukhāya vedanāya sampayuttoti? Na hevaṃ vattabbe…pe….
೭೩೯. ಕಮ್ಮೂಪಚಯೋ ಕಮ್ಮೇನ ಸಹಜಾತೋತಿ? ಆಮನ್ತಾ। ಅಕುಸಲೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ॰…।
739. Kammūpacayo kammena sahajātoti? Āmantā. Akusalena kammena sahajāto kammūpacayo akusaloti? Na hevaṃ vattabbe…pe….
ಅಕುಸಲೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಅಕುಸಲೋತಿ? ಆಮನ್ತಾ। ಸುಖಾಯ ವೇದನಾಯ ಸಮ್ಪಯುತ್ತೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಸುಖಾಯ ವೇದನಾಯ ಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ॰… ದುಕ್ಖಾಯ ವೇದನಾಯ…ಪೇ॰… ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತೇನ ಕಮ್ಮೇನ ಸಹಜಾತೋ ಕಮ್ಮೂಪಚಯೋ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ॰…।
Akusalena kammena sahajāto kammūpacayo akusaloti? Āmantā. Sukhāya vedanāya sampayuttena kammena sahajāto kammūpacayo sukhāya vedanāya sampayuttoti? Na hevaṃ vattabbe…pe… dukkhāya vedanāya…pe… adukkhamasukhāya vedanāya sampayuttena kammena sahajāto kammūpacayo adukkhamasukhāya vedanāya sampayuttoti? Na hevaṃ vattabbe…pe….
೭೪೦. ಕಮ್ಮಂ ಚಿತ್ತೇನ ಸಹಜಾತಂ, ಕಮ್ಮಂ ಸಾರಮ್ಮಣನ್ತಿ? ಆಮನ್ತಾ। ಕಮ್ಮೂಪಚಯೋ ಚಿತ್ತೇನ ಸಹಜಾತೋ, ಕಮ್ಮೂಪಚಯೋ ಸಾರಮ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ॰… ಕಮ್ಮೂಪಚಯೋ ಚಿತ್ತೇನ ಸಹಜಾತೋ , ಕಮ್ಮೂಪಚಯೋ ಅನಾರಮ್ಮಣೋತಿ ? ಆಮನ್ತಾ। ಕಮ್ಮಂ ಚಿತ್ತೇನ ಸಹಜಾತಂ, ಕಮ್ಮಂ ಅನಾರಮ್ಮಣನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
740. Kammaṃ cittena sahajātaṃ, kammaṃ sārammaṇanti? Āmantā. Kammūpacayo cittena sahajāto, kammūpacayo sārammaṇoti? Na hevaṃ vattabbe…pe… kammūpacayo cittena sahajāto , kammūpacayo anārammaṇoti ? Āmantā. Kammaṃ cittena sahajātaṃ, kammaṃ anārammaṇanti? Na hevaṃ vattabbe…pe….
ಕಮ್ಮಂ ಚಿತ್ತೇನ ಸಹಜಾತಂ, ಚಿತ್ತಂ ಭಿಜ್ಜಮಾನಂ ಕಮ್ಮಂ ಭಿಜ್ಜತೀತಿ? ಆಮನ್ತಾ। ಕಮ್ಮೂಪಚಯೋ ಚಿತ್ತೇನ ಸಹಜಾತೋ, ಚಿತ್ತಂ ಭಿಜ್ಜಮಾನಂ ಕಮ್ಮೂಪಚಯೋ ಭಿಜ್ಜತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Kammaṃ cittena sahajātaṃ, cittaṃ bhijjamānaṃ kammaṃ bhijjatīti? Āmantā. Kammūpacayo cittena sahajāto, cittaṃ bhijjamānaṃ kammūpacayo bhijjatīti? Na hevaṃ vattabbe…pe….
ಕಮ್ಮೂಪಚಯೋ ಚಿತ್ತೇನ ಸಹಜಾತೋ, ಚಿತ್ತಂ ಭಿಜ್ಜಮಾನಂ ಕಮ್ಮೂಪಚಯೋ ನ ಭಿಜ್ಜತೀತಿ? ಆಮನ್ತಾ। ಕಮ್ಮಂ ಚಿತ್ತೇನ ಸಹಜಾತಂ, ಚಿತ್ತಂ ಭಿಜ್ಜಮಾನಂ ಕಮ್ಮಂ ನ ಭಿಜ್ಜತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Kammūpacayo cittena sahajāto, cittaṃ bhijjamānaṃ kammūpacayo na bhijjatīti? Āmantā. Kammaṃ cittena sahajātaṃ, cittaṃ bhijjamānaṃ kammaṃ na bhijjatīti? Na hevaṃ vattabbe…pe….
೭೪೧. ಕಮ್ಮಮ್ಹಿ ಕಮ್ಮೂಪಚಯೋತಿ? ಆಮನ್ತಾ। ತಞ್ಞೇವ ಕಮ್ಮಂ ಸೋ ಕಮ್ಮೂಪಚಯೋತಿ? ನ ಹೇವಂ ವತ್ತಬ್ಬೇ…ಪೇ॰…।
741. Kammamhi kammūpacayoti? Āmantā. Taññeva kammaṃ so kammūpacayoti? Na hevaṃ vattabbe…pe….
ಕಮ್ಮಮ್ಹಿ ಕಮ್ಮೂಪಚಯೋ, ಕಮ್ಮೂಪಚಯತೋ ವಿಪಾಕೋ ನಿಬ್ಬತ್ತತೀತಿ? ಆಮನ್ತಾ। ತಞ್ಞೇವ ಕಮ್ಮಂ, ಸೋ ಕಮ್ಮೂಪಚಯೋ, ಸೋ ಕಮ್ಮವಿಪಾಕೋತಿ? ನ ಹೇವಂ ವತ್ತಬ್ಬೇ…ಪೇ॰…।
Kammamhi kammūpacayo, kammūpacayato vipāko nibbattatīti? Āmantā. Taññeva kammaṃ, so kammūpacayo, so kammavipākoti? Na hevaṃ vattabbe…pe….
ಕಮ್ಮಮ್ಹಿ ಕಮ್ಮೂಪಚಯೋ, ಕಮ್ಮೂಪಚಯತೋ ವಿಪಾಕೋ ನಿಬ್ಬತ್ತತಿ, ವಿಪಾಕೋ ಸಾರಮ್ಮಣೋತಿ? ಆಮನ್ತಾ। ಕಮ್ಮೂಪಚಯೋ ಸಾರಮ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ॰… ಕಮ್ಮೂಪಚಯೋ ಅನಾರಮ್ಮಣೋತಿ? ಆಮನ್ತಾ। ವಿಪಾಕೋ ಅನಾರಮ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ॰…।
Kammamhi kammūpacayo, kammūpacayato vipāko nibbattati, vipāko sārammaṇoti? Āmantā. Kammūpacayo sārammaṇoti? Na hevaṃ vattabbe…pe… kammūpacayo anārammaṇoti? Āmantā. Vipāko anārammaṇoti? Na hevaṃ vattabbe…pe….
೭೪೨. ಅಞ್ಞಂ ಕಮ್ಮಂ ಅಞ್ಞೋ ಕಮ್ಮೂಪಚಯೋತಿ, ಆಮನ್ತಾ। ನನು ವುತ್ತಂ ಭಗವತಾ – ‘‘ಇಧ, ಪುಣ್ಣ, ಏಕಚ್ಚೋ ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ 1 ಕಾಯಸಙ್ಖಾರಂ ಅಭಿಸಙ್ಖರೋತಿ, ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ ವಚೀಸಙ್ಖಾರಂ…ಪೇ॰… ಮನೋಸಙ್ಖಾರಂ ಅಭಿಸಙ್ಖರೋತಿ, ಸೋ ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ ಕಾಯಸಙ್ಖಾರಂ ಅಭಿಸಙ್ಖರಿತ್ವಾ, ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ ವಚೀಸಙ್ಖಾರಂ…ಪೇ॰… ಮನೋಸಙ್ಖಾರಂ ಅಭಿಸಙ್ಖರಿತ್ವಾ ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ ಲೋಕಂ ಉಪಪಜ್ಜತಿ। ತಮೇನಂ ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ ಲೋಕಂ ಉಪಪನ್ನಂ ಸಮಾನಂ ಸಬ್ಯಾಬಜ್ಝಾಪಿ ಅಬ್ಯಾಬಜ್ಝಾಪಿ ಫಸ್ಸಾ ಫುಸನ್ತಿ। ಸೋ ಸಬ್ಯಾಬಜ್ಝೇಹಿಪಿ ಅಬ್ಯಾಬಜ್ಝೇಹಿಪಿ ಫಸ್ಸೇಹಿ ಫುಟ್ಠೋ ಸಮಾನೋ ಸಬ್ಯಾಬಜ್ಝಮ್ಪಿ ಅಬ್ಯಾಬಜ್ಝಮ್ಪಿ ವೇದನಂ ವೇದೇತಿ ವೋಕಿಣ್ಣಸುಖದುಕ್ಖಂ, ಸೇಯ್ಯಥಾಪಿ ಮನುಸ್ಸಾ ಏಕಚ್ಚೇ ಚ ದೇವಾ ಏಕಚ್ಚೇ ಚ ವಿನಿಪಾತಿಕಾ। ಇತಿ ಖೋ, ಪುಣ್ಣ, ಭೂತಾ ಭೂತಸ್ಸ ಉಪಪತ್ತಿ ಹೋತಿ, ಯಂ ಕರೋತಿ ತೇನ ಉಪಪಜ್ಜತಿ, ಉಪಪನ್ನಮೇತಂ ಫಸ್ಸಾ ಫುಸನ್ತಿ। ಏವಮ್ಪಾಹಂ, ಪುಣ್ಣ, ‘ಕಮ್ಮದಾಯಾದಾ ಸತ್ತಾ’ತಿ ವದಾಮೀ’’ತಿ 2। ಅತ್ಥೇವ ಸುತ್ತನ್ತೋತಿ? ಆಮನ್ತಾ। ತೇನ ಹಿ ನ ವತ್ತಬ್ಬಂ – ‘‘ಅಞ್ಞಂ ಕಮ್ಮಂ, ಅಞ್ಞೋ ಕಮ್ಮೂಪಚಯೋ’’ತಿ।
742. Aññaṃ kammaṃ añño kammūpacayoti, āmantā. Nanu vuttaṃ bhagavatā – ‘‘idha, puṇṇa, ekacco sabyābajjhampi abyābajjhampi 3 kāyasaṅkhāraṃ abhisaṅkharoti, sabyābajjhampi abyābajjhampi vacīsaṅkhāraṃ…pe… manosaṅkhāraṃ abhisaṅkharoti, so sabyābajjhampi abyābajjhampi kāyasaṅkhāraṃ abhisaṅkharitvā, sabyābajjhampi abyābajjhampi vacīsaṅkhāraṃ…pe… manosaṅkhāraṃ abhisaṅkharitvā sabyābajjhampi abyābajjhampi lokaṃ upapajjati. Tamenaṃ sabyābajjhampi abyābajjhampi lokaṃ upapannaṃ samānaṃ sabyābajjhāpi abyābajjhāpi phassā phusanti. So sabyābajjhehipi abyābajjhehipi phassehi phuṭṭho samāno sabyābajjhampi abyābajjhampi vedanaṃ vedeti vokiṇṇasukhadukkhaṃ, seyyathāpi manussā ekacce ca devā ekacce ca vinipātikā. Iti kho, puṇṇa, bhūtā bhūtassa upapatti hoti, yaṃ karoti tena upapajjati, upapannametaṃ phassā phusanti. Evampāhaṃ, puṇṇa, ‘kammadāyādā sattā’ti vadāmī’’ti 4. Attheva suttantoti? Āmantā. Tena hi na vattabbaṃ – ‘‘aññaṃ kammaṃ, añño kammūpacayo’’ti.
ಕಮ್ಮೂಪಚಯಕಥಾ ನಿಟ್ಠಿತಾ।
Kammūpacayakathā niṭṭhitā.
ಪನ್ನರಸಮವಗ್ಗೋ।
Pannarasamavaggo.
ತಸ್ಸುದ್ದಾನಂ –
Tassuddānaṃ –
ಪಚ್ಚಯತಾ ವವತ್ಥಿತಾ, ಪಟಿಚ್ಚಸಮುಪ್ಪಾದೋ, ಅದ್ಧಾ, ಖಣೋ ಲಯೋ ಮುಹುತ್ತಂ, ಚತ್ತಾರೋ ಆಸವಾ ಅನಾಸವಾ, ಲೋಕುತ್ತರಾನಂ ಧಮ್ಮಾನಂ ಜರಾಮರಣಂ ಲೋಕುತ್ತರಾ, ಸಞ್ಞಾವೇದಯಿತನಿರೋಧಸಮಾಪತ್ತಿ ಲೋಕುತ್ತರಾ, ಸಞ್ಞಾವೇದಯಿತನಿರೋಧಸಮಾಪತ್ತಿ ಲೋಕಿಯಾ, ಸಞ್ಞಾವೇದಯಿತನಿರೋಧಂ ಸಮಾಪನ್ನೋ ಕಾಲಂ ಕರೇಯ್ಯ, ಸ್ವೇವ ಮಗ್ಗೋ ಅಸಞ್ಞಸತ್ತುಪಪತ್ತಿಯಾ , ಅಞ್ಞಂ ಕಮ್ಮಂ ಅಞ್ಞೋ ಕಮ್ಮೂಪಚಯೋತಿ।
Paccayatā vavatthitā, paṭiccasamuppādo, addhā, khaṇo layo muhuttaṃ, cattāro āsavā anāsavā, lokuttarānaṃ dhammānaṃ jarāmaraṇaṃ lokuttarā, saññāvedayitanirodhasamāpatti lokuttarā, saññāvedayitanirodhasamāpatti lokiyā, saññāvedayitanirodhaṃ samāpanno kālaṃ kareyya, sveva maggo asaññasattupapattiyā , aññaṃ kammaṃ añño kammūpacayoti.
ತತಿಯೋ ಪಣ್ಣಾಸಕೋ।
Tatiyo paṇṇāsako.
ತಸ್ಸುದ್ದಾನಂ –
Tassuddānaṃ –
ಅನುಸಯಾ, ಸಂವರೋ, ಕಪ್ಪೋ, ಮೂಲಞ್ಚ ವವತ್ಥಿತಾತಿ।
Anusayā, saṃvaro, kappo, mūlañca vavatthitāti.
Footnotes:
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೧೧. ಕಮ್ಮೂಪಚಯಕಥಾವಣ್ಣನಾ • 11. Kammūpacayakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೧೧. ಕಮ್ಮೂಪಚಯಕಥಾವಣ್ಣನಾ • 11. Kammūpacayakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೧೧. ಕಮ್ಮೂಪಚಯಕಥಾವಣ್ಣನಾ • 11. Kammūpacayakathāvaṇṇanā
