| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༡༥. པནྣརསམཝགྒོ
15. Pannarasamavaggo
(༡༥༥) ༡༡. ཀམྨཱུཔཙཡཀཐཱ
(155) 11. Kammūpacayakathā
༧༣༧. ཨཉྙཾ ཀམྨཾ ཨཉྙོ ཀམྨཱུཔཙཡོཏི? ཨཱམནྟཱ། ཨཉྙོ ཕསྶོ, ཨཉྙོ ཕསྶཱུཔཙཡོ; ཨཉྙཱ ཝེདནཱ, ཨཉྙོ ཝེདནཱུཔཙཡོ; ཨཉྙཱ སཉྙཱ, ཨཉྙོ སཉྙཱུཔཙཡོ; ཨཉྙཱ ཙེཏནཱ, ཨཉྙོ ཙེཏནཱུཔཙཡོ; ཨཉྙཾ ཙིཏྟཾ, ཨཉྙོ ཙིཏྟཱུཔཙཡོ; ཨཉྙཱ སདྡྷཱ, ཨཉྙོ སདྡྷཱུཔཙཡོ; ཨཉྙཾ ཝཱིརིཡཾ, ཨཉྙོ ཝཱིརིཡཱུཔཙཡོ; ཨཉྙཱ སཏི, ཨཉྙོ སཏཱུཔཙཡོ ; ཨཉྙོ སམཱདྷི, ཨཉྙོ སམཱདྷཱུཔཙཡོ; ཨཉྙཱ པཉྙཱ, ཨཉྙོ པཉྙཱུཔཙཡོ; ཨཉྙོ རཱགོ, ཨཉྙོ རཱགཱུཔཙཡོ…པེ॰… ཨཉྙཾ ཨནོཏྟཔྤཾ, ཨཉྙོ ཨནོཏྟཔྤཱུཔཙཡོཏི? ན ཧེཝཾ ཝཏྟབྦེ…པེ॰…།
737. Aññaṃ kammaṃ añño kammūpacayoti? Āmantā. Añño phasso, añño phassūpacayo; aññā vedanā, añño vedanūpacayo; aññā saññā, añño saññūpacayo; aññā cetanā, añño cetanūpacayo; aññaṃ cittaṃ, añño cittūpacayo; aññā saddhā, añño saddhūpacayo; aññaṃ vīriyaṃ, añño vīriyūpacayo; aññā sati, añño satūpacayo ; añño samādhi, añño samādhūpacayo; aññā paññā, añño paññūpacayo; añño rāgo, añño rāgūpacayo…pe… aññaṃ anottappaṃ, añño anottappūpacayoti? Na hevaṃ vattabbe…pe….
༧༣༨. ཨཉྙཾ ཀམྨཾ, ཨཉྙོ ཀམྨཱུཔཙཡོཏི? ཨཱམནྟཱ། ཀམྨཱུཔཙཡོ ཀམྨེན སཧཛཱཏོཏི? ན ཧེཝཾ ཝཏྟབྦེ…པེ॰…།
738. Aññaṃ kammaṃ, añño kammūpacayoti? Āmantā. Kammūpacayo kammena sahajātoti? Na hevaṃ vattabbe…pe….
ཀམྨཱུཔཙཡོ ཀམྨེན སཧཛཱཏོཏི, ཨཱམནྟཱ། ཀུསལེན ཀམྨེན སཧཛཱཏོ ཀམྨཱུཔཙཡོ ཀུསལོཏི, ན ཧེཝཾ ཝཏྟབྦེ…པེ॰…།
Kammūpacayo kammena sahajātoti, āmantā. Kusalena kammena sahajāto kammūpacayo kusaloti, na hevaṃ vattabbe…pe….
ཀུསལེན ཀམྨེན སཧཛཱཏོ ཀམྨཱུཔཙཡོ ཀུསལོཏི? ཨཱམནྟཱ། སུཁཱཡ ཝེདནཱཡ སམྤཡུཏྟེན ཀམྨེན སཧཛཱཏོ ཀམྨཱུཔཙཡོ སུཁཱཡ ཝེདནཱཡ སམྤཡུཏྟོཏི? ན ཧེཝཾ ཝཏྟབྦེ…པེ॰… དུཀྑཱཡ ཝེདནཱཡ…པེ॰… ཨདུཀྑམསུཁཱཡ ཝེདནཱཡ སམྤཡུཏྟེན ཀམྨེན སཧཛཱཏོ ཀམྨཱུཔཙཡོ ཨདུཀྑམསུཁཱཡ ཝེདནཱཡ སམྤཡུཏྟོཏི? ན ཧེཝཾ ཝཏྟབྦེ…པེ॰…།
Kusalena kammena sahajāto kammūpacayo kusaloti? Āmantā. Sukhāya vedanāya sampayuttena kammena sahajāto kammūpacayo sukhāya vedanāya sampayuttoti? Na hevaṃ vattabbe…pe… dukkhāya vedanāya…pe… adukkhamasukhāya vedanāya sampayuttena kammena sahajāto kammūpacayo adukkhamasukhāya vedanāya sampayuttoti? Na hevaṃ vattabbe…pe….
༧༣༩. ཀམྨཱུཔཙཡོ ཀམྨེན སཧཛཱཏོཏི? ཨཱམནྟཱ། ཨཀུསལེན ཀམྨེན སཧཛཱཏོ ཀམྨཱུཔཙཡོ ཨཀུསལོཏི? ན ཧེཝཾ ཝཏྟབྦེ…པེ॰…།
739. Kammūpacayo kammena sahajātoti? Āmantā. Akusalena kammena sahajāto kammūpacayo akusaloti? Na hevaṃ vattabbe…pe….
ཨཀུསལེན ཀམྨེན སཧཛཱཏོ ཀམྨཱུཔཙཡོ ཨཀུསལོཏི? ཨཱམནྟཱ། སུཁཱཡ ཝེདནཱཡ སམྤཡུཏྟེན ཀམྨེན སཧཛཱཏོ ཀམྨཱུཔཙཡོ སུཁཱཡ ཝེདནཱཡ སམྤཡུཏྟོཏི? ན ཧེཝཾ ཝཏྟབྦེ…པེ॰… དུཀྑཱཡ ཝེདནཱཡ…པེ॰… ཨདུཀྑམསུཁཱཡ ཝེདནཱཡ སམྤཡུཏྟེན ཀམྨེན སཧཛཱཏོ ཀམྨཱུཔཙཡོ ཨདུཀྑམསུཁཱཡ ཝེདནཱཡ སམྤཡུཏྟོཏི? ན ཧེཝཾ ཝཏྟབྦེ…པེ॰…།
Akusalena kammena sahajāto kammūpacayo akusaloti? Āmantā. Sukhāya vedanāya sampayuttena kammena sahajāto kammūpacayo sukhāya vedanāya sampayuttoti? Na hevaṃ vattabbe…pe… dukkhāya vedanāya…pe… adukkhamasukhāya vedanāya sampayuttena kammena sahajāto kammūpacayo adukkhamasukhāya vedanāya sampayuttoti? Na hevaṃ vattabbe…pe….
༧༤༠. ཀམྨཾ ཙིཏྟེན སཧཛཱཏཾ, ཀམྨཾ སཱརམྨཎནྟི? ཨཱམནྟཱ། ཀམྨཱུཔཙཡོ ཙིཏྟེན སཧཛཱཏོ, ཀམྨཱུཔཙཡོ སཱརམྨཎོཏི? ན ཧེཝཾ ཝཏྟབྦེ…པེ॰… ཀམྨཱུཔཙཡོ ཙིཏྟེན སཧཛཱཏོ , ཀམྨཱུཔཙཡོ ཨནཱརམྨཎོཏི ? ཨཱམནྟཱ། ཀམྨཾ ཙིཏྟེན སཧཛཱཏཾ, ཀམྨཾ ཨནཱརམྨཎནྟི? ན ཧེཝཾ ཝཏྟབྦེ…པེ॰…།
740. Kammaṃ cittena sahajātaṃ, kammaṃ sārammaṇanti? Āmantā. Kammūpacayo cittena sahajāto, kammūpacayo sārammaṇoti? Na hevaṃ vattabbe…pe… kammūpacayo cittena sahajāto , kammūpacayo anārammaṇoti ? Āmantā. Kammaṃ cittena sahajātaṃ, kammaṃ anārammaṇanti? Na hevaṃ vattabbe…pe….
ཀམྨཾ ཙིཏྟེན སཧཛཱཏཾ, ཙིཏྟཾ བྷིཛྫམཱནཾ ཀམྨཾ བྷིཛྫཏཱིཏི? ཨཱམནྟཱ། ཀམྨཱུཔཙཡོ ཙིཏྟེན སཧཛཱཏོ, ཙིཏྟཾ བྷིཛྫམཱནཾ ཀམྨཱུཔཙཡོ བྷིཛྫཏཱིཏི? ན ཧེཝཾ ཝཏྟབྦེ…པེ॰…།
Kammaṃ cittena sahajātaṃ, cittaṃ bhijjamānaṃ kammaṃ bhijjatīti? Āmantā. Kammūpacayo cittena sahajāto, cittaṃ bhijjamānaṃ kammūpacayo bhijjatīti? Na hevaṃ vattabbe…pe….
ཀམྨཱུཔཙཡོ ཙིཏྟེན སཧཛཱཏོ, ཙིཏྟཾ བྷིཛྫམཱནཾ ཀམྨཱུཔཙཡོ ན བྷིཛྫཏཱིཏི? ཨཱམནྟཱ། ཀམྨཾ ཙིཏྟེན སཧཛཱཏཾ, ཙིཏྟཾ བྷིཛྫམཱནཾ ཀམྨཾ ན བྷིཛྫཏཱིཏི? ན ཧེཝཾ ཝཏྟབྦེ…པེ॰…།
Kammūpacayo cittena sahajāto, cittaṃ bhijjamānaṃ kammūpacayo na bhijjatīti? Āmantā. Kammaṃ cittena sahajātaṃ, cittaṃ bhijjamānaṃ kammaṃ na bhijjatīti? Na hevaṃ vattabbe…pe….
༧༤༡. ཀམྨམྷི ཀམྨཱུཔཙཡོཏི? ཨཱམནྟཱ། ཏཉྙེཝ ཀམྨཾ སོ ཀམྨཱུཔཙཡོཏི? ན ཧེཝཾ ཝཏྟབྦེ…པེ॰…།
741. Kammamhi kammūpacayoti? Āmantā. Taññeva kammaṃ so kammūpacayoti? Na hevaṃ vattabbe…pe….
ཀམྨམྷི ཀམྨཱུཔཙཡོ, ཀམྨཱུཔཙཡཏོ ཝིཔཱཀོ ནིབྦཏྟཏཱིཏི? ཨཱམནྟཱ། ཏཉྙེཝ ཀམྨཾ, སོ ཀམྨཱུཔཙཡོ, སོ ཀམྨཝིཔཱཀོཏི? ན ཧེཝཾ ཝཏྟབྦེ…པེ॰…།
Kammamhi kammūpacayo, kammūpacayato vipāko nibbattatīti? Āmantā. Taññeva kammaṃ, so kammūpacayo, so kammavipākoti? Na hevaṃ vattabbe…pe….
ཀམྨམྷི ཀམྨཱུཔཙཡོ, ཀམྨཱུཔཙཡཏོ ཝིཔཱཀོ ནིབྦཏྟཏི, ཝིཔཱཀོ སཱརམྨཎོཏི? ཨཱམནྟཱ། ཀམྨཱུཔཙཡོ སཱརམྨཎོཏི? ན ཧེཝཾ ཝཏྟབྦེ…པེ॰… ཀམྨཱུཔཙཡོ ཨནཱརམྨཎོཏི? ཨཱམནྟཱ། ཝིཔཱཀོ ཨནཱརམྨཎོཏི? ན ཧེཝཾ ཝཏྟབྦེ…པེ॰…།
Kammamhi kammūpacayo, kammūpacayato vipāko nibbattati, vipāko sārammaṇoti? Āmantā. Kammūpacayo sārammaṇoti? Na hevaṃ vattabbe…pe… kammūpacayo anārammaṇoti? Āmantā. Vipāko anārammaṇoti? Na hevaṃ vattabbe…pe….
༧༤༢. ཨཉྙཾ ཀམྨཾ ཨཉྙོ ཀམྨཱུཔཙཡོཏི, ཨཱམནྟཱ། ནནུ ཝུཏྟཾ བྷགཝཏཱ – ‘‘ཨིདྷ, པུཎྞ, ཨེཀཙྩོ སབྱཱབཛ྄ཛྷམྤི ཨབྱཱབཛ྄ཛྷམྤི 1 ཀཱཡསངྑཱརཾ ཨབྷིསངྑརོཏི, སབྱཱབཛ྄ཛྷམྤི ཨབྱཱབཛ྄ཛྷམྤི ཝཙཱིསངྑཱརཾ…པེ॰… མནོསངྑཱརཾ ཨབྷིསངྑརོཏི, སོ སབྱཱབཛ྄ཛྷམྤི ཨབྱཱབཛ྄ཛྷམྤི ཀཱཡསངྑཱརཾ ཨབྷིསངྑརིཏྭཱ, སབྱཱབཛ྄ཛྷམྤི ཨབྱཱབཛ྄ཛྷམྤི ཝཙཱིསངྑཱརཾ…པེ॰… མནོསངྑཱརཾ ཨབྷིསངྑརིཏྭཱ སབྱཱབཛ྄ཛྷམྤི ཨབྱཱབཛ྄ཛྷམྤི ལོཀཾ ཨུཔཔཛྫཏི། ཏམེནཾ སབྱཱབཛ྄ཛྷམྤི ཨབྱཱབཛ྄ཛྷམྤི ལོཀཾ ཨུཔཔནྣཾ སམཱནཾ སབྱཱབཛ྄ཛྷཱཔི ཨབྱཱབཛ྄ཛྷཱཔི ཕསྶཱ ཕུསནྟི། སོ སབྱཱབཛ྄ཛྷེཧིཔི ཨབྱཱབཛ྄ཛྷེཧིཔི ཕསྶེཧི ཕུཊྛོ སམཱནོ སབྱཱབཛ྄ཛྷམྤི ཨབྱཱབཛ྄ཛྷམྤི ཝེདནཾ ཝེདེཏི ཝོཀིཎྞསུཁདུཀྑཾ, སེཡྻཐཱཔི མནུསྶཱ ཨེཀཙྩེ ཙ དེཝཱ ཨེཀཙྩེ ཙ ཝིནིཔཱཏིཀཱ། ཨིཏི ཁོ, པུཎྞ, བྷཱུཏཱ བྷཱུཏསྶ ཨུཔཔཏྟི ཧོཏི, ཡཾ ཀརོཏི ཏེན ཨུཔཔཛྫཏི, ཨུཔཔནྣམེཏཾ ཕསྶཱ ཕུསནྟི། ཨེཝམྤཱཧཾ, པུཎྞ, ‘ཀམྨདཱཡཱདཱ སཏྟཱ’ཏི ཝདཱམཱི’’ཏི 2། ཨཏྠེཝ སུཏྟནྟོཏི? ཨཱམནྟཱ། ཏེན ཧི ན ཝཏྟབྦཾ – ‘‘ཨཉྙཾ ཀམྨཾ, ཨཉྙོ ཀམྨཱུཔཙཡོ’’ཏི།
742. Aññaṃ kammaṃ añño kammūpacayoti, āmantā. Nanu vuttaṃ bhagavatā – ‘‘idha, puṇṇa, ekacco sabyābajjhampi abyābajjhampi 3 kāyasaṅkhāraṃ abhisaṅkharoti, sabyābajjhampi abyābajjhampi vacīsaṅkhāraṃ…pe… manosaṅkhāraṃ abhisaṅkharoti, so sabyābajjhampi abyābajjhampi kāyasaṅkhāraṃ abhisaṅkharitvā, sabyābajjhampi abyābajjhampi vacīsaṅkhāraṃ…pe… manosaṅkhāraṃ abhisaṅkharitvā sabyābajjhampi abyābajjhampi lokaṃ upapajjati. Tamenaṃ sabyābajjhampi abyābajjhampi lokaṃ upapannaṃ samānaṃ sabyābajjhāpi abyābajjhāpi phassā phusanti. So sabyābajjhehipi abyābajjhehipi phassehi phuṭṭho samāno sabyābajjhampi abyābajjhampi vedanaṃ vedeti vokiṇṇasukhadukkhaṃ, seyyathāpi manussā ekacce ca devā ekacce ca vinipātikā. Iti kho, puṇṇa, bhūtā bhūtassa upapatti hoti, yaṃ karoti tena upapajjati, upapannametaṃ phassā phusanti. Evampāhaṃ, puṇṇa, ‘kammadāyādā sattā’ti vadāmī’’ti 4. Attheva suttantoti? Āmantā. Tena hi na vattabbaṃ – ‘‘aññaṃ kammaṃ, añño kammūpacayo’’ti.
ཀམྨཱུཔཙཡཀཐཱ ནིཊྛིཏཱ།
Kammūpacayakathā niṭṭhitā.
པནྣརསམཝགྒོ།
Pannarasamavaggo.
ཏསྶུདྡཱནཾ –
Tassuddānaṃ –
པཙྩཡཏཱ ཝཝཏྠིཏཱ, པཊིཙྩསམུཔྤཱདོ, ཨདྡྷཱ, ཁཎོ ལཡོ མུཧུཏྟཾ, ཙཏྟཱརོ ཨཱསཝཱ ཨནཱསཝཱ, ལོཀུཏྟརཱནཾ དྷམྨཱནཾ ཛརཱམརཎཾ ལོཀུཏྟརཱ, སཉྙཱཝེདཡིཏནིརོདྷསམཱཔཏྟི ལོཀུཏྟརཱ, སཉྙཱཝེདཡིཏནིརོདྷསམཱཔཏྟི ལོཀིཡཱ, སཉྙཱཝེདཡིཏནིརོདྷཾ སམཱཔནྣོ ཀཱལཾ ཀརེཡྻ, སྭེཝ མགྒོ ཨསཉྙསཏྟུཔཔཏྟིཡཱ , ཨཉྙཾ ཀམྨཾ ཨཉྙོ ཀམྨཱུཔཙཡོཏི།
Paccayatā vavatthitā, paṭiccasamuppādo, addhā, khaṇo layo muhuttaṃ, cattāro āsavā anāsavā, lokuttarānaṃ dhammānaṃ jarāmaraṇaṃ lokuttarā, saññāvedayitanirodhasamāpatti lokuttarā, saññāvedayitanirodhasamāpatti lokiyā, saññāvedayitanirodhaṃ samāpanno kālaṃ kareyya, sveva maggo asaññasattupapattiyā , aññaṃ kammaṃ añño kammūpacayoti.
ཏཏིཡོ པཎྞཱསཀོ།
Tatiyo paṇṇāsako.
ཏསྶུདྡཱནཾ –
Tassuddānaṃ –
ཨནུསཡཱ, སཾཝརོ, ཀཔྤོ, མཱུལཉྩ ཝཝཏྠིཏཱཏི།
Anusayā, saṃvaro, kappo, mūlañca vavatthitāti.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༡༡. ཀམྨཱུཔཙཡཀཐཱཝཎྞནཱ • 11. Kammūpacayakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༡༡. ཀམྨཱུཔཙཡཀཐཱཝཎྞནཱ • 11. Kammūpacayakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༡༡. ཀམྨཱུཔཙཡཀཐཱཝཎྞནཱ • 11. Kammūpacayakathāvaṇṇanā
