| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
১১. কম্মূপচযকথাৰণ্ণনা
11. Kammūpacayakathāvaṇṇanā
৭৩৭. ইদানি কম্মূপচযকথা নাম হোতি। তত্থ যেসং কম্মূপচযো নাম কম্মতো অঞ্ঞো চিত্তৰিপ্পযুত্তো অব্যাকতো অনারম্মণোতি লদ্ধি, সেয্যথাপি অন্ধকানঞ্চেৰ সম্মিতিযানঞ্চ; তে সন্ধায অঞ্ঞং কম্মন্তি পুচ্ছা সকৰাদিস্স, পটিঞ্ঞা ইতরস্স। অথ নং ‘‘যদি কম্মতো অঞ্ঞো কম্মূপচযো, ফস্সাদিতোপি অঞ্ঞেন ফস্সূপচযাদিনা ভৰিতব্ব’’ন্তি চোদেতুং অঞ্ঞো ফস্সোতিআদিমাহ। ইতরো লদ্ধিযা অভাৰেন পটিক্খিপতি।
737. Idāni kammūpacayakathā nāma hoti. Tattha yesaṃ kammūpacayo nāma kammato añño cittavippayutto abyākato anārammaṇoti laddhi, seyyathāpi andhakānañceva sammitiyānañca; te sandhāya aññaṃ kammanti pucchā sakavādissa, paṭiññā itarassa. Atha naṃ ‘‘yadi kammato añño kammūpacayo, phassāditopi aññena phassūpacayādinā bhavitabba’’nti codetuṃ añño phassotiādimāha. Itaro laddhiyā abhāvena paṭikkhipati.
৭৩৮-৭৩৯. কম্মেন সহজাতোতি পঞ্হেসু চিত্তৰিপ্পযুত্তং সন্ধায পটিক্খিপতি, চিত্তসম্পযুত্তং সন্ধায পটিজানাতি। কুসলোতি পঞ্হেসুপি চিত্তৰিপ্পযুত্তং সন্ধায পটিজানাতি। পরতো অকুসলোতিপঞ্হেসুপি এসেৰ নযো।
738-739. Kammenasahajātoti pañhesu cittavippayuttaṃ sandhāya paṭikkhipati, cittasampayuttaṃ sandhāya paṭijānāti. Kusaloti pañhesupi cittavippayuttaṃ sandhāya paṭijānāti. Parato akusalotipañhesupi eseva nayo.
৭৪০. সারম্মণোতি পুট্ঠো পন একন্তং অনারম্মণমেৰ ইচ্ছতি, তস্মা পটিক্খিপতি। চিত্তং ভিজ্জমানন্তি যদা চিত্তং ভিজ্জমানং হোতি, তদা কম্মং ভিজ্জতীতি অত্থো। ভুম্মত্থে ৰা পচ্চত্তং, চিত্তে ভিজ্জমানেতি অত্থো। অযমেৰ ৰা পাঠো। তত্থ যস্মা সম্পযুত্তো ভিজ্জতি, ৰিপ্পযুত্তো ন ভিজ্জতি, তস্মা পটিজানাতি চেৰ পটিক্খিপতি চ।
740. Sārammaṇoti puṭṭho pana ekantaṃ anārammaṇameva icchati, tasmā paṭikkhipati. Cittaṃ bhijjamānanti yadā cittaṃ bhijjamānaṃ hoti, tadā kammaṃ bhijjatīti attho. Bhummatthe vā paccattaṃ, citte bhijjamāneti attho. Ayameva vā pāṭho. Tattha yasmā sampayutto bhijjati, vippayutto na bhijjati, tasmā paṭijānāti ceva paṭikkhipati ca.
৭৪১. কম্মম্হি কম্মূপচযোতি কম্মে সতি কম্মূপচযো, কম্মে ৰা পতিট্ঠিতে কম্মূপচযো, কম্মূপচযতোৰ ৰিপাকো নিব্বত্ততি। তস্মিং পন কম্মে নিরুদ্ধে যাৰ অংকুরুপ্পাদা বীজং ৰিয যাৰ ৰিপাকুপ্পাদা কম্মূপচযো তিট্ঠতীতিস্স লদ্ধি, তস্মা পটিজানাতি। তঞ্ঞেৰ কম্মং, সো কম্মূপচযো, সো কম্মৰিপাকোতি যস্মা কম্মম্হি কম্মূপচযো, সো চ যাৰ ৰিপাকুপ্পাদা তিট্ঠতীতিস্স লদ্ধি, তস্মা নং তেসং তিণ্ণম্পি একত্তং পুচ্ছতি ৰিপাকো সারম্মণোতি ইদং ৰিপাকো ৰিয ৰিপাকধম্মধম্মোপি আরম্মণপটিবদ্ধোযেৰাতি চোদনত্থং পুচ্ছতি। ইতরো পন লদ্ধিৰসেনেকং পটিজানাতি, একং পটিক্খিপতি। পটিলোমেপি এসেৰ নযো। সেসমেত্থ যথাপাল়িমেৰ নিয্যাতীতি।
741. Kammamhi kammūpacayoti kamme sati kammūpacayo, kamme vā patiṭṭhite kammūpacayo, kammūpacayatova vipāko nibbattati. Tasmiṃ pana kamme niruddhe yāva aṃkuruppādā bījaṃ viya yāva vipākuppādā kammūpacayo tiṭṭhatītissa laddhi, tasmā paṭijānāti. Taññeva kammaṃ, so kammūpacayo, so kammavipākoti yasmā kammamhi kammūpacayo, so ca yāva vipākuppādā tiṭṭhatītissa laddhi, tasmā naṃ tesaṃ tiṇṇampi ekattaṃ pucchati vipāko sārammaṇoti idaṃ vipāko viya vipākadhammadhammopi ārammaṇapaṭibaddhoyevāti codanatthaṃ pucchati. Itaro pana laddhivasenekaṃ paṭijānāti, ekaṃ paṭikkhipati. Paṭilomepi eseva nayo. Sesamettha yathāpāḷimeva niyyātīti.
কম্মূপচযকথাৰণ্ণনা।
Kammūpacayakathāvaṇṇanā.
পন্নরসমো ৰগ্গো।
Pannarasamo vaggo.
ততিযপণ্ণাসকো সমত্তো।
Tatiyapaṇṇāsako samatto.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১৫৫) ১১. কম্মূপচযকথা • (155) 11. Kammūpacayakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১১. কম্মূপচযকথাৰণ্ণনা • 11. Kammūpacayakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১১. কম্মূপচযকথাৰণ্ণনা • 11. Kammūpacayakathāvaṇṇanā
