| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
6. කාමූපපත්‌තිසුත්‌තං
6. Kāmūpapattisuttaṃ
95. වුත්‌තඤ්‌හෙතං භගවතා, වුත්‌තමරහතාති මෙ සුතං –
95. Vuttañhetaṃ bhagavatā, vuttamarahatāti me sutaṃ –
‘‘තිස්‌සො ඉමා, භික්‌ඛවෙ, කාමූපපත්‌තියො 1. කතමා තිස්‌සො? පච්‌චුපට්‌ඨිතකාමා, නිම්‌මානරතිනො , පරනිම්‌මිතවසවත්‌තිනො – ඉමා ඛො, භික්‌ඛවෙ, තිස්‌සො කාමූපපත්‌තියො’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Tisso imā, bhikkhave, kāmūpapattiyo 2. Katamā tisso? Paccupaṭṭhitakāmā, nimmānaratino , paranimmitavasavattino – imā kho, bhikkhave, tisso kāmūpapattiyo’’ti. Etamatthaṃ bhagavā avoca. Tatthetaṃ iti vuccati –
‘‘පච්‌චුපට්‌ඨිතකාමා ච, යෙ දෙවා වසවත්‌තිනො;
‘‘Paccupaṭṭhitakāmā ca, ye devā vasavattino;
නිම්‌මානරතිනො දෙවා, යෙ චඤ්‌ඤෙ කාමභොගිනො;
Nimmānaratino devā, ye caññe kāmabhogino;
ඉත්‌ථභාවඤ්‌ඤථාභාවං , සංසාරං නාතිවත්‌තරෙ.
Itthabhāvaññathābhāvaṃ , saṃsāraṃ nātivattare.
‘‘එතමාදීනවං ඤත්‌වා, කාමභොගෙසු පණ්‌ඩිතො;
‘‘Etamādīnavaṃ ñatvā, kāmabhogesu paṇḍito;
සබ්‌බෙ පරිච්‌චජෙ කාමෙ, යෙ දිබ්‌බා යෙ ච මානුසා.
Sabbe pariccaje kāme, ye dibbā ye ca mānusā.
‘‘පියරූපසාතගධිතං , ඡෙත්‌වා සොතං දුරච්‌චයං;
‘‘Piyarūpasātagadhitaṃ , chetvā sotaṃ duraccayaṃ;
අසෙසං පරිනිබ්‌බන්‌ති, අසෙසං දුක්‌ඛමච්‌චගුං.
Asesaṃ parinibbanti, asesaṃ dukkhamaccaguṃ.
‘‘අරියද්‌දසා වෙදගුනො, සම්‌මදඤ්‌ඤාය පණ්‌ඩිතා;
‘‘Ariyaddasā vedaguno, sammadaññāya paṇḍitā;
ජාතික්‌ඛයමභිඤ්‌ඤාය, නාගච්‌ඡන්‌ති පුනබ්‌භව’’න්‌ති.
Jātikkhayamabhiññāya, nāgacchanti punabbhava’’nti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. ඡට්‌ඨං.
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 6. කාමූපපත්‌තිසුත්‌තවණ්‌ණනා • 6. Kāmūpapattisuttavaṇṇanā
