| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
4. காணமாதாஸிக்கா²பத³வண்ணனா
4. Kāṇamātāsikkhāpadavaṇṇanā
230. சதுத்த²ஸிக்கா²பதே³ – காணமாதாதி காணாய மாதா. ஸா கிரஸ்ஸா தீ⁴தா அபி⁴ரூபா அஹோஸி, யே யே தங் பஸ்ஸந்தி, தே தே ராகே³ன காணா ஹொந்தி, ராக³ந்தா⁴ ஹொந்தீதி அத்தோ². தஸ்மா பரேஸங் காணபா⁴வகரணதோ ‘‘காணா’’தி விஸ்ஸுதா அஹோஸி. தஸ்ஸா வஸேன மாதாபிஸ்ஸா ‘‘காணமாதா’’தி பாகடா ஜாதா. ஆக³தந்தி ஆக³மனங். கிஸ்மிங் வியாதி கீதி³ஸங் விய; லஜ்ஜனகங் விய ஹோதீதி அதி⁴ப்பாயோ. ரித்தஹத்த²ங் க³ந்துந்தி ரித்தா ஹத்தா² அஸ்மிங் க³மனே ததி³த³ங் ரித்தஹத்த²ங், தங் ரித்தஹத்த²ங் க³மனங் க³ந்துங் லஜ்ஜனகங் விய ஹோதீதி வுத்தங் ஹோதி. பரிக்க²யங் அக³மாஸீதி உபாஸிகா அரியஸாவிகா பி⁴க்கூ² தி³ஸ்வா ஸந்தங் அதா³துங் ந ஸக்கோதி, தஸ்மா தாவ தா³பேஸி, யாவ ஸப்³ப³ங் பரிக்க²யங் அக³மாஸி. த⁴ம்மியா கதா²யாதி எத்த² காணாபி மாது அத்தா²ய தே³ஸியமானங் த⁴ம்மங் ஸுணந்தீ தே³ஸனாபரியோஸானே ஸோதாபன்னா அஹோஸி. உட்டா²யாஸனா பக்காமீதி ஆஸனதோ உட்ட²ஹித்வா க³தோ. ஸோபி புரிஸோ ‘‘ஸத்தா² கிர காணமாதாய நிவேஸனங் அக³மாஸீ’’தி ஸுத்வா காணங் ஆனெத்வா பகதிட்டா²னேயேவ ட²பேஸி.
230. Catutthasikkhāpade – kāṇamātāti kāṇāya mātā. Sā kirassā dhītā abhirūpā ahosi, ye ye taṃ passanti, te te rāgena kāṇā honti, rāgandhā hontīti attho. Tasmā paresaṃ kāṇabhāvakaraṇato ‘‘kāṇā’’ti vissutā ahosi. Tassā vasena mātāpissā ‘‘kāṇamātā’’ti pākaṭā jātā. Āgatanti āgamanaṃ. Kismiṃ viyāti kīdisaṃ viya; lajjanakaṃ viya hotīti adhippāyo. Rittahatthaṃ gantunti rittā hatthā asmiṃ gamane tadidaṃ rittahatthaṃ, taṃ rittahatthaṃ gamanaṃ gantuṃ lajjanakaṃ viya hotīti vuttaṃ hoti. Parikkhayaṃ agamāsīti upāsikā ariyasāvikā bhikkhū disvā santaṃ adātuṃ na sakkoti, tasmā tāva dāpesi, yāva sabbaṃ parikkhayaṃ agamāsi. Dhammiyā kathāyāti ettha kāṇāpi mātu atthāya desiyamānaṃ dhammaṃ suṇantī desanāpariyosāne sotāpannā ahosi. Uṭṭhāyāsanā pakkāmīti āsanato uṭṭhahitvā gato. Sopi puriso ‘‘satthā kira kāṇamātāya nivesanaṃ agamāsī’’ti sutvā kāṇaṃ ānetvā pakatiṭṭhāneyeva ṭhapesi.
231. இமஸ்மிங் பன வத்து²ஸ்மிங் உப்பன்னமத்தே அப்பஞ்ஞத்தேயேவ ஸிக்கா²பதே³ பாதெ²ய்யவத்து² உத³பாதி³, தஸ்மா அனந்தரமேவ சேதங் த³ஸ்ஸேதுங் ‘‘தேன கோ² பன ஸமயேனா’’திஆதி³ வுத்தங். ஸோபி ச உபாஸகோ அரியஸாவகத்தா ஸப்³ப³மேவ தா³பேஸி. தேன வுத்தங் – ‘‘பரிக்க²யங் அக³மாஸீ’’தி.
231. Imasmiṃ pana vatthusmiṃ uppannamatte appaññatteyeva sikkhāpade pātheyyavatthu udapādi, tasmā anantarameva cetaṃ dassetuṃ ‘‘tena kho pana samayenā’’tiādi vuttaṃ. Sopi ca upāsako ariyasāvakattā sabbameva dāpesi. Tena vuttaṃ – ‘‘parikkhayaṃ agamāsī’’ti.
233. யங்கிஞ்சி பஹேணகத்தா²யாதி பண்ணாகாரத்தா²ய படியத்தங் யங்கிஞ்சி அதிரஸகமோத³கஸக்க²லிகாதி³ ஸப்³ப³ங் இத⁴ பூவொத்வேவ ஸங்க்²யங் க³ச்ச²தி. யங்கிஞ்சி பாதெ²ய்யத்தா²யாதி மக்³க³ங் க³ச்ச²ந்தானங் அந்தராமக்³க³த்தா²ய படியத்தங் யங்கிஞ்சி ப³த்³த⁴ஸத்துஅப³த்³த⁴ஸத்துதிலதண்டு³லாதி³ ஸப்³ப³ங் இத⁴ மந்தொ²த்வேவ ஸங்க்²யங் க³ச்ச²தி. ததோ சே உத்தரிந்தி ஸசேபி ததியங் பத்தங் தூ²பீகதங் க³ண்ஹாதி, பூவக³ணனாய பாசித்தியங்.
233.Yaṃkiñci paheṇakatthāyāti paṇṇākāratthāya paṭiyattaṃ yaṃkiñci atirasakamodakasakkhalikādi sabbaṃ idha pūvotveva saṅkhyaṃ gacchati. Yaṃkiñcipātheyyatthāyāti maggaṃ gacchantānaṃ antarāmaggatthāya paṭiyattaṃ yaṃkiñci baddhasattuabaddhasattutilataṇḍulādi sabbaṃ idha manthotveva saṅkhyaṃ gacchati. Tato ce uttarinti sacepi tatiyaṃ pattaṃ thūpīkataṃ gaṇhāti, pūvagaṇanāya pācittiyaṃ.
த்³வத்திபத்தபூரே படிக்³க³ஹெத்வாதி முக²வட்டியா ஹெட்டி²மலேகா²ய ஸமபூரே பத்தே க³ஹெத்வா. அமுத்ர மயா த்³வத்திபத்தபூராதி எத்த² ஸசே த்³வே க³ஹிதா, ‘‘அத்ர மயா த்³வே பத்தபூரா படிக்³க³ஹிதா, த்வங் ஏகங் க³ண்ஹெய்யாஸீ’’தி வத்தப்³ப³ங். தேனாபி அஞ்ஞங் பஸ்ஸித்வா ‘‘பட²மங் ஆக³தேன த்³வே பத்தபூரா க³ஹிதா, மயா ஏகோ, மா த்வங் க³ண்ஹீ’’தி வத்தப்³ப³ங். யேன பட²மங் ஏகோ க³ஹிதோ, தஸ்ஸாபி பரம்பராரோசனே ஏஸேவ நயோ. யேன பன ஸயமேவ தயோ க³ஹிதா, தேன அஞ்ஞங் தி³ஸ்வா ‘‘மா கோ² எத்த² படிக்³க³ண்ஹி’’ ச்சேவ வத்தப்³ப³ங். படிக்கமனங் நீஹரித்வாதி ஆஸனஸாலங் ஹரித்வா, ஆஸனஸாலங் க³ச்ச²ந்தேன ச ச²ட்³டி³தஸாலா ந க³ந்தப்³பா³. யத்த² மஹா பி⁴க்கு²ஸங்கோ⁴ நிஸீத³தி, தத்த² க³ந்தப்³ப³ங். மஹாபச்சரியங் பன வுத்தங் ‘‘யா லத்³த⁴ட்டா²னதோ ஆஸன்னா ஆஸனஸாலா, தத்த² க³ந்தப்³ப³ங். அத்தனோ ‘ஸந்தி³ட்டா²னங் வா ஸம்ப⁴த்தானங் வா ஏகனிகாயிகானங் வா த³ஸ்ஸாமீ’தி அஞ்ஞத்த² க³ந்துங் ந லப்³ப⁴தி. ஸசே பனஸ்ஸ நிப³த்³த⁴னிஸீத³னட்டா²னங் ஹோதி, தூ³ரம்பி க³ந்துங் வட்டதீ’’தி.
Dvattipattapūre paṭiggahetvāti mukhavaṭṭiyā heṭṭhimalekhāya samapūre patte gahetvā. Amutra mayā dvattipattapūrāti ettha sace dve gahitā, ‘‘atra mayā dve pattapūrā paṭiggahitā, tvaṃ ekaṃ gaṇheyyāsī’’ti vattabbaṃ. Tenāpi aññaṃ passitvā ‘‘paṭhamaṃ āgatena dve pattapūrā gahitā, mayā eko, mā tvaṃ gaṇhī’’ti vattabbaṃ. Yena paṭhamaṃ eko gahito, tassāpi paramparārocane eseva nayo. Yena pana sayameva tayo gahitā, tena aññaṃ disvā ‘‘mā kho ettha paṭiggaṇhi’’ cceva vattabbaṃ. Paṭikkamanaṃ nīharitvāti āsanasālaṃ haritvā, āsanasālaṃ gacchantena ca chaḍḍitasālā na gantabbā. Yattha mahā bhikkhusaṅgho nisīdati, tattha gantabbaṃ. Mahāpaccariyaṃ pana vuttaṃ ‘‘yā laddhaṭṭhānato āsannā āsanasālā, tattha gantabbaṃ. Attano ‘sandiṭṭhānaṃ vā sambhattānaṃ vā ekanikāyikānaṃ vā dassāmī’ti aññattha gantuṃ na labbhati. Sace panassa nibaddhanisīdanaṭṭhānaṃ hoti, dūrampi gantuṃ vaṭṭatī’’ti.
ஸங்விப⁴ஜிதப்³ப³ந்தி ஸசே தயோ பத்தபூரா க³ஹிதா, ஏகங் அத்தனோ ட²பெத்வா த்³வே பி⁴க்கு²ஸங்க⁴ஸ்ஸ தா³தப்³பா³. ஸச்சே த்³வே க³ஹிதா, ஏகங் அத்தனோ ட²பெத்வா ஏகோ ஸங்க⁴ஸ்ஸ தா³தப்³போ³, யதா²மித்தங் பன தா³துங் ந லப்³ப⁴தி. யேன ஏகோ க³ஹிதோ, ந தேன கிஞ்சி அகாமா தா³தப்³ப³ங், யதா²ருசி காதப்³ப³ங்.
Saṃvibhajitabbanti sace tayo pattapūrā gahitā, ekaṃ attano ṭhapetvā dve bhikkhusaṅghassa dātabbā. Sacce dve gahitā, ekaṃ attano ṭhapetvā eko saṅghassa dātabbo, yathāmittaṃ pana dātuṃ na labbhati. Yena eko gahito, na tena kiñci akāmā dātabbaṃ, yathāruci kātabbaṃ.
235. க³மனே படிப்பஸ்ஸத்³தே⁴தி அந்தராமக்³கே³ உபத்³த³வங் வா தி³ஸ்வா அனத்தி²கதாய வா ‘‘மயங் இதா³னி ந பேஸிஸ்ஸாம, ந க³மிஸ்ஸாமா’’தி ஏவங் க³மனே படிப்பஸ்ஸத்³தே⁴ உபச்சி²ன்னே. ஞாதகானங் பவாரிதானந்தி ஏதேஸங் ப³ஹும்பி தெ³ந்தானங் படிக்³க³ண்ஹந்தஸ்ஸ அனாபத்தி. அட்ட²கதா²ஸு பன ‘‘தேஸம்பி பாதெ²ய்யபஹேணகத்தா²ய படியத்ததோ பமாணமேவ வட்டதீ’’தி வுத்தங். ஸேஸங் உத்தானமேவ.
235.Gamane paṭippassaddheti antarāmagge upaddavaṃ vā disvā anatthikatāya vā ‘‘mayaṃ idāni na pesissāma, na gamissāmā’’ti evaṃ gamane paṭippassaddhe upacchinne. Ñātakānaṃ pavāritānanti etesaṃ bahumpi dentānaṃ paṭiggaṇhantassa anāpatti. Aṭṭhakathāsu pana ‘‘tesampi pātheyyapaheṇakatthāya paṭiyattato pamāṇameva vaṭṭatī’’ti vuttaṃ. Sesaṃ uttānameva.
ச²ஸமுட்டா²னங் – கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், வசீகம்மங், திசித்தங், திவேத³னந்தி.
Chasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
காணமாதாஸிக்கா²பத³ங் சதுத்த²ங்.
Kāṇamātāsikkhāpadaṃ catutthaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. காணமாதாஸிக்கா²பத³வண்ணனா • 4. Kāṇamātāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. காணமாதாஸிக்கா²பத³வண்ணனா • 4. Kāṇamātāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. காணமாதாஸிக்கா²பத³வண்ணனா • 4. Kāṇamātāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. காணமாதாஸிக்கா²பத³ங் • 4. Kāṇamātāsikkhāpadaṃ
