| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
៤. កាណមាតាសិក្ខាបទវណ្ណនា
4. Kāṇamātāsikkhāpadavaṇṇanā
បហេណកត្ថាយាតិ បណ្ណាការត្ថាយ។ បាថេយ្យត្ថាយាតិ មគ្គំ គច្ឆន្តានំ អន្តរាមគ្គត្ថាយ។ សត្តូតិ ពទ្ធសត្តុ, អពទ្ធសត្តុ ច។ ទ្វត្តិបត្តបូរេ បដិគ្គហេត្វាតិ មុខវដ្ដិយា ហេដ្ឋិមលេខាយ សមំ បូរេ ទ្វត្តិបត្តបូរេ គហេត្វាតិ អត្ថោ។ ឥមស្ស ចត្ថស្ស ហេដ្ឋា វុត្តនយេនេវ បាកដត្តា តត្ថ កត្តព្ពប្បការមេវ ទស្សេតុំ ‘‘ឯត្ថា’’តិអាទិមាហ។ សេសន្តិ តតោ ឯកបត្តតោ អញ្ញំ បត្តំ។ សចេ តយោ បត្តបូរា គហិតា ទ្វេ, សចេ ទ្វេ គហិតា, ឯកន្តិ វុត្តំ ហោតិ។
Paheṇakatthāyāti paṇṇākāratthāya. Pātheyyatthāyāti maggaṃ gacchantānaṃ antarāmaggatthāya. Sattūti baddhasattu, abaddhasattu ca. Dvattipattapūre paṭiggahetvāti mukhavaṭṭiyā heṭṭhimalekhāya samaṃ pūre dvattipattapūre gahetvāti attho. Imassa catthassa heṭṭhā vuttanayeneva pākaṭattā tattha kattabbappakārameva dassetuṃ ‘‘etthā’’tiādimāha. Sesanti tato ekapattato aññaṃ pattaṃ. Sace tayo pattapūrā gahitā dve, sace dve gahitā, ekanti vuttaṃ hoti.
គមនេ វា បដិប្បស្សទ្ធេតិ អន្តរាមគ្គេ ឧបទ្ទវំ ទិស្វា, អនត្ថិកតាយ វា ‘‘មយំ ឥទានិ ន បេសិស្សាម ន គមិស្សាមា’’តិ ឯវំ គមនេ ឧបច្ឆិន្នេ ទេន្តានន្តិ អត្ថោ។
Gamanevā paṭippassaddheti antarāmagge upaddavaṃ disvā, anatthikatāya vā ‘‘mayaṃ idāni na pesissāma na gamissāmā’’ti evaṃ gamane upacchinne dentānanti attho.
កាណមាតាសិក្ខាបទវណ្ណនា និដ្ឋិតា។
Kāṇamātāsikkhāpadavaṇṇanā niṭṭhitā.
