| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၄. ကာဏမာတာသိက္ခာပဒဝဏ္ဏနာ
4. Kāṇamātāsikkhāpadavaṇṇanā
ပဟေဏကတ္ထာယာတိ ပဏ္ဏာကာရတ္ထာယ။ ပာထေယ္ယတ္ထာယာတိ မဂ္ဂံ ဂစ္ဆန္တာနံ အန္တရာမဂ္ဂတ္ထာယ။ သတ္တူတိ ဗဒ္ဓသတ္တု, အဗဒ္ဓသတ္တု စ။ ဒ္ဝတ္တိပတ္တပူရေ ပဋိဂ္ဂဟေတ္ဝာတိ မုခဝဋ္ဋိယာ ဟေဋ္ဌိမလေခာယ သမံ ပူရေ ဒ္ဝတ္တိပတ္တပူရေ ဂဟေတ္ဝာတိ အတ္ထော။ ဣမသ္သ စတ္ထသ္သ ဟေဋ္ဌာ ဝုတ္တနယေနေဝ ပာကဋတ္တာ တတ္ထ ကတ္တဗ္ဗပ္ပကာရမေဝ ဒသ္သေတုံ ‘‘ဧတ္ထာ’’တိအာဒိမာဟ။ သေသန္တိ တတော ဧကပတ္တတော အညံ ပတ္တံ။ သစေ တယော ပတ္တပူရာ ဂဟိတာ ဒ္ဝေ, သစေ ဒ္ဝေ ဂဟိတာ, ဧကန္တိ ဝုတ္တံ ဟောတိ။
Paheṇakatthāyāti paṇṇākāratthāya. Pātheyyatthāyāti maggaṃ gacchantānaṃ antarāmaggatthāya. Sattūti baddhasattu, abaddhasattu ca. Dvattipattapūre paṭiggahetvāti mukhavaṭṭiyā heṭṭhimalekhāya samaṃ pūre dvattipattapūre gahetvāti attho. Imassa catthassa heṭṭhā vuttanayeneva pākaṭattā tattha kattabbappakārameva dassetuṃ ‘‘etthā’’tiādimāha. Sesanti tato ekapattato aññaṃ pattaṃ. Sace tayo pattapūrā gahitā dve, sace dve gahitā, ekanti vuttaṃ hoti.
ဂမနေ ဝာ ပဋိပ္ပသ္သဒ္ဓေတိ အန္တရာမဂ္ဂေ ဥပဒ္ဒဝံ ဒိသ္ဝာ, အနတ္ထိကတာယ ဝာ ‘‘မယံ ဣဒာနိ န ပေသိသ္သာမ န ဂမိသ္သာမာ’’တိ ဧဝံ ဂမနေ ဥပစ္ဆိန္နေ ဒေန္တာနန္တိ အတ္ထော။
Gamanevā paṭippassaddheti antarāmagge upaddavaṃ disvā, anatthikatāya vā ‘‘mayaṃ idāni na pesissāma na gamissāmā’’ti evaṃ gamane upacchinne dentānanti attho.
ကာဏမာတာသိက္ခာပဒဝဏ္ဏနာ နိဋ္ဌိတာ။
Kāṇamātāsikkhāpadavaṇṇanā niṭṭhitā.
