| Library / Tipiṭaka / တိပိဋက • Tipiṭaka / ကင္ခာဝိတရဏီ-ပုရာဏ-ဋီကာ • Kaṅkhāvitaraṇī-purāṇa-ṭīkā |
၄. ကာဏမာတာသိက္ခာပဒဝဏ္ဏနာ
4. Kāṇamātāsikkhāpadavaṇṇanā
ဒ္ဝတ္တိပတ္တပူရာ ပဋိဂ္ဂဟေတဗ္ဗာတိ တထာနီတပူဝေဟိ အတ္ထိကေန ဥက္ကဋ္ဌပတ္တပ္ပမာဏဝသေန ဂဟေတဗ္ဗာ။ ‘‘မာ ခော တ္ဝံ ဧတ္ထ ပဋိဂ္ဂဏ္ဟီ’’တိ အပာထေယ္ယာဒိအတ္ထာယ သဇ္ဇိတသညာယ အတိရေကပ္ပဋိဂ္ဂဟဏေန အာရောစနေ, အသံဝိဘာဂေ စ န မုစ္စတိ အစိတ္တကတ္တာ သိက္ခာပဒသ္သ။ အထ ဥဂ္ဂဟိတကံ ဂဏ္ဟာတိ, န မုစ္စတိ ဧဝ။ အသံဝိဘာဂေ ပန အနာပတ္တိ အကပ္ပိယတ္တာ။ အစိတ္တကတာ ပဏ္ဏတ္တိဇာနနာဘာဝေနေဝ, န ဝတ္ထုဇာနနာဘာဝေနာတိ ဧကေ။ ‘‘န ပာထေယ္ယာဒိအတ္ထာယ သဇ္ဇိတဘာဝဇာနန’’န္တိ အင္ဂေသု အဝုတ္တတ္တာ သစေ သဉ္စိစ္စ န ဝဒတိ, ပာစိတ္တိယန္တိ ပောရာဏာ ဝဒန္တိ။ အတိရေကပ္ပဋိဂ္ဂဟဏန္တိ တတ္ထ ပဉ္စမံဝ အင္ဂံ ဝုတ္တံ, တသ္မာ အပ္ပဋိဂ္ဂဟိတတ္တာ န ပာစိတ္တိယံ, ကတ္တဗ္ဗာကရဏတော ပန ဒုက္ကဋံ။ အညထာ ကိရိယာကိရိယံ ဣဒံ အာပဇ္ဇတိ။ အနိဝာရဏံ, အနာရောစနံ ဝာ ဆဋ္ဌမင္ဂံ ဝတ္တဗ္ဗံ သိယာ။
Dvattipattapūrā paṭiggahetabbāti tathānītapūvehi atthikena ukkaṭṭhapattappamāṇavasena gahetabbā. ‘‘Mā kho tvaṃ ettha paṭiggaṇhī’’ti apātheyyādiatthāya sajjitasaññāya atirekappaṭiggahaṇena ārocane, asaṃvibhāge ca na muccati acittakattā sikkhāpadassa. Atha uggahitakaṃ gaṇhāti, na muccati eva. Asaṃvibhāge pana anāpatti akappiyattā. Acittakatā paṇṇattijānanābhāveneva, na vatthujānanābhāvenāti eke. ‘‘Na pātheyyādiatthāya sajjitabhāvajānana’’nti aṅgesu avuttattā sace sañcicca na vadati, pācittiyanti porāṇā vadanti. Atirekappaṭiggahaṇanti tattha pañcamaṃva aṅgaṃ vuttaṃ, tasmā appaṭiggahitattā na pācittiyaṃ, kattabbākaraṇato pana dukkaṭaṃ. Aññathā kiriyākiriyaṃ idaṃ āpajjati. Anivāraṇaṃ, anārocanaṃ vā chaṭṭhamaṅgaṃ vattabbaṃ siyā.
ကာဏမာတာသိက္ခာပဒဝဏ္ဏနာ နိဋ္ဌိတာ။
Kāṇamātāsikkhāpadavaṇṇanā niṭṭhitā.
