| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-པུརཱཎ-ཊཱིཀཱ • Kaṅkhāvitaraṇī-purāṇa-ṭīkā |
༤. ཀཱཎམཱཏཱསིཀྑཱཔདཝཎྞནཱ
4. Kāṇamātāsikkhāpadavaṇṇanā
དྭཏྟིཔཏྟཔཱུརཱ པཊིགྒཧེཏབྦཱཏི ཏཐཱནཱིཏཔཱུཝེཧི ཨཏྠིཀེན ཨུཀྐཊྛཔཏྟཔྤམཱཎཝསེན གཧེཏབྦཱ། ‘‘མཱ ཁོ ཏྭཾ ཨེཏྠ པཊིགྒཎྷཱི’’ཏི ཨཔཱཐེཡྻཱདིཨཏྠཱཡ སཛྫིཏསཉྙཱཡ ཨཏིརེཀཔྤཊིགྒཧཎེན ཨཱརོཙནེ, ཨསཾཝིབྷཱགེ ཙ ན མུཙྩཏི ཨཙིཏྟཀཏྟཱ སིཀྑཱཔདསྶ། ཨཐ ཨུགྒཧིཏཀཾ གཎྷཱཏི, ན མུཙྩཏི ཨེཝ། ཨསཾཝིབྷཱགེ པན ཨནཱཔཏྟི ཨཀཔྤིཡཏྟཱ། ཨཙིཏྟཀཏཱ པཎྞཏྟིཛཱནནཱབྷཱཝེནེཝ, ན ཝཏྠུཛཱནནཱབྷཱཝེནཱཏི ཨེཀེ། ‘‘ན པཱཐེཡྻཱདིཨཏྠཱཡ སཛྫིཏབྷཱཝཛཱནན’’ནྟི ཨངྒེསུ ཨཝུཏྟཏྟཱ སཙེ སཉྩིཙྩ ན ཝདཏི, པཱཙིཏྟིཡནྟི པོརཱཎཱ ཝདནྟི། ཨཏིརེཀཔྤཊིགྒཧཎནྟི ཏཏྠ པཉྩམཾཝ ཨངྒཾ ཝུཏྟཾ, ཏསྨཱ ཨཔྤཊིགྒཧིཏཏྟཱ ན པཱཙིཏྟིཡཾ, ཀཏྟབྦཱཀརཎཏོ པན དུཀྐཊཾ། ཨཉྙཐཱ ཀིརིཡཱཀིརིཡཾ ཨིདཾ ཨཱཔཛྫཏི། ཨནིཝཱརཎཾ, ཨནཱརོཙནཾ ཝཱ ཚཊྛམངྒཾ ཝཏྟབྦཾ སིཡཱ།
Dvattipattapūrā paṭiggahetabbāti tathānītapūvehi atthikena ukkaṭṭhapattappamāṇavasena gahetabbā. ‘‘Mā kho tvaṃ ettha paṭiggaṇhī’’ti apātheyyādiatthāya sajjitasaññāya atirekappaṭiggahaṇena ārocane, asaṃvibhāge ca na muccati acittakattā sikkhāpadassa. Atha uggahitakaṃ gaṇhāti, na muccati eva. Asaṃvibhāge pana anāpatti akappiyattā. Acittakatā paṇṇattijānanābhāveneva, na vatthujānanābhāvenāti eke. ‘‘Na pātheyyādiatthāya sajjitabhāvajānana’’nti aṅgesu avuttattā sace sañcicca na vadati, pācittiyanti porāṇā vadanti. Atirekappaṭiggahaṇanti tattha pañcamaṃva aṅgaṃ vuttaṃ, tasmā appaṭiggahitattā na pācittiyaṃ, kattabbākaraṇato pana dukkaṭaṃ. Aññathā kiriyākiriyaṃ idaṃ āpajjati. Anivāraṇaṃ, anārocanaṃ vā chaṭṭhamaṅgaṃ vattabbaṃ siyā.
ཀཱཎམཱཏཱསིཀྑཱཔདཝཎྞནཱ ནིཊྛིཏཱ།
Kāṇamātāsikkhāpadavaṇṇanā niṭṭhitā.
