| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
२. कणवेरपुप्फियत्थेरअपदानवण्णना
2. Kaṇaverapupphiyattheraapadānavaṇṇanā
सिद्धत्थो नाम भगवातिआदिकं आयस्मतो कणवेरपुप्फियत्थेरस्स अपदानं। अयम्पि पुरिमबुद्धेसु कताधिकारो सिद्धत्थस्स भगवतो काले सुद्दकुले निब्बत्तो वुद्धिमन्वाय रञ्ञो अन्तेपुरपालको अहोसि। तस्मिं समये सिद्धत्थो भगवा भिक्खुसङ्घपरिवुतो राजवीथिं पटिपज्जि। अथ सो अन्तेपुरपालको चरमानं भगवन्तं दिस्वा पसन्नमानसो हुत्वा कणवेरपुप्फेन भगवन्तं पूजेत्वा नमस्समानो अट्ठासि। सो तेन पुञ्ञेन सुगतिसम्पत्तियोयेव अनुभवित्वा इमस्मिं बुद्धुप्पादे एकस्मिं कुले निब्बत्तित्वा वुद्धिप्पत्तो सत्थु धम्मदेसनं सुत्वा पटिलद्धसद्धो पब्बजित्वा नचिरस्सेव अरहा अहोसि।
Siddhatthonāma bhagavātiādikaṃ āyasmato kaṇaverapupphiyattherassa apadānaṃ. Ayampi purimabuddhesu katādhikāro siddhatthassa bhagavato kāle suddakule nibbatto vuddhimanvāya rañño antepurapālako ahosi. Tasmiṃ samaye siddhattho bhagavā bhikkhusaṅghaparivuto rājavīthiṃ paṭipajji. Atha so antepurapālako caramānaṃ bhagavantaṃ disvā pasannamānaso hutvā kaṇaverapupphena bhagavantaṃ pūjetvā namassamāno aṭṭhāsi. So tena puññena sugatisampattiyoyeva anubhavitvā imasmiṃ buddhuppāde ekasmiṃ kule nibbattitvā vuddhippatto satthu dhammadesanaṃ sutvā paṭiladdhasaddho pabbajitvā nacirasseva arahā ahosi.
७. सो पत्तअग्गफलो पुब्बे कतकुसलं सरित्वा सञ्जातसोमनस्सो पुब्बचरितापदानं पकासेन्तो सिद्धत्थो नाम भगवातिआदिमाह। तं सब्बं हेट्ठा वुत्तत्ता उत्तानत्थमेवाति।
7. So pattaaggaphalo pubbe katakusalaṃ saritvā sañjātasomanasso pubbacaritāpadānaṃ pakāsento siddhattho nāma bhagavātiādimāha. Taṃ sabbaṃ heṭṭhā vuttattā uttānatthamevāti.
कणवेरपुप्फियत्थेरअपदानवण्णना समत्ता।
Kaṇaverapupphiyattheraapadānavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / २. कणवेरपुप्फियत्थेरअपदानं • 2. Kaṇaverapupphiyattheraapadānaṃ
