| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๙. กนฺทลิปุปฺผิยเตฺถรอปทานํ
9. Kandalipupphiyattheraapadānaṃ
๔๗.
47.
‘‘สินฺธุยา นทิยา ตีเร, อโหสิํ กสฺสโก ตทา;
‘‘Sindhuyā nadiyā tīre, ahosiṃ kassako tadā;
ปรกมฺมายเน ยุโตฺต, ปรภตฺตํ อปสฺสิโตฯ
Parakammāyane yutto, parabhattaṃ apassito.
๔๘.
48.
‘‘สินฺธุํ อนุจรโนฺตหํ, สิทฺธตฺถํ ชินมทฺทสํ;
‘‘Sindhuṃ anucarantohaṃ, siddhatthaṃ jinamaddasaṃ;
สมาธินา นิสินฺนํว, สตปตฺตํว ปุปฺผิตํฯ
Samādhinā nisinnaṃva, satapattaṃva pupphitaṃ.
๔๙.
49.
‘‘สตฺต กนฺทลิปุปฺผานิ, วเณฺฎ เฉตฺวานหํ ตทา;
‘‘Satta kandalipupphāni, vaṇṭe chetvānahaṃ tadā;
มตฺถเก อภิโรเปสิํ, พุทฺธสฺสาทิจฺจพนฺธุโนฯ
Matthake abhiropesiṃ, buddhassādiccabandhuno.
๕๐.
50.
‘‘สุวณฺณวณฺณํ สมฺพุทฺธํ, อนุกูเล สมาหิตํ;
‘‘Suvaṇṇavaṇṇaṃ sambuddhaṃ, anukūle samāhitaṃ;
ติธาปภินฺนมาตงฺคํ, กุญฺชรํว ทุราสทํฯ
Tidhāpabhinnamātaṅgaṃ, kuñjaraṃva durāsadaṃ.
๕๑.
51.
‘‘ตมหํ อุปคนฺตฺวาน, นิปกํ ภาวิตินฺทฺริยํ;
‘‘Tamahaṃ upagantvāna, nipakaṃ bhāvitindriyaṃ;
อญฺชลิํ ปคฺคเหตฺวาน, อวนฺทิํ สตฺถุโน อหํฯ
Añjaliṃ paggahetvāna, avandiṃ satthuno ahaṃ.
๕๒.
52.
‘‘จตุนฺนวุติโต กเปฺป, ยํ ปุปฺผมภิโรปยิํ;
‘‘Catunnavutito kappe, yaṃ pupphamabhiropayiṃ;
ทุคฺคติํ นาภิชานามิ, พุทฺธปูชายิทํ ผลํฯ
Duggatiṃ nābhijānāmi, buddhapūjāyidaṃ phalaṃ.
๕๓.
53.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ อายสฺมา กนฺทลิปุปฺผิโย เถโร อิมา คาถาโย อภาสิตฺถาติฯ
Itthaṃ sudaṃ āyasmā kandalipupphiyo thero imā gāthāyo abhāsitthāti.
กนฺทลิปุปฺผิยเตฺถรสฺสาปทานํ นวมํฯ
Kandalipupphiyattherassāpadānaṃ navamaṃ.
