| Library / Tipiṭaka / д̇ибидага • Tipiṭaka / маж̇жхиманигааяа (дийгаа) • Majjhimanikāya (ṭīkā) |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
маж̇жхиманигааяз
Majjhimanikāye
маж̇жхимабан̣н̣аасадийгаа
Majjhimapaṇṇāsaṭīkā
1. г̇ахабад̇иваг̇г̇о
1. Gahapativaggo
1. ганд̣̇арагасуд̇д̇аван̣н̣анаа
1. Kandarakasuttavaṇṇanā
1. аараамабогкаран̣ийаад̣̇ийсууд̇и аараамабогкаран̣ийуяяаанажзд̇ияадтаанаад̣̇ийсу. уссаннаад̇и б̣ахулаа. асогаган̣игаараговил̣аарагумбхийрааж̇аругкзхи саммиссад̇ааяа д̇ам̣ жамбагаванам̣ нийлаад̣̇ибан̃жаван̣н̣агусумабадиман̣д̣ид̇анд̇и д̣̇адтаб̣б̣ам̣, на жамбагаругкаанам̣язва нийлаад̣̇ибан̃жаван̣н̣агусумад̇ааяаад̇и вад̣̇анд̇и. бхаг̇аваа гусумаг̇анд̇хасуг̇анд̇хз жамбагаванз вихарад̇ийд̇и иминаа на маабанагаалз зва д̇асмим̣ наг̇арз жамбагаругкаа уссаннаа, ат̇а ко абарабхааг̇збийд̇и д̣̇ассзд̇и. ‘‘бан̃жасад̇амад̇д̇зхи ад̣дхад̇зл̣асзхий’’д̇и звам̣ ад̣̇ассид̇абарижчзд̣̇зна. хад̇т̇ино жаарзд̇и сигкаабзд̇ийд̇и хад̇т̇аажарияо хад̇т̇ийнам̣ сигкаабаго, д̇асса буд̇д̇од̇и ааха ‘‘хад̇т̇аажарияасса буд̇д̇о’’д̇и. д̇ад̣̇аа бхаг̇аваа д̇зсам̣ басаад̣̇аж̇ананад̇т̇ам̣ ад̇д̇ано б̣уд̣̇д̇хаанубхаавам̣ аниг̇ухид̇ваава нисиннод̇и д̣̇ассзнд̇о ‘‘чаб̣б̣ан̣н̣аанам̣ гханаб̣уд̣̇д̇харасмийна’’нд̇иаад̣̇имааха. бхаг̇авад̇о жзва г̇ааравзнаад̇и бхаг̇авад̇о г̇арубхаавзна, бхаг̇авад̇и г̇ааравзнаад̇и ваа баато.
1.Ārāmapokkharaṇīādīsūti ārāmapokkharaṇīuyyānacetiyaṭṭhānādīsu. Ussannāti bahulā. Asokakaṇikārakoviḷārakumbhīrājarukkhehi sammissatāya taṃ campakavanaṃ nīlādipañcavaṇṇakusumapaṭimaṇḍitanti daṭṭhabbaṃ, na campakarukkhānaṃyeva nīlādipañcavaṇṇakusumatāyāti vadanti. Bhagavā kusumagandhasugandhe campakavane viharatīti iminā na māpanakāle eva tasmiṃ nagare campakarukkhā ussannā, atha kho aparabhāgepīti dasseti. ‘‘Pañcasatamattehi aḍḍhateḷasehī’’ti evaṃ adassitaparicchedena. Hatthino cāreti sikkhāpetīti hatthācariyo hatthīnaṃ sikkhāpako, tassa puttoti āha ‘‘hatthācariyassa putto’’ti. Tadā bhagavā tesaṃ pasādajananatthaṃ attano buddhānubhāvaṃ aniguhitvāva nisinnoti dassento ‘‘chabbaṇṇānaṃ ghanabuddharasmīna’’ntiādimāha. Bhagavato ceva gāravenāti bhagavato garubhāvena, bhagavati gāravenāti vā pāṭho.
нижжам̣ на ход̇ийд̇и абхин̣хам̣ на ход̇и, гад̣̇аажид̣̇зва ход̇ийд̇и ад̇т̇о. абхин̣ханижжад̇аа хи ид̇ха ад̇хиббзд̇аа, на гуудадтанижжад̇аа. логз гин̃жи вимхаяаавахам̣ д̣̇исваа хад̇т̇авигаарамби гаронд̇и, ан̇г̇улим̣ ваа подаяанд̇и, д̇ам̣ санд̇хааяа вуд̇д̇ам̣ ‘‘ажчарам̣ бахарид̇ум̣ яуд̇д̇а’’нд̇и. абхууд̇абуб̣б̣ам̣ бхууд̇анд̇и аяам̣ нируд̇д̇инаяо язбхуяязна убаад̣̇ааяа рул̣хийвасзна вуд̇д̇од̇и взд̣̇ид̇аб̣б̣о. д̇ат̇аа хи баал̣ияам̣ ‘‘язби д̇з, бхо г̇од̇ама, ахзсум̣ ад̇ийд̇амад̣̇д̇хаана’’нд̇иаад̣̇и вуд̇д̇ам̣, гин̃жи агад̇д̇аб̣б̣амби гарияамаанам̣ д̣̇уггарабхаавзна вимхаяаавахам̣ ход̇и, д̇ат̇аа гин̃жи гад̇д̇аб̣б̣ам̣, буримам̣ г̇арахажчарияам̣, бажчимам̣ басам̣сажчарияам̣, д̇ад̣̇убхаяам̣ суд̇д̇абад̣̇асо д̣̇ассзд̇ум̣ ‘‘д̇ад̇т̇аа’’д̇иаад̣̇и вуд̇д̇ам̣.
Niccaṃna hotīti abhiṇhaṃ na hoti, kadācideva hotīti attho. Abhiṇhaniccatā hi idha adhippetā, na kūṭaṭṭhaniccatā. Loke kiñci vimhayāvahaṃ disvā hatthavikārampi karonti, aṅguliṃ vā phoṭayanti, taṃ sandhāya vuttaṃ ‘‘accharaṃ paharituṃ yutta’’nti. Abhūtapubbaṃ bhūtanti ayaṃ niruttinayo yebhuyyena upādāya ruḷhīvasena vuttoti veditabbo. Tathā hi pāḷiyaṃ ‘‘yepi te, bho gotama, ahesuṃ atītamaddhāna’’ntiādi vuttaṃ, kiñci akattabbampi kariyamānaṃ dukkarabhāvena vimhayāvahaṃ hoti, tathā kiñci kattabbaṃ, purimaṃ garahacchariyaṃ, pacchimaṃ pasaṃsacchariyaṃ, tadubhayaṃ suttapadaso dassetuṃ ‘‘tatthā’’tiādi vuttaṃ.
саммаа бадибаад̣̇ид̇од̇и саммаабадибад̣̇ааяам̣ табид̇о. зсаа бадибад̣̇аа барамаад̇и зд̇абарамам̣, бхааванабум̣саганид̣̇д̣̇зсояам̣ яат̇аа ‘‘висамам̣ жанд̣̇имасуурияаа баривад̇д̇анд̇ий’’д̇и (а. ни. 4.70). аяан̃хзд̇т̇а ад̇т̇о – бхаг̇аваа бхигкусан̇гхо бадибад̣̇ааяа д̇умхзхи бадибаад̣̇ид̇о, ад̇ийд̇зби гаалз б̣уд̣̇д̇хаа зд̇абарамам̣язва бхигкусан̇гхам̣ саммаа бадибаад̣̇зсум̣, анааг̇ад̇зби гаалз зд̇абарамам̣язва бхигкусан̇гхам̣ саммаа бадибаад̣̇зссанд̇ийд̇и бариб̣б̣ааж̇аго наяаг̇г̇аахзна д̣̇идтзна ад̣̇идтам̣ ануминанд̇о саб̣б̣зсамби б̣уд̣̇д̇хаанам̣ саасанз сан̇гхасуббадибад̇д̇им̣ маж̇жхз бхиннасуван̣н̣ам̣ вияа самасамам̣ гад̇ваа д̣̇ассзд̇и, звам̣ д̣̇ассзнд̇о жа д̇зсам̣ суд̇хаммад̇ан̃жа д̇ат̇аа д̣̇ассзд̇и зваад̇и взд̣̇ид̇аб̣б̣о, б̣уд̣̇д̇хасуб̣уд̣̇д̇хад̇аа бана нзсам̣ саруубзнзва д̣̇ассид̇аад̇и. на ид̇о бхияяод̇и иминаа баал̣ияам̣ зд̇абарамам̣язваад̇и авад̇хааран̣зна нивад̇д̇ид̇ам̣ д̣̇ассзд̇и сийлабад̣̇адтаанад̇д̇аа самаад̇хисса, самаад̇хибад̣̇адтаанад̇д̇аа жа бан̃н̃ааяа сийлзби жа абхисамаажааригабуб̣б̣агад̇д̇аа аад̣̇иб̣рахмажарияагасса вуд̇д̇ам̣ ‘‘аабхисамаажааригавад̇д̇ам̣ аад̣̇им̣ гад̇ваа’’д̇и.
Sammā paṭipāditoti sammāpaṭipadāyaṃ ṭhapito. Esā paṭipadā paramāti etaparamaṃ, bhāvanapuṃsakaniddesoyaṃ yathā ‘‘visamaṃ candimasūriyā parivattantī’’ti (a. ni. 4.70). Ayañhettha attho – bhagavā bhikkhusaṅgho paṭipadāya tumhehi paṭipādito, atītepi kāle buddhā etaparamaṃyeva bhikkhusaṅghaṃ sammā paṭipādesuṃ, anāgatepi kāle etaparamaṃyeva bhikkhusaṅghaṃ sammā paṭipādessantīti paribbājako nayaggāhena diṭṭhena adiṭṭhaṃ anuminanto sabbesampi buddhānaṃ sāsane saṅghasuppaṭipattiṃ majjhe bhinnasuvaṇṇaṃ viya samasamaṃ katvā dasseti, evaṃ dassento ca tesaṃ sudhammatañca tathā dasseti evāti veditabbo, buddhasubuddhatā pana nesaṃ sarūpeneva dassitāti. Na ito bhiyyoti iminā pāḷiyaṃ etaparamaṃyevāti avadhāraṇena nivattitaṃ dasseti sīlapadaṭṭhānattā samādhissa, samādhipadaṭṭhānattā ca paññāya sīlepi ca abhisamācārikapubbakattā ādibrahmacariyakassa vuttaṃ ‘‘ābhisamācārikavattaṃ ādiṃ katvā’’ti.
2. бужчаанусанд̇хиаад̣̇ийсу ананд̇ог̇ад̇хад̇д̇аа ‘‘баадизгго анусанд̇хий’’д̇и вад̇ваа д̇амзвад̇т̇ам̣ баагадам̣ гаад̇ум̣ ‘‘бхаг̇аваа гираа’’д̇иаад̣̇и вуд̇д̇ам̣. убасанд̇агааран̣анд̇и убасанд̇абхаавагааран̣ам̣. д̇ан̃хи арияаанам̣язва висаяо, д̇ад̇т̇ааби жа б̣уд̣̇д̇хаанам̣ зва анавасзсад̇о висаяод̇и имамад̇т̇ам̣ б̣яад̇ирзгад̇о анваяад̇о жа д̣̇ассзд̇ум̣ на хи д̇ванд̇иаад̣̇и вуд̇д̇ам̣. д̇ад̇т̇а н̃аад̇ад̇т̇ажарияаа гаагаж̇аад̇агаад̣̇ивасзна взд̣̇ид̇аб̣б̣аа, логад̇т̇ажарияаа д̇ам̣д̇ам̣баарамибууран̣авасзна, б̣уд̣̇д̇хад̇т̇ажарияаа махааб̣од̇хиж̇аад̇агаад̣̇ивасзна. ажчарияам̣ бхо г̇од̇амаад̇иаад̣̇инаа ганд̣̇арагзна гад̇ам̣ басаад̣̇абавзд̣̇анам̣ д̣̇ассзд̇и.
2. Pucchānusandhiādīsu anantogadhattā ‘‘pāṭiekko anusandhī’’ti vatvā tamevatthaṃ pākaṭaṃ kātuṃ ‘‘bhagavā kirā’’tiādi vuttaṃ. Upasantakāraṇanti upasantabhāvakāraṇaṃ. Tañhi ariyānaṃyeva visayo, tatthāpi ca buddhānaṃ eva anavasesato visayoti imamatthaṃ byatirekato anvayato ca dassetuṃ na hi tvantiādi vuttaṃ. Tattha ñātatthacariyā kākajātakādivasena veditabbā, lokatthacariyā taṃtaṃpāramipūraṇavasena, buddhatthacariyā mahābodhijātakādivasena. Acchariyaṃ bho gotamātiādinā kandarakena kataṃ pasādapavedanaṃ dasseti.
язби д̇зд̇иаад̣̇инаа д̇зна вуд̇д̇амад̇т̇ам̣ бажжанубхаасанд̇зна бхаг̇авад̇аа самбадижчид̇анд̇и жарид̇ад̇д̇аа ааха – ‘‘санд̇и хи ганд̣̇арагаад̇и аяамби баадиязгго анусанд̇хий’’д̇и . яо хи ганд̣̇арагзна бхигкусан̇гхасса убасанд̇абхааво гид̇д̇ид̇о, д̇ам̣ вибхаж̇ид̇ваа д̣̇ассзнд̇оби д̇зна абужчид̇оязва ад̇д̇ано аж̇жхаасаязна бхаг̇аваа ‘‘санд̇и хий’’д̇иаад̣̇инаа д̣̇зсанам̣ аарабхи. д̇знааха ‘‘бхаг̇авад̇о гира зд̇ад̣̇ахосий’’ д̇иаад̣̇и. габбзд̇ваад̇и ан̃н̃ат̇аа санд̇амзва ад̇д̇аанам̣ ан̃н̃ат̇аа вид̇хааяа. багаббзд̇ваад̇и санид̣̇ассанавасзна г̇ахзд̇ваа. д̇знааха ‘‘гухагабхаавзнаа’’д̇иаад̣̇и. бадибад̣̇ам̣ буураяамаанаад̇и гаамам̣ ависзсзна сзгкаа вужжанд̇и, д̇з бана ад̇хиг̇ад̇амаг̇г̇авасзна ‘‘буураяамаанаа’’д̇и на вад̇д̇аб̣б̣аа гижжасса нидтид̇ад̇д̇аа. маг̇г̇о хи згажид̇д̇агкан̣игод̇и ааха ‘‘убаримаг̇г̇асса вибассанааяа убасанд̇аа’’д̇и. ид̇о муд̇д̇аад̇и маг̇г̇знааг̇ад̇уубасамад̇о муд̇д̇аа. галяаан̣абут̇уж̇ж̇анз санд̇хааяа вад̣̇ад̇и. д̇знааха ‘‘жад̇уухи сад̇ибадтаанзхи убасанд̇аа’’д̇и.
Yepi tetiādinā tena vuttamatthaṃ paccanubhāsantena bhagavatā sampaṭicchitanti caritattā āha – ‘‘santi hi kandarakāti ayampi pāṭiyekko anusandhī’’ti . Yo hi kandarakena bhikkhusaṅghassa upasantabhāvo kittito, taṃ vibhajitvā dassentopi tena apucchitoyeva attano ajjhāsayena bhagavā ‘‘santi hī’’tiādinā desanaṃ ārabhi. Tenāha ‘‘bhagavato kira etadahosī’’ tiādi. Kappetvāti aññathā santameva attānaṃ aññathā vidhāya. Pakappetvāti sanidassanavasena gahetvā. Tenāha ‘‘kuhakabhāvenā’’tiādi. Paṭipadaṃ pūrayamānāti kāmaṃ avisesena sekkhā vuccanti, te pana adhigatamaggavasena ‘‘pūrayamānā’’ti na vattabbā kiccassa niṭṭhitattā. Maggo hi ekacittakkhaṇikoti āha ‘‘uparimaggassa vipassanāya upasantā’’ti. Ito muttāti maggenāgatūpasamato muttā. Kalyāṇaputhujjane sandhāya vadati. Tenāha ‘‘catūhi satipaṭṭhānehi upasantā’’ti.
сад̇ад̇асийлаад̇и авижчиннасийлаа. саад̇исаяо хи зд̇зсам̣ сийласса акан̣д̣аад̣̇ибхааво. субарисуд̣̇д̇хасийлад̇аавасзна санд̇ад̇аа вуд̇д̇и зд̇зсанд̇и санд̇ад̇авуд̇д̇инод̇и ааха ‘‘д̇ассзва взважана’’нд̇и. звам̣ сийлавуд̇д̇ивасзна ‘‘санд̇ад̇авуд̇д̇ино’’д̇и бад̣̇асса ад̇т̇ам̣ вад̇ваа ид̣̇аани ж̇ийвид̇авуд̇д̇ивасзна д̣̇ассзнд̇о ‘‘санд̇ад̇аж̇ийвигааваад̇и ад̇т̇о’’д̇и ааха. саасанасса ж̇ийвид̇авуд̇д̇и сийласанниссид̇аа зваад̇и ааха ‘‘д̇асми’’нд̇иаад̣̇и.
Satatasīlāti avicchinnasīlā. Sātisayo hi etesaṃ sīlassa akhaṇḍādibhāvo. Suparisuddhasīlatāvasena santatā vutti etesanti santatavuttinoti āha ‘‘tasseva vevacana’’nti. Evaṃ sīlavuttivasena ‘‘santatavuttino’’ti padassa atthaṃ vatvā idāni jīvitavuttivasena dassento ‘‘santatajīvikāvāti attho’’ti āha. Sāsanassa jīvitavutti sīlasannissitā evāti āha ‘‘tasmi’’ntiādi.
нибаяад̇и висосзд̇и рааг̇аад̣̇исам̣гилзсам̣, д̇ад̇о ваа ад̇д̇аанам̣ нибаад̇ийд̇и нибаго, бан̃н̃аваа. д̇знааха ‘‘бан̃н̃аванд̇о’’д̇и. бан̃н̃ааяа тад̇ваа ж̇ийвигаагаббанам̣ наама б̣уд̣̇д̇хабадигудтамижчааж̇ийвам̣ бахааяа саммааж̇ийвзна ж̇ийвананд̇и д̇ам̣ д̣̇ассзнд̇о ‘‘яат̇аа згажжо’’д̇иаад̣̇имааха. д̇ад̇т̇а яам̣ вад̇д̇аб̣б̣ам̣, д̇ам̣ висуд̣̇д̇химаг̇г̇з (висуд̣̇д̇хи. 1.14) д̇ам̣сам̣ван̣н̣анааяан̃жа (висуд̣̇д̇хи. махаадий. 1.14) вуд̇д̇анаязнзва взд̣̇ид̇аб̣б̣ам̣. рат̇авинийд̇абадибад̣̇аад̣̇аяо д̇зсу д̇зсу суд̇д̇зсу вуд̇д̇анаязна взд̣̇ид̇аб̣б̣аа. ид̇о ан̃н̃ад̇т̇а махааг̇обаалагасуд̇д̇аад̣̇ийсу (ма. ни. 1.346 аад̣̇аяо) логуд̇д̇арасад̇ибадтаанаа гат̇ид̇аад̇и ааха – ‘‘ид̇ха бана логияалогуд̇д̇арамиссагаа сад̇ибадтаанаа гат̇ид̇аа’’д̇и, сад̇ибадтаанасуд̇д̇зби (д̣̇ий. ни. 2.373-374; ма. ни. 1.106 аад̣̇аяо) вомиссагаава гат̇ид̇аад̇и. зд̇д̇агзнаад̇и зд̇д̇агааяа д̣̇зсанааяа.
Nipayati visoseti rāgādisaṃkilesaṃ, tato vā attānaṃ nipātīti nipako, paññavā. Tenāha ‘‘paññavanto’’ti. Paññāya ṭhatvā jīvikākappanaṃ nāma buddhapaṭikuṭṭhamicchājīvaṃ pahāya sammājīvena jīvananti taṃ dassento ‘‘yathā ekacco’’tiādimāha. Tattha yaṃ vattabbaṃ, taṃ visuddhimagge (visuddhi. 1.14) taṃsaṃvaṇṇanāyañca (visuddhi. mahāṭī. 1.14) vuttanayeneva veditabbaṃ. Rathavinītapaṭipadādayo tesu tesu suttesu vuttanayena veditabbā. Ito aññattha mahāgopālakasuttādīsu (ma. ni. 1.346 ādayo) lokuttarasatipaṭṭhānā kathitāti āha – ‘‘idha pana lokiyalokuttaramissakā satipaṭṭhānā kathitā’’ti, satipaṭṭhānasuttepi (dī. ni. 2.373-374; ma. ni. 1.106 ādayo) vomissakāva kathitāti. Ettakenāti ettakāya desanāya.
3. гаарагабхааванд̇и бадибад̇д̇ияам̣ бадибаж̇ж̇анагабхаавам̣. маяамби наама г̇ихий б̣ахугижжаа самаанаа гаалзна гаалам̣ сад̇ибадтаанзсу суббад̇идтид̇ажид̇д̇аа вихараама, гиман̇г̇ам̣ бана вивзгаваасинод̇и ад̇д̇ано гаарагабхаавам̣ бавзд̣̇знд̇о звам̣ бхигкусан̇гхан̃жа угкибад̇и. д̇знааха ‘‘аяан̃хзд̇т̇а ад̇хиббааяо’’д̇иаад̣̇и. наанаарамман̣зсу абараабарам̣ уббаж̇ж̇амаанаанам̣ рааг̇аад̣̇игилзсаанам̣ гханаж̇адид̇асан̇каад̇аагаарзна бавад̇д̇и гилзсаг̇аханзна г̇аханад̇аа, д̇знааха ‘‘анд̇о ж̇адаа б̣ахи ж̇адаа, ж̇адааяа ж̇адид̇аа баж̇аа’’д̇и (сам̣. ни. 1.23, 192). мануссаанам̣ аж̇жхаасаяаг̇ахан̣зна саатзяяамбийд̇и д̣̇ассзнд̇о ааха ‘‘гасадасаатзяязсуби зсзва наяо’’д̇и. яат̇аа саббимад̇хупаан̣ид̇аад̣̇ийсу гажаварабхааво, со гасадод̇и вужжад̇и, звам̣ санд̇аанз абарисуд̣̇д̇хо сам̣гилзсабхааво гасаданд̇и ааха ‘‘абарисуд̣̇д̇хадтзна гасадад̇аа’’д̇и. ад̇д̇ани асанд̇аг̇ун̣асамбхааванам̣ гзраадияадто. ж̇аанаад̇ийд̇и ‘‘ид̣̇ам̣ ахид̇ам̣ на сзвид̇аб̣б̣ам̣, ид̣̇ам̣ хид̇ам̣ сзвид̇аб̣б̣а’’нд̇и вижаарзд̇и д̣̇зсзд̇и. вижааран̣ад̇т̇оби хи ход̇и ж̇аанаад̇и-сад̣̇д̣̇о яат̇аа ‘‘ааяасмаа ж̇аанаад̇ий’’д̇и. саб̣б̣ааби…бз… ад̇хиббзд̇аа ‘‘басубаалагаа’’д̇иаад̣̇ийсу вияа. ид̇ха анд̇ара-сад̣̇д̣̇о ‘‘виж̇ж̇анд̇аригааяаа’’д̇иаад̣̇ийсу (ма. ни. 2.149) вияа кан̣ад̇т̇од̇и ааха ‘‘яад̇д̇агзна кан̣знаа’’д̇и. д̇знаад̇и хад̇т̇инаа. д̇аанийд̇и саатзяяаад̣̇ийни.
3.Kārakabhāvanti paṭipattiyaṃ paṭipajjanakabhāvaṃ. Mayampi nāma gihī bahukiccā samānā kālena kālaṃ satipaṭṭhānesu suppatiṭṭhitacittā viharāma, kimaṅgaṃ pana vivekavāsinoti attano kārakabhāvaṃ pavedento evaṃ bhikkhusaṅghañca ukkhipati. Tenāha ‘‘ayañhettha adhippāyo’’tiādi. Nānārammaṇesu aparāparaṃ uppajjamānānaṃ rāgādikilesānaṃ ghanajaṭitasaṅkhātākārena pavatti kilesagahanena gahanatā, tenāha ‘‘anto jaṭā bahi jaṭā, jaṭāya jaṭitā pajā’’ti (saṃ. ni. 1.23, 192). Manussānaṃ ajjhāsayagahaṇena sāṭheyyampīti dassento āha ‘‘kasaṭasāṭheyyesupi eseva nayo’’ti. Yathā sappimadhuphāṇitādīsu kacavarabhāvo, so kasaṭoti vuccati, evaṃ santāne aparisuddho saṃkilesabhāvo kasaṭanti āha ‘‘aparisuddhaṭṭhena kasaṭatā’’ti. Attani asantaguṇasambhāvanaṃ kerāṭiyaṭṭho. Jānātīti ‘‘idaṃ ahitaṃ na sevitabbaṃ, idaṃ hitaṃ sevitabba’’nti vicāreti deseti. Vicāraṇatthopi hi hoti jānāti-saddo yathā ‘‘āyasmā jānātī’’ti. Sabbāpi…pe… adhippetā ‘‘pasupālakā’’tiādīsu viya. Idha antara-saddo ‘‘vijjantarikāyā’’tiādīsu (ma. ni. 2.149) viya khaṇatthoti āha ‘‘yattakena khaṇenā’’ti. Tenāti hatthinā. Tānīti sāṭheyyādīni.
ад̇т̇ад̇о гааяажид̇д̇уж̇угад̇аабадибагкабхууд̇аава лобхасахаг̇ад̇ажид̇д̇уббаад̣̇асса бавад̇д̇иаагаарависзсаад̇и д̇аани бавад̇д̇иаагаарзна д̣̇ассзд̇ум̣ ‘‘д̇ад̇т̇аа’’д̇иаад̣̇и вуд̇д̇ам̣. д̇ад̇т̇а яассаад̇и баан̣абхууд̇асса ассасса ваа хад̇т̇ино ваа. тассаамийд̇и д̇ад̇т̇зва саббадибхаяз таанз г̇анд̇ваа тассаамийд̇и на ход̇и. имасса саатзяяад̇ааяа баагадагаран̣ам̣ ван̃жанаад̇хиббааяабхаавад̇о. д̇ат̇аа хи жад̇уусу таанзсу ‘‘ван̃жзд̇ваа’’ ижжзва вуд̇д̇ам̣, ниг̇уханд̇о бана д̇ад̇т̇зва г̇анд̇ваа д̇идтзяяа. зса наяо сзсзсуби. бадимаг̇г̇ам̣ аарохид̇угаамассаад̇и ааг̇ад̇амаг̇г̇амзва нивад̇д̇ид̇ваа г̇анд̇угаамасса. лзн̣д̣ависсаж̇ж̇анаад̣̇ийсу гааланд̇араабзгкаабхаавам̣ ‘‘д̇ат̇аа’’д̇и иминаа убасам̣харад̇и.
Atthato kāyacittujukatāpaṭipakkhabhūtāva lobhasahagatacittuppādassa pavattiākāravisesāti tāni pavattiākārena dassetuṃ ‘‘tatthā’’tiādi vuttaṃ. Tattha yassāti pāṇabhūtassa assassa vā hatthino vā. Ṭhassāmīti tattheva sappaṭibhaye ṭhāne gantvā ṭhassāmīti na hoti. Imassa sāṭheyyatāya pākaṭakaraṇaṃ vañcanādhippāyabhāvato. Tathā hi catūsu ṭhānesu ‘‘vañcetvā’’ icceva vuttaṃ, niguhanto pana tattheva gantvā tiṭṭheyya. Esa nayo sesesupi. Paṭimaggaṃ ārohitukāmassāti āgatamaggameva nivattitvā gantukāmassa. Leṇḍavissajjanādīsu kālantarāpekkhābhāvaṃ ‘‘tathā’’ti iminā upasaṃharati.
анд̇ож̇аад̇агаад̇и ад̇д̇ано д̣̇аасияаа гужчимхи ж̇аад̇аа. д̇ханаггийд̇аад̇и д̇ханам̣ д̣̇ад̇ваа д̣̇аасабхаавзна г̇ахид̇аа. гарамараанийд̇аад̇и д̣̇аасабхаавзна гарамараг̇г̇аахаг̇ахид̇аа. д̣̇аасаб̣яанд̇и д̣̇аасабхаавам̣. бзссаад̇и ад̣̇аасаа зва худ̇ваа взяяааважжагараа. имам̣ виссаж̇ж̇зд̇ваад̇и имам̣ ад̇д̇ано хад̇т̇аг̇ад̇ам̣ виссаж̇ж̇зд̇ваа. имам̣ г̇ан̣ханд̇аад̇и имам̣ д̇асса хад̇т̇аг̇ад̇ам̣ г̇ан̣ханд̇аа. саммукад̇о ан̃н̃ат̇аа бараммукагаалз гааяаваажаасамуд̣̇аажаарад̣̇ассанзнзва жид̇д̇асса нзсам̣ ан̃н̃ат̇аа тид̇абхааво нид̣̇д̣̇идтод̇и взд̣̇ид̇аб̣б̣о.
Antojātakāti attano dāsiyā kucchimhi jātā. Dhanakkītāti dhanaṃ datvā dāsabhāvena gahitā. Karamarānītāti dāsabhāvena karamaraggāhagahitā. Dāsabyanti dāsabhāvaṃ. Pessāti adāsā eva hutvā veyyāvaccakarā. Imaṃ vissajjetvāti imaṃ attano hatthagataṃ vissajjetvā. Imaṃgaṇhantāti imaṃ tassa hatthagataṃ gaṇhantā. Sammukhato aññathā parammukhakāle kāyavācāsamudācāradassaneneva cittassa nesaṃ aññathā ṭhitabhāvo niddiṭṭhoti veditabbo.
4. аяамби баадиязгго анусанд̇хийд̇и зд̇т̇ааби ананд̇арз вуд̇д̇анаязнзва анусанд̇хияож̇анаа взд̣̇ид̇аб̣б̣аа. д̇знзвааха ‘‘аяан̃хий’’д̇иаад̣̇и. жад̇уд̇т̇о хид̇абадибад̣̇ам̣ бадибаннод̇и яож̇анаа. буг̇г̇аласийсзна буг̇г̇алабадибад̇д̇им̣ д̣̇ассзнд̇о ‘‘буг̇г̇алз бахааяаа’’д̇и ааха. бадибад̇д̇и хи ид̇ха бахаад̇аб̣б̣аа, на буг̇г̇алаа. яат̇аа ассад̣̇д̇хаад̣̇ибуг̇г̇алабариваж̇ж̇анзна сад̣̇д̇хинд̣̇рияаад̣̇ибхааванаа иж̇жханд̇и, звам̣ мижчаабадибаннабуг̇г̇алабариваж̇ж̇анзна мижчаабадибад̣̇аа важ̇ж̇ид̇аб̣б̣аад̇и ааха – ‘‘буримз д̇аяо буг̇г̇алз бахааяаа’’д̇и. жад̇уд̇т̇абуг̇г̇алассаад̇и имасмим̣ жад̇уггз вуд̇д̇ажад̇уд̇т̇абуг̇г̇аласса хид̇абадибад̇д̇ияам̣язва бадибаад̣̇зми бавад̇д̇змийд̇и д̣̇ассзнд̇о. санд̇аад̇и самам̣ винаасам̣ нирод̇хам̣ бад̇д̇аад̇и аяамзд̇т̇а ад̇т̇од̇и ааха ‘‘нируд̣̇д̇хаа санд̇аад̇и вуд̇д̇аа’’д̇и. буна санд̇аад̇и бхааванаавасзна гилзсабарил̣аахавиг̇амад̇о санд̇аад̇и аяамзд̇т̇а ад̇т̇од̇и ааха ‘‘ниб̣б̣уд̇аа’’д̇и. санд̇аад̇и аанзд̇ваа яож̇анаа. санд̇о хавзд̇и зд̇т̇а самабхаавагарзна саад̇хубхаавасса висзсабажжаяабхууд̇зна бан̣д̣ижжзна саманнааг̇ад̇аа арияаа ‘‘санд̇о’’д̇и вуд̇д̇аад̇и ааха – ‘‘санд̇о хавз…бз… бан̣д̣ид̇аа’’д̇и.
4.Ayampi pāṭiyekko anusandhīti etthāpi anantare vuttanayeneva anusandhiyojanā veditabbā. Tenevāha ‘‘ayañhī’’tiādi. Catuttho hitapaṭipadaṃ paṭipannoti yojanā. Puggalasīsena puggalapaṭipattiṃ dassento ‘‘puggale pahāyā’’ti āha. Paṭipatti hi idha pahātabbā, na puggalā. Yathā assaddhādipuggalaparivajjanena saddhindriyādibhāvanā ijjhanti, evaṃ micchāpaṭipannapuggalaparivajjanena micchāpaṭipadā vajjitabbāti āha – ‘‘purime tayo puggale pahāyā’’ti. Catutthapuggalassāti imasmiṃ catukke vuttacatutthapuggalassa hitapaṭipattiyaṃyeva paṭipādemi pavattemīti dassento. Santāti samaṃ vināsaṃ nirodhaṃ pattāti ayamettha atthoti āha ‘‘niruddhā santāti vuttā’’ti. Puna santāti bhāvanāvasena kilesapariḷāhavigamato santāti ayamettha atthoti āha ‘‘nibbutā’’ti. Santāti ānetvā yojanā. Santo haveti ettha samabhāvakarena sādhubhāvassa visesapaccayabhūtena paṇḍiccena samannāgatā ariyā ‘‘santo’’ti vuttāti āha – ‘‘santo have…pe… paṇḍitā’’ti.
аахид̇о ахам̣маано зд̇т̇аад̇и ад̇д̇аа (а. ни. дий. 2.4.198) ад̇д̇абхааво, ид̇ха бана яо баро на ход̇и, со ад̇д̇аа, д̇ам̣ ад̇д̇аанам̣. баранд̇и ад̇д̇ад̇о ан̃н̃ам̣. чаад̇ам̣ вужжад̇и д̇ан̣хаа ж̇игхажчаахзд̇уд̇ааяа. анд̇о д̇аабанагилзсаананд̇и ад̇д̇ано санд̇аанз ад̇д̇абарил̣аахаж̇ананасанд̇аббанагилзсаанам̣. жид̇д̇ам̣ аараад̇хзд̇ийд̇и жид̇д̇ам̣ басаад̣̇зд̇и, самбахам̣сзд̇ийд̇и ад̇т̇о. яасмаа бана д̇ат̇аабхууд̇о жид̇д̇ам̣ самбаад̣̇знд̇о аж̇жхаасаяам̣ г̇ан̣ханд̇о наама ход̇и, д̇асмаа вуд̇д̇ам̣ ‘‘жид̇д̇ам̣ самбаад̣̇зд̇ий’’д̇иаад̣̇и.
Āhito ahaṃmāno etthāti attā (a. ni. ṭī. 2.4.198) attabhāvo, idha pana yo paro na hoti, so attā, taṃ attānaṃ. Paranti attato aññaṃ. Chātaṃ vuccati taṇhā jighacchāhetutāya. Anto tāpanakilesānanti attano santāne attapariḷāhajananasantappanakilesānaṃ. Cittaṃ ārādhetīti cittaṃ pasādeti, sampahaṃsetīti attho. Yasmā pana tathābhūto cittaṃ sampādento ajjhāsayaṃ gaṇhanto nāma hoti, tasmā vuttaṃ ‘‘cittaṃ sampādetī’’tiādi.
5. д̣̇угкам̣ бадиггуулам̣ ж̇зг̇ужчам̣ зд̇ассаад̇и д̣̇угкабадиггууло д̇ам̣ д̣̇угкабадиггуулам̣. висзсанависзсид̇аб̣б̣ад̇аа хи гаамажаараа. адтагат̇ааяам̣ бана д̣̇угкасса висзсид̇аб̣б̣ад̇ам̣ санд̇хааяа б̣аахирад̇т̇асамаасам̣ анаад̣̇ияид̇ваа ‘‘д̣̇угкасса бадиггуула’’нд̇и ад̇т̇о вуд̇д̇о. язна хи бхааг̇зна бурисасса д̣̇угкам̣ бадиггуулам̣, д̇зна д̣̇угкасса бурисобийд̇и. д̇знааха – ‘‘бажжанийгасан̣тид̇а’’нд̇и.
5. Dukkhaṃ paṭikkūlaṃ jegucchaṃ etassāti dukkhapaṭikkūlo taṃ dukkhapaṭikkūlaṃ. Visesanavisesitabbatā hi kāmacārā. Aṭṭhakathāyaṃ pana dukkhassa visesitabbataṃ sandhāya bāhiratthasamāsaṃ anādiyitvā ‘‘dukkhassa paṭikkūla’’nti attho vutto. Yena hi bhāgena purisassa dukkhaṃ paṭikkūlaṃ, tena dukkhassa purisopīti. Tenāha – ‘‘paccanīkasaṇṭhita’’nti.
6. жад̇уухи гааран̣зхийд̇и д̇хаад̇угусалад̇аад̣̇ийхи жад̇уухи гааран̣зхи. гаммам̣ гарод̇ийд̇и яог̇агаммам̣ гарод̇и. яасмаа самб̣уд̣̇д̇хаа барзсам̣ маг̇г̇апалаад̇хиг̇амааяа уссаахаж̇аад̇аа, д̇ад̇т̇а ниранд̇арам̣ яуд̇д̇аббаяуд̇д̇аа зва хонд̇и, д̇з бадижжа д̇зсам̣ анд̇арааяо на ход̇иязваад̇и ааха ‘‘на бана б̣уд̣̇д̇хз бадижжаа’’д̇и. гирияабарихаанияаа д̣̇зсагасса д̇ассзва ваа буг̇г̇аласса д̇аж̇ж̇абаяог̇аабхаавад̇о. ‘‘д̣̇зсагасса ваа’’д̇и ид̣̇ам̣ саавагаанам̣ васзна д̣̇адтаб̣б̣ам̣. махад̇аа ад̇т̇знаад̇и зд̇т̇а ад̇т̇а-сад̣̇д̣̇о аанисам̣сабарияааяод̇и ааха ‘‘д̣̇вийхи аанисам̣сзхий’’д̇и. басаад̣̇ам̣ бадилабхад̇и ‘‘араханд̇о’’д̇иаад̣̇инаа сан̇гхасуббадибад̇д̇ияаа суд̇ад̇д̇аа. абхинаво наяо уд̣̇абаад̣̇и санд̇ад̇асийлад̇аад̣̇ивасзна анад̇д̇анд̇абад̇аад̣̇ивасзна, соби д̇ам̣ суд̇ваа д̣̇аасаад̣̇ийсу сависзсам̣ лаж̇ж̇ий д̣̇аяаабанно хид̇аанугамбий худ̇ваа сзгкабадибад̣̇ам̣ сийлам̣ саад̇хзнд̇о ануггамзна сад̇ибадтаанабхааванам̣ бариб̣руухзд̇и. д̇знааха бхаг̇аваа ‘‘махад̇аа ад̇т̇зна сам̣яуд̇д̇о’’д̇и.
6.Catūhikāraṇehīti dhātukusalatādīhi catūhi kāraṇehi. Kammaṃ karotīti yogakammaṃ karoti. Yasmā sambuddhā paresaṃ maggaphalādhigamāya ussāhajātā, tattha nirantaraṃ yuttappayuttā eva honti, te paṭicca tesaṃ antarāyo na hotiyevāti āha ‘‘na pana buddhe paṭiccā’’ti. Kiriyaparihāniyā desakassa tasseva vā puggalassa tajjapayogābhāvato. ‘‘Desakassa vā’’ti idaṃ sāvakānaṃ vasena daṭṭhabbaṃ. Mahatā atthenāti ettha attha-saddo ānisaṃsapariyāyoti āha ‘‘dvīhi ānisaṃsehī’’ti. Pasādaṃ paṭilabhati ‘‘arahanto’’tiādinā saṅghasuppaṭipattiyā sutattā. Abhinavo nayo udapādi santatasīlatādivasena anattantapatādivasena, sopi taṃ sutvā dāsādīsu savisesaṃ lajjī dayāpanno hitānukampī hutvā sekkhapaṭipadaṃ sīlaṃ sādhento anukkamena satipaṭṭhānabhāvanaṃ paribrūheti. Tenāha bhagavā ‘‘mahatā atthena saṃyutto’’ti.
8. барзсам̣ хананагхаад̇анаад̣̇инаа род̣̇аабанад̇о луд̣̇д̣̇о, д̇ат̇аа вигхаад̇агабхаавзна гааяажид̇д̇аанам̣ вид̣̇ааран̣ад̇о д̣̇аарун̣о, вируд̣̇д̇хаваад̣̇ад̇ааяа гагкал̣о, б̣анд̇ханааг̇аарз нияуд̇д̇о б̣анд̇ханааг̇аариго.
8. Paresaṃ hananaghātanādinā rodāpanato luddo, tathā vighātakabhāvena kāyacittānaṃ vidāraṇato dāruṇo, viruddhavādatāya kakkhaḷo, bandhanāgāre niyutto bandhanāgāriko.
9. кад̇д̇ияаабхисзгзнаад̇и кад̇д̇ияаанам̣ гад̇д̇аб̣б̣аабхисзгзна. сант̇ааг̇ааранд̇и сант̇ааравасзна гад̇ам̣ аг̇аарам̣ яан̃н̃ааваадам̣. саббид̇злзнаад̇и саббимаязна д̇злзна, яамагаснзхзна хи д̇ад̣̇аа гааяам̣ аб̣бхан̃ж̇ад̇и. важчабхаавам̣ д̇арид̇ваа тид̇о важчад̇аро. баригкзбагаран̣ад̇т̇ааяаад̇и ванамаалаахи сад̣̇д̇хим̣ д̣̇аб̣бхзхи взд̣̇ияаа баригкзбанад̇т̇ааяа. яан̃н̃абхуумияанд̇и авасзсаяан̃н̃адтаанз. яам̣ банзд̇т̇а ад̇т̇ад̇о авибхад̇д̇ам̣ д̇ам̣ сувин̃н̃зяяамзва.
9.Khattiyābhisekenāti khattiyānaṃ kattabbaabhisekena. Santhāgāranti santhāravasena kataṃ agāraṃ yaññāvāṭaṃ. Sappitelenāti sappimayena telena, yamakasnehena hi tadā kāyaṃ abbhañjati. Vacchabhāvaṃ taritvā ṭhito vacchataro. Parikkhepakaraṇatthāyāti vanamālāhi saddhiṃ dabbhehi vediyā parikkhepanatthāya. Yaññabhūmiyanti avasesayaññaṭṭhāne. Yaṃ panettha atthato avibhattaṃ taṃ suviññeyyameva.
ганд̣̇арагасуд̇д̇аван̣н̣анааяа лийнад̇т̇аббагаасанаа самад̇д̇аа.
Kandarakasuttavaṇṇanāya līnatthappakāsanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 1. ганд̣̇арагасуд̇д̇ам̣ • 1. Kandarakasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 1. ганд̣̇арагасуд̇д̇аван̣н̣анаа • 1. Kandarakasuttavaṇṇanā
