| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৮. কণ্ডুপটিচ্ছাদিসিক্খাপদং
8. Kaṇḍupaṭicchādisikkhāpadaṃ
৫৩৭. অট্ঠমে ‘‘কত্থা’’তিআদীনি ৰুত্তনযানেৰ।
537. Aṭṭhame ‘‘katthā’’tiādīni vuttanayāneva.
৫৩৯. ‘‘যস্সা’’তি পদস্স ৰিসযং দস্সেতুং ৰুত্তং ‘‘ভিক্খুনো’’তি। ‘‘নাভিযা হেট্ঠা’’তি ইমিনা নাভিযা অধো অধোনাভীতি ৰচনত্থং দস্সেতি, ‘‘জাণুমণ্ডলানং উপরী’’তি ইমিনা জাণুমণ্ডলানং উব্ভ উব্ভজাণুমণ্ডলন্তি। উব্ভসদ্দো হি উপরিপরিযাযো সত্তম্যন্তনিপাতো। কণ্ডুখজ্জুসদ্দানং ৰেৰচনত্তা ৰুত্তং ‘‘কণ্ডূতি খজ্জূ’’তি। কণ্ডতি ভেদনং করোতীতি কণ্ডু। খজ্জতি ব্যধনং করোতীতি খজ্জু। কেসুচি পোত্থকেসু ‘‘কচ্ছূ’’তি পাঠো অত্থি, সো অযুত্তো।
539. ‘‘Yassā’’ti padassa visayaṃ dassetuṃ vuttaṃ ‘‘bhikkhuno’’ti. ‘‘Nābhiyā heṭṭhā’’ti iminā nābhiyā adho adhonābhīti vacanatthaṃ dasseti, ‘‘jāṇumaṇḍalānaṃ uparī’’ti iminā jāṇumaṇḍalānaṃ ubbha ubbhajāṇumaṇḍalanti. Ubbhasaddo hi uparipariyāyo sattamyantanipāto. Kaṇḍukhajjusaddānaṃ vevacanattā vuttaṃ ‘‘kaṇḍūti khajjū’’ti. Kaṇḍati bhedanaṃ karotīti kaṇḍu. Khajjati byadhanaṃ karotīti khajju. Kesuci potthakesu ‘‘kacchū’’ti pāṭho atthi, so ayutto.
লোহিতং তুণ্ডং এতিস্সাতি লোহিততুণ্ডিকা। পিল়যতি ৰিবাধযতীতি পিল়কা। আ ভুসো অসুচিং সৰতি পগ্ঘরাপেতীতি অস্সাৰোতি ৰচনত্থং দস্সেন্তো আহ ‘‘অসুচিপগ্ঘরণ’’ন্তি। অরিসঞ্চ ভগন্দরা চ মধুমেহো চ। আদিসদ্দেন দুন্নামকাদযো সঙ্গণ্হাতি। তত্থ অরি ৰিয ঈসতি অভিভৰতীতি অরিসং। ভগং ৰুচ্চতি ৰচ্চমগ্গং, তং দরতি ফালেতীতি ভগন্দরা, গূথসমীপে জাতো ৰণৰিসেসো। মধু ৰিয মুত্তাদিং মিহতি সেচতীতি মধুমেহো, সো আবাধো মুত্তমেহো সুক্কমেহো রত্তমেহোতি অনেকৰিধো। থুল্লসদ্দো মহন্তপরিযাযোতি আহ ‘‘মহা’’তি। অট্ঠমং।
Lohitaṃ tuṇḍaṃ etissāti lohitatuṇḍikā. Piḷayati vibādhayatīti piḷakā. Ā bhuso asuciṃ savati paggharāpetīti assāvoti vacanatthaṃ dassento āha ‘‘asucipaggharaṇa’’nti. Arisañca bhagandarā ca madhumeho ca. Ādisaddena dunnāmakādayo saṅgaṇhāti. Tattha ari viya īsati abhibhavatīti arisaṃ. Bhagaṃ vuccati vaccamaggaṃ, taṃ darati phāletīti bhagandarā, gūthasamīpe jāto vaṇaviseso. Madhu viya muttādiṃ mihati secatīti madhumeho, so ābādho muttameho sukkameho rattamehoti anekavidho. Thullasaddo mahantapariyāyoti āha ‘‘mahā’’ti. Aṭṭhamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৯. রতনৰগ্গো • 9. Ratanavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৮. কণ্ডুপটিচ্ছাদিসিক্খাপদৰণ্ণনা • 8. Kaṇḍupaṭicchādisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৭. নিসীদনসিক্খাপদৰণ্ণনা • 7. Nisīdanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৮. কণ্ডুপটিচ্ছাদিসিক্খাপদৰণ্ণনা • 8. Kaṇḍupaṭicchādisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৭. নিসীদনসিক্খাপদৰণ্ণনা • 7. Nisīdanasikkhāpadavaṇṇanā
