| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೮. ಕಣ್ಡುಪಟಿಚ್ಛಾದಿಸಿಕ್ಖಾಪದಂ
8. Kaṇḍupaṭicchādisikkhāpadaṃ
೫೩೭. ಅಟ್ಠಮೇ ‘‘ಕತ್ಥಾ’’ತಿಆದೀನಿ ವುತ್ತನಯಾನೇವ।
537. Aṭṭhame ‘‘katthā’’tiādīni vuttanayāneva.
೫೩೯. ‘‘ಯಸ್ಸಾ’’ತಿ ಪದಸ್ಸ ವಿಸಯಂ ದಸ್ಸೇತುಂ ವುತ್ತಂ ‘‘ಭಿಕ್ಖುನೋ’’ತಿ। ‘‘ನಾಭಿಯಾ ಹೇಟ್ಠಾ’’ತಿ ಇಮಿನಾ ನಾಭಿಯಾ ಅಧೋ ಅಧೋನಾಭೀತಿ ವಚನತ್ಥಂ ದಸ್ಸೇತಿ, ‘‘ಜಾಣುಮಣ್ಡಲಾನಂ ಉಪರೀ’’ತಿ ಇಮಿನಾ ಜಾಣುಮಣ್ಡಲಾನಂ ಉಬ್ಭ ಉಬ್ಭಜಾಣುಮಣ್ಡಲನ್ತಿ। ಉಬ್ಭಸದ್ದೋ ಹಿ ಉಪರಿಪರಿಯಾಯೋ ಸತ್ತಮ್ಯನ್ತನಿಪಾತೋ। ಕಣ್ಡುಖಜ್ಜುಸದ್ದಾನಂ ವೇವಚನತ್ತಾ ವುತ್ತಂ ‘‘ಕಣ್ಡೂತಿ ಖಜ್ಜೂ’’ತಿ। ಕಣ್ಡತಿ ಭೇದನಂ ಕರೋತೀತಿ ಕಣ್ಡು। ಖಜ್ಜತಿ ಬ್ಯಧನಂ ಕರೋತೀತಿ ಖಜ್ಜು। ಕೇಸುಚಿ ಪೋತ್ಥಕೇಸು ‘‘ಕಚ್ಛೂ’’ತಿ ಪಾಠೋ ಅತ್ಥಿ, ಸೋ ಅಯುತ್ತೋ।
539. ‘‘Yassā’’ti padassa visayaṃ dassetuṃ vuttaṃ ‘‘bhikkhuno’’ti. ‘‘Nābhiyā heṭṭhā’’ti iminā nābhiyā adho adhonābhīti vacanatthaṃ dasseti, ‘‘jāṇumaṇḍalānaṃ uparī’’ti iminā jāṇumaṇḍalānaṃ ubbha ubbhajāṇumaṇḍalanti. Ubbhasaddo hi uparipariyāyo sattamyantanipāto. Kaṇḍukhajjusaddānaṃ vevacanattā vuttaṃ ‘‘kaṇḍūti khajjū’’ti. Kaṇḍati bhedanaṃ karotīti kaṇḍu. Khajjati byadhanaṃ karotīti khajju. Kesuci potthakesu ‘‘kacchū’’ti pāṭho atthi, so ayutto.
ಲೋಹಿತಂ ತುಣ್ಡಂ ಏತಿಸ್ಸಾತಿ ಲೋಹಿತತುಣ್ಡಿಕಾ। ಪಿಳಯತಿ ವಿಬಾಧಯತೀತಿ ಪಿಳಕಾ। ಆ ಭುಸೋ ಅಸುಚಿಂ ಸವತಿ ಪಗ್ಘರಾಪೇತೀತಿ ಅಸ್ಸಾವೋತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಅಸುಚಿಪಗ್ಘರಣ’’ನ್ತಿ। ಅರಿಸಞ್ಚ ಭಗನ್ದರಾ ಚ ಮಧುಮೇಹೋ ಚ। ಆದಿಸದ್ದೇನ ದುನ್ನಾಮಕಾದಯೋ ಸಙ್ಗಣ್ಹಾತಿ। ತತ್ಥ ಅರಿ ವಿಯ ಈಸತಿ ಅಭಿಭವತೀತಿ ಅರಿಸಂ। ಭಗಂ ವುಚ್ಚತಿ ವಚ್ಚಮಗ್ಗಂ, ತಂ ದರತಿ ಫಾಲೇತೀತಿ ಭಗನ್ದರಾ, ಗೂಥಸಮೀಪೇ ಜಾತೋ ವಣವಿಸೇಸೋ। ಮಧು ವಿಯ ಮುತ್ತಾದಿಂ ಮಿಹತಿ ಸೇಚತೀತಿ ಮಧುಮೇಹೋ, ಸೋ ಆಬಾಧೋ ಮುತ್ತಮೇಹೋ ಸುಕ್ಕಮೇಹೋ ರತ್ತಮೇಹೋತಿ ಅನೇಕವಿಧೋ। ಥುಲ್ಲಸದ್ದೋ ಮಹನ್ತಪರಿಯಾಯೋತಿ ಆಹ ‘‘ಮಹಾ’’ತಿ। ಅಟ್ಠಮಂ।
Lohitaṃ tuṇḍaṃ etissāti lohitatuṇḍikā. Piḷayati vibādhayatīti piḷakā. Ā bhuso asuciṃ savati paggharāpetīti assāvoti vacanatthaṃ dassento āha ‘‘asucipaggharaṇa’’nti. Arisañca bhagandarā ca madhumeho ca. Ādisaddena dunnāmakādayo saṅgaṇhāti. Tattha ari viya īsati abhibhavatīti arisaṃ. Bhagaṃ vuccati vaccamaggaṃ, taṃ darati phāletīti bhagandarā, gūthasamīpe jāto vaṇaviseso. Madhu viya muttādiṃ mihati secatīti madhumeho, so ābādho muttameho sukkameho rattamehoti anekavidho. Thullasaddo mahantapariyāyoti āha ‘‘mahā’’ti. Aṭṭhamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೯. ರತನವಗ್ಗೋ • 9. Ratanavaggo
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā / ೮. ಕಣ್ಡುಪಟಿಚ್ಛಾದಿಸಿಕ್ಖಾಪದವಣ್ಣನಾ • 8. Kaṇḍupaṭicchādisikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೭. ನಿಸೀದನಸಿಕ್ಖಾಪದವಣ್ಣನಾ • 7. Nisīdanasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೮. ಕಣ್ಡುಪಟಿಚ್ಛಾದಿಸಿಕ್ಖಾಪದವಣ್ಣನಾ • 8. Kaṇḍupaṭicchādisikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೭. ನಿಸೀದನಸಿಕ್ಖಾಪದವಣ್ಣನಾ • 7. Nisīdanasikkhāpadavaṇṇanā
