| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៤៤៤. កណ្ហទីបាយនជាតកំ (៦)
444. Kaṇhadīpāyanajātakaṃ (6)
៦២.
62.
សត្តាហមេវាហំ បសន្នចិត្តោ, បុញ្ញត្ថិកោ អាចរិំ 1 ព្រហ្មចរិយំ;
Sattāhamevāhaṃ pasannacitto, puññatthiko ācariṃ 2 brahmacariyaṃ;
អថាបរំ យំ ចរិតំ មមេទំ 3, វស្សានិ បញ្ញាស សមាធិកានិ;
Athāparaṃ yaṃ caritaṃ mamedaṃ 4, vassāni paññāsa samādhikāni;
អកាមកោ វាបិ 5 អហំ ចរាមិ, ឯតេន សច្ចេន សុវត្ថិ ហោតុ;
Akāmako vāpi 6 ahaṃ carāmi, etena saccena suvatthi hotu;
ហតំ វិសំ ជីវតុ យញ្ញទត្តោ។
Hataṃ visaṃ jīvatu yaññadatto.
៦៣.
63.
យស្មា ទានំ នាភិនន្ទិំ កទាចិ, ទិស្វានហំ អតិថិំ វាសកាលេ;
Yasmā dānaṃ nābhinandiṃ kadāci, disvānahaṃ atithiṃ vāsakāle;
ន ចាបិ មេ អប្បិយតំ អវេទុំ, ពហុស្សុតា សមណព្រាហ្មណា ច។
Na cāpi me appiyataṃ aveduṃ, bahussutā samaṇabrāhmaṇā ca.
អកាមកោ វាបិ អហំ ទទាមិ, ឯតេន សច្ចេន សុវត្ថិ ហោតុ;
Akāmako vāpi ahaṃ dadāmi, etena saccena suvatthi hotu;
ហតំ វិសំ ជីវតុ យញ្ញទត្តោ។
Hataṃ visaṃ jīvatu yaññadatto.
៦៤.
64.
តស្មិញ្ច មេ អប្បិយតាយ អជ្ជ, បិតរិ ច តេ នត្ថិ កោចិ វិសេសោ;
Tasmiñca me appiyatāya ajja, pitari ca te natthi koci viseso;
ឯតេន សច្ចេន សុវត្ថិ ហោតុ, ហតំ វិសំ ជីវតុ យញ្ញទត្តោ។
Etena saccena suvatthi hotu, hataṃ visaṃ jīvatu yaññadatto.
៦៥.
65.
ទីបាយន កិស្ស ជិគុច្ឆមានោ, អកាមកោ ចរសិ ព្រហ្មចរិយំ។
Dīpāyana kissa jigucchamāno, akāmako carasi brahmacariyaṃ.
៦៦.
66.
សទ្ធាយ និក្ខម្ម បុនំ និវត្តោ, សោ ឯឡមូគោវ ពាលោ 15 វតាយំ;
Saddhāya nikkhamma punaṃ nivatto, so eḷamūgova bālo 16 vatāyaṃ;
ឯតស្ស វាទស្ស ជិគុច្ឆមានោ, អកាមកោ ចរាមិ ព្រហ្មចរិយំ;
Etassa vādassa jigucchamāno, akāmako carāmi brahmacariyaṃ;
វិញ្ញុប្បសត្ថញ្ច សតញ្ច ឋានំ 17, ឯវម្បហំ បុញ្ញករោ ភវាមិ។
Viññuppasatthañca satañca ṭhānaṃ 18, evampahaṃ puññakaro bhavāmi.
៦៧.
67.
សមណេ តុវំ ព្រាហ្មណេ អទ្ធិកេ ច, សន្តប្បយាសិ អន្នបានេន ភិក្ខំ;
Samaṇe tuvaṃ brāhmaṇe addhike ca, santappayāsi annapānena bhikkhaṃ;
ឱបានភូតំវ ឃរំ តវ យិទំ, អន្នេន បានេន ឧបេតរូបំ;
Opānabhūtaṃva gharaṃ tava yidaṃ, annena pānena upetarūpaṃ;
អថ កិស្ស វាទស្ស ជិគុច្ឆមានោ, អកាមកោ ទានមិមំ ទទាសិ។
Atha kissa vādassa jigucchamāno, akāmako dānamimaṃ dadāsi.
៦៨.
68.
បិតរោ ច មេ អាសុំ បិតាមហា ច, សទ្ធា អហុំ ទានបតី វទញ្ញូ;
Pitaro ca me āsuṃ pitāmahā ca, saddhā ahuṃ dānapatī vadaññū;
តំ កុល្លវត្តំ អនុវត្តមានោ, មាហំ កុលេ អន្តិមគន្ធនោ 19 អហុំ;
Taṃ kullavattaṃ anuvattamāno, māhaṃ kule antimagandhano 20 ahuṃ;
ឯតស្ស វាទស្ស ជិគុច្ឆមានោ, អកាមកោ ទានមិមំ ទទាមិ។
Etassa vādassa jigucchamāno, akāmako dānamimaṃ dadāmi.
៦៩.
69.
ទហរិំ កុមារិំ អសមត្ថបញ្ញំ, យំ តានយិំ ញាតិកុលា សុគត្តេ;
Dahariṃ kumāriṃ asamatthapaññaṃ, yaṃ tānayiṃ ñātikulā sugatte;
ន ចាបិ មេ អប្បិយតំ អវេទិ, អញ្ញត្រ កាមា បរិចារយន្តា 21;
Na cāpi me appiyataṃ avedi, aññatra kāmā paricārayantā 22;
អថ កេន វណ្ណេន មយា តេ ភោតិ, សំវាសធម្មោ អហុ ឯវរូបោ។
Atha kena vaṇṇena mayā te bhoti, saṃvāsadhammo ahu evarūpo.
៧០.
70.
អារា ទូរេ នយិធ កទាចិ អត្ថិ, បរម្បរា នាម កុលេ ឥមស្មិំ;
Ārā dūre nayidha kadāci atthi, paramparā nāma kule imasmiṃ;
តំ កុល្លវត្តំ អនុវត្តមានា, មាហំ កុលេ អន្តិមគន្ធិនី អហុំ;
Taṃ kullavattaṃ anuvattamānā, māhaṃ kule antimagandhinī ahuṃ;
ឯតស្ស វាទស្ស ជិគុច្ឆមានា, អកាមិកា បទ្ធចរាម្ហិ 23 តុយ្ហំ។
Etassa vādassa jigucchamānā, akāmikā paddhacarāmhi 24 tuyhaṃ.
៧១.
71.
មណ្ឌព្យ ភាសិំ យមភាសនេយ្យំ 25, តំ ខម្យតំ បុត្តកហេតុ មជ្ជ;
Maṇḍabya bhāsiṃ yamabhāsaneyyaṃ 26, taṃ khamyataṃ puttakahetu majja;
បុត្តបេមា ន ឥធ បរត្ថិ កិញ្ចិ, សោ នោ អយំ ជីវតិ យញ្ញទត្តោតិ។
Puttapemā na idha paratthi kiñci, so no ayaṃ jīvati yaññadattoti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៤៤៤] ៦. កណ្ហទីបាយនជាតកវណ្ណនា • [444] 6. Kaṇhadīpāyanajātakavaṇṇanā
