| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[444] 6. ган̣хад̣̇ийбааяанаж̇аад̇агаван̣н̣анаа
[444] 6. Kaṇhadīpāyanajātakavaṇṇanā
сад̇д̇аахамзвааханд̇и ид̣̇ам̣ сад̇т̇аа ж̇зд̇аванз вихаранд̇о згам̣ угган̣тид̇абхигкум̣ аараб̣бха гат̇зси. вад̇т̇у гусаж̇аад̇агз (ж̇аа. 2.20.1 аад̣̇аяо) аави бхависсад̇и. сад̇т̇аа д̇ам̣ бхигкум̣ ‘‘сажжам̣ гира д̇вам̣ бхигку угган̣тид̇осий’’д̇и бужчид̇ваа ‘‘сажжам̣ бханд̇з’’д̇и вуд̇д̇з ‘‘бхигку бораан̣агабан̣д̣ид̇аа ануббаннз б̣уд̣̇д̇хз б̣аахирагабаб̣б̣аж̇ж̇ам̣ баб̣б̣аж̇ид̇ваа ад̇ирзгабан̃н̃аасавассаани анабхирад̇аа б̣рахмажарияам̣ жаранд̇аа хирод̇д̇аббабхзд̣̇абхаязна ад̇д̇ано угган̣тид̇абхаавам̣ на гассажи гат̇зсум̣, д̇вам̣ гасмаа зваруубз нияяаанигасаасанз баб̣б̣аж̇ид̇ваа маад̣̇исасса г̇аруно б̣уд̣̇д̇хасса саммукз тад̇ваа жад̇убарисамаж̇жхз угган̣тид̇абхаавам̣ аави гароси, гимад̇т̇ам̣ ад̇д̇ано хирод̇д̇аббам̣ на рагкасий’’д̇и вад̇ваа ад̇ийд̇ам̣ аахари.
Sattāhamevāhanti idaṃ satthā jetavane viharanto ekaṃ ukkaṇṭhitabhikkhuṃ ārabbha kathesi. Vatthu kusajātake (jā. 2.20.1 ādayo) āvi bhavissati. Satthā taṃ bhikkhuṃ ‘‘saccaṃ kira tvaṃ bhikkhu ukkaṇṭhitosī’’ti pucchitvā ‘‘saccaṃ bhante’’ti vutte ‘‘bhikkhu porāṇakapaṇḍitā anuppanne buddhe bāhirakapabbajjaṃ pabbajitvā atirekapaññāsavassāni anabhiratā brahmacariyaṃ carantā hirottappabhedabhayena attano ukkaṇṭhitabhāvaṃ na kassaci kathesuṃ, tvaṃ kasmā evarūpe niyyānikasāsane pabbajitvā mādisassa garuno buddhassa sammukhe ṭhatvā catuparisamajjhe ukkaṇṭhitabhāvaṃ āvi karosi, kimatthaṃ attano hirottappaṃ na rakkhasī’’ti vatvā atītaṃ āhari.
ад̇ийд̇з вам̣сарадтз госамб̣ияам̣ наама наг̇арз госамб̣аго наама рааж̇аа раж̇ж̇ам̣ гаарзси. д̇ад̣̇аа ан̃н̃ад̇арасмим̣ ниг̇амз д̣̇вз б̣раахман̣аа асийд̇игодид̇ханавибхаваа ан̃н̃аман̃н̃ам̣ бияасахааяагаа гаамзсу д̣̇осам̣ д̣̇исваа махаад̣̇аанам̣ бавад̇д̇зд̇ваа убхоби гаамз бахааяа махааж̇анасса род̣̇анд̇асса барид̣̇званд̇асса нигкамид̇ваа химаванд̇абад̣̇зсз ассамабад̣̇ам̣ гад̇ваа баб̣б̣аж̇ид̇ваа ун̃чаажарияааяа ванамуулапалаапалзна яаабзнд̇аа бан̣н̣ааса вассаани васим̣су, жхаанам̣ уббаад̣̇зд̇ум̣ наасагким̣су. д̇з бан̣н̣аасавассажжаязна лон̣амб̣иласзванад̇т̇ааяа ж̇анабад̣̇ам̣ жаранд̇аа гаасирадтам̣ самбаабун̣им̣су. д̇ад̇ра ан̃н̃ад̇арасмим̣ ниг̇амаг̇аамз д̣̇ийбааяанад̇аабасасса г̇ихисахааяо ман̣д̣аб̣яо наама ад̇т̇и, д̇з убхоби д̇асса санд̇игам̣ аг̇амам̣су. со д̇з д̣̇исваава ад̇д̇амано бан̣н̣асаалам̣ гаарзд̇ваа убхоби д̇з жад̇уухи бажжаязхи убадтахи. д̇з д̇ад̇т̇а д̇ийн̣и жад̇д̇аари вассаани васид̇ваа д̇ам̣ аабужчид̇ваа жааригам̣ жаранд̇аа б̣аараан̣асим̣ бад̇ваа ад̇имуд̇д̇агасусаанз васим̣су. д̇ад̇т̇а д̣̇ийбааяано яат̇аабхиранд̇ам̣ вихарид̇ваа буна д̇ассзва сахааяасса санд̇игам̣ г̇ад̇о. ман̣д̣аб̣яад̇аабасо д̇ад̇т̇зва васи.
Atīte vaṃsaraṭṭhe kosambiyaṃ nāma nagare kosambako nāma rājā rajjaṃ kāresi. Tadā aññatarasmiṃ nigame dve brāhmaṇā asītikoṭidhanavibhavā aññamaññaṃ piyasahāyakā kāmesu dosaṃ disvā mahādānaṃ pavattetvā ubhopi kāme pahāya mahājanassa rodantassa paridevantassa nikkhamitvā himavantapadese assamapadaṃ katvā pabbajitvā uñchācariyāya vanamūlaphalāphalena yāpentā paṇṇāsa vassāni vasiṃsu, jhānaṃ uppādetuṃ nāsakkhiṃsu. Te paṇṇāsavassaccayena loṇambilasevanatthāya janapadaṃ carantā kāsiraṭṭhaṃ sampāpuṇiṃsu. Tatra aññatarasmiṃ nigamagāme dīpāyanatāpasassa gihisahāyo maṇḍabyo nāma atthi, te ubhopi tassa santikaṃ agamaṃsu. So te disvāva attamano paṇṇasālaṃ kāretvā ubhopi te catūhi paccayehi upaṭṭhahi. Te tattha tīṇi cattāri vassāni vasitvā taṃ āpucchitvā cārikaṃ carantā bārāṇasiṃ patvā atimuttakasusāne vasiṃsu. Tattha dīpāyano yathābhirantaṃ viharitvā puna tasseva sahāyassa santikaṃ gato. Maṇḍabyatāpaso tattheva vasi.
ат̇згад̣̇ивасам̣ зго жоро анд̇онаг̇арз жоригам̣ гад̇ваа д̇ханасаарам̣ аад̣̇ааяа нигканд̇о ‘‘жоро’’д̇и н̃ад̇ваа бадиб̣уд̣̇д̇хзхи гхарассаамигзхи жзва аарагкамануссзхи жа ануб̣ад̣̇д̇хо нид̣̇д̇хаманзна нигкамид̇ваа взг̇зна сусаанам̣ бависид̇ваа д̇аабасасса бан̣н̣асаалад̣̇ваарз бхан̣д̣игам̣ чаддзд̇ваа балааяи . мануссаа бхан̣д̣игам̣ д̣̇исваа ‘‘арз д̣̇удтаж̇адила, д̇вам̣ рад̇д̇им̣ жоригам̣ гад̇ваа д̣̇иваа д̇аабасаруубзна жарасий’’д̇и д̇аж̇ж̇зд̇ваа бот̇зд̇ваа д̇ам̣ аад̣̇ааяа нзд̇ваа ран̃н̃о д̣̇ассаяим̣су. рааж̇аа анубабаригкид̇ваава ‘‘г̇ажчат̇а, нам̣ суулз уд̇д̇аасзт̇аа’’д̇и ааха. д̇з д̇ам̣ сусаанам̣ нзд̇ваа кад̣̇ирасуулам̣ ааробаяим̣су, д̇аабасасса сарийрз суулам̣ на бависад̇и. д̇ад̇о нимб̣асуулам̣ аахарим̣су, д̇амби на бависад̇и. аяасуулам̣ аахарим̣су, д̇амби на бависад̇и. д̇аабасо ‘‘гим̣ ну ко мз буб̣б̣агамма’’нд̇и ологзси, ат̇асса ж̇аад̇иссаран̃аан̣ам̣ уббаж̇ж̇и, д̇зна буб̣б̣агаммам̣ ологзд̇ваа ад̣̇д̣̇аса. гим̣ банасса буб̣б̣агамманд̇и? говил̣аарасуулз магкигаавзд̇ханам̣. со гира буримабхавз вад̣дхагибуд̇д̇о худ̇ваа бид̇у ругкад̇ажчанадтаанам̣ г̇анд̇ваа згам̣ магкигам̣ г̇ахзд̇ваа говил̣аарасалаагааяа суулз вияа виж̇жхи. д̇амзнам̣ баабагаммам̣ имам̣ таанам̣ бад̇ваа г̇ан̣хи. со ‘‘на саггаа ид̇о баабаа маяаа мужжид̇у’’нд̇и н̃ад̇ваа рааж̇абурисз ааха ‘‘сажз мам̣ суулз уд̇д̇аасзд̇угаамад̇т̇а, говил̣аарасуулам̣ аахарат̇аа’’д̇и. д̇з д̇ат̇аа гад̇ваа д̇ам̣ суулз уд̇д̇аасзд̇ваа аарагкам̣ д̣̇ад̇ваа баггамим̣су.
Athekadivasaṃ eko coro antonagare corikaṃ katvā dhanasāraṃ ādāya nikkhanto ‘‘coro’’ti ñatvā paṭibuddhehi gharassāmikehi ceva ārakkhamanussehi ca anubaddho niddhamanena nikkhamitvā vegena susānaṃ pavisitvā tāpasassa paṇṇasāladvāre bhaṇḍikaṃ chaṭṭetvā palāyi . Manussā bhaṇḍikaṃ disvā ‘‘are duṭṭhajaṭila, tvaṃ rattiṃ corikaṃ katvā divā tāpasarūpena carasī’’ti tajjetvā pothetvā taṃ ādāya netvā rañño dassayiṃsu. Rājā anupaparikkhitvāva ‘‘gacchatha, naṃ sūle uttāsethā’’ti āha. Te taṃ susānaṃ netvā khadirasūlaṃ āropayiṃsu, tāpasassa sarīre sūlaṃ na pavisati. Tato nimbasūlaṃ āhariṃsu, tampi na pavisati. Ayasūlaṃ āhariṃsu, tampi na pavisati. Tāpaso ‘‘kiṃ nu kho me pubbakamma’’nti olokesi, athassa jātissarañāṇaṃ uppajji, tena pubbakammaṃ oloketvā addasa. Kiṃ panassa pubbakammanti? Koviḷārasūle makkhikāvedhanaṃ. So kira purimabhave vaḍḍhakiputto hutvā pitu rukkhatacchanaṭṭhānaṃ gantvā ekaṃ makkhikaṃ gahetvā koviḷārasalākāya sūle viya vijjhi. Tamenaṃ pāpakammaṃ imaṃ ṭhānaṃ patvā gaṇhi. So ‘‘na sakkā ito pāpā mayā muccitu’’nti ñatvā rājapurise āha ‘‘sace maṃ sūle uttāsetukāmattha, koviḷārasūlaṃ āharathā’’ti. Te tathā katvā taṃ sūle uttāsetvā ārakkhaṃ datvā pakkamiṃsu.
аарагкагаа бадижчаннаа худ̇ваа д̇асса санд̇игам̣ ааг̇ажчанд̇з ологзнд̇и. д̇ад̣̇аа д̣̇ийбааяано ‘‘жирад̣̇идто мз сахааяо’’д̇и ман̣д̣аб̣яасса санд̇игам̣ ааг̇ажчанд̇о ‘‘суулз уд̇д̇аасид̇о’’д̇и д̇ам̣ д̣̇ивасан̃н̃зва анд̇араамаг̇г̇з суд̇ваа д̇ам̣ таанам̣ г̇анд̇ваа згаманд̇ам̣ тид̇о ‘‘гим̣ самма гаарагосий’’д̇и бужчид̇ваа ‘‘агаарагомхий’’д̇и вуд̇д̇з ‘‘ад̇д̇ано манобад̣̇осам̣ рагкид̇ум̣ сагки, наасагкий’’д̇и бужчи. ‘‘самма, язхи ахам̣ г̇ахид̇о, нзва д̇зсам̣, на ран̃н̃о убари маяхам̣ манобад̣̇осо ад̇т̇ий’’д̇и. ‘‘звам̣ санд̇з д̇аад̣̇исасса сийлавад̇о чааяаа маяхам̣ сукаа’’д̇и вад̇ваа д̣̇ийбааяано суулам̣ ниссааяа нисийд̣̇и. ат̇асса сарийрз ман̣д̣аб̣яасса сарийрад̇о лохид̇аб̣инд̣̇ууни бад̇им̣су. д̇аани суван̣н̣аван̣н̣асарийрз бад̇ид̇абад̇ид̇аани суссид̇ваа гаал̣агаани уббаж̇ж̇им̣су. д̇ад̇о бадтааязва со ган̣хад̣̇ийбааяано наама ахоси. со саб̣б̣арад̇д̇им̣ д̇ад̇т̇зва нисийд̣̇и.
Ārakkhakā paṭicchannā hutvā tassa santikaṃ āgacchante olokenti. Tadā dīpāyano ‘‘ciradiṭṭho me sahāyo’’ti maṇḍabyassa santikaṃ āgacchanto ‘‘sūle uttāsito’’ti taṃ divasaññeva antarāmagge sutvā taṃ ṭhānaṃ gantvā ekamantaṃ ṭhito ‘‘kiṃ samma kārakosī’’ti pucchitvā ‘‘akārakomhī’’ti vutte ‘‘attano manopadosaṃ rakkhituṃ sakkhi, nāsakkhī’’ti pucchi. ‘‘Samma, yehi ahaṃ gahito, neva tesaṃ, na rañño upari mayhaṃ manopadoso atthī’’ti. ‘‘Evaṃ sante tādisassa sīlavato chāyā mayhaṃ sukhā’’ti vatvā dīpāyano sūlaṃ nissāya nisīdi. Athassa sarīre maṇḍabyassa sarīrato lohitabindūni patiṃsu. Tāni suvaṇṇavaṇṇasarīre patitapatitāni sussitvā kāḷakāni uppajjiṃsu. Tato paṭṭhāyeva so kaṇhadīpāyano nāma ahosi. So sabbarattiṃ tattheva nisīdi.
бунад̣̇ивасз аарагкабурисаа ааг̇анд̇ваа д̇ам̣ бавад̇д̇им̣ ран̃н̃о аарожзсум̣. рааж̇аа ‘‘анисаамзд̇ваава мз гад̇а’’нд̇и взг̇зна д̇ад̇т̇а г̇анд̇ваа ‘‘баб̣б̣аж̇ид̇а, гасмаа суулам̣ ниссааяа нисинносий’’д̇и д̣̇ийбааяанам̣ бужчи. махаарааж̇а, имам̣ д̇аабасам̣ рагканд̇о нисинномхи. гим̣ бана д̇вам̣ махаарааж̇а, имасса гаарагабхаавам̣ ваа агаарагабхаавам̣ ваа н̃ад̇ваа звам̣ гаарзсийд̇и? со гаммасса асод̇хид̇абхаавам̣ аажигки. ат̇асса со ‘‘махаарааж̇а, ран̃н̃аа наама нисаммагааринаа бхавид̇аб̣б̣ам̣ , аласо г̇ихий гаамабхог̇ий на саад̇хуу’’д̇иаад̣̇ийни вад̇ваа д̇хаммам̣ д̣̇зсзси. рааж̇аа ман̣д̣аб̣яасса нид̣̇д̣̇осабхаавам̣ н̃ад̇ваа ‘‘суулам̣ харат̇аа’’д̇и аан̣аабзси. суулам̣ харанд̇аа харид̇ум̣ на сагким̣су. ман̣д̣аб̣яо ааха – ‘‘махаарааж̇а, ахам̣ буб̣б̣з гад̇агаммад̣̇осзна зваруубам̣ бхаяам̣ самбад̇д̇о, мама сарийрад̇о суулам̣ харид̇ум̣ на саггаа, сажз маяхам̣ ж̇ийвид̇ам̣ д̣̇аад̇угаамо, гагажам̣ аахараабзд̇ваа имам̣ суулам̣ жаммасамам̣ чинд̣̇аабзхий’’д̇и. рааж̇аа д̇ат̇аа гаарзси. анд̇осарийрз сууло анд̇оязва ахоси. д̇ад̣̇аа гира со сукумам̣ говил̣аарасалаагам̣ г̇ахзд̇ваа магкигааяа важжамаг̇г̇ам̣ бавзсзси, д̇ам̣ д̇асса анд̇осарийрзязва ахоси. со д̇зна гааран̣зна амарид̇ваа ад̇д̇ано ааяугкаязнзва мари, д̇асмаа аяамби на мад̇о. рааж̇аа д̇аабасз ванд̣̇ид̇ваа камаабзд̇ваа убхоби уяяаанз васаабзнд̇о бадиж̇аг̇г̇и, д̇ад̇о бадтааяа ман̣д̣аб̣яо аан̣иман̣д̣аб̣яо наама ж̇аад̇о. со рааж̇аанам̣ убаниссааяа д̇ад̇т̇зва васи, д̣̇ийбааяано бана д̇асса ван̣ам̣ паасугам̣ гад̇ваа ад̇д̇ано г̇ихисахааяаман̣д̣аб̣яасса санд̇игамзва г̇ад̇о.
Punadivase ārakkhapurisā āgantvā taṃ pavattiṃ rañño ārocesuṃ. Rājā ‘‘anisāmetvāva me kata’’nti vegena tattha gantvā ‘‘pabbajita, kasmā sūlaṃ nissāya nisinnosī’’ti dīpāyanaṃ pucchi. Mahārāja, imaṃ tāpasaṃ rakkhanto nisinnomhi. Kiṃ pana tvaṃ mahārāja, imassa kārakabhāvaṃ vā akārakabhāvaṃ vā ñatvā evaṃ kāresīti? So kammassa asodhitabhāvaṃ ācikkhi. Athassa so ‘‘mahārāja, raññā nāma nisammakārinā bhavitabbaṃ , alaso gihī kāmabhogī na sādhū’’tiādīni vatvā dhammaṃ desesi. Rājā maṇḍabyassa niddosabhāvaṃ ñatvā ‘‘sūlaṃ harathā’’ti āṇāpesi. Sūlaṃ harantā harituṃ na sakkhiṃsu. Maṇḍabyo āha – ‘‘mahārāja, ahaṃ pubbe katakammadosena evarūpaṃ bhayaṃ sampatto, mama sarīrato sūlaṃ harituṃ na sakkā, sace mayhaṃ jīvitaṃ dātukāmo, kakacaṃ āharāpetvā imaṃ sūlaṃ cammasamaṃ chindāpehī’’ti. Rājā tathā kāresi. Antosarīre sūlo antoyeva ahosi. Tadā kira so sukhumaṃ koviḷārasalākaṃ gahetvā makkhikāya vaccamaggaṃ pavesesi, taṃ tassa antosarīreyeva ahosi. So tena kāraṇena amaritvā attano āyukkhayeneva mari, tasmā ayampi na mato. Rājā tāpase vanditvā khamāpetvā ubhopi uyyāne vasāpento paṭijaggi, tato paṭṭhāya maṇḍabyo āṇimaṇḍabyo nāma jāto. So rājānaṃ upanissāya tattheva vasi, dīpāyano pana tassa vaṇaṃ phāsukaṃ katvā attano gihisahāyamaṇḍabyassa santikameva gato.
д̇ам̣ бан̣н̣асаалам̣ бависанд̇ам̣ д̣̇исваа зго бурисо сахааяасса аарожзси. со суд̇ваава д̇удтажид̇д̇о сабуд̇д̇ад̣̇ааро б̣ахуу г̇анд̇хамаалад̇злапаан̣ид̇аад̣̇ийни аад̣̇ааяа д̇ам̣ бан̣н̣асаалам̣ г̇анд̇ваа д̣̇ийбааяанам̣ ванд̣̇ид̇ваа баад̣̇з д̇ховид̇ваа д̇злзна магкзд̇ваа баанагам̣ бааязд̇ваа аан̣иман̣д̣аб̣яасса бавад̇д̇им̣ сун̣анд̇о нисийд̣̇и. ат̇асса буд̇д̇о яан̃н̃ад̣̇ад̇д̇агумааро наама жан̇гаманагодияам̣ г̇зн̣д̣угзна гийл̣и, д̇ад̇ра жзгасмим̣ ваммигз аасийвисо васад̇и. гумаарасса бхуумияам̣ бахадаг̇зн̣д̣уго г̇анд̇ваа ваммигаб̣илз аасийвисасса мад̇т̇агз бад̇и. со аж̇аананд̇о б̣илз хад̇т̇ам̣ бавзсзси. ат̇а нам̣ гуд̣̇д̇хо аасийвисо хад̇т̇з д̣ам̣си. со висавзг̇зна мужчид̇о д̇ад̇т̇зва бад̇и. ат̇асса маад̇аабид̇аро саббзна д̣адтабхаавам̣ н̃ад̇ваа гумаарагам̣ угкибид̇ваа д̇аабасасса санд̇игам̣ аанзд̇ваа баад̣̇амуулз нибаж̇ж̇аабзд̇ваа ‘‘бханд̇з, баб̣б̣аж̇ид̇аа наама осад̇хам̣ ваа барид̇д̇ам̣ ваа ж̇аананд̇и, буд̇д̇агам̣ но аарог̇ам̣ гарот̇аа’’д̇и аахам̣су. ахам̣ осад̇хам̣ на ж̇аанаами, наахам̣ взж̇ж̇агаммам̣ гариссаамийд̇и. ‘‘д̇зна хи бханд̇з, имасмим̣ гумаарагз мзд̇д̇ам̣ гад̇ваа сажжагирияам̣ гарот̇аа’’д̇и вуд̇д̇з д̇аабасо ‘‘саад̇ху, сажжагирияам̣ гариссаамий’’д̇и вад̇ваа яан̃н̃ад̣̇ад̇д̇асса сийсз хад̇т̇ам̣ табзд̇ваа батамам̣ г̇аат̇амааха –
Taṃ paṇṇasālaṃ pavisantaṃ disvā eko puriso sahāyassa ārocesi. So sutvāva tuṭṭhacitto saputtadāro bahū gandhamālatelaphāṇitādīni ādāya taṃ paṇṇasālaṃ gantvā dīpāyanaṃ vanditvā pāde dhovitvā telena makkhetvā pānakaṃ pāyetvā āṇimaṇḍabyassa pavattiṃ suṇanto nisīdi. Athassa putto yaññadattakumāro nāma caṅkamanakoṭiyaṃ geṇḍukena kīḷi, tatra cekasmiṃ vammike āsīviso vasati. Kumārassa bhūmiyaṃ pahaṭageṇḍuko gantvā vammikabile āsīvisassa matthake pati. So ajānanto bile hatthaṃ pavesesi. Atha naṃ kuddho āsīviso hatthe ḍaṃsi. So visavegena mucchito tattheva pati. Athassa mātāpitaro sappena ḍaṭṭhabhāvaṃ ñatvā kumārakaṃ ukkhipitvā tāpasassa santikaṃ ānetvā pādamūle nipajjāpetvā ‘‘bhante, pabbajitā nāma osadhaṃ vā parittaṃ vā jānanti, puttakaṃ no ārogaṃ karothā’’ti āhaṃsu. Ahaṃ osadhaṃ na jānāmi, nāhaṃ vejjakammaṃ karissāmīti. ‘‘Tena hi bhante, imasmiṃ kumārake mettaṃ katvā saccakiriyaṃ karothā’’ti vutte tāpaso ‘‘sādhu, saccakiriyaṃ karissāmī’’ti vatvā yaññadattassa sīse hatthaṃ ṭhapetvā paṭhamaṃ gāthamāha –
62.
62.
‘‘сад̇д̇аахамзваахам̣ басаннажид̇д̇о, бун̃н̃ад̇т̇иго аажарим̣ б̣рахмажарияам̣;
‘‘Sattāhamevāhaṃ pasannacitto, puññatthiko ācariṃ brahmacariyaṃ;
ат̇аабарам̣ яам̣ жарид̇ам̣ мамзд̣̇ам̣, вассаани бан̃н̃ааса самаад̇хигаани;
Athāparaṃ yaṃ caritaṃ mamedaṃ, vassāni paññāsa samādhikāni;
агаамаговааби ахам̣ жараами, зд̇зна сажжзна сувад̇т̇и ход̇у;
Akāmakovāpi ahaṃ carāmi, etena saccena suvatthi hotu;
хад̇ам̣ висам̣ ж̇ийвад̇у яан̃н̃ад̣̇ад̇д̇о’’д̇и.
Hataṃ visaṃ jīvatu yaññadatto’’ti.
д̇ад̇т̇а ат̇аабарам̣ яам̣ жарид̇анд̇и д̇асмаа сад̇д̇аахаа уд̇д̇ари яам̣ мама б̣рахмажарияам̣. агаамаговаабийд̇и баб̣б̣аж̇ж̇ам̣ анижчанд̇оязва. зд̇зна сажжзна сувад̇т̇и ход̇ууд̇и сажз ад̇ирзгабан̣н̣аасавассаани анабхирад̇иваасам̣ васанд̇зна маяаа гассажи анаарожид̇абхааво сажжам̣, зд̇зна сажжзна яан̃н̃ад̣̇ад̇д̇агумаарасса сод̇т̇ибхааво ход̇у, ж̇ийвид̇ам̣ бадилабхад̇ууд̇и.
Tattha athāparaṃ yaṃ caritanti tasmā sattāhā uttari yaṃ mama brahmacariyaṃ. Akāmakovāpīti pabbajjaṃ anicchantoyeva. Etena saccena suvatthi hotūti sace atirekapaṇṇāsavassāni anabhirativāsaṃ vasantena mayā kassaci anārocitabhāvo saccaṃ, etena saccena yaññadattakumārassa sotthibhāvo hotu, jīvitaṃ paṭilabhatūti.
ат̇асса саха сажжагирияааяа яан̃н̃ад̣̇ад̇д̇асса т̇анаббад̣̇зсад̇о уд̣̇д̇хам̣ висам̣ бхассид̇ваа бат̇авим̣ баависи. гумааро агкийни уммийлзд̇ваа маад̇аабид̇аро ологзд̇ваа ‘‘аммад̇аад̇аа’’д̇и вад̇ваа баривад̇д̇ид̇ваа нибаж̇ж̇и. ат̇асса бид̇арам̣ ган̣хад̣̇ийбааяано ааха – ‘‘маяаа д̇аава мама б̣алам̣ гад̇ам̣, д̇вамби ад̇д̇ано б̣алам̣ гарохий’’д̇и. со ‘‘ахамби сажжагирияам̣ гариссаамий’’д̇и буд̇д̇асса урз хад̇т̇ам̣ табзд̇ваа д̣̇уд̇ияам̣ г̇аат̇амааха –
Athassa saha saccakiriyāya yaññadattassa thanappadesato uddhaṃ visaṃ bhassitvā pathaviṃ pāvisi. Kumāro akkhīni ummīletvā mātāpitaro oloketvā ‘‘ammatātā’’ti vatvā parivattitvā nipajji. Athassa pitaraṃ kaṇhadīpāyano āha – ‘‘mayā tāva mama balaṃ kataṃ, tvampi attano balaṃ karohī’’ti. So ‘‘ahampi saccakiriyaṃ karissāmī’’ti puttassa ure hatthaṃ ṭhapetvā dutiyaṃ gāthamāha –
63.
63.
‘‘яасмаа д̣̇аанам̣ наабхинанд̣̇им̣ гад̣̇аажи, д̣̇исваанахам̣ ад̇ит̇им̣ ваасагаалз;
‘‘Yasmā dānaṃ nābhinandiṃ kadāci, disvānahaṃ atithiṃ vāsakāle;
на жааби мз аббияад̇ам̣ авзд̣̇ум̣, б̣ахуссуд̇аа саман̣аб̣раахман̣аа жа;
Na cāpi me appiyataṃ aveduṃ, bahussutā samaṇabrāhmaṇā ca;
агаамаговааби ахам̣ д̣̇ад̣̇аами, зд̇зна сажжзна сувад̇т̇и ход̇у;
Akāmakovāpi ahaṃ dadāmi, etena saccena suvatthi hotu;
хад̇ам̣ висам̣ ж̇ийвад̇у яан̃н̃ад̣̇ад̇д̇о’’д̇и.
Hataṃ visaṃ jīvatu yaññadatto’’ti.
д̇ад̇т̇а ваасагаалзд̇и васанад̇т̇ааяа г̇зхам̣ ааг̇ад̇агаалз. на жааби мз аббияад̇ам̣ авзд̣̇унд̇и б̣ахуссуд̇ааби саман̣аб̣раахман̣аа ‘‘аяам̣ нзва д̣̇аанам̣ абхинанд̣̇ад̇и на амхз’’д̇и имам̣ мама аббияабхаавам̣ нзва ж̇ааним̣су. ахан̃хи д̇з бияажагкуухиязва ологзмийд̇и д̣̇ийбзд̇и. зд̇зна сажжзнаад̇и сажз ахам̣ д̣̇аанам̣ д̣̇ад̣̇амаано вибаагам̣ асад̣̇д̣̇ахид̇ваа ад̇д̇ано анижчааяа д̣̇амми, анижчанабхаавам̣ мама барз на ж̇аананд̇и, зд̇зна сажжзна сувад̇т̇и ход̇ууд̇и ад̇т̇о.
Tattha vāsakāleti vasanatthāya gehaṃ āgatakāle. Na cāpi me appiyataṃ avedunti bahussutāpi samaṇabrāhmaṇā ‘‘ayaṃ neva dānaṃ abhinandati na amhe’’ti imaṃ mama appiyabhāvaṃ neva jāniṃsu. Ahañhi te piyacakkhūhiyeva olokemīti dīpeti. Etena saccenāti sace ahaṃ dānaṃ dadamāno vipākaṃ asaddahitvā attano anicchāya dammi, anicchanabhāvaṃ mama pare na jānanti, etena saccena suvatthi hotūti attho.
звам̣ д̇асса сажжагирияааяа саха гадид̇о уд̣̇д̇хам̣ висам̣ бхассид̇ваа бат̇авим̣ баависи. гумааро удтааяа нисийд̣̇и, таад̇ум̣ бана на саггод̇и. ат̇асса бид̇аа маад̇арам̣ ааха ‘‘бхад̣̇д̣̇з, маяаа ад̇д̇ано б̣алам̣ гад̇ам̣, д̇вам̣ ид̣̇аани сажжагирияам̣ гад̇ваа буд̇д̇асса удтааяа г̇аманабхаавам̣ гарохий’’д̇и. ‘‘саами, ад̇т̇и маяхам̣ згам̣ сажжам̣, д̇ава бана санд̇игз гат̇зд̇ум̣ на саггомий’’д̇и. ‘‘бхад̣̇д̣̇з, яат̇аа д̇ат̇аа мз буд̇д̇ам̣ арог̇ам̣ гарохий’’д̇и. саа ‘‘саад̇хуу’’д̇и самбадижчид̇ваа сажжам̣ гаронд̇ий д̇ад̇ияам̣ г̇аат̇амааха –
Evaṃ tassa saccakiriyāya saha kaṭito uddhaṃ visaṃ bhassitvā pathaviṃ pāvisi. Kumāro uṭṭhāya nisīdi, ṭhātuṃ pana na sakkoti. Athassa pitā mātaraṃ āha ‘‘bhadde, mayā attano balaṃ kataṃ, tvaṃ idāni saccakiriyaṃ katvā puttassa uṭṭhāya gamanabhāvaṃ karohī’’ti. ‘‘Sāmi, atthi mayhaṃ ekaṃ saccaṃ, tava pana santike kathetuṃ na sakkomī’’ti. ‘‘Bhadde, yathā tathā me puttaṃ arogaṃ karohī’’ti. Sā ‘‘sādhū’’ti sampaṭicchitvā saccaṃ karontī tatiyaṃ gāthamāha –
64.
64.
‘‘аасийвисо д̇аад̇а бахууд̇ад̇зж̇о, яо д̇ам̣ ад̣ам̣сий б̣илараа уд̣̇ижжа;
‘‘Āsīviso tāta pahūtatejo, yo taṃ aḍaṃsī bilarā udicca;
д̇асмин̃жа мз аббияад̇ааяа аж̇ж̇а, бид̇аран̃жа д̇з над̇т̇и гожи висзсо;
Tasmiñca me appiyatāya ajja, pitarañca te natthi koci viseso;
зд̇зна сажжзна сувад̇т̇и ход̇у, хад̇ам̣ висам̣ ж̇ийвад̇у яан̃н̃ад̣̇ад̇д̇о’’д̇и.
Etena saccena suvatthi hotu, hataṃ visaṃ jīvatu yaññadatto’’ti.
д̇ад̇т̇а д̇аад̇аад̇и буд̇д̇ам̣ аалабад̇и. бахууд̇ад̇зж̇од̇и б̣алавависо. б̣илараад̇и вивараа, аяамзва ваа баато. уд̣̇ижжаад̇и удтахид̇ваа, ваммигаб̣илад̇о удтааяаад̇и ад̇т̇о. бид̇аран̃жа д̇зд̇и бид̇ари жа д̇з. адтагат̇ааяам̣ бана аяамзва баато. ид̣̇ам̣ вуд̇д̇ам̣ ход̇и – ‘‘д̇аад̇а, яан̃н̃ад̣̇ад̇д̇а д̇асмин̃жа аасийвисз д̇ава бид̇ари жа аббияабхаавзна маяхам̣ гожи висзсо над̇т̇и. д̇ан̃жа бана аббияабхаавам̣ табзд̇ваа аж̇ж̇а маяаа гожи ж̇аанаабид̇абуб̣б̣о наама над̇т̇и, сажз зд̇ам̣ сажжам̣, зд̇зна сажжзна д̇ава сод̇т̇и ход̇уу’’д̇и.
Tattha tātāti puttaṃ ālapati. Pahūtatejoti balavaviso. Bilarāti vivarā, ayameva vā pāṭho. Udiccāti uṭṭhahitvā, vammikabilato uṭṭhāyāti attho. Pitarañca teti pitari ca te. Aṭṭhakathāyaṃ pana ayameva pāṭho. Idaṃ vuttaṃ hoti – ‘‘tāta, yaññadatta tasmiñca āsīvise tava pitari ca appiyabhāvena mayhaṃ koci viseso natthi. Tañca pana appiyabhāvaṃ ṭhapetvā ajja mayā koci jānāpitapubbo nāma natthi, sace etaṃ saccaṃ, etena saccena tava sotthi hotū’’ti.
саха жа сажжагирияааяа саб̣б̣ам̣ висам̣ бхассид̇ваа бат̇авим̣ баависи. яан̃н̃ад̣̇ад̇д̇о ниб̣б̣исзна сарийрзна удтааяа гийл̣ид̇ум̣ аарад̣̇д̇хо. звам̣ буд̇д̇з удтид̇з ман̣д̣аб̣яо д̣̇ийбааяанасса аж̇жхаасаяам̣ бужчанд̇о жад̇уд̇т̇ам̣ г̇аат̇амааха –
Saha ca saccakiriyāya sabbaṃ visaṃ bhassitvā pathaviṃ pāvisi. Yaññadatto nibbisena sarīrena uṭṭhāya kīḷituṃ āraddho. Evaṃ putte uṭṭhite maṇḍabyo dīpāyanassa ajjhāsayaṃ pucchanto catutthaṃ gāthamāha –
65.
65.
‘‘санд̇аа д̣̇анд̇ааязва бариб̣б̣аж̇анд̇и, ан̃н̃ад̇ра ган̣хаа над̇т̇аагаамаруубаа;
‘‘Santā dantāyeva paribbajanti, aññatra kaṇhā natthākāmarūpā;
д̣̇ийбааяана гисса ж̇иг̇ужчамаано, агаамаго жараси б̣рахмажарияа’’нд̇и.
Dīpāyana kissa jigucchamāno, akāmako carasi brahmacariya’’nti.
д̇ассад̇т̇о – яз гзжи кад̇д̇ияаад̣̇аяо гаамз бахааяа ид̇ха логз баб̣б̣аж̇анд̇и, д̇з ан̃н̃ад̇ра ган̣хаа бхаванд̇ам̣ ган̣хам̣ табзд̇ваа ан̃н̃з агаамаруубаа наама над̇т̇и, саб̣б̣з жхаанабхааванааяа гилзсаанам̣ самид̇ад̇д̇аа санд̇аа, жагкаад̣̇ийни д̣̇ваараани яат̇аа ниб̣б̣исзванаани хонд̇и, д̇ат̇аа д̇зсам̣ д̣̇амид̇ад̇д̇аа д̣̇анд̇аа худ̇ваа абхирад̇аава б̣рахмажарияам̣ жаранд̇и, д̇вам̣ бана бханд̇з д̣̇ийбааяана, гим̣гааран̣аа д̇абам̣ ж̇иг̇ужчамаано агаамаго худ̇ваа б̣рахмажарияам̣ жараси, гасмаа буна на аг̇аарамзва аж̇жхаавасасийд̇и.
Tassattho – ye keci khattiyādayo kāme pahāya idha loke pabbajanti, te aññatra kaṇhā bhavantaṃ kaṇhaṃ ṭhapetvā aññe akāmarūpā nāma natthi, sabbe jhānabhāvanāya kilesānaṃ samitattā santā, cakkhādīni dvārāni yathā nibbisevanāni honti, tathā tesaṃ damitattā dantā hutvā abhiratāva brahmacariyaṃ caranti, tvaṃ pana bhante dīpāyana, kiṃkāraṇā tapaṃ jigucchamāno akāmako hutvā brahmacariyaṃ carasi, kasmā puna na agārameva ajjhāvasasīti.
ат̇асса со гааран̣ам̣ гат̇знд̇о бан̃жамам̣ г̇аат̇амааха –
Athassa so kāraṇaṃ kathento pañcamaṃ gāthamāha –
66.
66.
‘‘сад̣̇д̇хааяа нигкамма бунам̣ нивад̇д̇о, со зл̣амууг̇ова б̣аало вад̇ааяам̣;
‘‘Saddhāya nikkhamma punaṃ nivatto, so eḷamūgova bālo vatāyaṃ;
зд̇асса ваад̣̇асса ж̇иг̇ужчамаано, агаамаго жараами б̣рахмажарияам̣;
Etassa vādassa jigucchamāno, akāmako carāmi brahmacariyaṃ;
вин̃н̃уббасад̇т̇ан̃жа сад̇ан̃жа таанам̣, звамбахам̣ бун̃н̃агаро бхаваамий’’д̇и.
Viññuppasatthañca satañca ṭhānaṃ, evampahaṃ puññakaro bhavāmī’’ti.
д̇ассад̇т̇о – ган̣хо гамман̃жа палан̃жа сад̣̇д̣̇ахид̇ваа д̇аава маханд̇ам̣ вибхавам̣ бахааяа аг̇аараа нигкамид̇ваа яам̣ ж̇ахи, буна д̇ад̣̇ад̇т̇амзва нивад̇д̇о. со аяам̣ зл̣амууг̇о г̇аамад̣̇аараго вияа б̣аало вад̇аад̇и имам̣ ваад̣̇ам̣ ж̇иг̇ужчамаано ахам̣ ад̇д̇ано хирод̇д̇аббабхзд̣̇абхаязна анижчамааноби б̣рахмажарияам̣ жараами. гин̃жа бхияяо баб̣б̣аж̇ж̇аабун̃н̃ан̃жа наамзд̇ам̣ вин̃н̃уухи б̣уд̣̇д̇хаад̣̇ийхи басад̇т̇ам̣, д̇зсам̣язва жа сад̇ам̣ ниваасадтаанам̣. звам̣ иминааби гааран̣зна ахам̣ бун̃н̃агаро бхаваами, ассумукоби руд̣̇амаано б̣рахмажарияам̣ жараамиязваад̇и.
Tassattho – kaṇho kammañca phalañca saddahitvā tāva mahantaṃ vibhavaṃ pahāya agārā nikkhamitvā yaṃ jahi, puna tadatthameva nivatto. So ayaṃ eḷamūgo gāmadārako viya bālo vatāti imaṃ vādaṃ jigucchamāno ahaṃ attano hirottappabhedabhayena anicchamānopi brahmacariyaṃ carāmi. Kiñca bhiyyo pabbajjāpuññañca nāmetaṃ viññūhi buddhādīhi pasatthaṃ, tesaṃyeva ca sataṃ nivāsaṭṭhānaṃ. Evaṃ imināpi kāraṇena ahaṃ puññakaro bhavāmi, assumukhopi rudamāno brahmacariyaṃ carāmiyevāti.
звам̣ со ад̇д̇ано аж̇жхаасаяам̣ гат̇зд̇ваа буна ман̣д̣аб̣яам̣ бужчанд̇о чадтам̣ г̇аат̇амааха –
Evaṃ so attano ajjhāsayaṃ kathetvā puna maṇḍabyaṃ pucchanto chaṭṭhaṃ gāthamāha –
67.
67.
‘‘саман̣з д̇увам̣ б̣раахман̣з ад̣̇д̇хигз жа, санд̇аббаяааси аннабаанзна бхигкам̣;
‘‘Samaṇe tuvaṃ brāhmaṇe addhike ca, santappayāsi annapānena bhikkhaṃ;
обаанабхууд̇ам̣ва гхарам̣ д̇ава яид̣̇ам̣, аннзна баанзна убзд̇аруубам̣;
Opānabhūtaṃva gharaṃ tava yidaṃ, annena pānena upetarūpaṃ;
ат̇а гисса ваад̣̇асса ж̇иг̇ужчамаано, агаамаго д̣̇аанамимам̣ д̣̇ад̣̇аасий’’д̇и.
Atha kissa vādassa jigucchamāno, akāmako dānamimaṃ dadāsī’’ti.
д̇ад̇т̇а бхигканд̇и бхигкааяа жаранд̇аанам̣ бхигкан̃жа самбаад̣̇зд̇ваа д̣̇ад̣̇ааси. обаанабхууд̇ам̣ваад̇и жад̇умахаабат̇з кад̇асаад̇хааран̣абогкаран̣ий вияа.
Tattha bhikkhanti bhikkhāya carantānaṃ bhikkhañca sampādetvā dadāsi. Opānabhūtaṃvāti catumahāpathe khatasādhāraṇapokkharaṇī viya.
д̇ад̇о ман̣д̣аб̣яо ад̇д̇ано аж̇жхаасаяам̣ гат̇знд̇о сад̇д̇амам̣ г̇аат̇амааха –
Tato maṇḍabyo attano ajjhāsayaṃ kathento sattamaṃ gāthamāha –
68.
68.
‘‘бид̇аро жа мз аасум̣ бид̇аамахаа жа, сад̣̇д̇хаа ахум̣ д̣̇аанабад̇ий вад̣̇ан̃н̃уу;
‘‘Pitaro ca me āsuṃ pitāmahā ca, saddhā ahuṃ dānapatī vadaññū;
д̇ам̣ гуллавад̇д̇ам̣ анувад̇д̇амаано, маахам̣ гулз анд̇имаг̇анд̇хано ахум̣;
Taṃ kullavattaṃ anuvattamāno, māhaṃ kule antimagandhano ahuṃ;
зд̇асса ваад̣̇асса ж̇иг̇ужчамаано, агаамаго д̣̇аанамимам̣ д̣̇ад̣̇аамий’’д̇и.
Etassa vādassa jigucchamāno, akāmako dānamimaṃ dadāmī’’ti.
д̇ад̇т̇а ‘‘аасу’’нд̇и бад̣̇асса ‘‘сад̣̇д̇хаа’’д̇и иминаа самб̣анд̇хо, сад̣̇д̇хаа ахзсунд̇и ад̇т̇о. ахунд̇и сад̣̇д̇хаа худ̇ваа д̇ад̇о уд̇д̇ари д̣̇аанаж̇здтагаа жзва ‘‘д̣̇зт̇а гарот̇аа’’д̇и вуд̇д̇аважанасса ад̇т̇аж̇аананагаа жа ахзсум̣. д̇ам̣ гуллавад̇д̇анд̇и д̇ам̣ гулавад̇д̇ам̣, адтагат̇ааяам̣ бана аяамзва баато. маахам̣ гулз анд̇имаг̇анд̇хано ахунд̇и ‘‘ахам̣ ад̇д̇ано гулз саб̣б̣абажчимаго жзва гулабалаабо жа маа аху’’нд̇и саллагкзд̇ваа зд̇ам̣ ‘‘гулаанд̇имо гулабалаабо’’д̇и ваад̣̇ам̣ ж̇иг̇ужчамаано д̣̇аанам̣ анижчанд̇оби ид̣̇ам̣ д̣̇аанам̣ д̣̇ад̣̇аамийд̇и д̣̇ийбзд̇и.
Tattha ‘‘āsu’’nti padassa ‘‘saddhā’’ti iminā sambandho, saddhā ahesunti attho. Ahunti saddhā hutvā tato uttari dānajeṭṭhakā ceva ‘‘detha karothā’’ti vuttavacanassa atthajānanakā ca ahesuṃ. Taṃ kullavattanti taṃ kulavattaṃ, aṭṭhakathāyaṃ pana ayameva pāṭho. Māhaṃ kule antimagandhano ahunti ‘‘ahaṃ attano kule sabbapacchimako ceva kulapalāpo ca mā ahu’’nti sallakkhetvā etaṃ ‘‘kulaantimo kulapalāpo’’ti vādaṃ jigucchamāno dānaṃ anicchantopi idaṃ dānaṃ dadāmīti dīpeti.
зван̃жа бана вад̇ваа ман̣д̣аб̣яо ад̇д̇ано бхарияам̣ бужчамаано адтамам̣ г̇аат̇амааха –
Evañca pana vatvā maṇḍabyo attano bhariyaṃ pucchamāno aṭṭhamaṃ gāthamāha –
69.
69.
‘‘д̣̇ахарим̣ гумаарим̣ асамад̇т̇абан̃н̃ам̣, яам̣ д̇аанаяим̣ н̃аад̇игулаа суг̇ад̇д̇з;
‘‘Dahariṃ kumāriṃ asamatthapaññaṃ, yaṃ tānayiṃ ñātikulā sugatte;
на жааби мз аббияад̇ам̣ авзд̣̇и, ан̃н̃ад̇ра гаамаа барижаараяанд̇аа;
Na cāpi me appiyataṃ avedi, aññatra kāmā paricārayantā;
ат̇а гзна ван̣н̣зна маяаа д̇з бход̇и, сам̣ваасад̇хаммо аху зваруубо’’д̇и.
Atha kena vaṇṇena mayā te bhoti, saṃvāsadhammo ahu evarūpo’’ti.
д̇ад̇т̇а асамад̇т̇абан̃н̃анд̇и гудумб̣ам̣ вижаарзд̇ум̣ аббадиб̣алабан̃н̃ам̣ ад̇ид̇арун̣ин̃н̃зва самаанам̣. яам̣ д̇аанаяинд̇и яам̣ д̇ам̣ аанаяим̣, ахам̣ д̣̇ахаримзва самаанам̣ д̇ам̣ н̃аад̇игулад̇о аанзсинд̇и вуд̇д̇ам̣ ход̇и. ан̃н̃ад̇ра гаамаа барижаараяанд̇аад̇и зд̇д̇агам̣ гаалам̣ винаа гаамзна анижчааяа мам̣ барижаараяанд̇ааби ад̇д̇ано аббияад̇ам̣ мам̣ на ж̇аанаабзси, самбияааяамаанаруубаава барижари. гзна ван̣н̣знаад̇и гзна гааран̣зна. бход̇ийд̇и д̇ам̣ аалабад̇и. зваруубод̇и аасийвисасамаанабадигуулабхаавзна маяаа сад̣̇д̇хим̣ д̇ава сам̣ваасад̇хаммо зваруубо бияасам̣ваасо вияа гат̇ам̣ ж̇аад̇од̇и.
Tattha asamatthapaññanti kuṭumbaṃ vicāretuṃ appaṭibalapaññaṃ atitaruṇiññeva samānaṃ. Yaṃ tānayinti yaṃ taṃ ānayiṃ, ahaṃ daharimeva samānaṃ taṃ ñātikulato ānesinti vuttaṃ hoti. Aññatra kāmā paricārayantāti ettakaṃ kālaṃ vinā kāmena anicchāya maṃ paricārayantāpi attano appiyataṃ maṃ na jānāpesi, sampiyāyamānarūpāva paricari. Kena vaṇṇenāti kena kāraṇena. Bhotīti taṃ ālapati. Evarūpoti āsīvisasamānapaṭikūlabhāvena mayā saddhiṃ tava saṃvāsadhammo evarūpo piyasaṃvāso viya kathaṃ jātoti.
ат̇асса саа гат̇знд̇ий навамам̣ г̇аат̇амааха –
Athassa sā kathentī navamaṃ gāthamāha –
70.
70.
‘‘аараа д̣̇уурз наяид̇ха гад̣̇аажи ад̇т̇и, барамбараа наама гулз имасмим̣;
‘‘Ārā dūre nayidha kadāci atthi, paramparā nāma kule imasmiṃ;
д̇ам̣ гуллавад̇д̇ам̣ анувад̇д̇амаанаа, маахам̣ гулз анд̇имаг̇анд̇хиний ахум̣;
Taṃ kullavattaṃ anuvattamānā, māhaṃ kule antimagandhinī ahuṃ;
зд̇асса ваад̣̇асса ж̇иг̇ужчамаанаа, агаамигаа бад̣̇д̇хажараамхи д̇уяха’’нд̇и.
Etassa vādassa jigucchamānā, akāmikā paddhacarāmhi tuyha’’nti.
д̇ад̇т̇а аараа д̣̇уурзд̇и ан̃н̃аман̃н̃авзважанам̣. ад̇ид̣̇уурзд̇и ваа д̣̇ассзнд̇ий звамааха. ид̇хаад̇и нибаад̇амад̇д̇ам̣, на гад̣̇аажийд̇и ад̇т̇о. барамбараад̇и бурисабарамбараа. ид̣̇ам̣ вуд̇д̇ам̣ ход̇и – саами, имасмим̣ амхаагам̣ н̃аад̇игулз д̣̇уурад̇о бадтааяа яаава сад̇д̇амаа гулабариваддаа бурисабарамбараа наама на гад̣̇аажи ад̇т̇и, згид̇т̇ияааби саамигам̣ чад̣д̣зд̇ваа ан̃н̃о бурисо г̇ахид̇абуб̣б̣о наама над̇т̇ийд̇и. д̇ам̣ гуллавад̇д̇анд̇и ахамби д̇ам̣ гулавад̇д̇ам̣ гулабавзн̣им̣ анувад̇д̇амаанаа ад̇д̇ано гулз бажчимигаа балаалабхууд̇аа маа ахунд̇и саллагкзд̇ваа зд̇ам̣ гулаанд̇имаа гулаг̇анд̇хинийд̇и ваад̣̇ам̣ ж̇иг̇ужчамаанаа агаамигааби д̇уяхам̣ бад̣̇д̇хажараамхи взяяааважжагааригаа баад̣̇абарижааригаа ж̇аад̇аамхийд̇и.
Tattha ārā dūreti aññamaññavevacanaṃ. Atidūreti vā dassentī evamāha. Idhāti nipātamattaṃ, na kadācīti attho. Paramparāti purisaparamparā. Idaṃ vuttaṃ hoti – sāmi, imasmiṃ amhākaṃ ñātikule dūrato paṭṭhāya yāva sattamā kulaparivaṭṭā purisaparamparā nāma na kadāci atthi, ekitthiyāpi sāmikaṃ chaḍḍetvā añño puriso gahitapubbo nāma natthīti. Taṃ kullavattanti ahampi taṃ kulavattaṃ kulapaveṇiṃ anuvattamānā attano kule pacchimikā palālabhūtā mā ahunti sallakkhetvā etaṃ kulaantimā kulagandhinīti vādaṃ jigucchamānā akāmikāpi tuyhaṃ paddhacarāmhi veyyāvaccakārikā pādaparicārikā jātāmhīti.
зван̃жа бана вад̇ваа ‘‘маяаа саамигасса санд̇игз абхаасид̇абуб̣б̣ам̣ г̇уяхам̣ бхаасид̇ам̣, гуж̇жхзяяаби мз аяам̣, амхаагам̣ гулуубагад̇аабасасса саммукзязва камаабзссаамий’’д̇и жинд̇зд̇ваа камаабзнд̇ий д̣̇асамам̣ г̇аат̇амааха –
Evañca pana vatvā ‘‘mayā sāmikassa santike abhāsitapubbaṃ guyhaṃ bhāsitaṃ, kujjheyyapi me ayaṃ, amhākaṃ kulūpakatāpasassa sammukheyeva khamāpessāmī’’ti cintetvā khamāpentī dasamaṃ gāthamāha –
71.
71.
‘‘ман̣д̣аб̣яа бхаасим̣ яамабхаасанзяяам̣, д̇ам̣ камяад̇ам̣ буд̇д̇агахзд̇у маж̇ж̇а;
‘‘Maṇḍabya bhāsiṃ yamabhāsaneyyaṃ, taṃ khamyataṃ puttakahetu majja;
буд̇д̇абзмаа на ид̇ха барад̇т̇и гин̃жи, со но аяам̣ ж̇ийвад̇и яан̃н̃ад̣̇ад̇д̇о’’д̇и.
Puttapemā na idha paratthi kiñci, so no ayaṃ jīvati yaññadatto’’ti.
д̇ад̇т̇а д̇ам̣ камяад̇анд̇и д̇ам̣ камаяад̇у. буд̇д̇агахзд̇у маж̇ж̇аад̇и д̇ам̣ мама бхаасид̇ам̣ аж̇ж̇а имасса буд̇д̇асса хзд̇у камаяад̇у. со но аяанд̇и яасса буд̇д̇асса гааран̣аа маяаа зд̇ам̣ бхаасид̇ам̣, со но буд̇д̇о ж̇ийвад̇и, имасса ж̇ийвид̇алаабхабхаавзна мз кама саами, аж̇ж̇ад̇о бадтааяа д̇ава васавад̇д̇иний бхависсаамийд̇и.
Tattha taṃ khamyatanti taṃ khamayatu. Puttakahetu majjāti taṃ mama bhāsitaṃ ajja imassa puttassa hetu khamayatu. So no ayanti yassa puttassa kāraṇā mayā etaṃ bhāsitaṃ, so no putto jīvati, imassa jīvitalābhabhāvena me khama sāmi, ajjato paṭṭhāya tava vasavattinī bhavissāmīti.
ат̇а нам̣ ман̣д̣аб̣яо ‘‘удтзхи бхад̣̇д̣̇з, камаами д̇з, ид̇о бана бадтааяа маа парусажид̇д̇аа ахоси, ахамби д̇з аббияам̣ на гариссаамий’’д̇и ааха. б̣од̇хисад̇д̇о ман̣д̣аб̣яам̣ ааха – ‘‘аавусо, д̇аяаа д̣̇уссан̇гхарам̣ д̇ханам̣ сан̇гхарид̇ваа гамман̃жа палан̃жа асад̣̇д̣̇ахид̇ваа д̣̇аанам̣ д̣̇ад̣̇анд̇зна аяуд̇д̇ам̣ гад̇ам̣, ид̇о бадтааяа д̣̇аанам̣ сад̣̇д̣̇ахид̇ваа д̣̇зхий’’д̇и. со ‘‘саад̇хуу’’д̇и самбадижчид̇ваа б̣од̇хисад̇д̇ам̣ ааха – ‘‘бханд̇з, д̇аяаа амхаагам̣ д̣̇агкин̣зяяабхаавз тад̇ваа анабхирад̇зна б̣рахмажарияам̣ жаранд̇зна аяуд̇д̇ам̣ гад̇ам̣, ид̇о бадтааяа ид̣̇аани яат̇аа д̇аяи гад̇агаараа махабпалаа хонд̇и, звам̣ жид̇д̇ам̣ басаад̣̇зд̇ваа суд̣̇д̇хажид̇д̇о абхирад̇о худ̇ваа б̣рахмажарияам̣ жараахий’’д̇и. д̇з махаасад̇д̇ам̣ ванд̣̇ид̇ваа удтааяа аг̇амам̣су. д̇ад̇о бадтааяа бхарияаа саамигз саснзхаа ахоси, ман̣д̣аб̣яо басаннажид̇д̇о сад̣̇д̇хааяа д̣̇аанам̣ ад̣̇ааси. б̣од̇хисад̇д̇о анабхирад̇им̣ винод̣̇зд̇ваа жхаанаабхин̃н̃ам̣ уббаад̣̇зд̇ваа б̣рахмалогабарааяан̣о ахоси.
Atha naṃ maṇḍabyo ‘‘uṭṭhehi bhadde, khamāmi te, ito pana paṭṭhāya mā pharusacittā ahosi, ahampi te appiyaṃ na karissāmī’’ti āha. Bodhisatto maṇḍabyaṃ āha – ‘‘āvuso, tayā dussaṅgharaṃ dhanaṃ saṅgharitvā kammañca phalañca asaddahitvā dānaṃ dadantena ayuttaṃ kataṃ, ito paṭṭhāya dānaṃ saddahitvā dehī’’ti. So ‘‘sādhū’’ti sampaṭicchitvā bodhisattaṃ āha – ‘‘bhante, tayā amhākaṃ dakkhiṇeyyabhāve ṭhatvā anabhiratena brahmacariyaṃ carantena ayuttaṃ kataṃ, ito paṭṭhāya idāni yathā tayi katakārā mahapphalā honti, evaṃ cittaṃ pasādetvā suddhacitto abhirato hutvā brahmacariyaṃ carāhī’’ti. Te mahāsattaṃ vanditvā uṭṭhāya agamaṃsu. Tato paṭṭhāya bhariyā sāmike sasnehā ahosi, maṇḍabyo pasannacitto saddhāya dānaṃ adāsi. Bodhisatto anabhiratiṃ vinodetvā jhānābhiññaṃ uppādetvā brahmalokaparāyaṇo ahosi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз угган̣тид̇о бхигку сод̇аабад̇д̇ипалз бад̇идтахи . д̇ад̣̇аа ман̣д̣аб̣яо аананд̣̇о ахоси, бхарияаа висаакаа, буд̇д̇о раахуло, аан̣иман̣д̣аб̣яо саарибуд̇д̇о, ган̣хад̣̇ийбааяано бана ахамзва ахосинд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne ukkaṇṭhito bhikkhu sotāpattiphale patiṭṭhahi . Tadā maṇḍabyo ānando ahosi, bhariyā visākhā, putto rāhulo, āṇimaṇḍabyo sāriputto, kaṇhadīpāyano pana ahameva ahosinti.
ган̣хад̣̇ийбааяанаж̇аад̇агаван̣н̣анаа чадтаа.
Kaṇhadīpāyanajātakavaṇṇanā chaṭṭhā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 444. ган̣хад̣̇ийбааяанаж̇аад̇агам̣ • 444. Kaṇhadīpāyanajātakaṃ
