| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[29] 9. ган̣хаж̇аад̇агаван̣н̣анаа
[29] 9. Kaṇhajātakavaṇṇanā
яад̇о яад̇о г̇ару д̇хуранд̇и ид̣̇ам̣ сад̇т̇аа ж̇зд̇аванз вихаранд̇о яамагабаадихаарияам̣ аараб̣бха гат̇зси. д̇ам̣ сад̣̇д̇хим̣ д̣̇зворохан̣зна д̇зрасаганибаад̇з сарабхамиг̇аж̇аад̇агз (ж̇аа. 1.13.134 аад̣̇аяо) аави бхависсад̇и. саммаасамб̣уд̣̇д̇хз бана яамагабаадихаарияам̣ гад̇ваа д̣̇звалогз д̇змаасам̣ васид̇ваа махаабавааран̣ааяа сан̇гассанаг̇арад̣̇ваарз оруяха маханд̇зна бариваарзна ж̇зд̇аванам̣ бавидтз бхигкуу д̇хаммасабхааяам̣ саннибад̇ид̇ваа ‘‘аавусо, д̇ат̇ааг̇ад̇о наама асамад̇хуро, д̇ат̇ааг̇ад̇зна вул̣хад̇хурам̣ ан̃н̃о вахид̇ум̣ самад̇т̇о наама над̇т̇и, ча сад̇т̇ааро ‘маяамзва баадихаарияам̣ гариссаама, маяамзва баадихаарияам̣ гариссаамаа’д̇и вад̇ваа згамби баадихаарияам̣ на агам̣су, ахо сад̇т̇аа асамад̇хуро’’д̇и сад̇т̇у г̇ун̣агат̇ам̣ гат̇знд̇аа нисийд̣̇им̣су. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчи. ‘‘маяам̣, бханд̇з, на ан̃н̃ааяа гат̇ааяа, зваруубааяа наама д̇умхаагамзва г̇ун̣агат̇ааяаа’’д̇и. сад̇т̇аа ‘‘бхигкавз, ид̣̇аани маяаа вул̣хад̇хурам̣ го вахиссад̇и, буб̣б̣з д̇иражчаанаяонияам̣ ниб̣б̣ад̇д̇оби ахам̣ ад̇д̇анаа самад̇хурам̣ ган̃жи наалад̇т̇а’’нд̇и вад̇ваа ад̇ийд̇ам̣ аахари.
Yato yato garu dhuranti idaṃ satthā jetavane viharanto yamakapāṭihāriyaṃ ārabbha kathesi. Taṃ saddhiṃ devorohaṇena terasakanipāte sarabhamigajātake (jā. 1.13.134 ādayo) āvi bhavissati. Sammāsambuddhe pana yamakapāṭihāriyaṃ katvā devaloke temāsaṃ vasitvā mahāpavāraṇāya saṅkassanagaradvāre oruyha mahantena parivārena jetavanaṃ paviṭṭhe bhikkhū dhammasabhāyaṃ sannipatitvā ‘‘āvuso, tathāgato nāma asamadhuro, tathāgatena vuḷhadhuraṃ añño vahituṃ samattho nāma natthi, cha satthāro ‘mayameva pāṭihāriyaṃ karissāma, mayameva pāṭihāriyaṃ karissāmā’ti vatvā ekampi pāṭihāriyaṃ na akaṃsu, aho satthā asamadhuro’’ti satthu guṇakathaṃ kathentā nisīdiṃsu. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchi. ‘‘Mayaṃ, bhante, na aññāya kathāya, evarūpāya nāma tumhākameva guṇakathāyā’’ti. Satthā ‘‘bhikkhave, idāni mayā vuḷhadhuraṃ ko vahissati, pubbe tiracchānayoniyaṃ nibbattopi ahaṃ attanā samadhuraṃ kañci nālattha’’nti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о г̇ояонияам̣ бадисанд̇хим̣ г̇ан̣хи. ат̇а нам̣ саамигаа д̇арун̣аважчагагаалзязва згиссаа махаллигааяа гхарз васид̇ваа д̇ассаа ниваасавзд̇анад̇о барижчинд̣̇ид̇ваа ад̣̇ам̣су. саа д̇ам̣ яааг̇убхад̇д̇аад̣̇ийхи бадиж̇аг̇г̇амаанаа буд̇д̇адтаанз табзд̇ваа вад̣дхзси. со ‘‘аяяигаагаал̣аго’’ д̇взва наамам̣ бан̃н̃ааяид̇т̇а. ваяаббад̇д̇о жа ан̃ж̇анаван̣н̣о худ̇ваа г̇аамаг̇он̣зхи сад̣̇д̇хим̣ жарад̇и, сийлаажаарасамбанно ахоси. г̇аамад̣̇аарагаа син̇г̇зсуби ган̣н̣зсуби г̇алзби г̇ахзд̇ваа оламб̣анд̇и, нан̇г̇удтзби г̇ахзд̇ваа гийл̣анд̇и, бидтияамби нисийд̣̇анд̇и. со згад̣̇ивасам̣ жинд̇зси ‘‘маяхам̣ маад̇аа д̣̇уг̇г̇ад̇аа, мам̣ буд̇д̇адтаанз табзд̇ваа д̣̇угкзна босзси, яам̣нуунаахам̣ бхад̇им̣ гад̇ваа имам̣ д̣̇уг̇г̇ад̇абхаавад̇о можзяяа’’нд̇и. со д̇ад̇о бадтааяа бхад̇им̣ убад̇хаарзнд̇о жарад̇и.
Atīte bārāṇasiyaṃ brahmadatte rajjaṃ kārente bodhisatto goyoniyaṃ paṭisandhiṃ gaṇhi. Atha naṃ sāmikā taruṇavacchakakāleyeva ekissā mahallikāya ghare vasitvā tassā nivāsavetanato paricchinditvā adaṃsu. Sā taṃ yāgubhattādīhi paṭijaggamānā puttaṭṭhāne ṭhapetvā vaḍḍhesi. So ‘‘ayyikākāḷako’’ tveva nāmaṃ paññāyittha. Vayappatto ca añjanavaṇṇo hutvā gāmagoṇehi saddhiṃ carati, sīlācārasampanno ahosi. Gāmadārakā siṅgesupi kaṇṇesupi galepi gahetvā olambanti, naṅguṭṭhepi gahetvā kīḷanti, piṭṭhiyampi nisīdanti. So ekadivasaṃ cintesi ‘‘mayhaṃ mātā duggatā, maṃ puttaṭṭhāne ṭhapetvā dukkhena posesi, yaṃnūnāhaṃ bhatiṃ katvā imaṃ duggatabhāvato moceyya’’nti. So tato paṭṭhāya bhatiṃ upadhārento carati.
ат̇згад̣̇ивасам̣ зго сад̇т̇аваахабуд̇д̇о бан̃жахи сагадасад̇зхи висамад̇ид̇т̇ам̣ самбад̇д̇о, д̇асса г̇он̣аа сагадаани уд̇д̇аарзд̇ум̣ на саггонд̇и, бан̃жасу сагадасад̇зсу г̇он̣аа яуг̇абарамбарааяа яож̇ид̇аа згамби сагадам̣ уд̇д̇аарзд̇ум̣ наасагким̣су. б̣од̇хисад̇д̇оби г̇аамаг̇он̣зхи сад̣̇д̇хим̣ д̇ад̇т̇а самийбз жарад̇и. сад̇т̇аваахабуд̇д̇оби г̇осуд̇д̇авид̇д̇аго, со ‘‘ад̇т̇и ну ко зд̇зсам̣ г̇уннам̣ анд̇арз имаани сагадаани уд̇д̇аарзд̇ум̣ самад̇т̇о усабхааж̇аанийяо’’д̇и убад̇хаараяамаано б̣од̇хисад̇д̇ам̣ д̣̇исваа ‘‘аяам̣ ааж̇аанийяо сагкиссад̇и маяхам̣ сагадаани уд̇д̇аарзд̇ум̣, го ну ко асса саамиго’’д̇и г̇обаалагз бужчи ‘‘го ну ко бхо имасса саамиго, ахам̣ имам̣ сагадз яож̇зд̇ваа сагадзсу уд̇д̇аарид̇зсу взд̇анам̣ д̣̇ассаамий’’д̇и. д̇з аахам̣су ‘‘г̇ахзд̇ваа нам̣ яож̇зт̇а, над̇т̇и имасса имасмим̣ таанз саамиго’’д̇и. со нам̣ наасааяа раж̇ж̇угзна б̣анд̇хид̇ваа аагад̣дхзнд̇о жаалзд̇умби наасагки. б̣од̇хисад̇д̇о гира ‘‘бхад̇ияаа гат̇ид̇ааяа г̇амиссаамий’’д̇и на аг̇амааси. сад̇т̇аваахабуд̇д̇о д̇ассаад̇хиббааяам̣ н̃ад̇ваа ‘‘саами, д̇аяаа бан̃жасу сагадасад̇зсу уд̇д̇аарид̇зсу згзгасса сагадасса д̣̇вз д̣̇вз гахаабан̣з бхад̇им̣ гад̇ваа сахассам̣ д̣̇ассаамий’’д̇и ааха. д̇ад̣̇аа б̣од̇хисад̇д̇о саяамзва аг̇амааси. ат̇а нам̣ бурисаа буримасагадзсу яож̇зсум̣. ат̇а нам̣ згавзг̇знзва угкибид̇ваа т̇алз бад̇идтаабзси. зд̇знубааязна саб̣б̣асагадаани уд̇д̇аарзси.
Athekadivasaṃ eko satthavāhaputto pañcahi sakaṭasatehi visamatitthaṃ sampatto, tassa goṇā sakaṭāni uttāretuṃ na sakkonti, pañcasu sakaṭasatesu goṇā yugaparamparāya yojitā ekampi sakaṭaṃ uttāretuṃ nāsakkhiṃsu. Bodhisattopi gāmagoṇehi saddhiṃ tattha samīpe carati. Satthavāhaputtopi gosuttavittako, so ‘‘atthi nu kho etesaṃ gunnaṃ antare imāni sakaṭāni uttāretuṃ samattho usabhājānīyo’’ti upadhārayamāno bodhisattaṃ disvā ‘‘ayaṃ ājānīyo sakkhissati mayhaṃ sakaṭāni uttāretuṃ, ko nu kho assa sāmiko’’ti gopālake pucchi ‘‘ko nu kho bho imassa sāmiko, ahaṃ imaṃ sakaṭe yojetvā sakaṭesu uttāritesu vetanaṃ dassāmī’’ti. Te āhaṃsu ‘‘gahetvā naṃ yojetha, natthi imassa imasmiṃ ṭhāne sāmiko’’ti. So naṃ nāsāya rajjukena bandhitvā ākaḍḍhento cāletumpi nāsakkhi. Bodhisatto kira ‘‘bhatiyā kathitāya gamissāmī’’ti na agamāsi. Satthavāhaputto tassādhippāyaṃ ñatvā ‘‘sāmi, tayā pañcasu sakaṭasatesu uttāritesu ekekassa sakaṭassa dve dve kahāpaṇe bhatiṃ katvā sahassaṃ dassāmī’’ti āha. Tadā bodhisatto sayameva agamāsi. Atha naṃ purisā purimasakaṭesu yojesuṃ. Atha naṃ ekavegeneva ukkhipitvā thale patiṭṭhāpesi. Etenupāyena sabbasakaṭāni uttāresi.
сад̇т̇аваахабуд̇д̇о згзгасса сагадасса згзгам̣ гад̇ваа бан̃жасад̇аани бхан̣д̣игам̣ гад̇ваа д̇асса г̇алз б̣анд̇хи. со ‘‘аяам̣ маяхам̣ яат̇аабарижчиннам̣ бхад̇им̣ на д̣̇зд̇и, на д̣̇аанисса г̇анд̇ум̣ д̣̇ассаамий’’д̇и г̇анд̇ваа саб̣б̣абуримасагадасса бурад̇о маг̇г̇ам̣ ниваарзд̇ваа адтааси. абанзд̇ум̣ вааяаманд̇ааби нам̣ абанзд̇ум̣ наасагким̣су. сад̇т̇аваахабуд̇д̇о ‘‘ж̇аанаад̇и ман̃н̃з зса ад̇д̇ано бхад̇ияаа уунабхаава’’нд̇и згзгасмим̣ сагадз д̣̇вз д̣̇вз гад̇ваа сахассабхан̣д̣игам̣ б̣анд̇хид̇ваа ‘‘аяам̣ д̇з сагадуд̇д̇аран̣абхад̇ий’’д̇и г̇ийвааяам̣ лаг̇г̇зси. со сахассабхан̣д̣игам̣ аад̣̇ааяа маад̇у санд̇игам̣ аг̇амааси. г̇аамад̣̇аарагаа ‘‘гим̣ наамзд̇ам̣ аяяигаагаал̣агасса г̇алз’’д̇и б̣од̇хисад̇д̇асса санд̇игам̣ ааг̇ажчанд̇и. со д̇з ануб̣анд̇хид̇ваа д̣̇уурад̇ова балаабзнд̇о маад̇у санд̇игам̣ г̇ад̇о. бан̃жаннам̣ бана сагадасад̇аанам̣ уд̇д̇аарид̇ад̇д̇аа рад̇д̇зхи агкийхи гиланд̇аруубо бан̃н̃ааяид̇т̇а. аяяигаа д̇асса г̇ийвааяа сахассад̇т̇авигам̣ д̣̇исваа ‘‘д̇аад̇а, аяам̣ д̇з гахам̣ лад̣̇д̇хаа’’д̇и г̇обаалагад̣̇аарагз бужчид̇ваа д̇амад̇т̇ам̣ суд̇ваа ‘‘д̇аад̇а, гим̣ ахам̣ д̇аяаа лад̣̇д̇хабхад̇ияаа ж̇ийвид̇угаамаа, гим̣гааран̣аа зваруубам̣ д̣̇угкам̣ анубхосий’’д̇и вад̇ваа б̣од̇хисад̇д̇ам̣ ун̣ход̣̇агзна нхаабзд̇ваа сагаласарийрам̣ д̇злзна магкзд̇ваа баанийяам̣ бааязд̇ваа саббааяам̣ бхож̇анам̣ бхож̇зд̇ваа ж̇ийвид̇абарияосаанз сад̣̇д̇хим̣ б̣од̇хисад̇д̇зна яат̇аагаммам̣ г̇ад̇аа.
Satthavāhaputto ekekassa sakaṭassa ekekaṃ katvā pañcasatāni bhaṇḍikaṃ katvā tassa gale bandhi. So ‘‘ayaṃ mayhaṃ yathāparicchinnaṃ bhatiṃ na deti, na dānissa gantuṃ dassāmī’’ti gantvā sabbapurimasakaṭassa purato maggaṃ nivāretvā aṭṭhāsi. Apanetuṃ vāyamantāpi naṃ apanetuṃ nāsakkhiṃsu. Satthavāhaputto ‘‘jānāti maññe esa attano bhatiyā ūnabhāva’’nti ekekasmiṃ sakaṭe dve dve katvā sahassabhaṇḍikaṃ bandhitvā ‘‘ayaṃ te sakaṭuttaraṇabhatī’’ti gīvāyaṃ laggesi. So sahassabhaṇḍikaṃ ādāya mātu santikaṃ agamāsi. Gāmadārakā ‘‘kiṃ nāmetaṃ ayyikākāḷakassa gale’’ti bodhisattassa santikaṃ āgacchanti. So te anubandhitvā dūratova palāpento mātu santikaṃ gato. Pañcannaṃ pana sakaṭasatānaṃ uttāritattā rattehi akkhīhi kilantarūpo paññāyittha. Ayyikā tassa gīvāya sahassatthavikaṃ disvā ‘‘tāta, ayaṃ te kahaṃ laddhā’’ti gopālakadārake pucchitvā tamatthaṃ sutvā ‘‘tāta, kiṃ ahaṃ tayā laddhabhatiyā jīvitukāmā, kiṃkāraṇā evarūpaṃ dukkhaṃ anubhosī’’ti vatvā bodhisattaṃ uṇhodakena nhāpetvā sakalasarīraṃ telena makkhetvā pānīyaṃ pāyetvā sappāyaṃ bhojanaṃ bhojetvā jīvitapariyosāne saddhiṃ bodhisattena yathākammaṃ gatā.
сад̇т̇аа ‘‘на, бхигкавз, д̇ат̇ааг̇ад̇о ид̣̇аанзва асамад̇хуро, буб̣б̣зби асамад̇хуроязваа’’д̇и вад̇ваа имам̣ д̇хаммад̣̇зсанам̣ аахарид̇ваа анусанд̇хим̣ гхадзд̇ваа абхисамб̣уд̣̇д̇хо худ̇ваа имам̣ г̇аат̇амааха –
Satthā ‘‘na, bhikkhave, tathāgato idāneva asamadhuro, pubbepi asamadhuroyevā’’ti vatvā imaṃ dhammadesanaṃ āharitvā anusandhiṃ ghaṭetvā abhisambuddho hutvā imaṃ gāthamāha –
29.
29.
‘‘яад̇о яад̇о г̇ару д̇хурам̣, яад̇о г̇амбхийравад̇д̇аний;
‘‘Yato yato garu dhuraṃ, yato gambhīravattanī;
д̇ад̣̇аассу ган̣хам̣ яун̃ж̇анд̇и, сваассу д̇ам̣ вахад̇з д̇хура’’нд̇и.
Tadāssu kaṇhaṃ yuñjanti, svāssu taṃ vahate dhura’’nti.
д̇ад̇т̇а яад̇о яад̇о г̇ару д̇хуранд̇и яасмим̣ яасмим̣ таанз д̇хурам̣ г̇ару бхаарияам̣ ход̇и, ан̃н̃з б̣алиб̣ад̣̇д̣̇аа угкибид̇ум̣ на саггонд̇и. яад̇о г̇амбхийравад̇д̇анийд̇и вад̇д̇анд̇и зд̇т̇аад̇и вад̇д̇аний, маг̇г̇ассзд̇ам̣ наамам̣, яасмим̣ таанз уд̣̇агажигкалламаханд̇ад̇ааяа ваа висамажчиннад̇адабхаавзна ваа маг̇г̇о г̇амбхийро ход̇ийд̇и ад̇т̇о. д̇ад̣̇аассу ган̣хам̣ яун̃ж̇анд̇ийд̇и зд̇т̇а ассууд̇и нибаад̇амад̇д̇ам̣, д̇ад̣̇аа ган̣хам̣ яун̃ж̇анд̇ийд̇и ад̇т̇о. яад̣̇аа д̇хуран̃жа г̇ару ход̇и маг̇г̇о жа г̇амбхийро, д̇ад̣̇аа ан̃н̃з б̣алиб̣ад̣̇д̣̇з абанзд̇ваа ган̣хамзва яож̇знд̇ийд̇и вуд̇д̇ам̣ ход̇и. сваассу д̇ам̣ вахад̇з д̇хуранд̇и зд̇т̇ааби ассууд̇и нибаад̇амад̇д̇амзва, со д̇ам̣ д̇хурам̣ вахад̇ийд̇и ад̇т̇о.
Tattha yato yato garu dhuranti yasmiṃ yasmiṃ ṭhāne dhuraṃ garu bhāriyaṃ hoti, aññe balibaddā ukkhipituṃ na sakkonti. Yato gambhīravattanīti vattanti etthāti vattanī, maggassetaṃ nāmaṃ, yasmiṃ ṭhāne udakacikkhallamahantatāya vā visamacchinnataṭabhāvena vā maggo gambhīro hotīti attho. Tadāssu kaṇhaṃ yuñjantīti ettha assūti nipātamattaṃ, tadā kaṇhaṃ yuñjantīti attho. Yadā dhurañca garu hoti maggo ca gambhīro, tadā aññe balibadde apanetvā kaṇhameva yojentīti vuttaṃ hoti. Svāssu taṃ vahate dhuranti etthāpi assūti nipātamattameva, so taṃ dhuraṃ vahatīti attho.
звам̣ бхаг̇аваа ‘‘д̇ад̣̇аа, бхигкавз, ган̣хова д̇ам̣ д̇хурам̣ вахад̇ий’’д̇и д̣̇ассзд̇ваа анусанд̇хим̣ гхадзд̇ваа ж̇аад̇агам̣ самод̇хаанзси – ‘‘д̇ад̣̇аа махаллигаа уббалаван̣н̣аа ахоси, аяяигаагаал̣аго бана ахамзва ахоси’’нд̇и.
Evaṃ bhagavā ‘‘tadā, bhikkhave, kaṇhova taṃ dhuraṃ vahatī’’ti dassetvā anusandhiṃ ghaṭetvā jātakaṃ samodhānesi – ‘‘tadā mahallikā uppalavaṇṇā ahosi, ayyikākāḷako pana ahameva ahosi’’nti.
ган̣хаж̇аад̇агаван̣н̣анаа навамаа.
Kaṇhajātakavaṇṇanā navamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 29. ган̣хаж̇аад̇агам̣ • 29. Kaṇhajātakaṃ
