| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៧. កណ្ហសុត្តវណ្ណនា
7. Kaṇhasuttavaṇṇanā
៧. សត្តមេ យថា ‘‘កណ្ហា គាវី’’តិអាទីសុ កាឡវណ្ណេន សមន្នាគតា ‘‘កណ្ហា’’តិ វុច្ចតិ, ន ឯវំ កាឡវណ្ណតាយ ធម្មា ‘‘កណ្ហា’’តិ វុច្ចន្តិ, អថ ខោ កណ្ហាភិជាតិនិព្ពត្តិហេតុតោ អប្បភស្សរភាវករណតោ វា ‘‘កណ្ហា’’តិ វុច្ចន្តីតិ ទស្សេន្តោ ‘‘ន កាឡវណ្ណតាយា’’តិអាទិមាហ។ កណ្ហតាយាតិ កណ្ហាភិជាតិតាយ។ កណ្ហាភិជាតីតិ ច អបាយា វុច្ចន្តិ មនុស្សេសុ ច ទោភគ្គិយំ។ សរសេនាតិ សភាវេន។ ន ហិរីយតិ ន លជ្ជតីតិ អហិរិកោ, បុគ្គលោ, ចិត្តំ, តំ សម្បយុត្តធម្មសមុទាយោ វា។ តស្ស ភាវោ អហិរិក្កន្តិ វត្តព្ពេ ឯកស្ស ក-ការស្ស លោបំ កត្វា អហិរិកន្តិ វុត្តន្តិ អាហ ‘‘អហិរិកន្តិ អហិរិកភាវោ’’តិ។ ន ឱត្តប្បតីតិ អនោត្តាបី, បុគ្គលោ, យថាវុត្តធម្មសមុទាយោ វា, តស្ស ភាវោ អនោត្តប្បន្តិ អាហ ‘‘អនោត្តាបិភាវោ’’តិ។
7. Sattame yathā ‘‘kaṇhā gāvī’’tiādīsu kāḷavaṇṇena samannāgatā ‘‘kaṇhā’’ti vuccati, na evaṃ kāḷavaṇṇatāya dhammā ‘‘kaṇhā’’ti vuccanti, atha kho kaṇhābhijātinibbattihetuto appabhassarabhāvakaraṇato vā ‘‘kaṇhā’’ti vuccantīti dassento ‘‘na kāḷavaṇṇatāyā’’tiādimāha. Kaṇhatāyāti kaṇhābhijātitāya. Kaṇhābhijātīti ca apāyā vuccanti manussesu ca dobhaggiyaṃ. Sarasenāti sabhāvena. Na hirīyati na lajjatīti ahiriko, puggalo, cittaṃ, taṃ sampayuttadhammasamudāyo vā. Tassa bhāvo ahirikkanti vattabbe ekassa ka-kārassa lopaṃ katvā ahirikanti vuttanti āha ‘‘ahirikanti ahirikabhāvo’’ti. Na ottappatīti anottāpī, puggalo, yathāvuttadhammasamudāyo vā, tassa bhāvo anottappanti āha ‘‘anottāpibhāvo’’ti.
កណ្ហសុត្តវណ្ណនា និដ្ឋិតា។
Kaṇhasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៧. កណ្ហសុត្តំ • 7. Kaṇhasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៧. កណ្ហសុត្តវណ្ណនា • 7. Kaṇhasuttavaṇṇanā
