| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
5. கணிகாரச²த்தியத்தே²ரஅபதா³னவண்ணனா
5. Kaṇikārachattiyattheraapadānavaṇṇanā
வெஸ்ஸபூ⁴ நாம ஸம்பு³த்³தோ⁴திஆதி³கங் ஆயஸ்மதோ கணிகாரச²த்தியத்தே²ரஸ்ஸ அபதா³னங். அயம்பி தே²ரோ புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ வெஸ்ஸபு⁴ஸ்ஸ ப⁴க³வதோ காலே குலகே³ஹே நிப்³ப³த்தோ விஞ்ஞுதங் பத்தோ ஸத்³தா⁴ஸம்பன்னோ அஹோஸி. தஸ்மிங் ஸமயே வெஸ்ஸபூ⁴ ப⁴க³வா விவேககாமோ மஹாவனங் பவிஸித்வா நிஸீதி³. அத² ஸோபி உபாஸகோ கேனசிதே³வ கரணீயேன தத்த² க³ந்த்வா ப⁴க³வந்தங் அக்³கி³க்க²ந்த⁴ங் விய ஜலமானங் நிஸின்னங் தி³ஸ்வா பஸன்னமானஸோ கணிகாரபுப்ப²ங் ஓசினித்வா ச²த்தங் கத்வா ப⁴க³வதோ நிஸின்னட்டா²னே விதானங் கத்வா பூஜேஸி, தங் ப⁴க³வதோ ஆனுபா⁴வேன ஸத்தாஹங் அமிலாதங் ஹுத்வா ததே²வ அட்டா²ஸி. ப⁴க³வாபி ப²லஸமாபத்திங் நிரோத⁴ஸமாபத்திஞ்ச ஸமாபஜ்ஜித்வா விஹாஸி , ஸோ தங் அச்ச²ரியங் தி³ஸ்வா ஸோமனஸ்ஸஜாதோ ப⁴க³வந்தங் வந்தி³த்வா அஞ்ஜலிங் பக்³க³ய்ஹ அட்டா²ஸி. ப⁴க³வா ஸமாபத்திதோ வுட்ட²ஹித்வா விஹாரமேவ அக³மாஸி.
Vessabhūnāma sambuddhotiādikaṃ āyasmato kaṇikārachattiyattherassa apadānaṃ. Ayampi thero purimabuddhesu katādhikāro tattha tattha bhave vivaṭṭūpanissayāni puññāni upacinanto vessabhussa bhagavato kāle kulagehe nibbatto viññutaṃ patto saddhāsampanno ahosi. Tasmiṃ samaye vessabhū bhagavā vivekakāmo mahāvanaṃ pavisitvā nisīdi. Atha sopi upāsako kenacideva karaṇīyena tattha gantvā bhagavantaṃ aggikkhandhaṃ viya jalamānaṃ nisinnaṃ disvā pasannamānaso kaṇikārapupphaṃ ocinitvā chattaṃ katvā bhagavato nisinnaṭṭhāne vitānaṃ katvā pūjesi, taṃ bhagavato ānubhāvena sattāhaṃ amilātaṃ hutvā tatheva aṭṭhāsi. Bhagavāpi phalasamāpattiṃ nirodhasamāpattiñca samāpajjitvā vihāsi , so taṃ acchariyaṃ disvā somanassajāto bhagavantaṃ vanditvā añjaliṃ paggayha aṭṭhāsi. Bhagavā samāpattito vuṭṭhahitvā vihārameva agamāsi.
23. ஸோ தேன புஞ்ஞேன தே³வமனுஸ்ஸேஸு ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் குலகே³ஹே நிப்³ப³த்தோ வுத்³தி⁴மன்வாய ஸத்³தா⁴ஸம்பன்னோ ஸத்து² த⁴ம்மதே³ஸனங் ஸுத்வா க⁴ராவாஸே அனல்லீனோ பப்³ப³ஜித்வா வத்தபடிபத்தியா ஜினஸாஸனங் ஸோபெ⁴ந்தோ நசிரஸ்ஸேவ அரஹா ஹுத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ வெஸ்ஸபூ⁴ நாம ஸம்பு³த்³தோ⁴திஆதி³மாஹ. தத்த² வெஸ்ஸபூ⁴தி வெஸ்ஸே வெஸ்ஸஜனே பு⁴னாதி அபி⁴ப⁴வதீதி வெஸ்ஸபூ⁴. அத² வா வெஸ்ஸே பஞ்சவித⁴மாரே அபி⁴பு⁴னாதி அஜ்ஜொ²த்த²ரதீதி வெஸ்ஸபூ⁴. ஸாமங்யேவ பு³ஜ்ஜி²தா ஸச்சானீதி ஸம்பு³த்³தோ⁴, நாமேன வெஸ்ஸபூ⁴ நாம ஸம்பு³த்³தோ⁴தி அத்தோ². தி³வாவிஹாராய முனீதி தி³ப்³ப³தி பகாஸேதி தங் தங் வத்து²ங் பாகடங் கரோதீதி தி³வா. ஸூரியுக்³க³மனதோ பட்டா²ய யாவ அத்த²ங்க³மோ, தாவ பரிச்சி²ன்னகாலோ, விஹரணங் சதூஹி இரியாபதே²ஹி பவத்தனங் விஹாரோ, தி³வாய விஹாரோ தி³வாவிஹாரோ, தஸ்ஸ தி³வாவிஹாராய லோகஜெட்டோ² நராஸபோ⁴ பு³த்³த⁴முனி மஹாவனங் ஓகா³ஹித்வா பவிஸித்வாதி அத்தோ². ஸேஸங் உத்தானத்த²மேவாதி.
23. So tena puññena devamanussesu sampattiyo anubhavitvā imasmiṃ buddhuppāde sāvatthiyaṃ kulagehe nibbatto vuddhimanvāya saddhāsampanno satthu dhammadesanaṃ sutvā gharāvāse anallīno pabbajitvā vattapaṭipattiyā jinasāsanaṃ sobhento nacirasseva arahā hutvā attano pubbakammaṃ saritvā somanassajāto pubbacaritāpadānaṃ pakāsento vessabhū nāma sambuddhotiādimāha. Tattha vessabhūti vesse vessajane bhunāti abhibhavatīti vessabhū. Atha vā vesse pañcavidhamāre abhibhunāti ajjhottharatīti vessabhū. Sāmaṃyeva bujjhitā saccānīti sambuddho, nāmena vessabhū nāma sambuddhoti attho. Divāvihārāya munīti dibbati pakāseti taṃ taṃ vatthuṃ pākaṭaṃ karotīti divā. Sūriyuggamanato paṭṭhāya yāva atthaṅgamo, tāva paricchinnakālo, viharaṇaṃ catūhi iriyāpathehi pavattanaṃ vihāro, divāya vihāro divāvihāro, tassa divāvihārāya lokajeṭṭho narāsabho buddhamuni mahāvanaṃ ogāhitvā pavisitvāti attho. Sesaṃ uttānatthamevāti.
கணிகாரச²த்தியத்தே²ரஅபதா³னவண்ணனா ஸமத்தா.
Kaṇikārachattiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 5. கணிகாரச²த்தியத்தே²ரஅபதா³னங் • 5. Kaṇikārachattiyattheraapadānaṃ
