| Library / Tipiṭaka / තිපිටක • Tipiṭaka / අපදානපාළි • Apadānapāḷi |
21. කණිකාරපුප්‌ඵියවග්‌ගො
21. Kaṇikārapupphiyavaggo
1. කණිකාරපුප්‌ඵියත්‌ථෙරඅපදානං
1. Kaṇikārapupphiyattheraapadānaṃ
1.
1.
‘‘කණිකාරං පුප්‌ඵිතං දිස්‌වා, ඔචිනිත්‌වානහං තදා;
‘‘Kaṇikāraṃ pupphitaṃ disvā, ocinitvānahaṃ tadā;
තිස්‌සස්‌ස අභිරොපෙසිං, ඔඝතිණ්‌ණස්‌ස තාදිනො.
Tissassa abhiropesiṃ, oghatiṇṇassa tādino.
2.
2.
‘‘ද්‌වෙනවුතෙ ඉතො කප්‌පෙ, යං පුප්‌ඵමභිරොපයිං;
‘‘Dvenavute ito kappe, yaṃ pupphamabhiropayiṃ;
දුග්‌ගතිං නාභිජානාමි, බුද්‌ධපූජායිදං ඵලං.
Duggatiṃ nābhijānāmi, buddhapūjāyidaṃ phalaṃ.
3.
3.
‘‘පඤ්‌චත්‌තිංසෙ ඉතො කප්‌පෙ, අරුණපාණීති විස්‌සුතො;
‘‘Pañcattiṃse ito kappe, aruṇapāṇīti vissuto;
සත්‌තරතනසම්‌පන්‌නො, චක්‌කවත්‌තී මහබ්‌බලො.
Sattaratanasampanno, cakkavattī mahabbalo.
4.
4.
‘‘පටිසම්‌භිදා චතස්‌සො, විමොක්‌ඛාපි ච අට්‌ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්‌ඤා සච්‌ඡිකතා, කතං බුද්‌ධස්‌ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්‌ථං සුදං ආයස්‌මා කණිකාරපුප්‌ඵියො ථෙරො ඉමා ගාථායො අභාසිත්‌ථාති.
Itthaṃ sudaṃ āyasmā kaṇikārapupphiyo thero imā gāthāyo abhāsitthāti.
කණිකාරපුප්‌ඵියත්‌ථෙරස්‌සාපදානං පඨමං.
Kaṇikārapupphiyattherassāpadānaṃ paṭhamaṃ.
