| Library / Tipiṭaka / তিপিটক • Tipiṭaka / উদান-অট্ঠকথা • Udāna-aṭṭhakathā |
৭. কঙ্খারেৰতসুত্তৰণ্ণনা
7. Kaṅkhārevatasuttavaṇṇanā
৪৭. সত্তমে কঙ্খারেৰতোতি তস্স থেরস্স নামং। সো হি সাসনে পব্বজিত্ৰা লদ্ধূপসম্পদো সীলৰা কল্যাণধম্মো ৰিহরতি, ‘‘অকপ্পিযা মুগ্গা, ন কপ্পন্তি মুগ্গা পরিভুঞ্জিতুং, অকপ্পিযো গুল়ো’’তি (মহাৰ॰ ২৭২) চ আদিনা ৰিনযকুক্কুচ্চসঙ্খাতকঙ্খাবহুলো পন হোতি। তেন কঙ্খারেৰতোতি পঞ্ঞাযিত্থ। সো অপরভাগে সত্থু সন্তিকে কম্মট্ঠানং গহেত্ৰা ঘটেন্তো ৰাযমন্তো ছল়ভিঞ্ঞা সচ্ছিকত্ৰা ঝানসুখেন ফলসুখেন ৰীতিনামেতি, যেভুয্যেন পন অত্তনা অধিগতং অরিযমগ্গং গরুং কত্ৰা পচ্চৰেক্খতি। তেন ৰুত্তং – ‘‘অত্তনো কঙ্খাৰিতরণৰিসুদ্ধিং পচ্চৰেক্খমানো’’তি। মগ্গপঞ্ঞা হি ‘‘অহোসিং নু খো অহং অতীতমদ্ধান’’ন্তিআদিনযপৰত্তায (ম॰ নি॰ ১.১৮; সং॰ নি॰ ২.২০) সোল়সৰত্থুকায, ‘‘বুদ্ধে কঙ্খতি…পে॰… পটিচ্চসমুপ্পন্নেসু ধম্মেসু কঙ্খতী’’তি (ধ॰ স॰ ১০০৮) এৰং ৰুত্তায অট্ঠৰত্থুকায, পগেৰ ইতরাসন্তি অনৰসেসতো সব্বকঙ্খানং ৰিতরণতো সমতিক্কমনতো, অঞ্ঞেহি চ অত্তনা পহাতব্বকিলেসেহি অচ্চন্তৰিসুজ্ঝনতো ‘‘কঙ্খাৰিতরণৰিসুদ্ধী’’তি ইধাধিপ্পেতা। তঞ্হি অযমাযস্মা দীঘরত্তং কঙ্খাপকতত্তা ‘‘ইমং মগ্গধম্মং অধিগম্ম ইমা মে কঙ্খা অনৰসেসা পহীনা’’তি গরুং কত্ৰা পচ্চৰেক্খমানো নিসীদি, ন সপ্পচ্চযনামরূপদস্সনং অনিচ্চন্তিকত্তা তস্স কঙ্খাৰিতরণস্স।
47. Sattame kaṅkhārevatoti tassa therassa nāmaṃ. So hi sāsane pabbajitvā laddhūpasampado sīlavā kalyāṇadhammo viharati, ‘‘akappiyā muggā, na kappanti muggā paribhuñjituṃ, akappiyo guḷo’’ti (mahāva. 272) ca ādinā vinayakukkuccasaṅkhātakaṅkhābahulo pana hoti. Tena kaṅkhārevatoti paññāyittha. So aparabhāge satthu santike kammaṭṭhānaṃ gahetvā ghaṭento vāyamanto chaḷabhiññā sacchikatvā jhānasukhena phalasukhena vītināmeti, yebhuyyena pana attanā adhigataṃ ariyamaggaṃ garuṃ katvā paccavekkhati. Tena vuttaṃ – ‘‘attano kaṅkhāvitaraṇavisuddhiṃ paccavekkhamāno’’ti. Maggapaññā hi ‘‘ahosiṃ nu kho ahaṃ atītamaddhāna’’ntiādinayapavattāya (ma. ni. 1.18; saṃ. ni. 2.20) soḷasavatthukāya, ‘‘buddhe kaṅkhati…pe… paṭiccasamuppannesu dhammesu kaṅkhatī’’ti (dha. sa. 1008) evaṃ vuttāya aṭṭhavatthukāya, pageva itarāsanti anavasesato sabbakaṅkhānaṃ vitaraṇato samatikkamanato, aññehi ca attanā pahātabbakilesehi accantavisujjhanato ‘‘kaṅkhāvitaraṇavisuddhī’’ti idhādhippetā. Tañhi ayamāyasmā dīgharattaṃ kaṅkhāpakatattā ‘‘imaṃ maggadhammaṃ adhigamma imā me kaṅkhā anavasesā pahīnā’’ti garuṃ katvā paccavekkhamāno nisīdi, na sappaccayanāmarūpadassanaṃ aniccantikattā tassa kaṅkhāvitaraṇassa.
এতমত্থং ৰিদিত্ৰাতি এতং অরিযমগ্গস্স অনৰসেসকঙ্খাৰিতরণসঙ্খাতং অত্থং ৰিদিত্ৰা তদত্থদীপকং ইমং উদানং উদানেসি।
Etamatthaṃ viditvāti etaṃ ariyamaggassa anavasesakaṅkhāvitaraṇasaṅkhātaṃ atthaṃ viditvā tadatthadīpakaṃ imaṃ udānaṃ udānesi.
তত্থ যা কাচি কঙ্খা ইধ ৰা হুরং ৰাতি ইধ ইমস্মিং পচ্চুপ্পন্নে অত্তভাৰে ‘‘অহং নু খোস্মি নো নু খোস্মী’’তিআদিনা হুরং ৰা, অতীতানাগতেসু অত্তভাৰেসু ‘‘অহোসিং নু খো অহং অতীতমদ্ধান’’ন্তিআদিনা উপ্পজ্জনকা কঙ্খা। সকৰেদিযা ৰা পরৰেদিযা ৰাতি তা এৰং ৰুত্তনযেনেৰ সকঅত্তভাৰে আরম্মণৰসেন পটিলভিতব্বায পৰত্তিযা সকৰেদিযা ৰা পরস্স অত্তভাৰে পটিলভিতব্বায ‘‘বুদ্ধো নু খো, নো নু খো’’তিআদিনা ৰা পরস্মিং পধানে উত্তমে পটিলভিতব্বায পৰত্তিযা পরৰেদিযা ৰা যা কাচি কঙ্খা ৰিচিকিচ্ছা। যে ঝাযিনো তা পজহন্তি সব্বা, আতাপিনো ব্রহ্মচরিযং চরন্তাতি যে আরম্মণূপনিজ্ঝানেন লক্খণূপনিজ্ঝানেন ঝাযিনো ৰিপস্সনং উস্সুক্কাপেত্ৰা চতুব্বিধসম্মপ্পধানপারিপূরিযা আতাপিনো মগ্গব্রহ্মচরিযং চরন্তা অধিগচ্ছন্তা সদ্ধানুসারীআদিপ্পভেদা পঠমমগ্গট্ঠা পুগ্গলা, তা সব্বা কঙ্খা পজহন্তি সমুচ্ছিন্দন্তি মগ্গক্খণে। ততো পরং পন তা পহীনা নাম হোন্তি, তস্মা ইতো অঞ্ঞং তাসং অচ্চন্তপ্পহানং নাম নত্থীতি অধিপ্পাযো।
Tattha yā kāci kaṅkhā idha vā huraṃ vāti idha imasmiṃ paccuppanne attabhāve ‘‘ahaṃ nu khosmi no nu khosmī’’tiādinā huraṃ vā, atītānāgatesu attabhāvesu ‘‘ahosiṃ nu kho ahaṃ atītamaddhāna’’ntiādinā uppajjanakā kaṅkhā. Sakavediyā vā paravediyā vāti tā evaṃ vuttanayeneva sakaattabhāve ārammaṇavasena paṭilabhitabbāya pavattiyā sakavediyā vā parassa attabhāve paṭilabhitabbāya ‘‘buddho nu kho, no nu kho’’tiādinā vā parasmiṃ padhāne uttame paṭilabhitabbāya pavattiyā paravediyā vā yā kāci kaṅkhā vicikicchā. Ye jhāyino tā pajahanti sabbā, ātāpino brahmacariyaṃ carantāti ye ārammaṇūpanijjhānena lakkhaṇūpanijjhānena jhāyino vipassanaṃ ussukkāpetvā catubbidhasammappadhānapāripūriyā ātāpino maggabrahmacariyaṃ carantā adhigacchantā saddhānusārīādippabhedā paṭhamamaggaṭṭhā puggalā, tā sabbā kaṅkhā pajahanti samucchindanti maggakkhaṇe. Tato paraṃ pana tā pahīnā nāma honti, tasmā ito aññaṃ tāsaṃ accantappahānaṃ nāma natthīti adhippāyo.
ইতি ভগৰা ঝানমুখেন আযস্মতো কঙ্খারেৰতস্স ঝানসীসেন অরিযমগ্গাধিগমং থোমেন্তো থোমনাৰসেন উদানং উদানেসি। তেনেৰ চ নং ‘‘এতদগ্গং, ভিক্খৰে, মম সাৰকানং ভিক্খূনং ঝাযীনং যদিদং কঙ্খারেৰতো’’তি (অ॰ নি॰ ১.২০৪) ঝাযীভাৰেন এতদগ্গে ঠপেসীতি।
Iti bhagavā jhānamukhena āyasmato kaṅkhārevatassa jhānasīsena ariyamaggādhigamaṃ thomento thomanāvasena udānaṃ udānesi. Teneva ca naṃ ‘‘etadaggaṃ, bhikkhave, mama sāvakānaṃ bhikkhūnaṃ jhāyīnaṃ yadidaṃ kaṅkhārevato’’ti (a. ni. 1.204) jhāyībhāvena etadagge ṭhapesīti.
সত্তমসুত্তৰণ্ণনা নিট্ঠিতা।
Sattamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / উদানপাল়ি • Udānapāḷi / ৭. কঙ্খারেৰতসুত্তং • 7. Kaṅkhārevatasuttaṃ
