| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
3. ган̇каарзвад̇ад̇т̇зраг̇аат̇ааван̣н̣анаа
3. Kaṅkhārevatattheragāthāvaṇṇanā
бан̃н̃ам̣ имам̣ бассаад̇и ааяасмад̇о ган̇каарзвад̇асса г̇аат̇аа. гаа уббад̇д̇и? аяамби т̇зро бад̣̇умуд̇д̇арабхаг̇авад̇о гаалз хам̣савад̇ийнаг̇арз б̣раахман̣амахаасаалагулз ниб̣б̣ад̇д̇о. згад̣̇ивасам̣ б̣уд̣̇д̇хаанам̣ д̇хаммад̣̇зсанаагаалз хздтаа вуд̇д̇анаязна махааж̇анзна сад̣̇д̇хим̣ вихаарам̣ г̇анд̇ваа барисабарияанд̇з тид̇о д̇хаммам̣ сун̣анд̇о сад̇т̇аарам̣ згам̣ бхигкум̣ жхаанаабхирад̇аанам̣ аг̇г̇адтаанз табзнд̇ам̣ д̣̇исваа ‘‘маяааби анааг̇ад̇з зваруубзна бхавид̇ум̣ ваддад̇ий’’д̇и жинд̇зд̇ваа д̣̇зсанаавасаанз сад̇т̇аарам̣ ниманд̇зд̇ваа хздтаа вуд̇д̇анаязна махаасаггаарам̣ гад̇ваа бхаг̇аванд̇ам̣ ааха – ‘‘бханд̇з, ахам̣ иминаа ад̇хигаарагаммзна ан̃н̃ам̣ самбад̇д̇им̣ на бад̇т̇зми, яат̇аа бана со бхигку д̇умхзхи ид̇о сад̇д̇амад̣̇ивасамад̇т̇агз жхааяийнам̣ аг̇г̇адтаанз табид̇о, звам̣ ахамби анааг̇ад̇з згасса б̣уд̣̇д̇хасса саасанз жхааяийнам̣ аг̇г̇о бхавзяяа’’нд̇и бад̇т̇анамагааси. сад̇т̇аа анааг̇ад̇ам̣ ологзд̇ваа нибпаж̇ж̇анабхаавам̣ д̣̇исваа ‘‘анааг̇ад̇з габбасад̇асахассаавасаанз г̇од̇амо наама б̣уд̣̇д̇хо уббаж̇ж̇иссад̇и, д̇асса саасанз д̇вам̣ жхааяийнам̣ аг̇г̇о бхависсасий’’д̇и б̣яаагарид̇ваа баггаами.
Paññaṃ imaṃ passāti āyasmato kaṅkhārevatassa gāthā. Kā uppatti? Ayampi thero padumuttarabhagavato kāle haṃsavatīnagare brāhmaṇamahāsālakule nibbatto. Ekadivasaṃ buddhānaṃ dhammadesanākāle heṭṭhā vuttanayena mahājanena saddhiṃ vihāraṃ gantvā parisapariyante ṭhito dhammaṃ suṇanto satthāraṃ ekaṃ bhikkhuṃ jhānābhiratānaṃ aggaṭṭhāne ṭhapentaṃ disvā ‘‘mayāpi anāgate evarūpena bhavituṃ vaṭṭatī’’ti cintetvā desanāvasāne satthāraṃ nimantetvā heṭṭhā vuttanayena mahāsakkāraṃ katvā bhagavantaṃ āha – ‘‘bhante, ahaṃ iminā adhikārakammena aññaṃ sampattiṃ na patthemi, yathā pana so bhikkhu tumhehi ito sattamadivasamatthake jhāyīnaṃ aggaṭṭhāne ṭhapito, evaṃ ahampi anāgate ekassa buddhassa sāsane jhāyīnaṃ aggo bhaveyya’’nti patthanamakāsi. Satthā anāgataṃ oloketvā nipphajjanabhāvaṃ disvā ‘‘anāgate kappasatasahassāvasāne gotamo nāma buddho uppajjissati, tassa sāsane tvaṃ jhāyīnaṃ aggo bhavissasī’’ti byākaritvā pakkāmi.
со яааваж̇ийвам̣ галяаан̣агаммам̣ гад̇ваа габбасад̇асахассам̣ д̣̇звамануссзсу сам̣сарид̇ваа амхаагам̣ бхаг̇авад̇о гаалз саавад̇т̇инаг̇арз махаабхог̇агулз ниб̣б̣ад̇д̇о бажчаабхад̇д̇ам̣ д̇хаммассаванад̇т̇ам̣ г̇ажчанд̇зна махааж̇анзна сад̣̇д̇хим̣ вихаарам̣ г̇анд̇ваа барисабарияанд̇з тид̇о д̣̇асаб̣аласса д̇хаммагат̇ам̣ суд̇ваа бадилад̣̇д̇хасад̣̇д̇хо баб̣б̣аж̇ид̇ваа убасамбад̣̇ам̣ лабхид̇ваа гаммадтаанам̣ гат̇аабзд̇ваа жхаанабаригаммам̣ гаронд̇о жхааналаабхий худ̇ваа жхаанам̣ баад̣̇агам̣ гад̇ваа арахад̇д̇ам̣ баабун̣и. со язбхуяязна д̣̇асаб̣алзна самаабаж̇ж̇ид̇аб̣б̣асамаабад̇д̇им̣ самаабаж̇ж̇анд̇о ахорад̇д̇ам̣ жхаанзсу жин̣н̣авасий ахоси. ат̇а нам̣ сад̇т̇аа ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ жхааяийнам̣ яад̣̇ид̣̇ам̣ ган̇каарзвад̇о’’д̇и (а. ни. 1.198, 204) жхааяийнам̣ аг̇г̇адтаанз табзси. вуд̇д̇амби жзд̇ам̣ абад̣̇аанз (аба. т̇зра 2.55.34-53) –
So yāvajīvaṃ kalyāṇakammaṃ katvā kappasatasahassaṃ devamanussesu saṃsaritvā amhākaṃ bhagavato kāle sāvatthinagare mahābhogakule nibbatto pacchābhattaṃ dhammassavanatthaṃ gacchantena mahājanena saddhiṃ vihāraṃ gantvā parisapariyante ṭhito dasabalassa dhammakathaṃ sutvā paṭiladdhasaddho pabbajitvā upasampadaṃ labhitvā kammaṭṭhānaṃ kathāpetvā jhānaparikammaṃ karonto jhānalābhī hutvā jhānaṃ pādakaṃ katvā arahattaṃ pāpuṇi. So yebhuyyena dasabalena samāpajjitabbasamāpattiṃ samāpajjanto ahorattaṃ jhānesu ciṇṇavasī ahosi. Atha naṃ satthā ‘‘etadaggaṃ, bhikkhave, mama sāvakānaṃ bhikkhūnaṃ jhāyīnaṃ yadidaṃ kaṅkhārevato’’ti (a. ni. 1.198, 204) jhāyīnaṃ aggaṭṭhāne ṭhapesi. Vuttampi cetaṃ apadāne (apa. thera 2.55.34-53) –
‘‘бад̣̇умуд̇д̇аро наама ж̇ино, саб̣б̣ад̇хаммзсу жагкумаа;
‘‘Padumuttaro nāma jino, sabbadhammesu cakkhumā;
ид̇о сад̇асахассамхи, габбз уббаж̇ж̇и нааяаго.
Ito satasahassamhi, kappe uppajji nāyako.
‘‘сийхахану б̣рахмаг̇иро, хам̣сад̣̇унд̣̇убхиниссано;
‘‘Sīhahanu brahmagiro, haṃsadundubhinissano;
нааг̇авигганд̇аг̇амано, жанд̣̇асуураад̇хигаббабхо.
Nāgavikkantagamano, candasūrādhikappabho.
‘‘махаамад̇и махаавийро, махаажхааяий махааб̣ало;
‘‘Mahāmati mahāvīro, mahājhāyī mahābalo;
махаагаарун̣иго наат̇о, махаад̇амабанууд̣̇ано.
Mahākāruṇiko nātho, mahātamapanūdano.
‘‘са гад̣̇аажи д̇илогаг̇г̇о, взнзяяам̣ винаяам̣ б̣ахум̣;
‘‘Sa kadāci tilokaggo, veneyyaṃ vinayaṃ bahuṃ;
д̇хаммам̣ д̣̇зсзси самб̣уд̣̇д̇хо, сад̇д̇аасаяавид̣̇уу муни.
Dhammaṃ desesi sambuddho, sattāsayavidū muni.
‘‘жхааяим̣ жхаанарад̇ам̣ вийрам̣, убасанд̇ам̣ анаавилам̣;
‘‘Jhāyiṃ jhānarataṃ vīraṃ, upasantaṃ anāvilaṃ;
ван̣н̣аяанд̇о барисад̇им̣, д̇осзси ж̇анад̇ам̣ ж̇ино.
Vaṇṇayanto parisatiṃ, tosesi janataṃ jino.
‘‘д̇ад̣̇аахам̣ хам̣савад̇ияам̣, б̣раахман̣о взд̣̇абаараг̇уу;
‘‘Tadāhaṃ haṃsavatiyaṃ, brāhmaṇo vedapāragū;
д̇хаммам̣ суд̇ваана муд̣̇ид̇о, д̇ам̣ таанамабхибад̇т̇аяим̣.
Dhammaṃ sutvāna mudito, taṃ ṭhānamabhipatthayiṃ.
‘‘д̇ад̣̇аа ж̇ино вияаагааси, сан̇гхамаж̇жхз винааяаго;
‘‘Tadā jino viyākāsi, saṅghamajjhe vināyako;
муд̣̇ид̇о хохи д̇вам̣ б̣рахмз, лажчасз д̇ам̣ манорат̇ам̣.
Mudito hohi tvaṃ brahme, lacchase taṃ manorathaṃ.
‘‘сад̇асахассид̇о габбз, оггаагагуласамбхаво;
‘‘Satasahassito kappe, okkākakulasambhavo;
г̇од̇амо наама г̇од̇д̇зна, сад̇т̇аа логз бхависсад̇и.
Gotamo nāma gottena, satthā loke bhavissati.
‘‘д̇асса д̇хаммзсу д̣̇ааяаад̣̇о, орасо д̇хамманиммид̇о;
‘‘Tassa dhammesu dāyādo, oraso dhammanimmito;
рзвад̇о наама наамзна, хзссад̇и сад̇т̇у сааваго.
Revato nāma nāmena, hessati satthu sāvako.
‘‘д̇зна гаммзна сугад̇зна, жзд̇анаабан̣ид̇хийхи жа;
‘‘Tena kammena sukatena, cetanāpaṇidhīhi ca;
ж̇ахид̇ваа маанусам̣ д̣̇зхам̣, д̇аавад̇им̣самаг̇ажчахам̣.
Jahitvā mānusaṃ dehaṃ, tāvatiṃsamagacchahaṃ.
‘‘бажчимз жа бхавз д̣̇аани, ж̇аад̇охам̣ голияз бурз;
‘‘Pacchime ca bhave dāni, jātohaṃ koliye pure;
кад̇д̇ияз гуласамбаннз, ид̣̇д̇хз пийд̇з махад̣̇д̇ханз.
Khattiye kulasampanne, iddhe phīte mahaddhane.
‘‘яад̣̇аа габилавад̇т̇усмим̣, б̣уд̣̇д̇хо д̇хаммамад̣̇зсаяи;
‘‘Yadā kapilavatthusmiṃ, buddho dhammamadesayi;
д̇ад̣̇аа басанно суг̇ад̇з, баб̣б̣аж̇им̣ анаг̇аарияам̣.
Tadā pasanno sugate, pabbajiṃ anagāriyaṃ.
‘‘ган̇каа мз б̣ахулаа ааси, габбаагаббз д̇ахим̣ д̇ахим̣;
‘‘Kaṅkhā me bahulā āsi, kappākappe tahiṃ tahiṃ;
саб̣б̣ам̣ д̇ам̣ винаяий б̣уд̣̇д̇хо, д̣̇зсзд̇ваа д̇хаммамуд̇д̇амам̣.
Sabbaṃ taṃ vinayī buddho, desetvā dhammamuttamaṃ.
‘‘д̇ад̇охам̣ д̇ин̣н̣асам̣сааро, д̇ад̣̇аа жхаанасукз рад̇о;
‘‘Tatohaṃ tiṇṇasaṃsāro, tadā jhānasukhe rato;
вихараами д̇ад̣̇аа б̣уд̣̇д̇хо, мам̣ д̣̇исваа зд̇ад̣̇аб̣рави.
Viharāmi tadā buddho, maṃ disvā etadabravi.
‘‘яаа гаажи ган̇каа ид̇ха ваа хурам̣ ваа, савзд̣̇ияаа ваа баравзд̣̇ияаа ваа;
‘‘Yā kāci kaṅkhā idha vā huraṃ vā, savediyā vā paravediyā vā;
яз жхааяино д̇аа баж̇аханд̇и саб̣б̣аа, аад̇аабино б̣рахмажарияам̣ жаранд̇аа.
Ye jhāyino tā pajahanti sabbā, ātāpino brahmacariyaṃ carantā.
‘‘сад̇асахассз гад̇ам̣ гаммам̣, палам̣ д̣̇ассзси мз ид̇ха;
‘‘Satasahasse kataṃ kammaṃ, phalaṃ dassesi me idha;
сумуд̇д̇о саравзг̇ова, гилзсз жхаабаяим̣ мама.
Sumutto saravegova, kilese jhāpayiṃ mama.
‘‘д̇ад̇о жхаанарад̇д̇ам̣ д̣̇исваа, б̣уд̣̇д̇хо логанд̇аг̇уу муни;
‘‘Tato jhānarattaṃ disvā, buddho lokantagū muni;
жхааяийнам̣ бхигкуунам̣ аг̇г̇о, бан̃н̃аабзси махаамад̇и.
Jhāyīnaṃ bhikkhūnaṃ aggo, paññāpesi mahāmati.
‘‘гилзсаа жхаабид̇аа маяхам̣, бхаваа саб̣б̣з самуухад̇аа;
‘‘Kilesā jhāpitā mayhaṃ, bhavā sabbe samūhatā;
нааг̇ова б̣анд̇ханам̣ чзд̇ваа, вихараами анаасаво.
Nāgova bandhanaṃ chetvā, viharāmi anāsavo.
‘‘свааг̇ад̇ам̣ вад̇а мз ааси, мама б̣уд̣̇д̇хасса санд̇игз;
‘‘Svāgataṃ vata me āsi, mama buddhassa santike;
д̇иссо виж̇ж̇аа ануббад̇д̇аа, гад̇ам̣ б̣уд̣̇д̇хасса саасанам̣.
Tisso vijjā anuppattā, kataṃ buddhassa sāsanaṃ.
‘‘бадисамбхид̣̇аа жад̇ассо, вимогкааби жа адтимз;
‘‘Paṭisambhidā catasso, vimokkhāpi ca aṭṭhime;
чал̣абхин̃н̃аа сажчигад̇аа, гад̇ам̣ б̣уд̣̇д̇хасса саасана’’нд̇и.
Chaḷabhiññā sacchikatā, kataṃ buddhassa sāsana’’nti.
д̇ат̇аа гад̇агижжо банааяам̣ махаат̇зро буб̣б̣з д̣̇ийгхарад̇д̇ам̣ ад̇д̇ано ган̇каабагад̇ажид̇д̇ад̇ам̣ ид̣̇аани саб̣б̣асо виг̇ад̇аган̇кад̇ан̃жа бажжавзгкид̇ваа ‘‘ахо нууна маяхам̣ сад̇т̇уно д̣̇зсанаанубхааво, д̇знзд̇арахи звам̣ виг̇ад̇аган̇ко аж̇жхад̇д̇ам̣ вуубасанд̇ажид̇д̇о ж̇аад̇о’’д̇и сан̃ж̇аад̇аб̣ахумаано бхаг̇авад̇о бан̃н̃ам̣ басам̣санд̇о ‘‘бан̃н̃ам̣ имам̣ бассаа’’д̇и имам̣ г̇аат̇амааха.
Tathā katakicco panāyaṃ mahāthero pubbe dīgharattaṃ attano kaṅkhāpakatacittataṃ idāni sabbaso vigatakaṅkhatañca paccavekkhitvā ‘‘aho nūna mayhaṃ satthuno desanānubhāvo, tenetarahi evaṃ vigatakaṅkho ajjhattaṃ vūpasantacitto jāto’’ti sañjātabahumāno bhagavato paññaṃ pasaṃsanto ‘‘paññaṃ imaṃ passā’’ti imaṃ gāthamāha.
3. д̇ад̇т̇а бан̃н̃анд̇и багаарз ж̇аанаад̇и, багаарзхи н̃аабзд̇ийд̇и жа бан̃н̃аа. взнзяяаанам̣ аасаяаанусаяажарияаад̇химуд̇д̇иаад̣̇иббагаарз д̇хаммаанам̣ гусалаад̣̇игз канд̇хаад̣̇игз жа д̣̇зсзд̇аб̣б̣аббагаарз ж̇аанаад̇и, яат̇аасабхаавад̇о бадивиж̇жхад̇и, д̇зхи жа багаарзхи н̃аабзд̇ийд̇и ад̇т̇о. сад̇т̇у д̣̇зсанаан̃аан̣ан̃хи ид̇хаад̇хиббзд̇ам̣, д̇знааха ‘‘има’’нд̇и. д̇ан̃хи ад̇д̇ани сид̣̇д̇хзна д̣̇зсанааб̣алзна наяаг̇г̇аахад̇о бажжагкам̣ вияа убадтид̇ам̣ г̇ахзд̇ваа ‘‘има’’нд̇и вуд̇д̇ам̣. яад̣̇аг̇г̇зна ваа сад̇т̇у д̣̇зсанаан̃аан̣ам̣ саавагзхи наяад̇о г̇аяхад̇и, д̇ад̣̇аг̇г̇зна ад̇д̇ано висаяз бадивзд̇хан̃аан̣амби наяад̇о г̇аяхад̇зва. д̇знааха ааяасмаа д̇хаммасзнаабад̇и – ‘‘абижа мз, бханд̇з, д̇хамманваяо вид̣̇ид̇о’’д̇и (д̣̇ий. ни. 2.146; 3.143). бассаад̇и вимхаяаббад̇д̇о анияамад̇о аалабад̇и ад̇д̇аноязва ваа жид̇д̇ам̣, яат̇ааха бхаг̇аваа уд̣̇аанзнд̇о – ‘‘логамимам̣ басса; бут̇уу авиж̇ж̇ааяа барзд̇ам̣ бхууд̇ам̣ бхууд̇арад̇ам̣ бхаваа абаримуд̇д̇а’’нд̇и (уд̣̇аа. 30). д̇ат̇ааг̇ад̇аананд̇и д̇ат̇аа ааг̇аманаад̣̇иад̇т̇зна д̇ат̇ааг̇ад̇аанам̣. д̇ат̇аа ааг̇ад̇од̇и хи д̇ат̇ааг̇ад̇о, д̇ат̇аа г̇ад̇од̇и д̇ат̇ааг̇ад̇о, д̇ат̇алагкан̣ам̣ ааг̇ад̇од̇и д̇ат̇ааг̇ад̇о, д̇ат̇ад̇хаммз яаат̇аавад̇о абхисамб̣уд̣̇д̇ход̇и д̇ат̇ааг̇ад̇о, д̇ат̇ад̣̇ассид̇ааяа д̇ат̇ааг̇ад̇о, д̇ат̇аваад̣̇ид̇ааяа д̇ат̇ааг̇ад̇о, д̇ат̇аагаарид̇ааяа д̇ат̇ааг̇ад̇о, абхибхаванадтзна д̇ат̇ааг̇ад̇од̇и звам̣ адтахи гааран̣зхи бхаг̇аваа д̇ат̇ааг̇ад̇о. д̇ат̇ааяа ааг̇ад̇од̇и д̇ат̇ааг̇ад̇о, д̇ат̇ааяа г̇ад̇од̇и д̇ат̇ааг̇ад̇о, д̇ат̇алагкан̣ам̣ г̇ад̇од̇и д̇ат̇ааг̇ад̇о, д̇ат̇аани ааг̇ад̇од̇и д̇ат̇ааг̇ад̇о, д̇ат̇аавид̇ход̇и д̇ат̇ааг̇ад̇о, д̇ат̇аа бавад̇д̇ид̇од̇и д̇ат̇ааг̇ад̇о, д̇ат̇зхи ааг̇ад̇од̇и д̇ат̇ааг̇ад̇о , д̇ат̇аа г̇ад̇абхаавзна д̇ат̇ааг̇ад̇од̇и звамби адтахи гааран̣зхи бхаг̇аваа д̇ат̇ааг̇ад̇од̇и аяамзд̇т̇а сан̇кзбо. вид̇т̇ааро бана барамад̇т̇ад̣̇ийбанияаа уд̣̇аанадтагат̇ааяа (уд̣̇аа. адта. 18) ид̇ивуд̇д̇агадтагат̇ааяа (ид̇иву. адта. 38) жа вуд̇д̇анаязнзва взд̣̇ид̇аб̣б̣о.
3. Tattha paññanti pakāre jānāti, pakārehi ñāpetīti ca paññā. Veneyyānaṃ āsayānusayacariyādhimuttiādippakāre dhammānaṃ kusalādike khandhādike ca desetabbappakāre jānāti, yathāsabhāvato paṭivijjhati, tehi ca pakārehi ñāpetīti attho. Satthu desanāñāṇañhi idhādhippetaṃ, tenāha ‘‘ima’’nti. Tañhi attani siddhena desanābalena nayaggāhato paccakkhaṃ viya upaṭṭhitaṃ gahetvā ‘‘ima’’nti vuttaṃ. Yadaggena vā satthu desanāñāṇaṃ sāvakehi nayato gayhati, tadaggena attano visaye paṭivedhañāṇampi nayato gayhateva. Tenāha āyasmā dhammasenāpati – ‘‘apica me, bhante, dhammanvayo vidito’’ti (dī. ni. 2.146; 3.143). Passāti vimhayappatto aniyamato ālapati attanoyeva vā cittaṃ, yathāha bhagavā udānento – ‘‘lokamimaṃ passa; puthū avijjāya paretaṃ bhūtaṃ bhūtarataṃ bhavā aparimutta’’nti (udā. 30). Tathāgatānanti tathā āgamanādiatthena tathāgatānaṃ. Tathā āgatoti hi tathāgato, tathā gatoti tathāgato, tathalakkhaṇaṃ āgatoti tathāgato, tathadhamme yāthāvato abhisambuddhoti tathāgato, tathadassitāya tathāgato, tathavāditāya tathāgato, tathākāritāya tathāgato, abhibhavanaṭṭhena tathāgatoti evaṃ aṭṭhahi kāraṇehi bhagavā tathāgato. Tathāya āgatoti tathāgato, tathāya gatoti tathāgato, tathalakkhaṇaṃ gatoti tathāgato, tathāni āgatoti tathāgato, tathāvidhoti tathāgato, tathā pavattitoti tathāgato, tathehi āgatoti tathāgato , tathā gatabhāvena tathāgatoti evampi aṭṭhahi kāraṇehi bhagavā tathāgatoti ayamettha saṅkhepo. Vitthāro pana paramatthadīpaniyā udānaṭṭhakathāya (udā. aṭṭha. 18) itivuttakaṭṭhakathāya (itivu. aṭṭha. 38) ca vuttanayeneva veditabbo.
ид̣̇аани д̇ассаа бан̃н̃ааяа асаад̇хааран̣ависзсам̣ д̣̇ассзд̇ум̣ ‘‘аг̇г̇и яат̇аа’’д̇иаад̣̇и вуд̇д̇ам̣. яат̇аа аг̇г̇ийд̇и убамааважанам̣. яат̇аад̇и д̇асса убамаабхаавад̣̇ассанам̣. баж̇ж̇алид̇од̇и убамзяязна самб̣анд̇хад̣̇ассанам̣. нисийт̇зд̇и гижжагаран̣агаалад̣̇ассанам̣. аяан̃хзд̇т̇а ад̇т̇о – яат̇аа наама нисийт̇з рад̇д̇ияам̣ жад̇уран̇г̇асаманнааг̇ад̇з анд̇хагаарз вад̇д̇амаанз уннад̇з таанз баж̇ж̇алид̇о аг̇г̇и д̇асмим̣ бад̣̇зсз д̇аяаг̇ад̇ам̣ вид̇хаманд̇ам̣ д̇идтад̇и, звамзва д̇ат̇ааг̇ад̇аанам̣ имам̣ д̣̇зсанаан̃аан̣асан̇каад̇ам̣ саб̣б̣асо взнзяяаанам̣ сам̣саяад̇амам̣ вид̇хаманд̇ам̣ бан̃н̃ам̣ бассаад̇и. яад̇о д̣̇зсанаавилаасзна сад̇д̇аанам̣ н̃аан̣амаяам̣ аалогам̣ д̣̇знд̇ийд̇и аалогад̣̇аа. бан̃н̃аамаяамзва жагкум̣ д̣̇ад̣̇анд̇ийд̇и жагкуд̣̇ад̣̇аа. д̇ад̣̇убхаяамби ган̇каавинаяабад̣̇адтаанамзва гад̇ваа д̣̇ассзнд̇о ‘‘яз ааг̇ад̇аанам̣ винаяанд̇и ган̇ка’’нд̇и ааха, яз д̇ат̇ааг̇ад̇аа ад̇д̇ано санд̇игам̣ ааг̇ад̇аанам̣ убаг̇ад̇аанам̣ взнзяяаанам̣ ‘‘ахосим̣ ну ко ахамад̇ийд̇амад̣̇д̇хаана’’нд̇иаад̣̇инаяаббавад̇д̇ам̣ (ма. ни. 1.18; сам̣. ни. 2.20) сол̣асавад̇т̇угам̣, ‘‘б̣уд̣̇д̇хз ган̇кад̇и д̇хаммз ган̇кад̇ий’’д̇иаад̣̇инаяаббавад̇д̇ам̣ (д̇ха. са. 1008) адтавад̇т̇уган̃жа ган̇кам̣ вижигижчам̣ винаяанд̇и д̣̇зсанаанубхаавзна анавасзсад̇о вид̇хаманд̇и вид̣̇д̇хам̣сзнд̇и. винаяагуггужжасан̇каад̇аа бана ган̇каа д̇аб̣б̣инаязнзва винийд̇аа хонд̇ийд̇и.
Idāni tassā paññāya asādhāraṇavisesaṃ dassetuṃ ‘‘aggi yathā’’tiādi vuttaṃ. Yathā aggīti upamāvacanaṃ. Yathāti tassa upamābhāvadassanaṃ. Pajjalitoti upameyyena sambandhadassanaṃ. Nisītheti kiccakaraṇakāladassanaṃ. Ayañhettha attho – yathā nāma nisīthe rattiyaṃ caturaṅgasamannāgate andhakāre vattamāne unnate ṭhāne pajjalito aggi tasmiṃ padese tayagataṃ vidhamantaṃ tiṭṭhati, evameva tathāgatānaṃ imaṃ desanāñāṇasaṅkhātaṃ sabbaso veneyyānaṃ saṃsayatamaṃ vidhamantaṃ paññaṃ passāti. Yato desanāvilāsena sattānaṃ ñāṇamayaṃ ālokaṃ dentīti ālokadā. Paññāmayameva cakkhuṃ dadantīti cakkhudadā. Tadubhayampi kaṅkhāvinayapadaṭṭhānameva katvā dassento ‘‘ye āgatānaṃ vinayanti kaṅkha’’nti āha, ye tathāgatā attano santikaṃ āgatānaṃ upagatānaṃ veneyyānaṃ ‘‘ahosiṃ nu kho ahamatītamaddhāna’’ntiādinayappavattaṃ (ma. ni. 1.18; saṃ. ni. 2.20) soḷasavatthukaṃ, ‘‘buddhe kaṅkhati dhamme kaṅkhatī’’tiādinayappavattaṃ (dha. sa. 1008) aṭṭhavatthukañca kaṅkhaṃ vicikicchaṃ vinayanti desanānubhāvena anavasesato vidhamanti viddhaṃsenti. Vinayakukkuccasaṅkhātā pana kaṅkhā tabbinayeneva vinītā hontīti.
абаро наяо – яат̇аа аг̇г̇и нисийт̇з рад̇д̇ибхааг̇з баж̇ж̇алид̇о бадуд̇араж̇аало самуж̇ж̇алам̣ ужжаасанз тид̇аанам̣ обхаасад̣̇аанамад̇д̇зна анд̇хагаарам̣ вид̇хамид̇ваа самависамам̣ вибхаавзнд̇о аалогад̣̇ад̣̇о ход̇и. ажжаасаннз бана тид̇аанам̣ д̇ам̣ субаагадам̣ гаронд̇о жагкугижжагаран̣ад̇о жагкуд̣̇ад̣̇о наама ход̇и, звамзва д̇ат̇ааг̇ад̇о ад̇д̇ано д̇хаммагааяасса д̣̇уурз тид̇аанам̣ агад̇аад̇хигаараанам̣ бан̃н̃аабаж̇ж̇од̇зна моханд̇хагаарам̣ вид̇хамид̇ваа гааяависамаад̣̇исамависамам̣ вибхаавзнд̇о аалогад̣̇аа бхаванд̇и, аасаннз тид̇аанам̣ бана гад̇аад̇хигаараанам̣ д̇хаммажагкум̣ уббаад̣̇знд̇о жагкуд̣̇ад̣̇аа бхаванд̇и. яз звам̣бхууд̇аа ад̇д̇ано важийг̇ожарам̣ ааг̇ад̇аанам̣ маад̣̇исаанамби ган̇кааб̣ахулаанам̣ ган̇кам̣ винаяанд̇и арияамаг̇г̇асамуббаад̣̇анзна вид̇хаманд̇и, д̇зсам̣ д̇ат̇ааг̇ад̇аанам̣ бан̃н̃ам̣ н̃аан̣аад̇исаяам̣ бассаад̇и яож̇анаа. звамаяам̣ т̇зрасса ад̇д̇ано ган̇каавид̇аран̣аббагаасанзна ан̃н̃ааб̣яаагаран̣аг̇аат̇ааби ход̇и. аяан̃хи т̇зро бут̇уж̇ж̇анагаалз габбиязби гуггужжаго худ̇ваа ган̇кааб̣ахулад̇ааяа ‘‘ган̇каарзвад̇о’’д̇и бан̃н̃аад̇о, бажчаа кийн̣аасавагаалзби д̇ат̇зва вохараяид̇т̇а. д̇знааха – ‘‘ид̇т̇ам̣ суд̣̇ам̣ ааяасмаа ган̇каарзвад̇о г̇аат̇ам̣ абхаасид̇т̇аа’’д̇и. д̇ам̣ вуд̇д̇ад̇т̇амзва.
Aparo nayo – yathā aggi nisīthe rattibhāge pajjalito paṭutarajālo samujjalaṃ uccāsane ṭhitānaṃ obhāsadānamattena andhakāraṃ vidhamitvā samavisamaṃ vibhāvento ālokadado hoti. Accāsanne pana ṭhitānaṃ taṃ supākaṭaṃ karonto cakkhukiccakaraṇato cakkhudado nāma hoti, evameva tathāgato attano dhammakāyassa dūre ṭhitānaṃ akatādhikārānaṃ paññāpajjotena mohandhakāraṃ vidhamitvā kāyavisamādisamavisamaṃ vibhāvento ālokadā bhavanti, āsanne ṭhitānaṃ pana katādhikārānaṃ dhammacakkhuṃ uppādento cakkhudadā bhavanti. Ye evaṃbhūtā attano vacīgocaraṃ āgatānaṃ mādisānampi kaṅkhābahulānaṃ kaṅkhaṃ vinayanti ariyamaggasamuppādanena vidhamanti, tesaṃ tathāgatānaṃ paññaṃ ñāṇātisayaṃ passāti yojanā. Evamayaṃ therassa attano kaṅkhāvitaraṇappakāsanena aññābyākaraṇagāthāpi hoti. Ayañhi thero puthujjanakāle kappiyepi kukkuccako hutvā kaṅkhābahulatāya ‘‘kaṅkhārevato’’ti paññāto, pacchā khīṇāsavakālepi tatheva voharayittha. Tenāha – ‘‘itthaṃ sudaṃ āyasmā kaṅkhārevato gāthaṃ abhāsitthā’’ti. Taṃ vuttatthameva.
ган̇каарзвад̇ад̇т̇зраг̇аат̇ааван̣н̣анаа нидтид̇аа.
Kaṅkhārevatattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 3. ган̇каарзвад̇ад̇т̇зраг̇аат̇аа • 3. Kaṅkhārevatattheragāthā
