| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
10. கண்ணகத்த²லஸுத்தவண்ணனா
10. Kaṇṇakatthalasuttavaṇṇanā
375. அனந்தரஸுத்தே வுத்தகரணீயேனேவாதி ‘‘பாஸாதே³ வா நாடகேஸு வா சித்தஸ்ஸாத³ங் அலப⁴மானோ தத்த² தத்த² விசரிதுங் ஆரத்³தோ⁴’’தி வுத்தகரணீயேன. அப்பது³ட்ட²பதோ³ஸீனஞ்ஹி ஏவங் ஹோதீதி.
375.Anantarasuttevuttakaraṇīyenevāti ‘‘pāsāde vā nāṭakesu vā cittassādaṃ alabhamāno tattha tattha vicarituṃ āraddho’’ti vuttakaraṇīyena. Appaduṭṭhapadosīnañhi evaṃ hotīti.
376. புச்சி²தோதி ‘‘அஞ்ஞங் தூ³தங் நாலத்து²’’ந்தி புச்சி²தோ. ஸோதி ராஜா. தாஸங் வந்த³னா ஸசே உத்தரகாலங், அத்தனோ ஆக³மனகாரணங் கதெ²ஸ்ஸதி.
376.Pucchitoti ‘‘aññaṃ dūtaṃ nālatthu’’nti pucchito. Soti rājā. Tāsaṃ vandanā sace uttarakālaṃ, attano āgamanakāraṇaṃ kathessati.
378. ஏகாவஜ்ஜனேனாதி ஏகவீதி²ஜவனேன. தேன ஏகசித்தங் தாவ திட்ட²து, ஏகசித்தவீதி²யாபி ஸப்³ப³ங் ஜானிதுங் ந ஸக்காதி த³ஸ்ஸேதி. ‘‘இத³ங் நாம அதீதங் ஜானிஸ்ஸாமீ’’தி அனியமெத்வா ஆவஜ்ஜதோ யங் கிஞ்சி அதீதங் ஜானாதி, நியமிதே பன நியமிதமேவாதி ஆஹ – ‘‘ஏகேன ஹி…பே॰… ஏகதே³ஸமேவ ஜானாதீ’’தி. தேன சித்தேனாதி ‘‘அதீதங் ஸப்³ப³ங் ஜானிஸ்ஸாமீ’’தி ஏவங் பவத்தசித்தேன. இதரேஸூதி அனாக³தபச்சுப்பன்னேஸு. காரணஜாதிகந்தி யுத்திஸபா⁴வங், யுத்தியா யுத்தந்தி அத்தோ². ஸம்பராயகு³ணந்தி ஸம்பராயே கதகம்மஸ்ஸ விஸேஸங்.
378.Ekāvajjanenāti ekavīthijavanena. Tena ekacittaṃ tāva tiṭṭhatu, ekacittavīthiyāpi sabbaṃ jānituṃ na sakkāti dasseti. ‘‘Idaṃ nāma atītaṃ jānissāmī’’ti aniyametvā āvajjato yaṃ kiñci atītaṃ jānāti, niyamite pana niyamitamevāti āha – ‘‘ekena hi…pe… ekadesameva jānātī’’ti. Tena cittenāti ‘‘atītaṃ sabbaṃ jānissāmī’’ti evaṃ pavattacittena. Itaresūti anāgatapaccuppannesu. Kāraṇajātikanti yuttisabhāvaṃ, yuttiyā yuttanti attho. Samparāyaguṇanti samparāye katakammassa visesaṃ.
379. லோகுத்தரமிஸ்ஸகானி கதி²தானி போ³தி⁴ராஜகுமாரஸுத்தே விய லோகியா சேவ லோகுத்தரா ச. யதா²லாப⁴வஸேன செத்த² பதா⁴னியங்கா³னங் லோகுத்தரக்³க³ஹணங் வேதி³தப்³ப³ங். பச்சேகங் ஏவ நேஸஞ்ச பதா⁴னியங்க³தா த³ட்ட²ப்³பா³ யதா² ‘‘அட்ட²விமொக்கா² ஸந்தி³ஸ்ஸந்தி லோகுத்தரமிஸ்ஸகா’’தி. லோகுத்தரானேவாதி செத்த² யங் வத்தப்³ப³ங், தங் பரதோ ஆவி ப⁴விஸ்ஸதி. பதா⁴னநானத்தந்தி பத³ஹனநானத்தங், பா⁴வனானுயோக³விஸேஸந்தி அத்தோ². ஸங்கா²ரே பரிமத்³தி³த்வா படிபக்க²த⁴ம்மே ஏகதே³ஸதோ பஜஹித்வா டி²தஸ்ஸ பா⁴வனானுயோகோ³ ஸப்³பே³ன ஸப்³ப³ங் அபரிமத்³தி³தஸங்கா²ரஸ்ஸ அப்பஹீனபடிபக்க²ஸ்ஸ பா⁴வனானுயோக³தோ ஸுகு²மோ விஸதோ³வ ஹோதி, ஸச்சாபி⁴ஸமயேன ஸந்தானஸ்ஸ ஆஹிதவிஸேஸத்தாதி ஆஹ – ‘‘அஞ்ஞாதி³ஸமேவ ஹி புது²ஜ்ஜனஸ்ஸ பதா⁴னங், அஞ்ஞாதி³ஸங் ஸோதாபன்னஸ்ஸா’’திஆதி³. அயஞ்ச விஸேஸோ ந கேவலங் அனரியஅரியபுக்³க³லதோ ஏவ, அத² கோ² அரியேஸுபி ஸெக்கா²தி³விஸேஸதோபி லப்³ப⁴தி அபி⁴ஸங்கா²ரவிஸேஸதோ அபி⁴னீஹாரதோ ச இஜ்ஜ²னதோதி த³ஸ்ஸெந்தோ ‘‘அஞ்ஞாதி³ஸங் ஸகதா³கா³மினோ’’திஆதி³மாஹ. ந பாபுணாதீதி யஸ்மா புது²ஜ்ஜனோ ஸப்³ப³தா²வ பதா⁴னங் பத³ஹந்தோ ஸோதாபத்திமக்³க³ங் அதி⁴க³ச்ச²தி, ஸோதாபன்னோ ச ஸகதா³கா³மிமக்³க³ந்தி ஹெட்டி²மங் உபரிமதோ ஓளாரிகங், உபரிமஞ்ச இதரதோ ஸுகு²மங் தேன பஹாதுங் அஸக்குணெய்யஸ்ஸ பஜஹனதோ, இதி அதி⁴க³ந்தப்³ப³விஸேஸேன ச அதி⁴க³மபடிபதா³ய ஸண்ஹஸுகு²மதா திக்க²விஸத³தா ச விஞ்ஞாயதீதி ஆஹ – ‘‘புது²ஜ்ஜனஸ்ஸ பதா⁴னங் ஸோதாபன்னஸ்ஸ பதா⁴னங் ந பாபுணாதீ’’திஆதி³.
379.Lokuttaramissakāni kathitāni bodhirājakumārasutte viya lokiyā ceva lokuttarā ca. Yathālābhavasena cettha padhāniyaṅgānaṃ lokuttaraggahaṇaṃ veditabbaṃ. Paccekaṃ eva nesañca padhāniyaṅgatā daṭṭhabbā yathā ‘‘aṭṭhavimokkhā sandissanti lokuttaramissakā’’ti. Lokuttarānevāti cettha yaṃ vattabbaṃ, taṃ parato āvi bhavissati. Padhānanānattanti padahananānattaṃ, bhāvanānuyogavisesanti attho. Saṅkhāre parimadditvā paṭipakkhadhamme ekadesato pajahitvā ṭhitassa bhāvanānuyogo sabbena sabbaṃ aparimadditasaṅkhārassa appahīnapaṭipakkhassa bhāvanānuyogato sukhumo visadova hoti, saccābhisamayena santānassa āhitavisesattāti āha – ‘‘aññādisameva hi puthujjanassa padhānaṃ, aññādisaṃ sotāpannassā’’tiādi. Ayañca viseso na kevalaṃ anariyaariyapuggalato eva, atha kho ariyesupi sekkhādivisesatopi labbhati abhisaṅkhāravisesato abhinīhārato ca ijjhanatoti dassento ‘‘aññādisaṃ sakadāgāmino’’tiādimāha. Na pāpuṇātīti yasmā puthujjano sabbathāva padhānaṃ padahanto sotāpattimaggaṃ adhigacchati, sotāpanno ca sakadāgāmimagganti heṭṭhimaṃ uparimato oḷārikaṃ, uparimañca itarato sukhumaṃ tena pahātuṃ asakkuṇeyyassa pajahanato, iti adhigantabbavisesena ca adhigamapaṭipadāya saṇhasukhumatā tikkhavisadatā ca viññāyatīti āha – ‘‘puthujjanassa padhānaṃ sotāpannassa padhānaṃ na pāpuṇātī’’tiādi.
அகூடகரணந்தி அவஞ்சனகிரியங். அனவச்சி²ந்த³னந்தி அதியானங். அவிஞ்ச²னங் ந ஆகட்³ட⁴னங், நியுத்ததங் வினிவேடெ²த்வா ஸமந்தா விபரிவத்தித்வா ஸமதா⁴ராய ச²ட்³ட³னங் வா. தஸ்ஸ காரணங் தங்காரணங், தங் காரணந்தி வா தங் கிரியங் தங் அதி⁴காரங். த³ந்தேஹி க³ந்தப்³ப³பூ⁴மிந்தி த³ந்தேஹி பத்தப்³ப³ட்டா²னங், பத்தப்³ப³வத்து²ங் வா. சத்தாரோபி அஸ்ஸத்³தா⁴ நாம உபரிமஉபரிமஸத்³தா⁴ய அபா⁴வதோ. யேன ஹி யங் அப்பத்தங், தஸ்ஸ தங் நத்தி². அரியஸாவகஸ்ஸ…பே॰… நத்தி² பட²மமக்³கே³னேவ மாயாஸாடெ²ய்யானங் பஹாதப்³ப³த்தா. தேனேவாதி ஸம்மதே³வ விருத்³த⁴பக்கா²னங் ஸத்³தா⁴தீ³னங் இதா⁴தி⁴ப்பேதத்தா. யதி³ ஏவங் கத²ங் மிஸ்ஸககதா²தி ஆஹ ‘‘அஸ்ஸக²ளுங்கஸுத்தந்தே பனா’’திஆதி³. சத்தாரோவ ஹொந்தி புது²ஜ்ஜனாதி³வஸேன.
Akūṭakaraṇanti avañcanakiriyaṃ. Anavacchindananti atiyānaṃ. Aviñchanaṃ na ākaḍḍhanaṃ, niyuttataṃ viniveṭhetvā samantā viparivattitvā samadhārāya chaḍḍanaṃ vā. Tassa kāraṇaṃ taṃkāraṇaṃ, taṃ kāraṇanti vā taṃ kiriyaṃ taṃ adhikāraṃ. Dantehi gantabbabhūminti dantehi pattabbaṭṭhānaṃ, pattabbavatthuṃ vā. Cattāropi assaddhā nāma uparimauparimasaddhāya abhāvato. Yena hi yaṃ appattaṃ, tassa taṃ natthi. Ariyasāvakassa…pe… natthi paṭhamamaggeneva māyāsāṭheyyānaṃ pahātabbattā. Tenevāti sammadeva viruddhapakkhānaṃ saddhādīnaṃ idhādhippetattā. Yadi evaṃ kathaṃ missakakathāti āha ‘‘assakhaḷuṅkasuttante panā’’tiādi. Cattārova honti puthujjanādivasena.
ஓபம்மஸங்ஸந்த³னே அத³ந்தஹத்தி²ஆத³யோ வியாதிஆதி³னா கண்ஹபக்கே², யதா² பன த³ந்தஹத்தி²ஆத³யோதிஆதி³னா ஸுக்கபக்கே² ச ஸாதா⁴ரணதோ ஏகஜ்ஜ²ங் கத்வா வுத்தங், அஸாதா⁴ரணதோ பி⁴ந்தி³த்வா த³ஸ்ஸேதுங் ‘‘இத³ங் வுத்தங் ஹோதீ’’திஆதி³ வுத்தங்.
Opammasaṃsandane adantahatthiādayo viyātiādinā kaṇhapakkhe, yathā pana dantahatthiādayotiādinā sukkapakkhe ca sādhāraṇato ekajjhaṃ katvā vuttaṃ, asādhāraṇato bhinditvā dassetuṃ ‘‘idaṃ vuttaṃ hotī’’tiādi vuttaṃ.
380. ஸம்மப்பதா⁴னா நிப்³பி³ஸிட்ட²வீரியா. தேனாஹ – ‘‘ந கிஞ்சி நானாகரணங் வதா³மி, யதி³த³ங் விமுத்தியா விமுத்தி’’ந்தி. ந ஹி ஸுக்க²விபஸ்ஸகதேவிஜ்ஜச²ளபி⁴ஞ்ஞானங் விமுத்தியா நானாகரணங் அத்தி². தேன வுத்தங் ‘‘யங் ஏகஸ்ஸா’’திஆதி³. கிங் த்வங் ந ஜானாஸீதி ஸம்ப³ந்தோ⁴. ஆக³ச்ச²ந்தீதி உப்பஜ்ஜனவஸேன ஆக³ச்ச²ந்தி. நாக³ச்ச²ந்தீதி எத்தா²பி ஏஸேவ நயோ. இத³ங் புச்ச²ந்தோதி இத³ங் புச்சா²மீதி த³ஸ்ஸெந்தோ. அப்பஹீனசேதஸிகது³க்கா² அனதி⁴க³தஅனாகா³மிதா. தேனாஹ ‘‘உபபத்திவஸேன ஆக³ந்தாரோ’’தி. ஸமுச்சி²ன்னது³க்கா²தி ஸமுக்³கா⁴டிதசேதஸிகது³க்கா².
380.Sammappadhānā nibbisiṭṭhavīriyā. Tenāha – ‘‘na kiñci nānākaraṇaṃ vadāmi, yadidaṃ vimuttiyā vimutti’’nti. Na hi sukkhavipassakatevijjachaḷabhiññānaṃ vimuttiyā nānākaraṇaṃ atthi. Tena vuttaṃ ‘‘yaṃ ekassā’’tiādi. Kiṃ tvaṃ na jānāsīti sambandho. Āgacchantīti uppajjanavasena āgacchanti. Nāgacchantīti etthāpi eseva nayo. Idaṃ pucchantoti idaṃ pucchāmīti dassento. Appahīnacetasikadukkhā anadhigataanāgāmitā. Tenāha ‘‘upapattivasena āgantāro’’ti. Samucchinnadukkhāti samugghāṭitacetasikadukkhā.
381. தம்ஹா டா²னாதி ததோ யதா²தி⁴க³தஇஸ்ஸரியட்டா²னதோ. புன தம்ஹா டா²னாதி ததோ து³க்³க³தா. ஸம்பன்னகாமகு³ணந்தி உளாரகாமகு³ணஸமன்னாக³தங்.
381.Tamhā ṭhānāti tato yathādhigataissariyaṭṭhānato. Puna tamhā ṭhānāti tato duggatā. Sampannakāmaguṇanti uḷārakāmaguṇasamannāgataṃ.
தத்தா²தி காமதே³வலோகே. டா²னபா⁴வதோதி அரஹத்தஞ்சே அதி⁴க³தங், தாவதே³வ பரினிப்³பா³னதோ. உபரிதே³வே சாதி உபரூபரி பூ⁴மிவாஸே தே³வே ச, சக்கு²விஞ்ஞாணத³ஸ்ஸனேனபி த³ஸ்ஸனாய நப்பஹொந்தீதி யோஜனா.
Tatthāti kāmadevaloke. Ṭhānabhāvatoti arahattañce adhigataṃ, tāvadeva parinibbānato. Uparidevecāti uparūpari bhūmivāse deve ca, cakkhuviññāṇadassanenapi dassanāya nappahontīti yojanā.
382. வுத்தனயேனேவாதி தே³வபுச்சா²ய வுத்தேனேவ நயேன. ஸா கிர கதா²தி ‘‘நத்தி² ஸோ ஸமணோ வா ப்³ராஹ்மணோ வா, யோ ஸகிதே³வ ஸப்³ப³ங் நெய்ய’’ந்தி கதா². தேதி விடடூப⁴ஸஞ்ஜயா. இமஸ்மிங்யேவ டா²னேதி இமஸ்மிங் மிக³தா³யேயேவ. ஸேஸங் ஸுவிஞ்ஞெய்யமேவ.
382.Vuttanayenevāti devapucchāya vutteneva nayena. Sā kira kathāti ‘‘natthi so samaṇo vā brāhmaṇo vā, yo sakideva sabbaṃ neyya’’nti kathā. Teti viṭaṭūbhasañjayā. Imasmiṃyeva ṭhāneti imasmiṃ migadāyeyeva. Sesaṃ suviññeyyameva.
கண்ணகத்த²லஸுத்தவண்ணனாய லீனத்த²ப்பகாஸனா ஸமத்தா.
Kaṇṇakatthalasuttavaṇṇanāya līnatthappakāsanā samattā.
நிட்டி²தா ச ராஜவக்³க³வண்ணனா.
Niṭṭhitā ca rājavaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. கண்ணகத்த²லஸுத்தங் • 10. Kaṇṇakatthalasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 10. கண்ணகத்த²லஸுத்தவண்ணனா • 10. Kaṇṇakatthalasuttavaṇṇanā
