| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
১০. কণ্ণকত্থলসুত্তৰণ্ণনা
10. Kaṇṇakatthalasuttavaṇṇanā
৩৭৫. অনন্তরসুত্তে ৰুত্তকরণীযেনেৰাতি ‘‘পাসাদে ৰা নাটকেসু ৰা চিত্তস্সাদং অলভমানো তত্থ তত্থ ৰিচরিতুং আরদ্ধো’’তি ৰুত্তকরণীযেন। অপ্পদুট্ঠপদোসীনঞ্হি এৰং হোতীতি।
375.Anantarasuttevuttakaraṇīyenevāti ‘‘pāsāde vā nāṭakesu vā cittassādaṃ alabhamāno tattha tattha vicarituṃ āraddho’’ti vuttakaraṇīyena. Appaduṭṭhapadosīnañhi evaṃ hotīti.
৩৭৬. পুচ্ছিতোতি ‘‘অঞ্ঞং দূতং নালত্থু’’ন্তি পুচ্ছিতো। সোতি রাজা। তাসং ৰন্দনা সচে উত্তরকালং, অত্তনো আগমনকারণং কথেস্সতি।
376.Pucchitoti ‘‘aññaṃ dūtaṃ nālatthu’’nti pucchito. Soti rājā. Tāsaṃ vandanā sace uttarakālaṃ, attano āgamanakāraṇaṃ kathessati.
৩৭৮. একাৰজ্জনেনাতি একৰীথিজৰনেন। তেন একচিত্তং তাৰ তিট্ঠতু, একচিত্তৰীথিযাপি সব্বং জানিতুং ন সক্কাতি দস্সেতি। ‘‘ইদং নাম অতীতং জানিস্সামী’’তি অনিযমেত্ৰা আৰজ্জতো যং কিঞ্চি অতীতং জানাতি, নিযমিতে পন নিযমিতমেৰাতি আহ – ‘‘একেন হি…পে॰… একদেসমেৰ জানাতী’’তি। তেন চিত্তেনাতি ‘‘অতীতং সব্বং জানিস্সামী’’তি এৰং পৰত্তচিত্তেন। ইতরেসূতি অনাগতপচ্চুপ্পন্নেসু। কারণজাতিকন্তি যুত্তিসভাৰং, যুত্তিযা যুত্তন্তি অত্থো। সম্পরাযগুণন্তি সম্পরাযে কতকম্মস্স ৰিসেসং।
378.Ekāvajjanenāti ekavīthijavanena. Tena ekacittaṃ tāva tiṭṭhatu, ekacittavīthiyāpi sabbaṃ jānituṃ na sakkāti dasseti. ‘‘Idaṃ nāma atītaṃ jānissāmī’’ti aniyametvā āvajjato yaṃ kiñci atītaṃ jānāti, niyamite pana niyamitamevāti āha – ‘‘ekena hi…pe… ekadesameva jānātī’’ti. Tena cittenāti ‘‘atītaṃ sabbaṃ jānissāmī’’ti evaṃ pavattacittena. Itaresūti anāgatapaccuppannesu. Kāraṇajātikanti yuttisabhāvaṃ, yuttiyā yuttanti attho. Samparāyaguṇanti samparāye katakammassa visesaṃ.
৩৭৯. লোকুত্তরমিস্সকানি কথিতানি বোধিরাজকুমারসুত্তে ৰিয লোকিযা চেৰ লোকুত্তরা চ। যথালাভৰসেন চেত্থ পধানিযঙ্গানং লোকুত্তরগ্গহণং ৰেদিতব্বং। পচ্চেকং এৰ নেসঞ্চ পধানিযঙ্গতা দট্ঠব্বা যথা ‘‘অট্ঠৰিমোক্খা সন্দিস্সন্তি লোকুত্তরমিস্সকা’’তি। লোকুত্তরানেৰাতি চেত্থ যং ৰত্তব্বং, তং পরতো আৰি ভৰিস্সতি। পধাননানত্তন্তি পদহননানত্তং, ভাৰনানুযোগৰিসেসন্তি অত্থো। সঙ্খারে পরিমদ্দিত্ৰা পটিপক্খধম্মে একদেসতো পজহিত্ৰা ঠিতস্স ভাৰনানুযোগো সব্বেন সব্বং অপরিমদ্দিতসঙ্খারস্স অপ্পহীনপটিপক্খস্স ভাৰনানুযোগতো সুখুমো ৰিসদোৰ হোতি, সচ্চাভিসমযেন সন্তানস্স আহিতৰিসেসত্তাতি আহ – ‘‘অঞ্ঞাদিসমেৰ হি পুথুজ্জনস্স পধানং, অঞ্ঞাদিসং সোতাপন্নস্সা’’তিআদি। অযঞ্চ ৰিসেসো ন কেৰলং অনরিযঅরিযপুগ্গলতো এৰ, অথ খো অরিযেসুপি সেক্খাদিৰিসেসতোপি লব্ভতি অভিসঙ্খারৰিসেসতো অভিনীহারতো চ ইজ্ঝনতোতি দস্সেন্তো ‘‘অঞ্ঞাদিসং সকদাগামিনো’’তিআদিমাহ। ন পাপুণাতীতি যস্মা পুথুজ্জনো সব্বথাৰ পধানং পদহন্তো সোতাপত্তিমগ্গং অধিগচ্ছতি, সোতাপন্নো চ সকদাগামিমগ্গন্তি হেট্ঠিমং উপরিমতো ওল়ারিকং, উপরিমঞ্চ ইতরতো সুখুমং তেন পহাতুং অসক্কুণেয্যস্স পজহনতো, ইতি অধিগন্তব্বৰিসেসেন চ অধিগমপটিপদায সণ্হসুখুমতা তিক্খৰিসদতা চ ৰিঞ্ঞাযতীতি আহ – ‘‘পুথুজ্জনস্স পধানং সোতাপন্নস্স পধানং ন পাপুণাতী’’তিআদি।
379.Lokuttaramissakāni kathitāni bodhirājakumārasutte viya lokiyā ceva lokuttarā ca. Yathālābhavasena cettha padhāniyaṅgānaṃ lokuttaraggahaṇaṃ veditabbaṃ. Paccekaṃ eva nesañca padhāniyaṅgatā daṭṭhabbā yathā ‘‘aṭṭhavimokkhā sandissanti lokuttaramissakā’’ti. Lokuttarānevāti cettha yaṃ vattabbaṃ, taṃ parato āvi bhavissati. Padhānanānattanti padahananānattaṃ, bhāvanānuyogavisesanti attho. Saṅkhāre parimadditvā paṭipakkhadhamme ekadesato pajahitvā ṭhitassa bhāvanānuyogo sabbena sabbaṃ aparimadditasaṅkhārassa appahīnapaṭipakkhassa bhāvanānuyogato sukhumo visadova hoti, saccābhisamayena santānassa āhitavisesattāti āha – ‘‘aññādisameva hi puthujjanassa padhānaṃ, aññādisaṃ sotāpannassā’’tiādi. Ayañca viseso na kevalaṃ anariyaariyapuggalato eva, atha kho ariyesupi sekkhādivisesatopi labbhati abhisaṅkhāravisesato abhinīhārato ca ijjhanatoti dassento ‘‘aññādisaṃ sakadāgāmino’’tiādimāha. Na pāpuṇātīti yasmā puthujjano sabbathāva padhānaṃ padahanto sotāpattimaggaṃ adhigacchati, sotāpanno ca sakadāgāmimagganti heṭṭhimaṃ uparimato oḷārikaṃ, uparimañca itarato sukhumaṃ tena pahātuṃ asakkuṇeyyassa pajahanato, iti adhigantabbavisesena ca adhigamapaṭipadāya saṇhasukhumatā tikkhavisadatā ca viññāyatīti āha – ‘‘puthujjanassa padhānaṃ sotāpannassa padhānaṃ na pāpuṇātī’’tiādi.
অকূটকরণন্তি অৰঞ্চনকিরিযং। অনৰচ্ছিন্দনন্তি অতিযানং। অৰিঞ্ছনং ন আকড্ঢনং, নিযুত্ততং ৰিনিৰেঠেত্ৰা সমন্তা ৰিপরিৰত্তিত্ৰা সমধারায ছড্ডনং ৰা। তস্স কারণং তংকারণং, তং কারণন্তি ৰা তং কিরিযং তং অধিকারং। দন্তেহি গন্তব্বভূমিন্তি দন্তেহি পত্তব্বট্ঠানং, পত্তব্বৰত্থুং ৰা। চত্তারোপি অস্সদ্ধা নাম উপরিমউপরিমসদ্ধায অভাৰতো। যেন হি যং অপ্পত্তং, তস্স তং নত্থি। অরিযসাৰকস্স…পে॰… নত্থি পঠমমগ্গেনেৰ মাযাসাঠেয্যানং পহাতব্বত্তা। তেনেৰাতি সম্মদেৰ ৰিরুদ্ধপক্খানং সদ্ধাদীনং ইধাধিপ্পেতত্তা। যদি এৰং কথং মিস্সককথাতি আহ ‘‘অস্সখল়ুঙ্কসুত্তন্তে পনা’’তিআদি। চত্তারোৰ হোন্তি পুথুজ্জনাদিৰসেন।
Akūṭakaraṇanti avañcanakiriyaṃ. Anavacchindananti atiyānaṃ. Aviñchanaṃ na ākaḍḍhanaṃ, niyuttataṃ viniveṭhetvā samantā viparivattitvā samadhārāya chaḍḍanaṃ vā. Tassa kāraṇaṃ taṃkāraṇaṃ, taṃ kāraṇanti vā taṃ kiriyaṃ taṃ adhikāraṃ. Dantehi gantabbabhūminti dantehi pattabbaṭṭhānaṃ, pattabbavatthuṃ vā. Cattāropi assaddhā nāma uparimauparimasaddhāya abhāvato. Yena hi yaṃ appattaṃ, tassa taṃ natthi. Ariyasāvakassa…pe… natthi paṭhamamaggeneva māyāsāṭheyyānaṃ pahātabbattā. Tenevāti sammadeva viruddhapakkhānaṃ saddhādīnaṃ idhādhippetattā. Yadi evaṃ kathaṃ missakakathāti āha ‘‘assakhaḷuṅkasuttante panā’’tiādi. Cattārova honti puthujjanādivasena.
ওপম্মসংসন্দনে অদন্তহত্থিআদযো ৰিযাতিআদিনা কণ্হপক্খে, যথা পন দন্তহত্থিআদযোতিআদিনা সুক্কপক্খে চ সাধারণতো একজ্ঝং কত্ৰা ৰুত্তং, অসাধারণতো ভিন্দিত্ৰা দস্সেতুং ‘‘ইদং ৰুত্তং হোতী’’তিআদি ৰুত্তং।
Opammasaṃsandane adantahatthiādayo viyātiādinā kaṇhapakkhe, yathā pana dantahatthiādayotiādinā sukkapakkhe ca sādhāraṇato ekajjhaṃ katvā vuttaṃ, asādhāraṇato bhinditvā dassetuṃ ‘‘idaṃ vuttaṃ hotī’’tiādi vuttaṃ.
৩৮০. সম্মপ্পধানা নিব্বিসিট্ঠৰীরিযা। তেনাহ – ‘‘ন কিঞ্চি নানাকরণং ৰদামি, যদিদং ৰিমুত্তিযা ৰিমুত্তি’’ন্তি। ন হি সুক্খৰিপস্সকতেৰিজ্জছল়ভিঞ্ঞানং ৰিমুত্তিযা নানাকরণং অত্থি। তেন ৰুত্তং ‘‘যং একস্সা’’তিআদি। কিং ত্ৰং ন জানাসীতি সম্বন্ধো। আগচ্ছন্তীতি উপ্পজ্জনৰসেন আগচ্ছন্তি। নাগচ্ছন্তীতি এত্থাপি এসেৰ নযো। ইদং পুচ্ছন্তোতি ইদং পুচ্ছামীতি দস্সেন্তো। অপ্পহীনচেতসিকদুক্খা অনধিগতঅনাগামিতা। তেনাহ ‘‘উপপত্তিৰসেন আগন্তারো’’তি। সমুচ্ছিন্নদুক্খাতি সমুগ্ঘাটিতচেতসিকদুক্খা।
380.Sammappadhānā nibbisiṭṭhavīriyā. Tenāha – ‘‘na kiñci nānākaraṇaṃ vadāmi, yadidaṃ vimuttiyā vimutti’’nti. Na hi sukkhavipassakatevijjachaḷabhiññānaṃ vimuttiyā nānākaraṇaṃ atthi. Tena vuttaṃ ‘‘yaṃ ekassā’’tiādi. Kiṃ tvaṃ na jānāsīti sambandho. Āgacchantīti uppajjanavasena āgacchanti. Nāgacchantīti etthāpi eseva nayo. Idaṃ pucchantoti idaṃ pucchāmīti dassento. Appahīnacetasikadukkhā anadhigataanāgāmitā. Tenāha ‘‘upapattivasena āgantāro’’ti. Samucchinnadukkhāti samugghāṭitacetasikadukkhā.
৩৮১. তম্হা ঠানাতি ততো যথাধিগতইস্সরিযট্ঠানতো। পুন তম্হা ঠানাতি ততো দুগ্গতা। সম্পন্নকামগুণন্তি উল়ারকামগুণসমন্নাগতং।
381.Tamhā ṭhānāti tato yathādhigataissariyaṭṭhānato. Puna tamhā ṭhānāti tato duggatā. Sampannakāmaguṇanti uḷārakāmaguṇasamannāgataṃ.
তত্থাতি কামদেৰলোকে। ঠানভাৰতোতি অরহত্তঞ্চে অধিগতং, তাৰদেৰ পরিনিব্বানতো। উপরিদেৰে চাতি উপরূপরি ভূমিৰাসে দেৰে চ, চক্খুৰিঞ্ঞাণদস্সনেনপি দস্সনায নপ্পহোন্তীতি যোজনা।
Tatthāti kāmadevaloke. Ṭhānabhāvatoti arahattañce adhigataṃ, tāvadeva parinibbānato. Uparidevecāti uparūpari bhūmivāse deve ca, cakkhuviññāṇadassanenapi dassanāya nappahontīti yojanā.
৩৮২. ৰুত্তনযেনেৰাতি দেৰপুচ্ছায ৰুত্তেনেৰ নযেন। সা কির কথাতি ‘‘নত্থি সো সমণো ৰা ব্রাহ্মণো ৰা, যো সকিদেৰ সব্বং নেয্য’’ন্তি কথা। তেতি ৰিটটূভসঞ্জযা। ইমস্মিংযেৰ ঠানেতি ইমস্মিং মিগদাযেযেৰ। সেসং সুৰিঞ্ঞেয্যমেৰ।
382.Vuttanayenevāti devapucchāya vutteneva nayena. Sā kira kathāti ‘‘natthi so samaṇo vā brāhmaṇo vā, yo sakideva sabbaṃ neyya’’nti kathā. Teti viṭaṭūbhasañjayā. Imasmiṃyeva ṭhāneti imasmiṃ migadāyeyeva. Sesaṃ suviññeyyameva.
কণ্ণকত্থলসুত্তৰণ্ণনায লীনত্থপ্পকাসনা সমত্তা।
Kaṇṇakatthalasuttavaṇṇanāya līnatthappakāsanā samattā.
নিট্ঠিতা চ রাজৰগ্গৰণ্ণনা।
Niṭṭhitā ca rājavaggavaṇṇanā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ১০. কণ্ণকত্থলসুত্তং • 10. Kaṇṇakatthalasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ১০. কণ্ণকত্থলসুত্তৰণ্ণনা • 10. Kaṇṇakatthalasuttavaṇṇanā
